Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "anwar"

Nazm MATCHES FOR "anwar"

Nazm

mujhe sochne de

merii naakaam mohabbat kii kahaanii mat chhe.D
apnii maayuus uma.ngo.n kaa fasaana na sunaa
zindagii talKH sahii zahr sahii sam hii sahii
dard o aazaar sahii jabr sahii Gam hii sahii
lekin is dard-o-Gam o jabr kii vus.at ko to dekh
zulm kii chhaa.nv me.n dam to.Dtii KHilqat ko to dekh
apnii maayuus uma.ngo.n kaa fasaana na sunaa
merii naakaam mohabbat kii kahaanii mat chhe.D
jalsa-gaaho.n me.n ye dahshat-zada sahme amboh
rahguzaaro.n pe falaakat-zada logo.n ke giroh
bhuuk aur pyaas se pazh-murda siyah-faam zamii.n
tiira-o-taar makaa.n muflis o biimaar makii.n
nau-e-insaa.n me.n ye sarmaaya o mehnat kaa tazaad
amn o tahziib ke parcham tale qaumo.n kaa fasaad
har taraf aatish o aahan kaa ye sailaab-e-aaziim
nit-na.e tarz pe hotii hu.ii duniyaa taqsiim
lahlahaate hu.e kheto.n pe javaanii kaa samaa.n
aur dahqaan ke chhappar me.n na battii na dhu.aa.n
ye falak-bos mile.n dilkash o siimii.n baazaar
ye Galaazat pe jhapaTte hu.e bhuuke naadaar
duur saahil pe vo shaffaaf makaano.n kii qataar
sarsaraate hu.e pardo.n me.n simaTte gulzaar
dar-o-diivaar pe anvaar kaa sailaab-e-ravaa.n
jaise ik shaa.er-e-mad.hosh ke KHvaabo.n kaa jahaa.n
ye sabhii kyuu.n hai ye kyaa hai mujhe kuchh sochne de
kaun insaa.n kaa KHudaa hai mujhe kuchh sochne de
apnii maayuus uma.ngo.n kaa fasaana na sunaa
merii naakaam mohabbat kii kahaanii mat chhe.D

Sahir Ludhianvi
Nazm

mere bhi hain kuchh KHwab

kuchh KHvaab hai.n parda-e-anvaar magar un kii sahar gum
jis aag se uThtaa hai mohabbat kaa KHamiir us ke sharar gum
hai kul kii KHabar un ko magar juz kii KHabar gum
ye KHvaab hai.n vo jin ke liye martaba-e-diida-e-tar hech
dil hech hai sar itne baraabar hai.n ki sar hech
arz-e-hunar hech!

Noon Meem Rashid
Nazm

taj-mahal

ye damaktii hu.ii chaukhaT ye tilaa-posh kalas
inhii.n jalvo.n ne diyaa qabr-parastii ko rivaaj
maah o anjum bhii hu.e jaate hai.n majbuur-e-sujuud
vaah aaraam-gah-e-malika-e-ma.abuud-mizaaj
diidanii qasr nahii.n diidanii taqsiim hai ye
ruu-e-hastii pe dhu.aa.n qabr pe raqs-e-anvaar
phail jaa.e isii rauza kaa jo simTaa daaman
kitne jaa.n-daar janaazo.n ko bhii mil jaa.e mazaar
dost mai.n dekh chukaa taaj-mahal
.....vaapas chal

Kaifi Azmi
Nazm

meri pahli nazm

kyaa bachche suljhe hote hai.n
jab ge.nd se uljhe hote hai.n
vo is liye mujh ko bhaate hai.n
din biite yaad dilaate hai.n
vo kitne hasiin basere the
jab duur Gamo.n se Dere the
jo khel me.n haa.il hotaa thaa
nafriin ke qaabil hotaa thaa
har ik se ulajh kar rah jaanaa
ruk ruk ke bahut kuchh kah jaanaa
ha.ns denaa baato.n baato.n par
barsaat kii kaalii raato.n par
baadal kii subuk-raftaarii par
bulbul kii aah-o-zaarii par
aur sham.a kii lau kii garmii par
parvaano.n kii haT-dharmii par
duniyaa ke dhande kyaa jaane.n
aazaad ye phande kyaa jaane.n
ma.asuum fazaa me.n rahte the
ham to ye samajh hii baiThe the
KHushiyo.n kaa alam anjaam nahii.n
duniyaa me.n KHizaa.n kaa naam nahii.n
maahaul ne khaayaa phir palTaa
naagaah taGayyur aa jhapTaa
aur us kii karam-farmaa.ii se
haalaat kii ik a.ng.Daa.ii se
aa pahu.nche aise be.Do.n me.n
jo le ga.e hame.n thape.Do.n me.n
bachpan ke suhaane saa.e the
saa.e me.n zaraa sustaa.e the
vo daur-e-muqaddas biit gayaa
ye vaqt hii baazii jiit gayaa
ab vaise mire haalaat nahii.n
vo chiiz nahii.n vo baat nahii.n
jiine kaa safar ab duubhar hai
har gaam pe sau sau Thokar hai
vo dil jo ruuh-e-qariina thaa
aashaa.o.n kaa ek KHaziina thaa
is dil me.n nihaa.n ab naale hai.n
taaro.n se ziyaada chhaale hai.n
jo ha.nsnaa ha.nsaanaa hotaa hai
rone ko chhupaanaa hotaa hai
ko.ii Guncha dil me.n khiltaa hai
tho.Daa saa sukuu.n jab miltaa hai
Gam tez qadam phir bhartaa hai
KHushiyo.n kaa ta.aaqub kartaa hai
mai.n sochtaa rahtaa huu.n yuu.nhii
aaKHir ye tafaavut kyaa ma.anii
ye soch ajab ta.Dpaatii hai
aa.ankho.n me.n namii bhar jaatii hai
phir mujh se dil ye kahtaa hai
maazii ko tuu rotaa rahtaa hai
kuchh aa.he.n dabii sii rahne de
kuchh aa.nsuu baaqii rahne de
ye haal bhii maazii honaa hai
is par bhii tujhe kuchh ronaa hai

Anwar Masood
Nazm

aata hai yaad mujhko

anvar aziiz raajuu munnuu ke saath mil kar
vo taaliyaa.n bajaanaa bandar ko mu.nh chi.Daanaa

Zafar Kamali
Nazm

taj-mahal

ye shaam kii zulfo.n me.n simaTte hu.e anvaar
firdaus-e-nazar taaj-mahal ke dar-o-diivaar

Mahshar Badayuni
Nazm

KHatun-e-mashriq

daf.atan guu.njii sadaa phir aalam-e-anvaar me.n
aurte.n duniyaa kii haazir ho.n mire darbaar me.n

Josh Malihabadi
Nazm

dariche ke qarib

jaag ai sham-e-shabistaan-e-visaal
mahfil-e-KHvaab ke is farsh-e-tarab-naak se jaag!
lazzat-e-shab se tiraa jism abhii chuur sahii
aa mirii jaan mere paas dariiche ke qariib
dekh kis pyaar se anvaar-e-sahar chuumte hai.n
masjid-e-shahar ke miinaaro.n ko
jin kii rif.at se mujhe
apnii barso.n kii tamannaa kaa KHayaal aataa hai

Noon Meem Rashid
Nazm

udasi ek laDki hai

december kii ghanii raato.n me.n
jab baadal barastaa hai
laraztii KHaamushii
jab baal khole
corridoro.n me.n sisaktii hai
to aatish-daan ke aage
kahii.n se vo dabe-paa.nv
mire pahluu me.n aatii hai
aur apne marmarii.n haatho.n se
mere baal suljhaate hu.e
sargoshiyo.n me.n dard ke qisse sunaatii hai
july kii do-pahre.n
mmTiyo.n se jab utar kar
aa.ngano.n me.n phail jaatii hai.n
baato.n ke biscuit phuul jaate hai.n
to vo bhii ja.ngalii belo.n se
uThtii KHushbu.o.n se jism paatii hai
mire nazdiik aatii hai
mirii saa.nso.n kii pagDanDii pe
dhiire dhiire chaltii hai
mire andar utartii hai

Anwar Fitrat
Nazm

ammi ki yaad mein

ammii kii ye jaa-e-namaaz mujhe de do
mujhe pata hai
is me.n kitnii raushan sub.he.n jazb hu.ii hai.n
kitnii sannaaTii do-pahre.n
is kii siivan me.n zinda hai.n
maGrib ke jhaT-paT anvaar kii shaahid hai ye
aaKHir shab kaa girya
us ke taane-baane kaa hissa hai
mujhe pata hai
ammii ke paakiiza sajdo.n kii sargoshii
us ke kaano.n me.n zinda hai
us ke sachche sachche sajde
dekho kaise chamak rahe hai.n
un ke lams kii KHushbuu
kaisii phuuT rahii hai
ammii kii ye jaa-e-namaaz ba.Dii daulat hai
ammii kii ye jaa-e-namaaz mujhe de do

Rashid Jamaal Farooqi
Nazm

manazir-e-sahar

vo ruuh me.n anvaar-e-KHudaa sub.h vo saadiq
vo husn jise dekh ke har aa.nkh ho aashiq
vo saadgii insaan kii fitrat ke mutaabiq
zarrii.n vo ufuq nuur se labrez vo mashriq

Josh Malihabadi
Nazm

hum

falak se anvaar
koh se chashme
shaaKH se phuul phuuTte hai.n
magar har ik phuul me.n namii bhii hai raushnii bhii
zabaa.n me.n alfaaz
aa.nkh me.n diid
dil me.n ehsaas rakh diye ga.e hai.n
pa lafz ehsaas diid ik duusre kaa paivand ho ga.e hai.n
numuu-o-taKHliiq ke amal baar baar dohraa.e jaa rahe hai.n
jamaal-e-arz-o-samaa kii takmiil ho rahii hai
mohabbat e.ajaaz-e-sarmadii hai

Zia Jalandhari
Nazm

ye basti meri basti hai

yahaa.n usmaan baabaa vaalaa uu.nchaa ta.aziya ab bhii kha.Daa hotaa hai
jis kii jhilmilaahaT mere andar aise raqsaa.n hai
ki us kii KHiirgii se ruuh tak merii munavvar hai
mire andar jo hai ik dard kii nannhii sii lau raushan
usii aavaaz kii baaliidgii kaa ek partav hai
mire usmaan baabaa kii vo ashko.n se dhulii aavaaz
nau kii raat ko jo vo shahaadat-naama pa.Dhtaa thaa
Gam-e-shabbiir kaa ye soz us par KHatm thaa goyaa

Ishrat Afreen
Nazm

ye kaun uTha hai sharmata

Duubaa hu.aa ruKH taabaanii me.n
anvaar-e-sahar peshaanii me.n
yaa aab-e-guhar tuGyaanii me.n
yaa chaa.nd kaa mukh.Daa paanii me.n
ye kaun uThaa hai sharmaataa

Josh Malihabadi
Nazm

ehsas-e-kaamran

karvaTe.n le ke machalne ko hai sail-e-anvaar
tiira-o-taar ghaTaa.o.n se kaho chhaT jaa.e.n

Sahir Ludhianvi
Nazm

ghar

chhupe hai.n ashk darvaazo.n ke piichhe
chhato.n ne siskiyaa.n Dhaa.npii hu.ii hai.n
dukho.n ke gird diivaare.n chunii hai.n
ba-zaahir muKHtalif shakle.n hai.n sab kii
magar andar ke manzar ek se hai.n
banii-aadam ke sab ghar ek se hai.n

Anwar Masood
Nazm

gurunanak

ai rahbar-e-manzil tirii raftaar ke sadqe
ai mehr-e-munavvar tire anvaar ke sadqe
ai band-e-haq-go tirii guftaar ke sadqe
ai saahab-e-iimaa.n tire kirdaar ke sadqe
to banda-o-saahab bhii thaa muhtaaj-o-Ganii bhii
jalvo.n kaa amii.n bhii tire lab pe arinii bhii
har chehra-e-mardum ke KHad-o-KHaal bure the
dekho jise us shaKHs ke a.amaal bure the
mullaa ke bhii panDit ke bhii a.amaal bure the
jo jhuuT ne phailaa.e the vo jaal bure the
sachchaa tiraa din aur tirii raat bhii sachchii
sachchaa tiraa saudaa terii har baat bhii sachchii
is dar kaa pujaarii ko.ii us dar kaa pujaarii
maGrib kaa pujaarii ko.ii KHaavar kaa pujaarii
miinaa kaa pujaarii ko.ii saaGar kaa pujaarii
qabro.n kaa pujaarii ko.ii banjar kaa pujaarii
kasrat thii yahaa.n shirk kii tauhiid nahii.n thii
rozo.n kaa bhulaavaa thaa magar iid nahii.n thii
tuu hinduu-o-muslim ke gunaaho.n se thaa vaaqif
maz.hab kii sisaktii hu.ii aaho.n se thaa vaaqif
to sho.abada-baazo.n kii nigaaho.n se thaa vaaqif
to manzil-e-tauhiid kii raaho.n se thaa vaaqif
dar haq ke kabhii banda-e-haajii pe khule hai.n
ga.ngaa me.n nahaa kar bhii kabhii paap dhule hai.n
tuu ne ye kahaa sab se ba.Daa hukm-e-razaa.ii
tuu ne ye kahaa saa.nch kii qiimat nahii.n paa.ii
tuu ne ye kahaa so ke ye sab umr ga.nvaa.ii
tuu ne ye kahaa jhuuT hai sab zuhd-e-riyaa.ii
pur-maanii-o-pur-maGz hai.n nekii ke ishaare
har haal me.n har rang me.n rahbar hai.n hamaare
mai.n mast-e-mai-e-ishq huu.n tan riish-e-qalandar
tiirath hai agar ko.ii to is man ke hai andar
jaa.uu.n mai.n kahaa.n sajde ko man meraa hai mandir
hai azm miraa faateh-e-daaraa-o-sikandar
gaate hai.n jise devtaa bhii chaudah ratan bhii
raqsaa.n hai usii dar pe merii jaan bhii tan bhii
jo dars diyaa tuu ne vo azmat kaa amii.n hai
vo prem kii aKHlaaq kii KHaatam kaa nagii.n hai
kundan jo na ho jaa.e vo sonaa hii nahii.n hai
haq-go hai jo duniyaa hii me.n jannat kaa makii.n hai
sar jhukte hai.n sab ke tirii sarkaar me.n aa kar
ham sajda-kunaa.n hai.n tire darbaar me.n aa kar

Arsh Malsiyani
Nazm

teri yaad

kal magar phir tirii aavaaz ne ta.Dpaa hii diyaa
aalam-e-KHvaab se goyaa mujhe chau.nkaa hii diyaa
aur phir teraa har ik naqsh mire saamne thaa
tirii zulfe.n, tirii zulfo.n kii ghaTaa.o.n kaa samaa.n
tirii chitvan, tirii chitvan vahii baatin kaa suraaG
tire aariz vahii KHush-ra.ng mahakte hu.e phuul
tirii aa.nkhe.n vo sharaabo.n ke chhalakte hu.e jaam
tire lab jaise sajaa.e hu.e do barg-e-gulaab
tirii har baat kaa andaaz tirii chaal kaa husn
tire aane kaa nazaaraa tire jaane kaa samaa.n
tiraa har naqsh to kyaa tuu hii mire saamne thii
dil ne jo baat ka.ii baar kahii thii mujh se
shab ke anvaar me.n bhii din ke a.ndhero.n me.n bhii
mire ehsaas me.n ab guu.nj rahii thii paiham
is tarah tujh ko bhulaanaa ko.ii aasaan nahii.n
dil haqiiqat hai ko.ii KHvaab-e-pareshaa.n to nahii.n
yaad maanind-e-KHirad maslahat-andesh nahii.n
Duubtii ye nahii.n holland ke mai-KHaano.n me.n
gum nahii.n hotii ye paris ke sanam-KHaano.n me.n
ye bhaTaktii nahii.n espen ke gulzaaro.n me.n
bhuultii raah nahii.n misr ke baazaaro.n me.n
yaad maanind-e-KHirad maslahat-andesh nahii.n
aql ayyaar hai sau bhes banaa letii hai
yaad kaa aaj bhii andaaz vahii hai ki jo thaa
aaj bhii us kaa hai aaha.ng vahii rang vahii
bhes hai us kaa vahii taur vahii Dha.ng vahii
phir isii yaad ne kal raat jagaayaa mujh ko
aur phir teraa har ik naqsh mire saamne thaa

Jagan Nath Azad
Nazm

aurat

sub.h-dam jab gosha gosha matla-e-anvaar thaa
zarra zarra aalam-e-naira.ng kaa sarshaar thaa

Shaad Aarfi
Nazm

jadid-tar

tujh se ik umr kaa paimaa.n thaa magar meraa nasiib
inqilaabaat kaa mahkuum hu.aa jaataa hai
vo tasavvur jo ka.ii baar nikhaaraa mai.n ne
itnaa mauhuum hai ma.aduum hu.aa jaataa hai
terii aa.nkho.n me.n jagaa.e the sitaare mai.n ne
aur chhalkaa.e the gaalo.n me.n hayaa.o.n ke ayaaG
ko.ii ehsaas na thaa vaqt kii gardish kaa mujhe
varna kyaa raat se miltaa nahii.n suuraj kaa suraaG
is chakaa-chau.nd me.n ab tujh ko pukaaruu.n kaise
sail-e-anvaar me.n taaro.n kaa guzar kyaa hogaa
tah-e-daaman jo charaaGo.n ko chhupaa.e rakhuu.n
sochtaa huu.n ki phir anjaam-e-safar kyaa hogaa
mujh ko aavaaz na de vaqt ke sahraa.o.n me.n
mai.n bahut duur bahut duur nikal aayaa huu.n
mai.n ufuq par bhii nahii.n huu.n mai.n falak par bhii nahii.n
mai.n tire maazii-e-marhuum kaa ik saaya huu.n

Ahmad Nadeem Qasmi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now