Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "aashiyaana"

Nazm MATCHES FOR "aashiyaana"

Nazm

parinde ki fariyaad

aataa hai yaad mujh ko guzraa hu.aa zamaana
vo baaG kii bahaare.n vo sab kaa chahchahaanaa
aazaadiyaa.n kahaa.n vo ab apne gho.nsle kii
apnii KHushii se aanaa apnii KHushii se jaanaa
lagtii hai choT dil par aataa hai yaad jis dam
shabnam ke aa.n.su.o.n par kaliyo.n kaa muskuraanaa
vo pyaarii pyaarii suurat vo kaamanii sii muurat
aabaad jis ke dam se thaa meraa aashiyaanaa
aatii nahii.n sadaa.e.n us kii mire qafas me.n
hotii mirii rihaa.ii ai kaash mere bas me.n

Allama Iqbal
Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal
Nazm

march 1907

zamaana aayaa hai be-hijaabii kaa aam diidaar-e-yaar hogaa
sukuut thaa parda-daar jis kaa vo raaz ab aashkaar hogaa
guzar gayaa ab vo daur-e-saaqii ki chhup ke piite the piine vaale
banegaa saaraa jahaan mai-KHaana har ko.ii baada-KHvaar hogaa
kabhii jo aavaara-e-junuu.n the vo bastiyo.n me.n phir aa base.nge
barahna-paa.ii vahii rahegii magar nayaa KHaarzaar hogaa
sunaa diyaa gosh-e-muntazir ko hijaaz kii KHaamushii ne aaKHir
jo ahd sahraa.iyo.n se baa.ndhaa gayaa thaa phir ustuvaar hogaa
nikal ke sahraa se jis ne ruumaa kii saltanat ko ulaT diyaa thaa
sunaa hai ye qudsiyo.n se mai.n ne vo sher phir hoshiyaar hogaa
kiyaa miraa tazkira jo saaqii ne baada-KHvaaro.n kii anjuman me.n
to piir-e-mai-KHaana sun ke kahne lagaa ki mu.nh-phaT hai KHvaar hogaa
dayaar-e-maGrib ke rahne vaalo KHudaa kii bastii dukaa.n nahii.n hai
kharaa jise tum samajh rahe ho vo ab zar-e-kam-ayaar hogaa
tumhaarii tahziib apne KHanjar se aap hii KHud-kushii karegii
jo shaaKH-e-naazuk pe aashiyaana banegaa naa-paa.edaar hogaa
safiina-e-barg-e-gul banaa legaa qaafila mor-e-naa-tavaa.n kaa
hazaar maujo.n kii ho kashaakash magar ye dariyaa se paar hogaa
chaman me.n laala dikhaataa phirtaa hai daaG apnaa kalii kalii ko
ye jaantaa hai ki is dikhaave se dil-jalo.n me.n shumaar hogaa
jo ek thaa ai nigaah tuu ne hazaar kar ke hame.n dikhaayaa
yahii agar kaifiyat hai terii to phir kise e'tibaar hogaa
kahaa jo qumrii se mai.n ne ik din yahaa.n ke aazaad paa-ba-gil hai.n
tuu Gunche kahne lage hamaare chaman kaa ye raazdaar hogaa
KHudaa ke aashiq to hai.n hazaaro.n bano.n me.n phirte hai.n maare maare
mai.n us kaa banda banuu.ngaa jis ko KHudaa ke bando.n se pyaar hogaa
ye rasm-e-bazm-e-fanaa hai ai dil gunaah hai jumbish-e-nazar bhii
rahegii kyaa aabruu hamaarii jo tuu yahaa.n be-qaraar hogaa
mai.n zulmat-e-shab me.n le ke nikluu.ngaa apne dar-maa.nda kaarvaa.n ko
sharar-fishaa.n hogii aah merii nafas miraa shola-baar hogaa
nahii.n hai Gair-az-numuud kuchh bhii jo mudda.aa terii zindagii kaa
tuu ik nafas me.n jahaa.n se miTnaa tujhe misaal-e-sharaar hogaa
na puuchh 'iqbaal' kaa Thikaanaa abhii vahii kaifiyat hai us kii
kahii.n sar-e-raah-guzaar baiThaa sitam-kash-e-intizaar hogaa

Allama Iqbal
Nazm

zabta

ye zaabta hai haqiiqat ko ik fasaana kahuu.n
ye zaabta hai qafas ko hii aashiyaana kahuu.n

Habib Jalib
Nazm

bulbul

hazaar rang KHizaa.n ne bahaar ne badle
hazaar ruup yahaa.n rozgaar ne badle
tirii qadiim ravish dekhtaa huu.n bachpan se
hai sub.h-o-shaam tujhe kaam apne shevan se
asar-paziir havaadis tiraa taraana nahii.n?
dayaar-e-ishq me.n yaa gardish-e-zamaana nahii.n?
na aashiyaana kahii.n hai na hai vatan teraa
rahegaa yuu.nhii baseraa chaman chaman teraa

Majnoon Gorakhpuri
Nazm

bachpane ki yaad

ai bachpane kii duniyaa to yaad aa rahii hai
dil se mirii sadaa-e-fariyaad aa rahii hai
raahat sunaa rahii thii afsaana saltanat kaa
thii maa.n kii god mujh ko kaashaana saltanat kaa
vo ghar ki duur jis se thii gardish-e-zamaana
aazaadiyo.n kaa merii aabaad aashiyaana
phirtii hai ab nazar me.n tasviir us makaa.n kii
arsh-e-barii.n se behtar thii sarzamii.n jahaa.n kii
naazuk-mizaaj ban kar vo ruuThnaa machalnaa
sehn-e-makaa.n me.n din bhar vo kuudnaa-uchhalnaa
allaah-re vo taKHayyul allaah-re saaz-o-saamaa.n
duniyaa kii saltanat thii is zindagii pe qurbaa.n
us ahd-e-aafyat me.n ik baar phir sulaa de
ai mere ahd-e-maazii phir ik jhalak dikhaa de
baaG-e-jahaa.n me.n rakkhaa un shaadiyo.n ne mujh ko
raahat kii loriyaa.n dii.n aazaadiyo.n ne mujh ko
be-fikr zindagii thii KHud hosh mujh ko kab thaa
ik kaif-e-be-KHudii thaa mast-e-mai-e-tarab thaa
ai umr-e-rafta tuu ne kii mujh se be-valfaaii
aa jaa palaT ke dam bhar mai.n huu.n tiraa fidaa.ii
dil me.n sharaarte.n thii.n kaise Gazab kii pinhaa.n
rag rag me.n bijliyaa.n thii.n josh-e-tarab kii pinhaa.n
huu.n apnii zindagii kaa andaaza karne vaalaa
jannat se laa ke tuu ne dozaKH me.n mujh ko Daalaa

Mirza Mohammad Hadi Aziz Lakhnavi
Nazm

34

KHudaa gar hame.n ik parinda banaataa
jahaa.n me.n ham ik aashiyaana banaate
kisii sabz vaadii me.n apnaa nasheman
yaa sehn-e-chaman ko Thikaana banaate
kabhii u.Dte baadal me.n hotaa baseraa
kabhii Daalte kunj-e-vahshat me.n Deraa
kabhii daaman-e-koh hotaa hamaaraa
kabhii bantaa ghar ik nadii kaa kinaaraa
kabhii giit gaate ghaTaa.o.n ke niiche
kabhii hote paagal havaa.o.n ke piichhe
fazaa.o.n me.n ham sub.h se shaam karte
a.ndhere se pahle zamii.n par utarte
ko.ii gulistaa.n mulk hotaa hamaaraa
ham is ke liye ik taraana banaate
KHudaa gar hame.n ik parinda banaataa
use ham parinde KHudaa na banaate

Zeeshan Sahil
Nazm

girta hua daraKHt

kyaa vo bhii
kabhii thaa
haa.n vo thaa
ek chhoTaa saa biij
ek din
zamiin se baahar aayaa
pal pal ba.Dhtaa rahaa
pal pal tarastaa rahaa
rihaa.ii ke liye
lekin
rihaa.ii har kisii ko nahii.n miltii
vo ek hii jagah
kha.Daa hu.aa
ba.Dhtaa hii chalaa gayaa
kyaa is ne phal diye?
nahii.n
lekin vo
phal dene ke qaabil bin gayaa
ek din
bahut zor kaa tuufaan aayaa
sab kuchh ukhaa.D ke le gayaa
kyaa use bhii?
haa.n use bhii...
ka.ii din udaasii rahii
aaKHir
kitne din
ek din sab kuchh
phir se vaisaa hii ho gayaa
lekin
us daraKHt kii jagah
kabhii na bhar sakii
us daraKHt jaisaa
ko.ii nahii.n ho saktaa
us ke phalo.n kii tamannaa
aaj bhii kahii.n dafan hai
us ke suukhe patte
aaj bhii
merii yaado.n me.n u.Dte hai.n
yaad hai
us kaa girnaa bhii
us ke kitne KHvaab ho.nge
kitnii KHvaahishe.n ho.ngii
kuchh ban.ne kii
tamannaa thii
vo bhii jiinaa chaahtaa thaa
vaqt ne
jiine nahii.n diyaa use
kuchh ban.ne nahii.n diyaa use
us daraKHt kii chhaa.nv merii thii
mai.n
ek parinde kii suurat
use talaash kar rahii huu.n
meraa aashiyaana
us daraKHt kii ek Tahnii par thaa

Sheerin Ahmad
Nazm

qurb-e-qayamat

ye chi.Diyaa jo pa.nkhe se Takraa ga.ii hai
use to faqat aashiyaana banaane kii dhun thii
use vaqt kii piiTh se laakh do laakh saalo.n ke girne kaa andaaza kab thaa
use kyaa KHabar thii
vo sarsabz ayyaam murjhaa chuke hai.n
vo insaa.n se pahle ke shaadaab ja.ngal
jahaa.n gho.nslo.n aur u.Daano.n ke maa-bain
dhaato.n kii parraa.n fasle.n nahii.n thii.n

Khursheed Rizvi
Nazm

zauq-e-shairana

mai.n talaash kar rahii thii Gam-e-dil kaa kuchh bahaana
mirii raah me.n ye naahaq kahaa.n aa gayaa zamaana
mire haal par karam kar kabhii dost Gaa.ebaana
vo sukuun baKHsh dil ko ki ta.Dap uThe zamaana
hai tavaaf ab bhii jaarii tire aastaa.n kaa lekin
nahii.n mil sakaa jabii.n ko tiraa sa.ng-e-aastaana
tirii baargaah tak ho mirii kis tarah rasaa.ii
mujhe dii ga.ii gadaa.ii tujhe taKHt-e-KHusravaana
mai.n ta.Dap ta.Dap ke Gam me.n rahii be-qaraar-o-muztar
mire dil kii dha.Dkano.n ko nahii.n sun sakaa zamaana
miraa shauq-e-sajda-rezii hai hanuuz naa-mukammal
mujhe ko.ii ye bataa de hai kahaa.n vo aastaana
mire Gam kii zindagii par mire haal-e-bekasii par
kabhii rahm un ko aa.e kabhii ro pa.De zamaana
ka.ii baar aa ke bijlii girii sehn-e-gulsitaa.n par
ye rahii hamaarii qismat ki jalaa na aashiyaana
mujhe hosh hii nahii.n kuchh ki mai.n shaad huu.n ki 'naashaad'
hai suruur-e-mai se ba.Dh kar miraa zauq-e-shaa.iraana

Rabia Sultana Nashad
Nazm

koyal

o chaman kii ajnabii chi.Diyaa! kahaa.n thii aah! tuu
kyaa kisii sahraa ke daaman me.n nihaa.n thii aah! tuu
tere dilkash zamzame the sabza-zaaro.n me.n KHamosh
aashiyaana thaa tiraa gulshan me.n bazm-e-be-KHarosh
khii.nchtii vaqt-e-sahar dil ko tirii kuu-kuu na thii
chhaa.nv me.n taaro.n kii mahv-e-naGma-e-dil-juu na thii
mausam-e-sarmaa me.n ai sarmaaya-e-sabr-o-shakeb
be-sadaa teraa pas-e-parda thaa saaz-e-dil-fareb
marhabaa ai paikar-e-paik-e-subuk-gaam-e-bahaar
le ke phir tuu garmiyo.n me.n aa.ii paiGaam-e-bahaar
tuu idhar aa.ii fazaa-e-gul kaa daur aayaa udhar
tuu ne gaa.e giit aur aamo.n kaa baur aayaa udhar
taa.iraan-e-baaG ne chhe.Daa hai saaz-e-imbisaat
tere maqdam me.n hai shaaKHo.n par ham-aahang-e-nashaat
pahnii nannhii nannhii kaliyo.n ne qabaa-e-shabnamii.n
aa rahii hai kaan me.n terii sadaa-e-dil-nashii.n
ko.ii anjum aasmaa.n kaa aur subuk parvaaz-e-shauq
rahnumaa hai kyaa tiraa dil-daada-e-andaaz-e-shauq
tuu jo aane vaale mausam kaa nishaa.n paatii hu.ii
apnii manzil par pahu.nch jaatii hai yuu.n gaatii hu.ii
tere maqdam me.n shakeb-e-KHaatir-e-naa-shaad mai.n
mausam-e-gul ko bhii detaa huu.n mubaarakbaad mai.n
tuu chaman me.n u.D ke kyaa aa.ii ki aa pahu.nchii bahaar
gaa rahii hai.n chhoTii chi.Diyaa.n sabz kunjo.n me.n malhaar
daaman-e-ra.ngii.n me.n ik doshiiza-e-naakat-KHudaa
chun rahii hai nannhii nannhii surKH kaliyaa.n KHushnumaa
aur tujh se ham-suruud-e-naGma-e-ejaaz hai
bazm-e-qudrat me.n tirii goyaa shariik-e-raaz hai
miiThe naGme gaane vaalii o chaman kii naaznii.n
hai tar-o-taaza hamesha teraa kunj-e-dil-nashii.n
aur musaffaa hai fazaa-e-aasmaa.n tere liye
hai shafaq-jaam-e-sharaab-e-arGavaa.n tere liye
tere naGmo.n me.n asar andoh-e-hirmaa.n kaa nahii.n
saal me.n tere guzar fasl-e-zamistaa.n kaa nahii.n
mujh ko qassam-e-azal detaa agar do baal-o-par
u.D ke hotaa mai.n bhii tere saath sargarm-e-safar
ban ke ham dono.n rafiiq-e-mausam-e-josh-e-bahaar
karte KHush KHush har baras gul-gasht-e-dasht-o-kohsaar

Suroor Jahanabadi
Nazm

us ka dard mera marham

na teraa ko.ii baseraa
na meraa ko.ii Thikaanaa
chal mil ke Dhuu.nDte hai.n
ko.ii nayaa aashiyaanaa

Anita Mohan
Nazm

ai mere arz-e-watan

ai mere arz-e-vatan
ai mere KHushbuu ke chaman
miTTii ko terii ra.ngaa thaa lahuu.n se apne
'iqbaal' ne chaahaa tujhe fikr se apne
qaum-e-muslim kaa bas tuu hii ik Thikaana hai
ik ghar ik jannat ik aashiyaana hai

Syeda Sadaf Akbar
Nazm

ek sawal

ek lamha bhii ik zamaana hai
yaad rakhnaa ki bhuul jaanaa hai
lab o ruKHsaar o gesuu-e-KHamdaar
vo lachaktii hu.ii baahe.n vo ham aaGosh badan
vo chhalakte hu.e paimaano.n kii mahfil vo iram
naGma o raqs fusuu.n-kaarii-e-fan
shahr aaraa.ish-e-jannat hai zamii.n par ki nahii.n
ye numaa.ish-gah-e-ta.amiir-o-taraqqii ye zamii.n
zindagii mehnat o qudrat ke ajaa.ib
ye mashiine.n KHud-kaar
dhaat ke purze jo hai.n farz-shanaas o hushiyaar
ai KHudaa ye tire sayyaaro.n ke rakhvaale
ek lamha bhii ik zamaana hai
yaad rakhnaa ki bhuul jaanaa hai
aaj mausam bahut suhaanaa hai
jii kare hai ki jaan de Daale.n
aaj mausam bahut suhaanaa hai
kaT ga.e qaatilo.n ke haat kahii.n
paa.ii mahkuum ne najaat kahii.n
baadshaahat zamii.n pe de maarii
chhiin lii hai inaan-e-muKHtaarii
har taraf inqalaab ke aasaar
hai.n kahaa.n parcham-e-shah-e-KHuu.n-KHvaar
rashk-e-jamshed faKHr-e-askandar
qaid mohallo.n me.n yaa ki mulk-badar
Dagmagaataa hai taKHt-e-shaahaana
shahryaaro.n kaa KHatm afsaana
an-ginat bijliyaa.n girii.n lekin
chaar tinko.n kaa aashiyaana hai
ai KHudaa-e-abad KHudaa-e-azal
tere ghar me.n pahu.nch ga.ii halchal

Niyaz Haidar
Nazm

aali-ji ki gum-shuda bayaz

bayaaz chorii hu.ii hai janaab-e-'aalii' kii
bayaaz-chor ne chorii ba.Dii misaalii kii
zaruur chor ko.ii saariq-e-adab hogaa
use bayaaz churaane kaa KHaas Dhab hogaa
mai.n aise chor kii daanish-varii pe huu.n hairaan
jo ek raat me.n ban baiThaa saahab-e-diivaan
janaab-e-'aalii' ke column the jitne matbuu.aa
samajh ke chho.D gayaa un ko nasr-e-mamnu.aa
ajiib chor thaa nasrii kalaam chho.D gayaa
bayaaz le gayaa column tamaam chho.D gayaa
Gazal ke saath ga.ii masnavii bhii dohaa bhii
tamaam shahr ne maanaa thaa jis kaa lohaa bhii
chhupaa hu.aa thaa jo shaa.ir nikal rahaa hogaa
vo is bayaaz ke maqte badal rahaa hogaa
janaab-e-'aalii' kii fikr-e-jamiil thii ye bayaaz
rubaa.iyo.n me.n ba.Dii KHud-kafiil thii ye bayaaz
jis anjuman me.n ye jaatii thii hashr kartii thii
adab ke saath siyaasat bhii nashr kartii thii
mushaa.eron me.n ba-sad ehtiraam aatii thii
yahii bayaaz musiibat me.n kaam aatii thii
isii bayaaz se doho.n ko aazmaanaa thaa
vo shaaKH hii na rahii jis pe aashiyaana thaa

Khalid Irfan
Nazm

raat ki aankh mein ek KHanjar uga

raat kii aa.nkh me.n ek KHanjar ugaa
ek vahshii parinde ne KHanjar kaa bosa liyaa
nok-e-KHanjar parinde kii aa.nkho.n me.n saazish kaa nasha machaa
KHvaab kii dhu.nd andhii nadii zard sho.ala banii aur bahtii rahii
phir kahii.n zard ra.ngo.n ke patthar kii baarish paraa.e shahr me.n ravaana hu.ii
raahato.n ke makaa.n ke mu.nDero.n se raahat ke kavve uThe
shor kii ka.nkarii se ku.e.n bhii bhare aa.ina aa.ina sii fazaa bhii jalii
ek qisse kii anti puraanii na.ii phir kahii.n buum kaa aashiyaana banii
raat kii aa.nkh me.n ek KHanjar ugaa

Akhtar Yusuf
Nazm

naujawanon ke nam

ye kin KHayaalo.n me.n kho rahe ho na.ii hai buniyaad-e-aashiyaana
chaman kii ta.amiir is tarah ho ki rashk tum par kare zamaana
ye jaan lo kis maqaam par ho chunaa hai kis rahguzar ko tum ne
uTho ki tahziib-e-nau ne ba.Dh kar badal diyaa dahr kaa fasaana
tumhaare azm-o-amal me.n pinhaa.n faroG-e-aalam kii quvvate.n hai.n
badal do tadbiir se muqaddar hanuuz haalaat kaa nishaana
jo dil me.n manzil kii aarzuu hai to siikh lo tum ai nau-javaano
har ek aafat kaa ruKH badalnaa har ik musiibat par muskuraanaa
tumhe.n KHabar hai ki ahd-e-maazii me.n daur aise bhii aa chuke hai.n
pa.De rahe tum hii Gaflato.n me.n pukaartaa rah gayaa zamaana
nayaa zamaana na.ii hai mahfil na.e hai.n barbat na.ii tarange.n
puraane raago.n ko band kar do fazaa ko de do nayaa taraana
na ahl-e-duniyaa kii samt dekho judaa judaa hai mafaad sab kaa
agarche koshish karoge dil se banegaa firdaus aashiyaana
maza to jab hai ai nau-javaano kahe tumhe.n aafrii.n muu.arriKH
abhii to hai vaqt sabt kar do tum apnaa taariiKH me.n fasaana

Jamal Bharti
Nazm

fan

kahaa.n banaanaa hai dar kahaa.n par
jagah dariiche kii chho.Dnii hai
jahaa.n se baad-e-sabaa to aa.e
daruun-e-KHaana chale jo aa.ndhii
giraane paa.e na aashiyaana

Tabassum Azmi
Nazm

ismat ke phul

ab iKHtiyaar tumhaaraa hai kyaa uThaanaa hai
ye jism jannat-o-dozaKH kaa aashiyaanaa hai

Sharib Mauranwi
Nazm

jazba-e-be-karana

makaa.n laa-makaa.n hai
zamaa.n be-karaa.n hai
nihaa.n hai
isii mehvar-e-aarzuu me.n
tumhaare KHad-o-KHaal kaa
aks-e-mauhuum
parvaaz kaa jazba-e-be-karaana
ghanii aur be-nuur raaho.n me.n
banaa.ogii kyaa aashiyaana

Zahida Zaidi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now