Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "ashko.n"

Nazm MATCHES FOR "ashko.n"

Nazm

aaKHiri mulaqat

kuchh uj.Dii maa.nge.n shaamo.n kii
aavaaz shikasta jaamo.n kii
kuchh Tuk.De KHaalii botal ke
kuchh ghu.ngruu TuuTii paa.el ke
kuchh bikhre tinke chilman ke
kuchh purze apne daaman ke
ye taare kuchh tharraa.e hu.e
ye giit kabhii ke gaa.e hu.e
kuchh sher puraanii Gazlo.n ke
unvaan adhuurii nazmo.n ke
TuuTii hu.ii ik ashko.n kii la.Dii
ik KHushk qalam ik band gha.Dii
mat roko inhe.n paas aane do
ye mujh se milne aa.e hai.n
mai.n KHud na jinhe.n pahchaan sakuu.n
kuchh itne dhu.ndle saa.e hai.n

Jan Nisar Akhtar
Nazm

ye fasl umidon ki hamdam

ye fasl umiido.n kii hamdam
is baar bhii Gaarat jaa.egii
sab mehnat sub.ho.n shaamo.n kii
ab ke bhii akaarat jaa.egii
khetii ke kono.n-khudro.n me.n
phir apne lahuu kii khaad bharo
phir miTTii sii.ncho ashko.n se
phir aglii rut kii fikr karo

Faiz Ahmad Faiz
Nazm

ye pichhle ishq ki baaten hain

ashko.n kaa nuur luTaatii thii.n
jab saa.nse.n ujle chehro.n kii

Mohsin Naqvi
Nazm

hasan kuza-gar (1)

jahaa.n-zaad us daur me.n roz har roz
vo saKHtaa-baKHt aa kar
mujhe dekhtii chaak par paa-ba-gil sar-ba-zaanuu
to shaano.n se mujh ko hilaatii
(vahii chaak jo saal-haa-saal jiine kaa tanhaa sahaaraa rahaa thaa)
vo shaano.n se mujh ko hilaatii
hasan kuuza-gar hosh me.n aa
hasan apne viiraan ghar par nazar kar
ye bachcho.n ke tannuur kyuu.nkar bhare.nge
hasan ai mohabbat ke maare
mohabbat amiiro.n kii baazii
hasan apne diivaar-o-dar par nazar kar
mere kaan me.n ye navaa-e-hazii.n yuu.n thii jaise
kisii Duubte shaKHs ko zer-e-girdaab ko.ii pukaare!
vo ashko.n ke ambaar phuulo.n ke ambaar the haa.n
magar mai.n hasan kuuza-gar shahr-e-auhaam ke un
KHaraabo.n kaa majzuub thaa jin
me.n ko.ii sadaa ko.ii jumbish
kisii murG-e-parraa.n kaa saayaa
kisii zindagii kaa nishaa.n tak nahii.n thaa!

Noon Meem Rashid
Nazm

shishon ka masiha koi nahin

motii ho ki shiisha jaam ki dur
jo TuuT gayaa so TuuT gayaa
kab ashko.n se ju.D saktaa hai
jo TuuT gayaa so chhuuT gayaa

Faiz Ahmad Faiz
Nazm

man ka KHwab

mai.n so.ii jo ik shab to dekhaa ye KHvaab
ba.Dhaa aur jis se miraa iztiraab
ye dekhaa ki mai.n jaa rahii huu.n kahii.n
a.ndheraa hai aur raah miltii nahii.n
laraztaa thaa Dar se miraa baal baal
qadam kaa thaa dahshat se uThnaa muhaal
jo kuchh hausla paa ke aage ba.Dhii
to dekhaa qataar ek la.Dko.n kii thii
zamurrad sii poshaak pahne hu.e
diye sab ke haatho.n me.n jalte hu.e
vo chup-chaap the aage piichhe ravaa.n
KHudaa jaane jaanaa thaa un ko kahaa.n
isii soch me.n thii ki meraa pisar
mujhe is jamaa.at me.n aayaa nazar
vo piichhe thaa aur tez chaltaa na thaa
diyaa us ke haatho.n me.n jaltaa na thaa
kahaa mai.n ne pahchaan kar merii jaa.n
mujhe chho.D kar aa ga.e tum kahaa.n
judaa.ii me.n rahtii huu.n mai.n be-qaraar
pirotii huu.n har roz ashko.n ke haar
na parvaa hamaarii zaraa tum ne kii
ga.e chho.D achchhii vafaa tum ne kii
jo bachche ne dekhaa miraa pech-o-taab
diyaa us ne mu.nh pher kar yuu.n javaab
rulaatii hai tujh ko judaa.ii mirii
nahii.n is me.n kuchh bhii bhalaa.ii mirii
ye kah kar vo kuchh der tak chup rahaa
diyaa phir dikhaa kar ye kahne lagaa
samajhtii hai tuu ho gayaa kyaa ise?
tire aa.n.su.o.n ne bujhaayaa ise!

Allama Iqbal
Nazm

hasan kuza-gar (2)

ai jahaa.n-zaad,
nashaat us shab-e-be-raah-ravii kii
mai.n kahaa.n tak bhuuluu.n?
zor-e-mai thaa ki mere haath kii larzish thii
ki us raat ko.ii jaam giraa TuuT gayaa
tujhe hairat na hu.ii!
ki tire ghar ke dariicho.n ke ka.ii shiisho.n par
us se pahle kii bhii durze.n thii.n bahut
tujhe hairat na hu.ii!
ai jahaa.n-zaad,
mai.n kuuzo.n kii taraf apne taGaaro.n kii taraf
ab jo baGdaad se lauTaa huu.n
to mai.n sochtaa huu.n
sochtaa huu.n tuu mere saamne aa.iina rahii
sar-e-baazaar dariiche me.n sar-e-bistar-e-san.jaab kabhii
tuu mere saamne aa.iina rahii
jis me.n kuchh bhii nazar aayaa na mujhe
apnii hii suurat ke sivaa
apnii tanhaa.i-e-jaan-kaah kii dahshat ke sivaa!
likh rahaa huu.n tujhe KHat
aur vo aa.iina mere haath me.n hai
is me.n kuchh bhii nazar aataa nahii.n
ab ek hii suurat ke sivaa!
likh rahaa huu.n tujhe KHat
aur mujhe likhnaa bhii kahaa.n aataa hai?
lauh-e-aa.iinaa pe ashko.n kii phavvaro.n hii se
KHat kyuu.n na likhuu.n?
ai jahaa.n-zaad,
nashaat us shab-e-be-raah-ravii kii
mujhe phir laa.egii?
vaqt kyaa chiiz hai tuu jaantii hai?
vaqt ik aisaa pati.ngaa hai
jo diivaaro.n pe aa.iino.n pe
paimaano.n pe shiisho.n pe
mire jaam o subuu mere taGaaro.n pe
sadaa re.ngtaa hai

Noon Meem Rashid
Nazm

ramayan ka ek scene

ruKHsat hu.aa vo baap se le kar KHudaa kaa naam
raah-e-vafaa kii manzil-e-avval hu.ii tamaam
manzuur thaa jo maa.n kii ziyaarat kaa intizaam
daaman se ashk po.nchh ke dil se kiyaa kalaam
iz.haar-e-be-kasii se sitam hogaa aur bhii
dekhaa hame.n udaas to Gam hogaa aur bhii
dil ko sa.nbhaaltaa hu.aa aaKHir vo naunihaal
KHaamosh maa.n ke paas gayaa suurat-e-KHayaal
dekhaa to ek dar me.n hai baiThii vo KHasta-haal
saktaa saa ho gayaa hai ye hai shiddat-e-malaal
tan me.n lahuu kaa naam nahii.n zard rang hai
goyaa bashar nahii.n ko.ii tasviir-e-sa.ng hai
kyaa jaane kis KHayaal me.n gum thii vo be-gunaah
nuur-e-nazar ye diida-e-hasrat se kii nigaah
jumbish hu.ii labo.n ko bharii ek sard aah
lii gosha-ha-e-chashm se ashko.n ne ruKH kii raah
chehre kaa rang haalat-e-dil kholne lagaa
har muu-e-tan zabaa.n kii tarah bolne lagaa
aaKHir asiir-e-yaas kaa qufl-e-dahan khulaa
afsaana-e-shadaa.id-e-ra.nj-o-mehan khulaa
ik daftar-e-mazaalim-e-charKH-e-kuhan khulaa
vaa thaa dahaan-e-zaKHm ki baab-e-suKHan khulaa
dard-e-dil-e-Gariib jo sarf-e-bayaa.n hu.aa
KHuun-e-jigar kaa rang suKHan se 'ayaa.n hu.aa
ro kar kahaa KHamosh kha.De kyuu.n ho merii jaa.n
mai.n jaantii huu.n jis liye aa.e ho tum yahaa.n
sab kii KHushii yahii hai to sahraa ko ho ravaa.n
lekin mai.n apne mu.nh se na hargiz kahuu.ngii haa.n
kis tarah ban me.n aa.nkho.n ke taare ko bhej duu.n
jogii banaa ke raaj-dulaare ko bhej duu.n
duniyaa kaa ho gayaa hai ye kaisaa lahuu sapiid
andhaa kiye hu.e hai zar-o-maal kii umiid
anjaam kyaa ho ko.ii nahii.n jaantaa ye bhed
soche bashar to jism ho larzaa.n misaal-e-biid
likkhii hai kyaa hayaat-e-abad in ke vaaste
phailaa rahe hai.n jaal ye kis din ke vaaste
letii kisii faqiir ke ghar me.n agar janam
hote na merii jaan ko saamaan ye baham
Dastaa na saa.np ban ke mujhe shaukat-o-hasham
tum mere laal the mujhe kis saltanat se kam
mai.n KHush huu.n phuu.nk de ko.ii is taKHt-o-taaj ko
tum hii nahii.n to aag lagaa duu.ngii raaj ko
kin kin riyaazato.n se guzaare hai.n maah-o-saal
dekhii tumhaarii shakl jab ai mere naunihaal
puuraa hu.aa jo byaah kaa armaan thaa kamaal
aafat ye aa.ii mujh pe hu.e jab safed baal
chhaTtii huu.n un se jog liyaa jin ke vaaste
kyaa sab kiyaa thaa mai.n ne isii din ke vaaste
aise bhii naa-muraad bahut aa.e.nge nazar
ghar jin ke be-charaaG rahe aah 'umr bhar
rahtaa miraa bhii naKHl-e-tamannaa jo be-samar
ye jaa-e-sabr thii ki du'aa me.n nahii.n asar
lekin yahaa.n to ban ke muqaddar biga.D gayaa
phal phuul laa ke baaG-e-tamannaa uja.D gayaa
sarzad hu.e the mujh se KHudaa jaane kyaa gunaah
ma.njdhaar me.n jo yuu.n mirii kashtii hu.ii tabaah
aatii nazar nahii.n ko.ii amn-o-amaa.n kii raah
ab yaa.n se kuuch ho to 'adam me.n mile panaah
taqsiir merii KHaaliq-e-aalam bahal kare
aasaan mujh Gariib kii mushkil ajal kare
sun kar zabaa.n se maa.n kii ye fariyaad-e-dard-KHez
us KHasta-jaa.n ke dil pe chalii Gam kii teG-e-tez
'aalam ye thaa qariib ki aa.nkhe.n ho.n ashk-rez
lekin hazaar zabt se rone se kii gurez
sochaa yahii ki jaan se bekas guzar na jaa.e
naashaad ham ko dekh ke maa.n aur mar na jaa.e
phir arz kii ye maadar-e-naashaad ke huzuur
maayuus kyuu.n hai.n aap alam kaa hai kyuu.n vafuur
sadma ye shaaq 'aalam-e-piirii me.n hai zaruur
lekin na dil se kiijiye sabr-o-qaraar duur
shaayad KHizaa.n se shakl 'ayaa.n ho bahaar kii
kuchh maslahat isii me.n ho parvardigaar kii
ye jaa'l ye fareb ye saazish ye shor-o-shar
honaa jo hai sab us ke bahaane hai.n sar-ba-sar
asbaab-e-zaahirii me.n na in par karo nazar
kyaa jaane kyaa hai parda-e-qudrat me.n jalva-gar
KHaas us kii maslahat ko.ii pahchaantaa nahii.n
manzuur kyaa use hai ko.ii jaantaa nahii.n
raahat ho yaa ki ranj KHushii ho ki intishaar
vaajib har ek rang me.n hai shukr-e-kird-gaar
tum hii nahii.n ho kushta-e-naira.ng-e-rozgaar
maatam-kade me.n dahr ke laakho.n hai.n sogvaar
saKHtii sahii nahii.n ki uThaa.ii ka.Dii nahii.n
duniyaa me.n kyaa kisii pe musiibat pa.Dii nahii.n

Chakbast Braj Narayan
Nazm

kisan

KHuun hai jis kii javaanii kaa bahaar-e-rozgaar
jis ke ashko.n par faraaGat ke tabassum kaa madaar

Josh Malihabadi
Nazm

aaKHiri lamha

vo vaqt kabhii to aa.egaa jab dil ke chaman lahraa.e.nge
mar jaa.uu.n to kyaa marne se mire ye KHvaab nahii.n mar jaa.e.nge
ye KHvaab hii merii daulat hai.n ye KHvaab tumhe.n de jaa.uu.ngaa
is dahr me.n jiine marne ke aadaab tumhe.n de jaa.uu.ngaa
mumkin hai ki ye duniyaa kii ravish pal bhar ko tumhaaraa saath na de
kaa.nTo.n hii kaa tohfa nazr kare phuulo.n kii ko.ii sauGaat na de
mumkin hai tumhaare raste me.n har zulm-o-sitam diivaar bane
siine me.n dahakte sho.ale ho.n har saa.ns ko.ii aazaar bane
aise me.n na khul kar rah jaanaa ashko.n se na aa.nchal bhar lenaa
Gam aap ba.Dii ik taaqat hai ye taaqat bas me.n kar lenaa
ho azm to lau de uThtaa hai har zaKHm sulagte siine kaa
jo apnaa haq KHud chhiin sake miltaa hai use haq jiine kaa
lekin ye hamesha yaad rahe ik fard kii taaqat kuchh bhii nahii.n
jo bhii ho akele insaa.n se duniyaa kii baGaavat kuchh bhii nahii.n
tanhaa jo kisii ko paa.e.nge taaqat ke shikanje jak.De.nge
sau haath uThe.nge jab mil kar duniyaa kaa garebaa.n pak.De.nge
insaan vahii hai taabinda us raaz se jis kaa siinaa hai
auro.n ke liye to jiinaa hii KHud apne liye bhii jiinaa hai

Jan Nisar Akhtar
Nazm

wada

is se pahle ki terii chashm-e-karam
ma.azarat kii nigaah ban jaa.e
is se pahle ki tere baam kaa husn
rif.at-e-mehr-o-maah ban jaa.e
pyaar Dhal jaa.e mere ashko.n me.n
aarzuu ek aah ban jaa.e
mujh pe aa jaa.e ishq kaa ilzaam
aur tuu be-gunaah ban jaa.e
mai.n tiraa shahr chho.D jaa.uu.ngaa
is se pahle ki saadgii terii
lab-e-KHaamosh ko gila kah de
mai.n tujhe chaaragar KHayaal karuu.n
tuu mire Gam ko laa-davaa kah de
terii majbuuriyaa.n na dekh sake
aur dil tujh ko bevafaa kah de
jaane mai.n be-KHudii me.n kyaa puuchhuu.n
jaane tuu be-ruKHii se kyaa kah de
mai.n tiraa shahr chho.D jaa.uu.ngaa
chaara-e-dard ho bhii saktaa thaa
mujh ko itnii KHushii bahut kuchh hai
pyaar go jaavedaa.n nahii.n phir bhii
pyaar kii yaad bhii bahut kuchh hai
aane vaale dino.n kii zulmat me.n
aaj kii raushnii bahut kuchh hai
us tahii-daamanii ke aalam me.n
jo milaa hai vahii bahut kuchh hai
mai.n tiraa shahr chho.D jaa.uu.ngaa
chho.D kar saahil-e-muraad chalaa
ab safiina miraa kahii.n Thahre
zahar piinaa miraa muqaddar hai
aur tire ho.nT a.ngbii.n Thahre
kis tiraa tere aastaa.n pe rukuu.n
jab na paa.nv tale zamii.n Thahre
us se behtar hai dil yahii samjhe
tuu ne rokaa thaa ham nahii.n Thahre
mai.n tiraa shahr chho.D jaa.uu.ngaa
mujh ko itnaa zaruur kahnaa hai
vaqt-e-ruKHsat salaam se pahle
ko.ii naama nahii.n likhaa mai.n ne
tere harf-e-payaam se pahle
to.D luu.n rishta-e-nazar me.n bhii
tum utar jaa.o baam se pahle
le mirii jaan meraa va.ada hai
kal kisii vaqt shaam se pahle
mai.n tiraa shahr chho.D jaa.uu.ngaa

Saifuddin Saif
Nazm

ziyaada pas mat aana

ziyaada paas mat aanaa
mai.n vo tah-KHaana huu.n jis me.n
shikasta KHvaahisho.n ke an-ginat aaseb baste hai.n
jo aadhii shab to rote hai.n phir aadhii raat ha.nste hai.n
mirii taariikiyo.n me.n
gum-shuda sadiyo.n ke gard-aaluud naa-aasuuda KHvaabo.n ke
ka.ii ifriit baste hai.n
mirii KHushiyo.n pe rote hai.n mire ashko.n pe ha.nste hai.n
mire viiraan dil me.n re.ngtii hai.n maka.Diyaa.n Gam kii
tamannaa.o.n ke kaale naag shab-bhar sarsaraate hai.n
gunaaho.n ke jane bichchhuu
damo.n par apne apne Da.nk laade
apne apne zahr ke sho.alo.n me.n jalte hai.n
ye bichchhuu dukh nigalte aur pachhtaave ugalte hai.n

Rehman Faris
Nazm

mayus to hun wade se tere

palko.n pe larazte ashko.n me.n
tasviir jhalaktii hai terii

Sahir Ludhianvi
Nazm

meri jaan ab bhi apna husn wapas pher de mujhko

mirii jaa.n ab bhii apnaa husn vaapas pher de mujh ko
abhii tak dil me.n tere ishq kii qindiil raushan hai
tire jalvo.n se bazm-e-zindagii jannat-ba-daaman hai
mirii ruuh ab bhii tanhaa.ii me.n tujh ko yaad kartii hai
har ik taar-e-nafas me.n aarzuu bedaar hai ab bhii
har ik be-ra.ng saa.at muntazir hai terii aamad kii
nigaahe.n bichh rahii hai.n raasta zar-kaar hai ab bhii
magar jaan-e-hazii.n sadme sahegii aaKHirash kab tak
tirii be-mehriyo.n par jaan degii aaKHirash kab tak
tirii aavaaz me.n so.ii hu.ii shiiriiniyaa.n aaKHir
mire dil kii fasurda KHalvato.n me.n jaa na paa.e.ngii
ye ashko.n kii faraavaanii se dhundlaa.ii hu.ii aa.nkhe.n
tirii raanaa.iyo.n kii tamkanat ko bhuul jaa.e.ngii
pukaare.nge tujhe to lab ko.ii lazzat na paa.e.nge
guluu me.n terii ulfat ke taraane suukh jaa.e.nge
mabaadaa yaad-haa-e-ahd-e-maazii mahv ho jaa.e.n
ye paariina fasaane mauj-haa-e-Gam me.n kho jaa.e.n
mire dil kii taho.n se terii suurat dhul ke bah jaa.e
hariim-e-ishq kii sham-e-daraKHshaa.n bujh ke rah jaa.e
mabaadaa ajnabii duniyaa kii zulmat gher le tujh ko
mirii jaa.n ab bhii apnaa husn vaapas pher de mujh ko

Faiz Ahmad Faiz
Nazm

KHud-kalami

kyaa zaruurii hai ki ham phone pe baate.n bhii kare.n
kyaa zaruurii hai ki har lafz mahakne bhii lage
kyaa zaruurii hai ki har zaKHm se KHushbuu aa.e
kyaa zaruurii hai vafaadaar rahe.n ham dono.n
kyaa zaruurii hai davaa saarii asar kar jaa.e
kyaa zaruurii hai ki har KHvaab ham achchhaa dekhe.n
kyaa zaruurii hai ki jo chaahe.n vahii ho jaa.e
kyaa zaruurii hai ki mausam ho hamaaraa saathii
kyaa zaruurii hai safar me.n kahii.n saaya bhii mile
kyaa zaruurii hai tabassum yuu.nhii maujuud rahe
kyaa zaruurii hai har ik raah me.n jugnuu chamkii.n
kyaa zaruurii hai ki ashko.n ko ravaanii bhii mile
kyaa zaruurii hai ki milnaa hii muqaddar Thahre
kyaa zaruurii hai ki har roz mile.n ham dono.n
ham jahaa.n gaa.nv basaa.e.n vahaa.n ik jhiil bhii ho
kyaa zaruurii hai mohabbat tirii takmiil bhii ho

Munawwar Rana
Nazm

payam-e-amal

gar qaum kii KHidmat kartaa hai
ehsaan tuu kis par dhartaa hai
kyo.n Gairo.n kaa dam bhartaa hai
kyo.n KHauf ke maare martaa hai
uTh baa.ndh kamar kyaa Dartaa hai
phir dekh KHudaa kyaa kartaa hai
jo umre.n muft ga.nvaa.egaa
vo aaKHir ko pachhtaa.egaa
kuchh baiThe haath na aa.egaa
jo Dhuu.nDegaa vo paa.egaa
tuu kab tak der lagaa.egaa
ye vaqt bhii aaKHir jaa.egaa
uTh baa.ndh kamar kyaa Dartaa hai
phir dekh KHudaa kyaa kartaa hai
jo mauqa paa kar kho.egaa
vo ashko.n se mu.nh dho.egaa
jo so.egaa vo ro.egaa
aur kaaTegaa jo bo.egaa
tuu Gaafil kab tak so.egaa
jo honaa hogaa ho.egaa
uTh baa.ndh kamar kyaa Dartaa hai
phir dekh KHudaa kyaa kartaa hai
ye duniyaa aaKHir faanii hai
aur jaan bhii ik din jaanii hai
phir tujh ko kyo.n hairaanii hai
kar Daal jo dil me.n Thaanii hai
jab himmat kii jaulaanii hai
to patthar bhii phir paanii hai
uTh baa.ndh kamar kyaa Dartaa hai
phir dekh KHudaa kyaa kartaa hai

Mohammad Farooq Deewana
Nazm

ghum raha hai pit ka pyasa

dil me.n aag dabii hai Darnaa
aa.nkho.n me.n ashko.n kaa jharnaa
lab par dard kaa baara-maasaa
ghuum rahaa hai piit kaa pyaasaa

Ibn۔e۔Insha
Nazm

zindagi

zindagii kahne ko be-maaya sahii
Gam kaa sarmaaya sahii
mai.n ne is ke liye kyaa kyaa na kiyaa
kabhii aasaanii se ik saa.ns bhii yamraaj ko apnaa na diyaa
aaj se pahle bahut pahle
isii aa.ngan me.n
dhuup-bhare daaman me.n
mai.n kha.Daa thaa mire talvo.n se dhu.aa.n uThtaa thaa
ek be-naam saa be-ra.ng saa KHauf
kachche ehsaas pe chhaayaa thaa ki jal jaa.uu.ngaa
mai.n pighal jaa.uu.ngaa
aur pighal kar miraa kamzor saa ''mai.n''
qatra qatra mire maathe se Tapak jaa.egaa
ro rahaa thaa magar ashko.n ke baGair
chiiKHtaa thaa magar aavaaz na thii
maut lahraatii thii sau shaklo.n me.n
mai.n ne har shakl ko ghabraa ke KHudaa maan liyaa
kaaT ke rakh diye sandal ke pur-asraar daraKHt
aur patthar se nikaalaa sho.ala
aur raushan kiyaa apne se ba.Daa ek alaav
jaanvar zab.h kiye itne ki KHuu.n kii lahre.n
paa.nv se uTh ke kamar tak aa.ii.n
aur kamar se mire sar tak aa.ii.n

Kaifi Azmi
Nazm

man tere jaane ke baad

phone par kis ko sunaa.uu.ngii mai.n apnaa haal-e-zaar
kis kii baate.n sun ke aa.egaa mire dil ko qaraar
kaun po.nchhegaa mire bahte hu.e ashko.n kii dhaar
kaun paanii pa.Dh ke degaa hogaa jab mujh ko buKHaar
dil me.n vahshat kaa baseraa maa.n tire jaane ke baa'd
dam ghuTaa jaataa hai meraa maa.n tire jaane ke baa'd

Shahnaz Parveen Shazi
Nazm

ban-bas

mere shahr ke saare raste band hai.n logo
mai.n is shahr kaa naGma-gar
jo do ik mausam Gurbat ke dukh jhel ke aayaa
taaki apne ghar kii diivaaro.n se
apnii thakii hu.ii aur tarsii hu.ii
aa.nkhe.n sahlaa.uu.n
apne darvaaze ke utarte roGan ko
apne ashko.n se saiqal kar luu.n
apne chaman ke jale hu.e paudo.n
aur gard-aaluud daraKHto.n kii
murda shaaKHo.n par bain karuu.n
har mahjuur sutuun ko itnaa TuuT ke chuumuu.n
mere labo.n ke KHuun se
un ke naqsh-o-nigaar sabhii jii uThe.n
galii ke logo.n ko itnaa dekhuu.n
itnaa dekhuu.n
merii aa.nkhe.n
barso.n kii tarsii hu.ii aa.nkhe.n
chehro.n ke aa.ngan ban jaa.e.n
phir mai.n apnaa saaz uThaa.uu.n
aa.nsu.o.n aur muskaano.n se jhilmil jhilmil
nazme.n Gazle.n giit sunaa.uu.n
apne pyaaro.n
dard ke maaro.n kaa darmaa.n ban jaa.uu.n
lekin mere shahr ke saare rasto.n par
ab baa.D hai lohe ke kaa.nTo.n kii
shah darvaaze par kuchh pahre-daar kha.De hai.n
jo mujh se aur mujh jaise dil vaalo.n kii
pahchaan se aarii
mere saaz se
sa.ngiino.n se baat kare.n
mai.n un se kahtaa huu.n
dekho
mai.n is shahr kaa naGma-gar huu.n
barso.n baa'd ka.Dii raaho.n kii
saarii aziyyat jhel ke ab vaapas aayaa huu.n
us miTTii kii KHaatir
jis kii KHushbu.e.n
duniyaa bhar kii do-shiizaa.o.n ke jismo.n kii mahko.n se
aur saare jahaa.n ke
sabhii gulaabo.n se
ba.Dh kar hai
mujh ko shahr me.n
mere shahr me.n jaane do
lekin tane hu.e nezo.n ne
mere jism ko yuu.n barmaayaa
mere saaz ko yuu.n rezaayaa
meraa humaktaa KHuun aur mere sisakte naGme
shah-darvaaze kii dahliiz se
riste riste
shahr ke andar jaa pahu.nche hai.n
aur mai.n apne jism kaa malba
saaz kaa laasha
apne shahr ke shah-darvaaze
kii dahliiz pe chho.D ke
phir anjaane shahro.n kii shahraaho.n par
majbuur-e-safar huu.n
jin ko taj kar ghar aayaa thaa
jin ko taj kar ghar aayaa thaa

Ahmad Faraz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now