Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "'fazl'"

Nazm MATCHES FOR "'fazl'"

Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Nazm

ramayan ka ek scene

ruKHsat hu.aa vo baap se le kar KHudaa kaa naam
raah-e-vafaa kii manzil-e-avval hu.ii tamaam
manzuur thaa jo maa.n kii ziyaarat kaa intizaam
daaman se ashk po.nchh ke dil se kiyaa kalaam
iz.haar-e-be-kasii se sitam hogaa aur bhii
dekhaa hame.n udaas to Gam hogaa aur bhii
dil ko sa.nbhaaltaa hu.aa aaKHir vo naunihaal
KHaamosh maa.n ke paas gayaa suurat-e-KHayaal
dekhaa to ek dar me.n hai baiThii vo KHasta-haal
saktaa saa ho gayaa hai ye hai shiddat-e-malaal
tan me.n lahuu kaa naam nahii.n zard rang hai
goyaa bashar nahii.n ko.ii tasviir-e-sa.ng hai
kyaa jaane kis KHayaal me.n gum thii vo be-gunaah
nuur-e-nazar ye diida-e-hasrat se kii nigaah
jumbish hu.ii labo.n ko bharii ek sard aah
lii gosha-ha-e-chashm se ashko.n ne ruKH kii raah
chehre kaa rang haalat-e-dil kholne lagaa
har muu-e-tan zabaa.n kii tarah bolne lagaa
aaKHir asiir-e-yaas kaa qufl-e-dahan khulaa
afsaana-e-shadaa.id-e-ra.nj-o-mehan khulaa
ik daftar-e-mazaalim-e-charKH-e-kuhan khulaa
vaa thaa dahaan-e-zaKHm ki baab-e-suKHan khulaa
dard-e-dil-e-Gariib jo sarf-e-bayaa.n hu.aa
KHuun-e-jigar kaa rang suKHan se 'ayaa.n hu.aa
ro kar kahaa KHamosh kha.De kyuu.n ho merii jaa.n
mai.n jaantii huu.n jis liye aa.e ho tum yahaa.n
sab kii KHushii yahii hai to sahraa ko ho ravaa.n
lekin mai.n apne mu.nh se na hargiz kahuu.ngii haa.n
kis tarah ban me.n aa.nkho.n ke taare ko bhej duu.n
jogii banaa ke raaj-dulaare ko bhej duu.n
duniyaa kaa ho gayaa hai ye kaisaa lahuu sapiid
andhaa kiye hu.e hai zar-o-maal kii umiid
anjaam kyaa ho ko.ii nahii.n jaantaa ye bhed
soche bashar to jism ho larzaa.n misaal-e-biid
likkhii hai kyaa hayaat-e-abad in ke vaaste
phailaa rahe hai.n jaal ye kis din ke vaaste
letii kisii faqiir ke ghar me.n agar janam
hote na merii jaan ko saamaan ye baham
Dastaa na saa.np ban ke mujhe shaukat-o-hasham
tum mere laal the mujhe kis saltanat se kam
mai.n KHush huu.n phuu.nk de ko.ii is taKHt-o-taaj ko
tum hii nahii.n to aag lagaa duu.ngii raaj ko
kin kin riyaazato.n se guzaare hai.n maah-o-saal
dekhii tumhaarii shakl jab ai mere naunihaal
puuraa hu.aa jo byaah kaa armaan thaa kamaal
aafat ye aa.ii mujh pe hu.e jab safed baal
chhaTtii huu.n un se jog liyaa jin ke vaaste
kyaa sab kiyaa thaa mai.n ne isii din ke vaaste
aise bhii naa-muraad bahut aa.e.nge nazar
ghar jin ke be-charaaG rahe aah 'umr bhar
rahtaa miraa bhii naKHl-e-tamannaa jo be-samar
ye jaa-e-sabr thii ki du'aa me.n nahii.n asar
lekin yahaa.n to ban ke muqaddar biga.D gayaa
phal phuul laa ke baaG-e-tamannaa uja.D gayaa
sarzad hu.e the mujh se KHudaa jaane kyaa gunaah
ma.njdhaar me.n jo yuu.n mirii kashtii hu.ii tabaah
aatii nazar nahii.n ko.ii amn-o-amaa.n kii raah
ab yaa.n se kuuch ho to 'adam me.n mile panaah
taqsiir merii KHaaliq-e-aalam bahal kare
aasaan mujh Gariib kii mushkil ajal kare
sun kar zabaa.n se maa.n kii ye fariyaad-e-dard-KHez
us KHasta-jaa.n ke dil pe chalii Gam kii teG-e-tez
'aalam ye thaa qariib ki aa.nkhe.n ho.n ashk-rez
lekin hazaar zabt se rone se kii gurez
sochaa yahii ki jaan se bekas guzar na jaa.e
naashaad ham ko dekh ke maa.n aur mar na jaa.e
phir arz kii ye maadar-e-naashaad ke huzuur
maayuus kyuu.n hai.n aap alam kaa hai kyuu.n vafuur
sadma ye shaaq 'aalam-e-piirii me.n hai zaruur
lekin na dil se kiijiye sabr-o-qaraar duur
shaayad KHizaa.n se shakl 'ayaa.n ho bahaar kii
kuchh maslahat isii me.n ho parvardigaar kii
ye jaa'l ye fareb ye saazish ye shor-o-shar
honaa jo hai sab us ke bahaane hai.n sar-ba-sar
asbaab-e-zaahirii me.n na in par karo nazar
kyaa jaane kyaa hai parda-e-qudrat me.n jalva-gar
KHaas us kii maslahat ko.ii pahchaantaa nahii.n
manzuur kyaa use hai ko.ii jaantaa nahii.n
raahat ho yaa ki ranj KHushii ho ki intishaar
vaajib har ek rang me.n hai shukr-e-kird-gaar
tum hii nahii.n ho kushta-e-naira.ng-e-rozgaar
maatam-kade me.n dahr ke laakho.n hai.n sogvaar
saKHtii sahii nahii.n ki uThaa.ii ka.Dii nahii.n
duniyaa me.n kyaa kisii pe musiibat pa.Dii nahii.n

Chakbast Braj Narayan
Nazm

rishwat

aap hai.n fazl-e-KHudaa-e-paak se kursii-nashii.n
intizaam-e-saltanat hai aap ke zer-e-nagii.n
aasmaa.n hai aap kaa KHaadim to lau.nDii hai zamii.n
aap KHud rishvat ke zimmedaar hai.n fidvii nahii.n

Josh Malihabadi
Nazm

inqalab

ye kah rahii hai ishaaro.n me.n gardish-e-garduu.n
ki jald ham ko.ii saKHt inqalaab dekhe.nge
nizaam-e-charKH me.n dekhe.nge ik taGayyur-e-KHaas
sukuun-e-dahr me.n ik iztiraab dekhe.nge
KHudaa ne chaahaa to ab jald hii vatan vaale
vatan me.n apnaa mission kaamyaab dekhe.nge
du.aa.e.n kii hai.n jo ahl-e-vatan ne ro ro kar
yaqii.n hai jald unhe.n mustajaab dekhe.nge
zamaana aane hii vaalaa hai jab ham ai zaalim
tujhe bhii KHvaar tujhe bhii KHaraab dekhe.nge
bahut hii jald tire sar pe bhii KHudaa kii qasam
KHudaa kaa qahr KHudaa kaa itaab dekhe.nge
tujhe bhii dekhe.nge majbuur-e-faaqa-o-aflaas
tujhe bhii qaid-e-Gam-o-iztiraab dekhe.nge
tujhe bhii apnii tarah jald hii ba-fazl-e-KHudaa
asiir-e-silsila-e-pech-o-tab dekhe.nge
tujhe bhii apnii tarah paa-e-band-e-naala-o-aah
yuu.n hii majaal-e-tbaah-o-KHaraab dekhe.nge
ravaa.n-davaa.n tujhe hindostaa.n se so.e adam
ba-qalb-e-zaar o ba-chashm-e-pur-aab dekhe.nge
ye dekhnaa hai jo kuchh ham ko us me.n der nahii.n
bahut hii jald bahut hii shitaab dekhe.nge

Ahmaq Phaphoondvi
Nazm

KHatun-e-mashriq

aurato.n kaa kaarvaa.n par kaarvaa.n aane lagaa
phir fazaa me.n parcham-e-in.aam lahraane lagaa

Josh Malihabadi
Nazm

saman diwali ka

siraf haraam kii kau.Dii kaa jin kaa hai bevpaar
unho.n ne khaayaa hai is din ke vaaste hai udhaar
kahe hai ha.ns ke qaraz-KHvaah se har ik ik baar
divaalii aa.ii hai sab de dilaa.e.nge ai yaar
KHudaa ke fazl se hai aasraa divaalii kaa

Nazeer Akbarabadi
Nazm

aligarh

KHudaa ke fazl se ahl-e-hunar hai.n ahl-e-fan sab hai.n
magar De.Dh ii.nT kii masjid banaane me.n magan sab hai.n

Syeda Farhat
Nazm

ganw ki saDak

KHushaa ki aaj ba-fazl-e-KHudaa vo din aayaa
ki dast-e-Gaib ne is ghar kii dar-kushaa.ii kii

Faiz Ahmad Faiz
Nazm

ye basti meri basti hai

hamaare us mohalle me.n
KHudaa ke fazl se har samt Dhero.n Dher bachche the
kabhii aisaa bhii hotaa thaa ki sab usmaan baabaa par
achaanak saath hii yalGaar karte the
magar phir bhii baraabar se
na jaane kis tarah ham sab me.n vo jangal jalebii baa.nT detaa thaa

Ishrat Afreen
Nazm

eid ki KHaridari

musalmaa.n qarz le kar eid kaa saamaa.n KHariide.nge
jo daanaa hai.n vo beche.nge jo hai.n naadaa.n KHariide.nge
jo sayyaa.n shauq se khaa.e.n vo sivayyaa.n KHariide.nge
murkkab suud kaa saudaa ba-naqd-e-jaa.n KHariide.nge
musalmaano.n ke sar par jab mah-e-shavvaal aataa hai
to un kii iqtisaadiyaat me.n bhau.nchaal aataa hai
baham dast-o-garebaa.n sales-man aur un ke gaahak hai.n
vo Gul barpaa hai jaise naGma-zan chauha.D me.n me.nDak hai.n
mizaajan roza-daar-e-shaam baaruud aur gandhak hai.n
aur un me.n nazm aur zabt aur ravaa-daarii yahaa.n tak hai.n
ki shiddat bhuuk kii aur pyaas kii aise miTaate hai.n
ba-zo.am-e-roza abnaa-e-vatan ko kaaT khaate hai.n
jo mujh aise hai.n ri.nd un ko bhii zo.am-e-paarsaa.ii hai
aur is mazmuun kii ik daavat-e-iftaar aa.ii hai
ki ik chaaliis-saala tifl kii roza-kushaa.ii hai
farishte is pe hairaa.n dam-ba-KHud saarii KHudaa.ii hai
KHudaavand-e-do-aalam se vo ye bevpaar karte hai.n
jo rakkhaa hii nahii.n roza use iftaar karte hai.n
miyaa.n biivii chale baazaar ko bahr-e-KHariidaarii
miThaa.ii phal sivayyaa.n itr juute gosht tarkaarii
jo shai biivii ne lii vo dosh par shauhar ke de maarii
vo be-chaara to KHachchar hai baraa.e baar-bardaarii
ba-zor-e-qarz duukaano.n pe itnaa fazl-e-baarii hai
ki is ghamsaan me.n insaan par insaan taarii hai
liyaa biivii ne shauhar ke liye juutaa jo arzaa.n hai
vo amriikii madad kii tarah us ke sar pe ehsaa.n hai
ki is se faa.eda pahu.nchegaa us ko jis kii duukaa.n hai
aur us shauhar kaa juutaa KHud usii ke sar pe raqsaa.n hai
ye suurat dekh kar kahte hai.n akasr dil me.n bin-byaahe
''dil o dii.n naqd laa saaqii se gar saudaa kiyaa chaahe''
jo silne ko diye kap.De vo hai.n sab habs-e-bejaa me.n
ki darzii chhup gayaa jab atlas-o-kamKHvaab-o-diibaa me.n
to readymade kap.Do.n kii dukaane.n jhaa.nktaa thaa mai.n
falak par qiimate.n laTkii hu.ii thii.n shaaKH-e-tuubaa me.n
mubaarak maah ke andar hamii.n se naf.a-KHorii hai
nahii.n hotaa hai baatil jis se roza ye vo chorii hai
ye sivayyaa.n jo bal khaatii hu.ii me.ade me.n jaa.e.ngii
siyaasii guththiyo.n ko aur uljhaanaa sikhaa.e.ngii
hamaarii aane vaalii nasl ke leader banaa.e.ngii
jo leader ban chuke hai.n ebdo un ko karaa.e.ngii
''qad o gesuu me.n qais-o-kohkan kii aazmaa.ish hai
jahaa.n ham hai.n vahaa.n daar-o-rasan kii aazmaa.ish hai''
mahiine bhar ke rozo.n baa'd haq ne din ye dikhlaayaa
alal-ailaan khaayaa dosto.n ke saath jo paayaa
ye pahle Dar thaa ham ko jhaa.nk kar dekhe na ham-saaya
ba-juz KHauf-e-KHudaa din me.n ba-zaahir kuchh na thaa khaayaa
hasiino.n mah-vasho.n ko ab sar-e-baazaar dekhe.nge
ga.e vo din ki kahte the pas-az-iftaar dekhe.nge

Syed Mohammad Jafri
Nazm

tarana-e-qaumi

kyuu.n na kahiye tujh ko ik sarchashma-e-aab-e-baqaa
hai.n ye aasaar-e-qadiima tere ganj-e-be-bahaa
roz o shab naira.ngiyaa.n terii hai.n kyaa kyaa jaa.n-fazaa
kis qadar hai ruuh-parvar ye tirii aab-o-havaa
gardish-e-ayyaam se go mai.n phiruu.n nazdiik o duur
har jagah yaad-e-vatan hai maaya-e-aish-o-suruur

Safeer Kakorvi
Nazm

agar KHuda mil gaya mujhko

ye sochtaa huu.n jo
KHudaa kabhii diidaar baKHshegaa
aur apne fazl se degaa ijaazat maa.ngne kii kuchh
to na dastaar-o-qabaa na jibh-o-KHirqa
na daulat na mahal na sar pe taaj maa.nguu.ngaa
na ohda-o-mansab na ko.ii jaah-o-jalaal
na ilm-o-aagahii na masnad na eqtidaar maa.nguu.ngaa
faraavaanii Gam se najaat na faariG-ul-baalii
na sehat na shifaa na achchhii maut maa.nguu.ngaa
na takmiil-e-aarzuu kii du.aa na nafs-e-mutma.inna kii
na umr-e-KHizr na shohrat na KHvaab kii ta.abiir maa.nguu.ngaa
na dushmano.n ke zarar se na shar se dosto.n ke
na kibr-sinii na zo.af na laachaarii se panaah maa.nguu.ngaa
na duniyaa jahaan kii KHushiyaa.n na shaan-o-shaukat hii
na KHush-nasiibii na dil kaa chain na sukuun-e-ruuh maa.nguu.ngaa
na KHush-gavaar raate.n na tuul-e-shabaab na nii.nd na aaGosh-e-mahbuub
na saamaan-e-aish-o-tarab na huur-o-qusuur maa.nguu.ngaa
na rusvaa.ii se bachne kii na izzat aabruu kii KHvaahish hai
na shohrat-o-maqbuuliyat na achchhii image maa.nguu.ngaa
na qarz ke bojh na KHauf na dahshat se
na kisii ke jabr se na zulm se hifaazat kii du.aa maa.nguu.ngaa
ab aap sochte ho.nge
ki ye baavlaa ye diivaana ye paagal shaKHs
na jaane aaKHir KHudaa se kyaa maa.ngegaa
so mire hamdam mire dosto mire yaaro
zaraa qariib aa.o aa.o bataa.uu.n raaz tumhe.n dukhii dil kaa
mai.n KHudaa-e-qaadir-e-mutlaq rahiim-o-akram se
junuun-e-mazhabii ke KHaatme aur amn kii fazaa maa.nguu.ngaa

Abu Bakr Abbad
Nazm

ittihadi

janaab-e-hazrat-e-abbaas kii qasam 'nashtar'
KHudaa ke fazl se ham zabt ke bhii aadii hai.n

Nashtar Amrohvi
Nazm

mushaera

mushaa.ere me.n jo shaa.er bulaa.e jaate hai.n
ba.De saliiqe se buudam banaa.e jaate hai.n
vasuul hote hai.n pahle ye naama-o-paiGaam
ki ai shahanshah-e-aqliim-e-'haafiz'-o-'KHayyaam'
hamaarii bazm-e-adab kaa hai jashn-e-saalaana
jalii hai sham-e-suKHan raqs me.n hai parvaana
ghaTaa jo shero.n kii chaaro.n taraf se aa.ii hai
vo film ke bhii sitaare sameT laa.ii hai
guzishta saal sunaa jis ne aap ko ye kahaa
na sho.ale me.n ye karishma, na barq me.n adaa
aur ab ke saal bhii KHud dekh le.nge ye sarkaar
ki guu.njte hai.n aqiidat se kuucha-o-baazaar
ravaana kar de.n kiraa.e kii gar zaruurat hai
''vo aa.e.n ghar me.n hamaare KHudaa kii qudrat hai''
hamaare shahr me.n urdu adab kaa da.nggal hai
ye shahar sher kaa aur shaa.ero.n kaa jangal hai
ab is pe shaa.er-e-shiirii.n-navaa ko hai ye gumaa.n
ki mere sho.ale se raushan hu.ii hai sham.a-e-bayaa.n
idhar se muntazim ik soch aur bichaar me.n hai
use KHabar hai ki shaa.er kis intizaar me.n hai
bulaane ke liye israar bhii vo kartaa hai
kiraaya le ki na phir aa.e is se Dartaa hai
banaa ke likhtaa hai daavat kaa is tarah maktuub
mushaa.ere me.n diyaa jaa.egaa jo hai matluub
Garaz bulaate hai.n vo shaa.ero.n ko hiile se
payaam aate hai.n ahbaab ke vasiile se
jo sher sun.ne ko apne gharo.n se aate hai.n
vo sab baTer la.Daane kaa lutf uThaate hai.n
vo jaante hai.n ki shaa.er hai ek murG-e-ajiib
agar galaa hai to shaa.er, nahii.n galaa to adiib
ye sochtaa hai chalo qismat aazmaa dekhe.n
suluuk hotaa hai auro.n ke saath kyaa dekhe.n
bahut se aur bhii shaa.er vahaa.n par aa.e.nge
chalo ki marg-e-raqiibaa.n kaa lutf uThaa.e.nge
hai.n kuchh pale hu.e shaa.er kuchh in me.n KHud-rav hai.n
puraane ghaag hai.n kuchh in me.n shaa.er-e-nau hai.n
vo diidanii hai agar ho kuchh in me.n ha.ngaama
ki is akhaa.De kaa har pahlvaa.n hai allaama
sataate rahte hai.n shaa.er ko aise andeshe
yahaa.n talak ki nikal aa.e.n rishte aur reshe
ta.alluqaat se aaKHir ko ho ke vo majbuur
mushaa.ere ko chalaa jaise kaam par mazduur
kisii se qarz liyaa aur kisii kii minnat kii
Garaz ki shaa.er-e-aatish-navaa ne rahlat kii
pha.nsaa hai is liye phande me.n shaa.er-e-saada
ki muntazim bhii the hushiyaar ye bhii aamaada
vo aa gayaa hai uThaa kar hazaar dushvaarii
chale jilau me.n use le ke us ke darbaarii
kisii ke haath me.n paan aur kisii ke haath me.n haar
har ik ye kahtaa hai zahmat bahut hu.ii sarkaar
mushaa.ere me.n qadam-ranja aap farmaa.e.n
to ahl-e-zauq nashisto.n me.n aa ke bhar jaa.e.n
ta.Dap rahe the jo sun.ne ke vaaste ash.aar
mushaa.ere ke liye un ke paas hai.n darkaar
ticket KHariid ke jo ahl-e-zauq aa.e hai.n
vo aaKHirii safo.n me.n KHud-baKHud samaa.e hai.n
moazzeziin jo zauq-e-adab se KHaalii hai.n
reserve un ke liye aglii saf karaa lii hai.n
ye is liye ki nazar me.n vo aap kii bhii rahe.n
jo sher vo na samajh paa.e.n aap vo na pa.Dhe.n
mushaa.ere me.n KHvaatiin buntii hai.n sweater
sambhal ke baiThe hai.n shaa.er kii taak me.n hooter
pa.Dhaa mushaa.era shaa.er ne ehtimaam ke saath
Gazal sunaa.ii tarannum kii dhuum-dhaam ke saath
kisii ne vaah kahaa aur kisii ne huuT kiyaa
mushaa.ere ko ye samjhaa ki mai.n ne luuT liyaa
isii pe phuulaa hu.aa hai vaah-vaah hu.ii
tamaam raat kaTii nii.nd bhii tabaah hu.ii
ye mahfil aa hii ga.ii roz-o-shab kii sarhad par
janaab-e-sadr bhii ab so chuke hai.n masnad par
jo saama.iin hai.n un par bhii nii.nd taarii hai
savaarii us ko milii jis pe fazl-e-baarii hai
jo muntazim the sitaaro.n ke saath Duub ga.e
ga.e vo shaa.ero.n se chhup ke aur KHuub ga.e
numuud-e-sub.h se jab muntashir hu.ii mahfil
akelaa rah gayaa shaa.er Gariib-e-shahr o KHajil
mushaa.era ba-juz andaaz-e-haav-huu kyaa hai
''tumhaare shahar me.n 'Gaalib' kii aabruu kyaa hai''

Syed Mohammad Jafri
Nazm

iqbaal ek kitab

dosto a.ngrez ne iqbaal ko
denaa chaahaa jis gha.Dii sir kaa KHitaab
shaa.ir-e-mashriq ne un se yuu.n kahaa
mai.n use aise nahii.n luu.ngaa janaab
hai.n mere ustaad ilm-o-fazl me.n
be-misaal-o-be-naziir-o-laa-javaab
pahle ye e.azaaz un ko diijiye
shauq se phir us ko mai.n luu.ngaa janaab
bolaa yuu.n a.ngrez ki likkhii nahii.n
aap ke ustaad ne ko.ii kitaab
saahab-e-tasniif jab tak vo na ho.n
de nahii.n sakte unhe.n sir kaa KHitaab
bole iqbaal aap ne dekhii hai kyaa
mujh se ba.Dh kar bhii kahii.n ko.ii kitaab
maanii aaKHir shaa.ir-e-mashriq kii baat
rah gayaa a.ngrez ho ke laa-javaab

Mateen Achalpuri
Nazm

qawwali

sabaq bas khelne khaane kaa jis ko yaad hotaa hai
ba.Daa ho kar vo la.Dkaa ek din ustaad hotaa hai
na aa.e master jis din pa.Dhaane mere darje me.n
zaraa sii der ko us din meraa dil shaad hotaa hai
jo maulaa-baKHsh se vo piiTte hai.n mujh ko maktab me.n
ko.ii samjhaa.e un ko vaqt bhii barbaad hotaa hai
banaayaa jaataa huu.n murGaa mai.n jis din apne maktab me.n
to us din dard se ye dil bahut naashaad hotaa hai
samajh me.n kuchh nahii.n aataa ki maqsad kyaa hai pa.Dhne kaa
maza bhii kuchh nahii.n hai vaqt bhii barbaad hotaa hai
KHudaa ke fazl se jis din buKHaar aataa hai teacher ko
to us din apnaa maktab bhii bahut aabaad hotaa hai
jo halva rakh ke almaarii me.n aapii band kartii hai.n
khilaatii hai.n na khaatii hai.n pa.Daa barbaad hotaa hai
agar ho.n mehrbaa.n teacher to tum dekhoge ai 'nuurii'
sabaq jis ko nahii.n ho yaad vo bhii shaad hotaa hai

Mushtaq Ahmad Noori
Nazm

jamuna-ji

naaz kyuu.n ho na tujhe kirshn dulaarii jamunaa
tuu to raadhaa kii sahelii banii pyaarii jamunaa
rutba aalii hai tiraa martaba bhaarii jamunaa
har jagah faiz-e-atam rahtaa hai jaarii jamunaa
hai yaqii.n garm kisii din bharii mahfil hogii
raas-manDal kii vo liilaa lab-e-saahil hogii
miT gayaa lutf tiraa chhin gayaa gahnaa teraa
jab kanhayyaa nahii.n be-lutf hai rahnaa teraa
Gam uThaanaa sitam-o-jaur ko sahnaa teraa
paanii ho ho ke shab-o-roz ye bahnaa teraa
aatish-e-hijr kuchh is darja lagii hai tan me.n
dil na mathuraa me.n bahaltaa hai na bindraaban me.n
baat big.Dii nahii.n ab bhii hai vahii baat tirii
vahii jaa.Daa vahii garmii vahii barsaat tirii
din usii Dha.ng usii rang kii hai raat tirii
kaun kah saktaa hai kuchh bhii nahii.n auqaat tirii
kirshn sadqe hai.n to raadhaa hai.n fidaa.ii jamunaa
har taraf KHalq me.n hai terii dahaa.ii jamunaa
saadii saadii hai ravish vaz.a hai bholii-bhaalii
hai ravaanii bhii Gazab chaal bhii hai matvaalii
niilii maujo.n se pashemaa.n hu.ii.n zulfe.n kaalii
husn-o-aaraa.ish-o-ziinat se ba.Dhii KHush-haalii
allaah-allaah re is naaz-o-adaa kii hastii
tere aage nahii.n kuchh aab-e-baqaa kii hastii
puuchhe raadhaa se ko.ii qadr-e-haqiiqat terii
kirshn se jaa.nche ko.ii KHuubii-e-izzat terii
saarii duniyaa me.n hai phailii hu.ii azmat terii
us ko jannat milii kii jis ne bhii KHidmat terii
apnaa ham-rutba jo paayaa tujhe ga.ngaa-jii ne
apne pahluu me.n biThaayaa tujhe ga.ngaa-jii ne
baa.is naaz hai be-shubah himaala ke liye
sabab-e-faKHr-o-sharf gokul-o-mathuraa ke liye
KHaas ik nemat-e-haq vaadii-o-sahraa ke liye
muKHtasar ye hai ba.Dii chiiz hai duniyaa ke liye
dil kii sar-basta kalii fart-e-KHushii se khul jaa.e
us ko amrit mile jis ko tiraa paanii mil jaa.e
sach hai asraar-e-haqiiqat kaa KHazaana tuu hai
haal-o-mustaqbil-o-maazii kaa zamaana tuu hai
lutf-aagii.n tarab-aamez fasaana tuu hai
sab hai.n begaane agar hai to yagaana tuu hai
saaf aa.iine kii suurat hai safaa.ii terii
bandagii kyuu.n na kare saarii KHudaa.ii terii
nigah-e-fazl-o-tarahhum se ishaaraa kar de
jo na ho kaam kisii se vo KHudaaraa kar de
ranj-o-Gam dard-o-qalaq duur hamaaraa kar de
pyaarii maKHluuq me.n kuchh aur bhii pyaaraa kar de
rahnumaa.ii tirii 'bismil' ke liye sab kuchh hai
naa-KHudaa.ii tirii 'bismil' ke liye sab kuchh hai

Bismil Allahabadi
Nazm

kawwa aur koyal

kisii kavve ne ik koyal se puuchaa
bataa bahnaa ki hai ye maajraa kyaa
Gazab hai ye ki ham dono.n hai.n kaale
KHudaa ke fazl se hai.n aql vaale
magar duniyaa kare kyuu.n pyaar tujh se
rahe.n chhoTe ba.De bezaar mujh se
tiraa hii naam hai sab kii zabaa.n par
tiraa jaaduu to hai saare jahaa.n par
jo shaa.er hai.n likhe.n teraa taraana
bataa teraa hai kyuu.n aashiq zamaana
rahaa kartii hai tuu bachcho.n ke dil me.n
magar ik mai.n ki chuhaa jaise bil me.n
jahaa.n jaa kar karuu.n mai.n kaa.e.n kaa.e.n
vahaa.n se maar kar mujh ko bhagaa.e.n
nazar me.n tiir aur talvaar ban kar
khaTaktaa huu.n dilo.n me.n KHaar ban kar
jise dekho use mujh se hai vahshat
sabhii ko naam se mere hai nafrat
kahaa koyal ne kavve se ki bhaa.ii
na kyuu.n terii samajh me.n baat aa.ii
jise aatii na ho shiirii.n-bayaanii
kare kyaa vo dilo.n par hukmaraanii
hai.n sab us ke jo miiThe bol bole
jo lab khol to ras kaano.n me.n ghole
kahaa.n mai.n bolne me.n chuuktii huu.n
magar jab boltii huu.n kuuktii huu.n
mirii aavaaz me.n phuulo.n kii narmii
tirii aavaaz me.n sho.alo.n kii garmii
zabaa.n se mai.n banii aa.ankho.n kaa taaraa
magar terii zabaa.n ne tujh ko maaraa
tuu jis din siikh legaa KHush-kalaamii
milegii har jagah tujh ko salaamii

Zafar Kamali
Nazm

qaid se najat

baare aa.ii najaat kii baarii
khul gayaa uqda-e-giraftaarii
ham ko mansab milaa rihaa.ii kaa
qaid ko jaa.edaad-e-bekaarii
paa.nv ko chho.D bhaage maar-e-do-sar
sar ko pushtaara-e-giraa.nbaarii
kuuch Thahraa maqaam-e-Gurbat se
ab vatan chalne kii hai tayyaarii
ruKHsat ai dostaan-e-zindaanii
alvidaa ai Gam-e-giraftaarii
arrahiil ai mashaqqat-e-har-zor
al-firaaq ai hujuum-e-naa-chaarii
daal fe ain ai kitaabat-e-qaid
gaaf miim ai hisaab-e-sarkaarii
daal chaaval se kah do ruKHsat ho.n
paanii me.n Duube ye namak khaarii
machhliyo.n se kaho ki haT ke sa.De.n
ghaas khode yahaa.n kii tarkaarii
chiinii barhamaa malaa.ii madraasii
ahl-e-aashaam ja.ngalii taataarii
apne diidaar se maaf kare.n
apnii baato.n se de.n subuk-saarii
kaale paanii se hote hai.n ruKHsat
ashk-e-shaadii hai.n aa.nkho.n se jaarii
baiThte hai.n jahaaz duurii par
uThte hai.n la.ngar-e-giraa.nbaarii
karam ai KHizr al-madad ai nuuh
rahm ai fazl-e-hazrat-e-baarii
assalaam ai KHarosh-e-bahr-e-muhiit
assafar ai safiina-e-jaarii
zaad-e-raah-e-safar tavakkul hai
rahnumaa.ii ko us kii Gaffaarii
hai iraada ki fikr-e-sher kare.n
taaki ho duur ra.nj-e-bekaarii
bas-ki barso.n rahaa huu.n zindaa.n me.n
bhuulii qasr-e-suKHan kii memaarii

Muneer Shikohabadi
Nazm

zanjir-e-ghulami

hamaaraa mulk hai is kii hukuumat haq hamaaraa hai
bataa.o to yahaa.n par kaun saa hissa tumhaaraa hai
ki aazaadii kii KHaatir ham ko har iizaa gavaaraa hai
KHudaa ke fazl se rif.at pe qismat kaa sitaaraa hai
ham apnaa mulk apnaa taKHt apnaa taaj le le.nge
kahe dete hai.n ham is saal me.n svaaraaj le le.nge

Zahida Khatoon Zahida
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now