Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ".keht"

Nazm MATCHES FOR ".keht"

Nazm

parchhaiyan

tum aaj hazaaro.n miil yahaa.n se duur kahii.n tanhaa.ii me.n
yaa bazm-e-tarab-aaraa.ii me.n
mere sapne buntii ho.ngii baiThii aaGosh paraa.ii me.n
aur mai.n siine me.n Gam le kar din-raat mashaqqat kartaa huu.n
jiine kii KHaatir martaa huu.n
apne fan ko rusvaa kar ke aGyaar kaa daaman bhartaa huu.n
majbuur huu.n mai.n majbuur ho tum majbuur ye duniyaa saarii hai
tan kaa dukh man par bhaarii hai
is daur me.n jiine kii qiimat yaa daar-o-rasan yaa KHvaarii hai
mai.n daar-o-rasan tak jaa na sakaa tum jehd kii had tak aa na sakii.n
chaahaa to magar apnaa na sakii.n
ham to do aisii ruuhe.n hai.n jo manzil-e-taskii.n paa na sake.n
jiine ko jiye jaate hai.n magar saa.nso.n me.n chitaae.n jaltii hai.n
KHaamosh vafaa.e.n jaltii hai.n
sangiin haqaa.iq-zaaro.n me.n KHvaabo.n kii ridaa.e.n jaltii hai.n
aur aaj jab in pe.Do.n ke tale phir do saa.e lahraa.e hai.n
phir do dil milne aa.e hai.n
phir maut kii aa.ndhii uTThii hai phir ja.ng ke baadal chhaa.e hai.n
mai.n soch rahaa huu.n in kaa bhii apnii hii tarah anjaam na ho
in kaa bhii junuu.n naakaam na ho
in ke bhii muqaddar me.n likhii ik KHuun me.n lith.Dii shaam na ho
suuraj ke lahuu me.n lith.Dii hu.ii vo shaam hai ab tak yaad mujhe
chaahat ke sunahre KHvaabo.n kaa anjaam hai ab tak yaad mujhe
hamaaraa pyaar havaadis kii taab laa na sakaa
magar unhe.n to muraado.n kii raat mil jaa.e
hame.n to kashmakash-e-marg-e-be-amaa.n hii milii
unhe.n to jhuumtii gaatii hayaat mil jaa.e
bahut dino.n se hai ye mashGala siyaasat kaa
ki jab javaan ho.n bachche to qatl ho jaa.e.n
bahut dino.n se ye hai KHabt hukmaraano.n kaa
ki duur duur ke mulko.n me.n qaht bo jaa.e.n
bahut dino.n se javaanii ke KHvaab viiraa.n hai.n
bahut dino.n se sitam-diida shaah-raaho.n me.n
nigaar-e-ziist kii ismat panaah Dhuu.nDhtii hai
chalo ki aaj sabhii paa.emaal ruuho.n se
kahe.n ki apne har ik zaKHm ko zabaa.n kar le.n
hamaaraa raaz hamaaraa nahii.n sabhii kaa hai
chalo ki saare zamaane ko raaz-daa.n kar le.n
chalo ki chal ke siyaasii muqaamiro.n se kahe.n
ki ham ko jang-o-jadal ke chalan se nafrat hai
jise lahuu ke sivaa ko.ii rang raas na aa.e
hame.n hayaat ke us pairahan se nafrat hai
kaho ki ab ko.ii qaatil agar idhar aayaa
to har qadam pe zamii.n tang hotii jaa.egii
har ek mauj-e-havaa ruKH badal ke jhapTegii
har ek shaaKH rag-e-sa.ng hotii jaa.egii
uTho ki aaj har ik jang-juu se ye kah de.n
ki ham ko kaam kii KHaatir kalo.n kii haajat hai
hame.n kisii kii zamii.n chhiin.ne kaa shauq nahii.n
hame.n to apnii zamii.n par halo.n kii haajat hai
kaho ki ab ko.ii taajir idhar kaa ruKH na kare
ab is jagah ko.ii ku.nvaarii na bechii jaa.egii
ye khet jaag pa.De uTh kha.Dii hu.ii.n fasle.n
ab is jagah ko.ii kyaarii na bechii jaa.egii
ye sar-zamiin hai gautam kii aur naanak kii
is arz-e-paak pe vahshii na chal sake.nge kabhii
hamaaraa KHuun amaanat hai nasl-e-nau ke liye
hamaare KHuun pe lashkar na pal sake.nge kabhii
kaho ki aaj bhii ham sab agar KHamosh rahe
to is damakte hu.e KHaak-daa.n kii KHair nahii.n
junuu.n kii Dhaalii hu.ii atomii balaa.o.n se
zamii.n kii KHair nahii.n aasmaa.n kii KHair nahii.n
guzishta jang me.n ghar hii jale magar is baar
ajab nahii.n ki ye tanhaa.iyaa.n bhii jal jaa.e.n
guzishta ja.ng me.n paikar jale magar is baar
ajab nahii.n ki ye parchhaa.iyaa.n bhii jal jaa.e.n
tasavvuraat kii parchhaa.iyaa.n ubhartii hai.n

Sahir Ludhianvi
Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

sochne do

ik zaraa sochne do
is KHayaabaa.n me.n
jo is lahza bayaabaa.n bhii nahii.n
kaun sii shaaKH me.n phuul aa.e the sab se pahle
kaun be-ra.ng hu.ii ra.nj-o-ta.ab se pahle
aur ab se pahle
kis gha.Dii kaun se mausam me.n yahaa.n
KHuun kaa qaht pa.Daa
gul kii shah-rag pe ka.Daa
vaqt pa.Daa
sochne do
sochne do
ik zaraa sochne do
ye bharaa shahr jo ab vaadi-e-viiraa.n bhii nahii.n
is me.n kis vaqt kahaa.n
aag lagii thii pahle
is ke saf-basta dariicho.n me.n se kis me.n avval
zah hu.ii surKH shu.aa.o.n kii kamaa.n
kis jagah jot jagii thii pahle
sochne do
ham se us des kaa tum naam o nishaa.n puuchhte ho
jis kii taariiKH na juGraafiya ab yaad aa.e
aur yaad aa.e to mahbuub-e-guzishta yaad aa.e
ruu-ba-ruu aane se jii ghabraa.e
haa.n magar jaise ko.ii
aise mahbuub yaa mahbuuba kaa dil rakhne ko
aa nikaltaa hai kabhii raat bitaane ke liye
ham ab us umr ko aa pahu.nche hai.n jab ham bhii yuu.nhii
dil se mil aate hai.n bas rasm nibhaane ke liye
dil kii kyaa puuchhte ho
sochne do

Faiz Ahmad Faiz
Nazm

shahr-nama

magar aise aise Ganii bhii the
isii qaht-zaar-e-damishq me.n
jinhe.n kuu-e-yaar 'aziiz thaa
jo kha.De the maqtal-e-ishq me.n

Ahmad Faraz
Nazm

hubb-e-watan

ham bhii hubb-e-vatan me.n hai.n go Garq
ham me.n aur un me.n hai magar ye farq
ham hai.n naam-e-vatan ke diivaane
vo the ahl-e-vatan ke parvaane
jis ne yuusuf kii daastaa.n hai sunii
jaantaa hogaa ruu.edaad us kii
misr me.n qaht jab pa.Daa aa kar
aur hu.ii qaum bhuuk se muztar
kar diyaa vaqf un pe baitulmaal
lab tak aane diyaa na harf-e-savaal
khatiyaa.n aur koThe khol diye
muft saare zaKHiire tol diye
qaafile KHaalii haath aate the
aur bharpuur yaa.n se jaate the
yuu.n ga.e qaht ke vo saal guzar
jaise bachcho.n kii bhuuk vaqt-e-sahar

Altaf Hussain Hali
Nazm

bas yunhi jite raho

bas yuu.nhii jiite raho
kuchh na kaho
sub.h jab so ke uTho
ghar ke afraad kii gintii kar lo
Taa.ng par Taa.ng rakhe roz kaa aKHbaar pa.Dho
us jagah qaht giraa
ja.ng vahaa.n par barsii
kitne mahfuuz ho tum shukr karo
radio khol ke filmo.n ke na.e giit suno
ghar se jab niklo to
shaam tak ke liye ho.nTo.n me.n tabassum sii lo
dono.n haatho.n me.n musaafe bhar lo
mu.nh me.n kuchh khokhle be-ma.anii se jumle rakh lo
muKHtalif haatho.n me.n sikko.n kii tarah ghiste raho
kuchh na kaho
ujlii poshaak
samaajii izzat
aur kyaa chaahiye jiine ke liye
rose mil jaatii hai piine ke liye
bas yuu.nhii jiite raho
kuchh na kaho

Nida Fazli
Nazm

dildar dekhna

tuufaa.n ba-dil hai har ko.ii dildaar dekhnaa
gul ho na jaa.e mish.al-e-ruKHsaar dekhnaa
aatish ba-jaa.n hai har ko.ii sarkaar dekhnaa
lau de uThe na turra-e-tarraar dekhnaa
jazb-e-musaafiraan-e-rah-e-yaar dekhnaa
sar dekhnaa, na sa.ng, na diivaar dekhnaa
kuu-e-jafaa me.n qaht-e-KHariidaar dekhnaa
ham aa ga.e to garmi-e-baazaar dekhnaa
us dil-navaaz shahr ke atvaar dekhnaa
be iltifaat bolnaa, bezaar dekhnaa
KHaalii hai.n garche masnad o mimbar, niguu.n hai KHalq
ro.ab-e-qabaa o haibat-e-dastaar dekhnaa
jab tak nasiib thaa tiraa diidaar dekhnaa
jis samt dekhnaa, gul-o-gulzaar dekhnaa
phir ham tamiiz-e-roz-o-mah-o-saal kar sake.n
ai yaad-e-yaar phir idhar ik baar dekhnaa

Faiz Ahmad Faiz
Nazm

panw se lahu ko dho Dalo

ham kyaa karte kis rah chalte
har raah me.n kaa.nTe bikhre the
in rishto.n ke jo chhuuT ga.e
in sadiyo.n ke yaarano.n ke
jo ik ik kar ke TuuT ga.e
jis raah chale jis samt ga.e
yuu.n paa.nv lahuuluhaan hu.e
sab dekhne vaale kahte the
ye kaisii riit rachaa.ii hai
ye meh.ndii kyuu.n lagaa.ii hai
vo kahte the kyuu.n qaht-e-vafaa
kaa naahaq charchaa karte ho
paa.nv se lahuu ko dho Daalo!
ye raahe.n jab aT jaa.e.ngii
sau raste in se phuuTe.nge
tum dil ko sambhaalo jis me.n abhii
sau tarah ke nashtar TuuTe.nge

Faiz Ahmad Faiz
Nazm

qaht-e-bangal

ba.ngaal kii mai.n shaam-o-sahar dekh rahaa huu.n
har chand ki huu.n duur magar dekh rahaa huu.n

Jigar Moradabadi
Nazm

husn aur maut

hazaar phuulo.n se aabaad baaG-e-hastii hai
ajal kii aa.nkh faqat ek ko tarastii hai
ka.ii dilo.n kii umiido.n kaa jo sahaaraa ho
fazaa-e-dahr kii aaluudgii se baalaa ho
jahaa.n me.n aa ke abhii jis ne kuchh na dekhaa ho
na qaht-e-aish-o-masarrat na, Gam kii arzaanii
kanaar-e-rahmat-e-haq me.n use sulaatii hai
sukuut-e-shab me.n farishto.n kii marsiya-KHvaanii
tavaaf karne ko sub.h-e-bahaar aatii hai
sabaa cha.Dhaane ko jannat ke phuul laatii hai

Faiz Ahmad Faiz
Nazm

phir wahi kunj-e-qafas

bol! chaTgaa.nv kii mazluum KHamoshii kuchh bol
bol ai piip se riste hu.e siino.n kii bahaar
bhuuk aur qaht ke tuufaan ba.Dhe aate hai.n
bol ai ismat-o-iffat ke janaazo.n kii qataar

Sahir Ludhianvi
Nazm

barish ka pahla qatra

ghanghor ghaTaa tulii kha.Dii thii
par buu.nd abhii nahii.n pa.Dii thii
har qatra ke dil me.n thaa ye KHatra
naachiiz huu.n mai.n Gariib qatra
tar mujh se kisii kaa lab na hogaa
mai.n aur kii guu.n na aap jogaa
kyaa khet kii mai.n bujhaa.uu.ngaa pyaas
apnaa hii karuu.ngaa satyaanaas
KHaalii haatho.n se kyaa saKHaavat
phiikii baato.n me.n kyaa halaavat
kis birte pe mai.n karuu.n dilerii
mai.n kaun huu.n kyaa bisaat merii
har qatra ke dil me.n thaa yahii Gam
sargoshiyaa.n ho rahii thii.n baaham
khich.Dii sii ghaTaa me.n pak rahii thii
kuchh kuchh bijlii chamak rahii thii
ik qatra ki thaa ba.Daa dilaavar
himmat ke muhiit kaa shanaavar
faiyyaz o javvaad o nek-niyyat
bha.Dkii us kii rag-e-hamiyyat
bolaa lalkaar kar ki aa.o!
mere piichhe qadam ba.Dhaa.o
kar guzro jo ho sake kuchh ehsaan
Daalo murda zamiin me.n jaan
yaaro! ye hachar-machar kahaa.n tak
apnii sii karo bane jahaa.n tak
mil kar jo karoge jaa.n-fishaanii
maidaan pe pher doge paanii
kahtaa huu.n ye sab se barmalaa mai.n
aate ho to aa.o lo chalaa mai.n
ye kah ke vo ho gayaa ravaana
''dushvaar hai jii pe khel jaanaa''
har-chand ki thaa vo be-bizaa.at
kii us ne magar ba.Dii shujaa.at
dekhii jur.at jo us sakhii kii
do-chaar ne aur pairvii kii
phir ek ke baa'd ek lapkaa
qatra qatra zamii.n pe Tapkaa
aaKHir qatro.n kaa ba.ndh gayaa taar
baarish lagii hone moslaa-dhaar
paanii paanii hu.aa bayaabaa.n
sairaab hu.e chaman KHayaabaa.n
thii qaht se paa.emaal KHilqat
is me.nh se hu.ii nihaal KHilqat
jur.at qatra kii kar ga.ii kaam
baaqii hai jahaa.n me.n aaj tak naam
ai saahibo! qaum kii KHabar lo
qatro.n kaa saa ittifaaq kar lo
qatro.n hii se hogii nahr jaarii
chal nikle.ngii kashtiyaa.n tumhaarii

Ismail Merathi
Nazm

bich bhanwar se lauT aaunga

paagal samjhaa hai kyaa mujh ko
Duub maruu.n mai.n
aur sab is manzar se apnaa dil bahlaa.e.n
bachcho.n ko kaa.ndho.n par le kar
uchak uchak kar mujh ko dekhe.n
ha.nsii u.Daa.e.n
laakh mirii apnii vaj.he.n ho.n jaa.n dene kii
lekin phir bhii
dil me.n mere bhii hai vo be-ma.anii KHvaahish
jaate jaate sab kii aa.nkhe.n nam karne kii
merii samajh se
itnaa haq to hai
jaa.n dene vaale kaa duniyaa vaalo.n par
shirkat kar le.n
vo is pal me.n tho.Daa saa sanjiida ho kar
jaa.n dene aayaa huu.n lekin
ye batlaa duu.n
jaan la.Daa duu.ngaa mai.n jaan bachaane me.n gar
ek tamaashaa dekhne vaale ko bhii ha.nstaa dekhaa KHud par
lauT aa.uu.ngaa
keh detaa huu.n
aisaa kuchh bhii agar hu.aa to
biich bha.nvar se lauT aa.uu.ngaa

Shariq Kaifi
Nazm

meri patthar aankhen

ab ke miTTii kii ibaarat me.n likhii jaa.egii
sabz patto.n kii kahaanii ruKH-e-shaadaab kii baat
kal ke dariyaa.o.n kii miTtii hu.ii mub.ham tahriir
ab faqat ret ke daaman me.n nazar aa.egii
buu.nd bhar nam ko taras jaa.egii be-suud du.aa
nam agar hogii ko.ii chiiz to merii aa.nkhe.n
meraa uj.Daa hu.aa chehra mirii patthar aa.nkhe.n
qaht-e-afsaana nahii.n aur ye be-abr falak
aaj us des kal is des kaa vaaris hogaa
ham se tarke me.n mile.nge use biimaar daraKHt
tez kirno.n kii tamaazat se chaTaKHte hu.e ho.nT
dhuup kaa harf-e-junuu.n luu kaa vasiyyat-naama
aur mire shahr-e-tilismaat kii be-dar aa.nkhe.n
mirii be-dar mirii banjar mirii patthar aa.nkhe.n

Mustafa Zaidi
Nazm

hubb-e-watan

ai aaftaab-e-hubb-e-vatan tuu kidhar hai aaj
tuu hai kidhar ki kuchh nahii.n aataa nazar hai aaj
tujh bin jahaa.n hai aa.nkho.n me.n andher ho rahaa
aur intizaam-e-dil hai zabar zer ho rahaa
ThanDe hai.n kyuu.n dilo.n me.n tire josh ho ga.e
kyuu.n sab tire charaaG hai.n KHaamosh ho ga.e
hubb-e-vatan kii jins kaa hai qaht-saal kyuu.n
hairaa.n huu.n aaj-kal hai pa.Daa us kaa kaal kyuu.n
kuchh ho gayaa zamaana kaa ulTaa chalan yahaa.n
hubb-e-vatan ke badle hai buGz-e-vatan yahaa.n
bin tere mulk-e-hind ke ghar be-charaaG hai.n
jalte evaz charaaGo.n ke siino.n me.n daaG hai.n
kab tak shab-e-siyaah me.n aalam tabaah ho
ai aaftaab idhar bhii karam kii nigaah ho
aalam se taa ki tiira-dilii duur ho tamaam
aur hind tere nuur se ma.amuur ho mudaam
ulfat se garm sab ke dil-e-sard ho.n baham
aur jo ki ham-vatan ho.n vo hamdard ho.n baham
taa ho vatan me.n apne zar-o-maal kaa vafuur
aur mumlikat me.n daulat-o-iqbaal kaa vafuur
sab apne haakimo.n ke liye jaa.n-nisaar huu.n
aur gardan-e-hariif pe KHanjar kii dhaar ho.n
ilm-o-hunar se KHalq ko raunaq diyaa kare.n
aur anjuman me.n baiTh ke jalse kiyaa kare.n
labrez-e-josh-e-hubb-e-vatan sab ke jaam ho.n
sarshaar-e-zauq-o-shauq dil-e-KHaas-o-aam ho.n

Mohammad Husain Azad
Nazm

KHushk-sali

ai dil-e-afsurda vo asraar-e-baatin kyaa hu.e
soz kii raate.n kahaa.n hai.n saaz ke din kyaa hu.e
aa.nsu.o.n kii vo jha.Dii vo Gam kaa saamaa.n kyaa hu.aa
teraa saavan kaa mahiina chashm-e-giryaa.n kyaa hu.aa
kyaa hu.ii baalaa-e-sar vo lutf-e-yazdaa.n kii ghaTaa
aasmaan-e-dil pe vo ghanghor irfaa.n kii ghaTaa
ab vo naalo.n kii garaj hai ab na vo shor-e-fuGaa.n
ab na uThtaa hai kaleja se mohabbat kaa dhu.aa.n
apne af.aal-e-siyah par ab pashemaanii nahii.n
ab pasiine ke sitaare zeb-e-peshaanii nahii.n
dard kii muddat se ab dil me.n chamak hotii nahii.n
vo tapak chhaalo.n kii kau.nde kii lapak hotii nahii.n
zikr-e-maulaa se labo.n par ab vo narmii hii nahii.n
bhaap siine se uThe kyaa dil me.n garmii hii nahii.n
ab sharaare soz-e-Gam ke dil me.n rahte hii nahii.n
ashk ab pichhle pahar aa.nkho.n se bahte hii nahii.n
ma.arifat dil me.n na ab vo ruuh me.n ehsaas hai
log kahte hai.n ki hai lekin hame.n to yaas hai
ab na vo aa.nkho.n me.n ashk-e-KHuu.n na vo dil me.n gudaaz
ab na vo shaam-e-tamannaa hai na vo sub.h-e-niyaaz
KHushk hai.n aa.nkhe.n jabiine.n ta.ng siine sard hai.n
ab na vo dukhte hu.e dil hai.n na chehre zard hai.n
aah kii aur dil uma.nD aayaa ye hotaa hii nahii.n
Duub kar zauq-e-fanaa me.n ko.ii rotaa hii nahii.n
phuul daaGo.n se khile the jis dil-e-sarshaar me.n
KHaak ab muddat se u.Dtii hai usii gulzaar me.n
aa.nsu.o.n se nam jo rahtaa thaa vo daamaa.n jal gayaa
lahlahaataa thaa jo siine me.n gulistaa.n jal gayaa
ruuh me.n baaliidgii kii quvvate.n ma.aduum hai.n
dono.n aa.nkhe.n aa.nsu.o.n ke faiz se mahruum hai.n
pech-o-KHam se bahne vaalaa dil kaa dariyaa KHushk hai
vo bharii barsaat ya.anii chashm-e-biinaa KHushk hai
KHuun hai dil me.n magar pahlii sii tuGyaanii nahii.n
abr hai baad-e-muKHaalif se magar paanii nahii.n
jab ye aalam hai to baarish kii shikaayat kis liye
be-mahal ye hasrat-e-baaraan-e-rahmat kis liye
ik mujassam KHushk-saalii KHud hamaarii zaat hai
zid hamaarii hastiyo.n kii abr hai barsaat hai
rahmato.n se josh me.n aane kii KHvaahish kyaa kare.n
KHud saraapaa qaht hai.n ummiid-e-baarish kyaa kare.n

Josh Malihabadi
Nazm

tawaif

kaal aur qaht kii sejo.n ko sajaatii nahii.n mai.n
KHuun mazduur kaa galiyo.n me.n bahaatii nahii.n mai.n
goliyaa.n ahl-e-mohabbat pe chalaatii nahii.n mai.n
pa.nch-saala ko.ii scheme banaatii nahii.n mai.n

Izhaar Malihabadi
Nazm

qatl-e-bahaaran

uj.Daa khanDar
suunaa manzar
beva panchhii
zaKHmii taa.ir
uryaa.n KHanjar
KHuunii.n dhartii kaalaa suuraj giilaa ambar
jangal jangal KHauf aur dahshat
sahraa sahraa vahshat vahshat
tank kii aamad
top kii harakat
jang kii la.anat
qaht kaa saaya
bhuuk kii aa.ndhii
aur bekaarii
aur bad-chalanii
aur biimaarii
tan kii tijaarat
man kii haziimat
dhan kii hukuumat
bhuukii siitaa nangii mariyam murda gautam
paara-paara shiisha-e-hurmat
reza reza qasr-e-tamaddun
dhajjii dhajjii amn kaa parcham
bol ki lab aazaad hai.n tere

Raza Ashk
Nazm

jit gaya jit gaya

aa.o
ab Dhuu.nDo mujhe
phisaDDii keh ke mujh ko chhe.Dne vaalo
haraa.o ab mujhe
haa.n mujhe bhii khel lagtaa thaa ye sab kuchh ibtidaa me.n
magar ye bhii to socho
musalsal haar ko.ii khel hai jo khel is ko maan letaa mai.n
kahaa.n tak haartaa mai.n?
mire chhupne ke sab kone ujaagar ho ga.e the
bahut aasaan hotaa jaa rahaa thaa Dhuu.nDnaa mujh ko
mujhe ab jiitnaa thaa
kisii qiimat pe mujh ko jiitnaa thaa
so mai.n ne ye kiyaa
vo aahaT jo mirii dushman rahii thii aaj tak
mai.n ne usii ko maar Daalaa
aur jaa kar chhup gayaa KHud qabr ke taKHto.n ke piichhe
mano.n miTTii ke niiche

Shariq Kaifi
Nazm

na-shanas

kitne lahjo.n kii kaTaare.n mirii gardan pe chalii.n
kitne alfaaz kaa siisa mire kaano.n me.n ghulaa
jis me.n ik samt dhu.ndalkaa thaa aur ik samt Gubaar
us taraazuu pe mire dard kaa saamaan tulaa
kam-nigaahii ne basiirat pe uThaa.e neze
vahm kii nahr me.n pairaahan-e-afkaar dhulaa
qaht aisaa thaa ki barpaa na hu.ii majlis-e-ishq
habs aisaa thaa ki tahqiiq kaa parcham na khulaa

Mustafa Zaidi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now