Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "bargad"

Nazm MATCHES FOR "bargad"

Nazm

pandrah august

yahii jagah thii yahii din thaa aur yahii lamhaat
saro.n pe chhaa.ii thii sadiyo.n se ik jo kaalii raat
isii jagah isii din to milii thii us ko maat
isii jagah isii din to hu.aa thaa ye elaan
a.ndhere haar ga.e zindaabaad hindostaan
yahii.n to ham ne kahaa thaa ye kar dikhaanaa hai
jo zaKHm tan pe hai bhaarat ke us ko bharnaa hai
jo daaG maathe pe bhaarat ke hai miTaanaa hai
yahii.n to khaa.ii thii ham sab ne ye qasam us din
yahii.n se nikle the apne safar pe ham us din
yahii.n thaa guu.nj uThaa vande-maatram us din
hai jur.ato.n kaa safar vaqt kii hai raahguzar
nazar ke saamne hai saaTh miil kaa patthar
ko.ii jo puuchhe kiyaa kyaa hai kuchh kiyaa hai agar
to us se kah do ki vo aa.e dekh le aa kar
lagaayaa ham ne thaa jamhuuriyat kaa jo paudhaa
vo aaj ek ghaneraa saa uu.nchaa bargad hai
aur us ke saa.e me.n kyaa badlaa kitnaa badlaa hai
kab intihaa hai ko.ii is kii kab ko.ii had hai

Javed Akhtar
Nazm

bargad

mere raste me.n ik mo.D thaa
aur us mo.D par
pe.D thaa ek bargad kaa
uu.nchaa
ghanaa
jis ke saa.e me.n meraa bahut vaqt biitaa hai
lekin hamesha yahii mai.n ne sochaa
ki raste me.n ye mo.D hii is liye hai
ki ye pe.D hai
umr kii aa.ndhiyo.n me.n
vo pe.D ek din gir gayaa hai
mo.D lekin hai ab tak vahii.n kaa vahii.n

Javed Akhtar
Nazm

baz-amad --- ek muntaj

ik parinda kisii ik pe.D kii Tahnii pe chahaktaa hai kahii.n
ek gaataa hu.aa yuu.n jaataa hai dhartii se falak kii jaanib
puurii quvvat se ko.ii ge.nd uchhaale jaise
ik phudaktaa hai sar-e-shaaKH pe jis tarah ko.ii
aamad-e-fasl-e-bahaarii kii KHushii me.n naache
guu.ndnii bojh se apne hii jhukii pa.Dtii hai
naaznii.n jaise hai ko.ii ye bharii mahfil me.n
aur kal haath hu.e hai.n piile
koyale.n kuuktii hai.n
jaamune.n pakkii hai.n, aamo.n pe bahaar aa.ii hai
arGanuu.n bajtaa hai yakjaa.ii kaa
niim ke pe.Do.n me.n jhuule hai.n jidhar dekho udhar
saavanii gaatii hai.n sab la.Dkiyaa.n aavaaz milaa kar har-suu
aur is aavaaz se guu.nj uTThii hai bastii saarii
mai.n kabhii ek kabhii duusre jhuule ke qarii.n jaataa huu.n
ek hii kam hai, vahii chehra nahii.n
aaKHirash puuchh hii letaa huu.n kisii se ba.Dh kar
kyuu.n habiiba nahii.n aa.ii ab tak?
khilkhilaa pa.Dtii hai.n sab la.Dkiyaa.n sun kar ye naam
lo ye sapne me.n hai.n, ik kahtii hai
baaolii sapnaa nahii.n, shahr se aa.e hai.n abhii
duusrii Toktii hai
baat se baat nikal chaltii hai
ThaaT kii aa.ii thii baaraat, chambelii ne kahaa
band-baajaa bhii thaa, diipaa bolii
aur dulhan pe hu.aa kitnaa bikher
kuchh na kuchh kahtii rahii.n sab hii magar mai.n ne sirf
itnaa puuchhaa vo nadii bahtii hai ab bhii, ki nahii.n
jis se vaabasta hai.n ham aur ye bastii saarii?
kyuu.n nahii.n bahtii, chambelii ne kahaa
aur vo bargad kaa ghanaa pe.D kinaare us ke?
vo bhii qaa.em hai abhii tak yuu.nhii
va.ada kar ke jo 'habiiba' nahii.n aatii thii kabhii
aa.nkhe.n dhotaa thaa nadii me.n jaakar
aur bargad kii ghanii chhaa.nv me.n so jaataa thaa

Akhtarul Iman
Nazm

parchhaiyan

1
ye shaam ik aa.iina-e-niil-guu.n ye nam ye mahak
ye manzaro.n kii jhalak khet baaG dariyaa gaa.nv
vo kuchh sulagte hu.e kuchh sulagne vaale alaav
siyaahiyo.n kaa dabe-paa.nv aasmaa.n se nuzuul
laTo.n ko khol de jis tarah shaam kii devii
puraane vaqt ke bargad kii ye udaas jaTaa.e.n
qariib o duur ye go dhuul kii ubhartii ghaTaa.e.n
ye kaa.enaat kaa Thahraa.o ye athaah sukuut
ye niim-tiirah fazaa roz-e-garm kaa taabuut
dhu.aa.n dhu.aa.n sii zamii.n hai ghulaa ghulaa saa falak
2
ye chaa.ndnii ye havaa.e.n ye shaaKH-e-gul kii lachak
ye daur-e-baada ye saaz-e-KHamosh fitrat ke
sunaa.ii dene lagii jagmagaate siino.n me.n
dilo.n ke naazuk o shaffaaf aabgiino.n me.n
tire KHayaal kii pa.Dtii hu.ii kiran kii khanak
3
ye raat chhantii havaa.o.n kii so.ndhii so.ndhii mahak
ye khet kartii hu.ii chaa.ndnii kii narm damak
sugandh raat kii raanii kii jab machaltii hai
fazaa me.n ruuh-e-tarab karvaTe.n badaltii hai
ye ruup sar se qadam tak hasiin jaise gunaah
ye aarizo.n kii damak ye fusuun-e-chashm-e-siyaah
ye dhaj na de jo ajantaa kii san.ato.n ko panaah
ye siina pa.D hii ga.ii dev lok kii bhii nigaah
ye sar-zamiin se aakaash kii parastish-gaah
utaarte hai.n tirii aartii sitaara o maah
sajal badan kii bayaa.n kis tarah ho kaifiyyat
sarasvatii ke bajaate hu.e sitaar kii gat
jamaal-e-yaar tire gulsitaa.n kii rah rah ke
jabiin-e-naaz tirii kahkashaa.n kii rah rah ke
dilo.n me.n aa.iina-dar-aa.iina suhaanii jhalak
4
ye chhab ye ruup ye joban ye saj ye dhaj ye lahak
chamakte taaro.n kii kirno.n kii narm narm phuvaar
ye rasmasaate badan kaa uThaan aur ye ubhaar
fazaa ke aa.iina me.n jaise lahlahaa.e bahaar
ye be-qaraar ye be-iKHtiyaar josh-e-numuud
ki jaise nuur kaa favvaara ho shafaq-aaluud
ye jalve paikar-e-shab-taab ke ye bazm-e-shohuud
ye mastiyaa.n ki mai-e-saaf-o-durd sab be-buud
KHajil ho laal-e-yaman uzv uzv kii vo Dalak
5
bas ik sitaara-e-shi.ngaraf kii jabii.n pe jhamak
vo chaal jis se labaalab gulaabiyaa.n chhalke.n
sakuu.n-numaa KHam-e-abru ye adh-khulii.n palke.n
har ik nigaah se aiman kii bijliyaa.n lapke.n
ye aa.nkh jis me.n ka.ii aasmaa.n dikhaa.ii pa.De.n
u.Daa de.n hosh vo kaano.n kii saada saada lave.n
ghaTaa.e.n vajd me.n aa.e.n ye gesu.o.n kii laTak
6
ye kaif-o-ra.ng-e-nazaara ye bijliyo.n kii lapak
ki jaise krishn se raadhaa kii aa.nkh ishaare kare
vo shoKH ishaare ki rabbaaniyat bhii jaa.e jhapak
jamaal sar se qadam tak tamaam sho.ala hai
sukuun jumbish o ram tak tamaam sho.ala hai
magar vo sho.ala ki aa.nkho.n me.n Daal de ThanDak
7
ye raat nii.nd me.n Duube hu.e se hai.n diipak
fazaa me.n bujh ga.e u.D u.D ke jugnu.o.n ke sharaar
kuchh aur taaro.n kii aa.nkho.n kaa ba.Dh chalaa hai KHumaar
fasurda chhiTkii hu.ii chaa.ndnii kaa dhundlaa Gubaar
ye bhiigii bhiigii uudaahaT ye bhiigaa bhiigaa nuur
ki jaise chashma-e-zulmaat me.n jale kaafuur
ye Dhaltii raat sitaaro.n ke qalb kaa ye gudaaz
KHunuk fazaa me.n tiraa shabnamii tabassum-e-naaz
jhalak jamaal kii ta.abiir KHvaab aa.iina-saaz
jahaa.n se jism ko dekhe.n tamaam naaz-o-niyaaz
jahaa.n nigaah Thahar jaa.e raaz-andar-raaz
sukuut-e-niim-shabii lahlahe badan kaa nikhaar
ki jaise nii.nd kii vaadii me.n jaagtaa sansaar
hai bazm-e-maah ki parchhaa.iyo.n kii bastii hai
fazaa kii oT se vo KHaamushii barastii hai
ki buu.nd buu.nd se paidaa ho gosh o dil me.n khanak
8
kisii KHayaal me.n hai Garq chaa.ndnii kii chamak
havaa.e.n nii.nd ke kheto.n se jaise aatii ho.n
hayaat o maut me.n sargoshiyaa.n sii hotii hai.n
karo.Do.n saal ke jaage sitaare nam-diida
siyaah gesu.o.n ke saa.np niim-KHvaabiida
ye pichhlii raat ye rag rag me.n narm narm kasak

Firaq Gorakhpuri
Nazm

masjid

duur bargad kii ghanii chhaa.nv me.n KHaamosh o maluul
jis jagah raat ke taariik kafan ke niiche
maazii o haal gunahgaar namaazii kii tarah
apne aamaal pe ro lete hai.n chupke chupke

Akhtarul Iman
Nazm

kale safed paron wala parinda aur meri ek sham

bargad ke niiche baiTho yaa suulii cha.Dh jaa.o
bhai.nse la.Dne se baaz nahii.n aa.e.nge
maut se ham ne ek ta.aavun kar rakkhaa hai
sa.Dko.n par se har lamha ik mayyat jaatii hai
pas-manzar me.n kyaa hotaa hai nazar kahaa.n jaatii hai
saamne jo kuchh hai ra.ngo.n aavaazo.n chehro.n kaa melaa hai!

Akhtarul Iman
Nazm

meri dost

merii ek dost
ham-dam aur hamraaz
us kii gahrii udaas aa.nkhe.n
suruud ke suro.n jaisii
bargad kii chhaalo.n jaise baal
ho.nTo.n par an-kahaa pyaar
lams me.n jaa.n-gudaaz narmii
us kii KHaamoshii me.n
aaKHirii-dam tak
merii ham-safarii kaa va.ada hai
yaas naam hai us kaa

Harbans Mukhia
Nazm

saDak

sa.Dak masaafat kii ujlato.n me.n
ghire hu.e sab musaafiro.n ko
ba-Gaur fursat se dekhtii hai
kisii ke chehre pe surKH vahshat chamak rahii hai
kisii ke chehre se zard hairat chhalak rahii hai
kisii kii aa.nkhe.n harii-bharii hai.n
kabiir had se ubhar rahaa hai
saGiir qad se guzar rahaa hai
kisii kaa tyre kisii ke pahiye ko khaa rahaa hai
kisii kaa juutaa kisii kii chappal chabaa rahaa hai
kisii ke pairo.n me.n aa rahaa hai kisii kaa bachcha
kisii kaa bachcha kisii ke shaane pe jaa rahaa hai
ko.ii Thikaane pe ko.ii khaane pe jaa rahaa hai
habiib dast-e-raqiib thaame
Gariib-KHaane pe jaa rahaa hai
amiir pi.njra banaa rahaa hai
Gulaam kartab dikhaa rahaa hai
aur apne beTe ke saath chhat par
amiin kunDaa lagaa rahaa hai
nizaam Taa.nga chalaa rahaa hai
kisii kalaa.ii pe jagmagaatii hu.ii gha.Dii hai
magar abhii vo rukii hu.ii hai
kisii ke chehre pe baara bajne me.n paa.nch second rah ga.e hai.n
kisii kii haathii-numaa prado
sa.Dak se aise guzar rahii hai
sivaa.e is ke kahii.n bhii jaise ko.ii nahii.n ho
kisii kii mo.nchhe.n jhukii hu.ii hai.n
kisii kii baa.nchhe.n khilii hu.ii hai.n
kisii kii taxi kisii kii foksii milii hu.ii hai.n
kisii ke lab aur kisii kii aa.nkhe.n silii hu.ii hai.n
kisii ke kap.De phaTe hu.e hai.n
kisii kii pag.Dii chamak rahii hai
kisii kii ra.ngat kisii kii Topii u.Dii hu.ii hai
shariif nazre.n uThaa uThaa kar
kamaan jismo.n pe apnii vahshat ke tiir kab se chalaa rahaa hai
naziir nazre.n churaa rahaa hai
nafiis apne cluff kii shikno.n ko ro rahaa hai
hakiim apne matab ke shiisho.n ko dho rahaa hai
kisii kii aa.nkho.n ke dhu.ndle shiisho.n me.n us ke maazii kii jhalkiyaa.n hai.n
kisii kii aa.nkho.n me.n aane vaale hasiin lamho.n kii mastiyaa.n hai.n
kisii kii aa.nkho.n me.n rat-jago.n kii kuchh arGavaanii sii Doriyaa.n hai.n
kisii ke kaa.ndhe pe us ke KHvaabo.n kii boriyaa.n hai.n
kabaa.D-KHaane pe baasii Tuk.Do.n kii or kitaabo.n kii boriyaa.n hai.n
buzurg bargad ke niiche buu.Dhaa kha.Daa hu.aa hai
aur us ke haatho.n me.n tape lipTii hu.ii chha.Dii hai
police kii gaa.Dii pikiT lagaa kar
sa.Dak pe tirchhii kha.Dii hu.ii hai
aur ek mazduur apnaa daaman uThaa.e be-bas kha.Daa hu.aa hai
aur ik sipaahii ki us ke nefe me.n u.ngliyo.n ko ghumaa rahaa hai
vahii.n pe shaahid siyaah chashma lagaa ke KHud ko chhupaa rahaa hai
news channel kii chhoTii gaa.Dii ba.Dii KHabar kii talaash me.n hai
do sabzii vaale bhii apnii pherii lagaa rahe hai.n
to phuul vaale ke sar pe phuulo.n kii Tokarii hai
kisii kii aa.nkho.n me.n naukrii hai
kisii kii aa.nkho.n me.n chhokrii hai
vaqaar sar ko jhukaa rahaa hai
faraaz khaa.ii me.n jaa rahaa hai
to giilii cigarette ke kash lagaa kar
navaab rickshaw chalaa rahaa hai
saliim kannii ghumaa rahaa hai
vakiil vardii me.n jaa rahaa hai
zamiir baGle.n bajaa rahaa hai
aur ek vaa.iz bataa rahaa hai
KHudaa ko naaraaz karne vaale jahannamii hai.n
KHudaa ko raazii karo KHudaaraa
KHudaa ko raazii karo KHudaaraa
aur us ke aage nasiir akmal kamaal shaadaab Gulaam saare
nazar jhukaa.e kha.De hu.e hai.n
ki chashm-e-biinaa agar kahii.n hai
to samjho paataal tak ga.Dhii hai
kisii ko a-c KHariidnaa hai
kisii ko pii sii KHariidnaa hai
kisii kii bas aur kisii kii bii-sii nikal rahii hai
aqiila KHaala ke dono.n haatho.n me.n aaTh thaile laTak rahe hai.n
aur aate jaate sabhii musaafir
unhe.n musalsal khaTak rahe hai.n
ziyaa a.ndhere me.n jaa rahaa hai
gulaab kachraa jalaa rahaa hai
aziim makkhii a.Daa rahaa hai
kaliim guTkaa chabaa rahaa hai
to ghanTa-package pe jaane kab se
fahiim gappe.n la.Daa rahaa hai
sabaq musaavaat kaa sikhaane
vaziir gaa.Dii me.n jaa rahaa hai
sanaa nidaa ko na.e latiife sunaa rahii hai
hinaa hathelii ko takte takte puraane raste se aa rahii hai
aur apnii bhaavaj kaa haath thaame
zubaida check-up ko jaa rahii hai
vo apnii nazre.n kabhii idhar ko kabhii adhar ko gumaa rahii hai
magar ko.ii shai use musalsal bulaa rahii rahii hai
ajiib ujlat ajiib vahshat ajiib Gaflat kaa maajraa hai
kahuu.n mai.n kis se mire KHudaayaa ye kaisii KHilqat kaa maajraa hai
ki apnii mastii me.n mast ho kar
ye sab musaafir guzar rahe
na.e musaafir ubhar rahe hai.n
sa.Dak jahaa.n thii vahii.n kha.Dii hai
magar haqiiqat bahut ba.Dii hai
sa.Dak pe billii marii pa.Dii hai

Imran Shamshad Narmi
Nazm

silsile sawalon ke

hazaaro.n sadiyaa.n guzar chukii hai.n
kisii samay me.n vo thii satvantii
kahii.n saavitrii
kahii.n thii miiraa
har ek yug me.n
aqiidato.n kii lahar me.n bhiigii
tapasyaa ke sehr me.n gum-sum
rivaayato.n ke nashe me.n Duubii
tumhaare qadmo.n kii gard ko vo tilak banaatii
diye jalaatii thii naqsh-e-paa par
janam janam kaa aTuuT rishta
nibaahe jaatii
hazaaro.n sadiyo.n safar kiyaa hai
nazar jamaa.e
tumhaare piichhe
tumhaare dukh par dukhii hu.ii hai
tumhaare sukh par sukhii hu.ii hai
magar bataa.o
hazaaro.n sadiyo.n ke darmiyaa.n ko.ii aisaa lamha
jo tum ne is ke liye jiyaa ho
sivaa.e aa.nsuu ke ko.ii jugnuu
kabhii jo aa.nchal me.n ja.D diyaa ho
puraane bargad pe ek dhaagaa
kahii.n to us ke bhii naam kaa ho
a.ndherii taaqo.n pe us kii KHaatir
rakhaa hu.aa bhii to ik diyaa ho
nahii.n hai kuchh bhii
kahii.n nahii.n hai
vo apnii taariiKH me.n tumhaaraa
likhe bhii gar naam
kis tarah se

Kahkashan Tabassum
Nazm

hum shair hote hain

ham paidaa karte hai.n
ham giilii miTTii ko muTThii me.n bhii.nchaa karte hai.n
to shakle.n bantii hai.n
ham un kii cho.nche.n khol ke saa.nse.n phuu.nkaa karte hai.n
jo miTTii the vo chhuu lene se taa.ir hote hai.n
ham shaa.ir hote hai.n
kan.aan me.n rahte hai.n
jab jalva karte hai.n
to shashdar a.ngushto.n ko pore.n nashtar detii hai.n
phir KHuun Tapaktaa hai jo sard nahii.n hotaa
ik sahmaa saa sakta hotaa hai dard nahii.n hotaa
yuunaan ke Daaku hai.n
ham devtaa.o.n ke mahal me.n naqab lagaayaa karte hai.n
ham aasmaan kaa niilaa shah-darvaaza to.Dte hai.n
ham aag churaate hai.n
to is duniyaa kii yaKH choTii se barf pighaltii hai
phir jame hu.e siine milte hai.n
saa.ns humaktii hai
aur shiryaano.n ke mu.nh khulte hai.n
KHuun dha.Daktaa hai
jiivan-raamaayan me.n
jab raavan istibdaadii kaarobaar chalaataa hai
ham siitaa likhte hai.n
jab rath ke pahiye jismo.n ke poshaak kuchalte hai.n
to giitaa likhte hai.n
jab ho.nTo.n ke sahme kap.Do.n par baKHiya hotaa hai
ham bolaa karte hai.n
jab manDii se ek ek taraazuu Gaa.eb hotaa hai
to jiivan ko miizaan pe rakh kar tolaa karte hai.n
mazduurii karte hai.n
ham lafzo.n ke jangal se lak.Dii kaaTaa karte hai.n
ham arkashii ke maahir hai.n ambaar lagaate hai.n
phir randa pherte hai.n phir barmaa dete hai.n
phir budh milaate hai.n phir chuul biThaate hai.n
ham tho.De tho.De hote hai.n
is bharii bharaa.ii duniyaa me.n ham kam-kam hote hai.n
jab shahr me.n jangal dar aa.e aur us kaa chalan ja.nglaa.e
to ham Gaar se aate hai.n
jab jangal shahr kii zad me.n ho aur us kaa sukuu.n shahraa.e
to bargad se nikalte hai.n
ham tho.De tho.De hote hai.n
ham kam-kam hote hai.n
ham shaa.ir hote hai.n

Waheed Ahmad
Nazm

hum donon

ham dono.n ik bastii ke do bargad the
ham dono.n pe bachche jhuulaa karte the
ham dono.n ko maa.e.n kosaa kartii thii.n
phir ham me.n se ek ne chalnaa siikh liyaa

Shahbaz Rizvi
Nazm

irfan

mere baap ne marte dam bhii
mujh se bas ye baat kahii thii
gardan bhii u.D jaa.e merii
sach boluu.n mai.n jhuuT na boluu.n
us din se mai.n aaj ke din tak
pag pag jhuuT se Takkar letaa
sach ko reza reza kartaa
apne dil ko in rezo.n se chhalnii kartaa
KHuun me.n lat-pat ghuum rahaa huu.n
aur miraa daaman hai KHaalii
lekin ab mai.n thak saa gayaa huu.n
bargad kii chhaayaa me.n baiThaa kitnii der se soch rahaa huu.n
kyuu.n na jhuuT se haath milaa luu.n
aur chupke se qabr pe apne baap kii jaa kar itnaa kah duu.n
tum jhuuTe the

Sulaiman Areeb Haidarabadi
Nazm

na ek patte ko ro baba

shafaq jab phuul kar ra.ng-e-hinaa thii
aur havaa ke lab sile the
ek buu.Dhaa pe.D bargad kaa
kha.Daa ga.ngaa-kinaare
dil-girafta
KHud se mahv-e-guftuguu thaa
''vo mirii ik shaaKH kaa patta
mire hii jism kaa hissa
giraa
gir kar sitaaraa ho gayaa
paanii kaa pyaaraa ho gayaa
mujh se kinaara ho gayaa''
vahii.n sargoshiyo.n me.n
ik pati.ngaa
gungunaayaa kaan me.n us ke
''niraashaa tum me.n kyuu.n jaagii
mire baabaa?
tumhaare a.ng ke kitne hii patte
ab bhii gun gaate tumhaaraa hai.n
sahaaraa tum bano un kaa
tumhaaraa vo sahaaraa hai.n
na ik patte ko ro baabaa!''

Jafar Sahni
Nazm

ai ruKH-e-yar idhar dekh zara

ham ki vaamaandagi-e-shauq kaa lamha le kar
aa ga.e hai.n tire paikar ke ujaalo.n ke qariib
kitnii sadiyo.n kii masaafat le kar
ek darmaa.nda tahii-dast musaafir kii tarah
aa ke Thahre hai.n tire pyaar ke bargad niiche
ham ki mas.huur tilismaat-kade hai.n tere
terii aa.nkho.n tere ho.nTo.n terii zulfo.n ke asiir
terii tamannaa ke faqiir
muntazir hai.n ki tire jism kaa partav ubhre
aur raushan ho.n taKHayyul kii vo raahe.n jin par
kab se phailii hu.ii gumnaam sii taariikii hai
yuu.n simaT jaa.e mire baKHt pe utrii hu.ii raat
nuur chhan kar tire paikar kii tunuk-taabii se
merii be-nuur sii duniyaa ko munavvar kar de
mere KHvaabo.n ko haqiiqat kar de
ai ruKH-e-yaar idhar dekh zaraa
mere dil-daar idhar dekh zaraa
jis kaa ik umr tamannaa.ii rahaa
apne gul-rang se jalvo.n ke tufail
mujh ko vo kaif vo ra.anaa.ii de
ek be-naam se rishte ko paziiraa.ii de
ab to ik lams-e-masiihaa.ii de
ham ko ai jaan-e-jahaa.n itnii ijaazat de de
jis gha.Dii shaam Dhale
terii gesuu kii tarah shab kii hasii.n zulf khule
tere aa.nchal kaa kinaara le kar
ek be-naam sahaaraa le kar
apnii betaab tamannaa.o.n kii girhe.n khole.n
tere zaanuu pe ye sar rakh ke
do aa.nsuu ro le.n

Salman Basit
Nazm

bachpan

na.ii na.ii duniyaa lagtii thii na.e na.e se log
khiltii kaliyaa.n sub.h savere kaise maddham maddham
hairat hotii phuul pe kaise jam jaatii hai shabnam
chi.Diyo.n kii aavaaz sunaatii ghu.ngruu jaisii chham-chham
baarish kii buu.nde.n girtii.n pe.Do.n pe rim-jhim rim-jhim
bargad kii daa.Dhii ko pak.De bachche pe.ng ba.Dhaate
kavve mainaa koyal chi.Diyaa.n mil kar shor machaate
maa.n ke haatho.n kii ik KHushbuu bastii thii roTii me.n
binaa shakkar lagtaa thaa miiThaa ThanDaa ThanDaa paanii
thaa kitnaa ma.asuum saa bachpan baat na ham ne jaanii
vo panchhii miiThii aavaaze.n nuur sii ujlii bhor
phisal ga.ii kyo.n haath se apne vo sapno.n kii Dor

Kausar Jahan Kausar
Nazm

kaghaz ki nayya

jaa nayyaa naanii ke gaa.nv
ThanDii hai bargad kii chhaa.nv

Adil Hayat
Nazm

kaun samjhe tujhe

shaa.irii
tuu parindo.n kii cho.ncho.n pe ugtii hu.ii naGmagii
tuu daraKHto.n kii chhaa.nv me.n paltii hu.ii saadgii
tuu bahaaro.n ke daaman me.n bikhrii hu.ii be-KHudii
tuu sulagte savaalo.n ke baatin me.n bahkii hu.ii aarzuu
tuu hai ma.asuum bachche kii aa.nkho.n me.n hairat-kada
kaun samjhe tujhe
tiirgii raushnii zindagii bebasii aadmii
aur ik kaamanii
kaun terii zabaa.n se hu.aa aashnaa
kaun samjhaa tujhe
paaniyo.n kii la.Daa.ii me.n maujo.n ne terii ko.ii
baat maanii hai kyaa
sarhado.n par bha.Daktii hu.ii aag ne
tere qadmo.n pe bosaa diyaa hai kabhii
shaa.irii
aa zaraa dekh le
mere pahluu me.n bargad ke paale hu.e vasvase
apne maathe se chup kii lakiire.n miTaa aur bataa
isti.aaro.n se bargad kii shaaKHe.n bhii kaTtii hai.n kyaa
shaa.irii
tujh se to
kaamanii kaa ko.ii ek jazba bhii mahkaa nahii.n
tujh se duniyaa me.n kyaa inqalaab aa.egaa
shaa.irii
dekh mere sirhaane tamannaa.e.n kitnii hai.n zanjiir-e-paa
kitne KHvaabo.n ke TuuTe hu.e
par hai.n bikhre hu.e
aa ki mil kar ajal ke kisii
gosha-e-nam me.n jaane ko raKHt-e-safar baa.ndh le.n
kaun samjhaa tujhe kaun samjhe tujhe

nawed malik
Nazm

sannaTa

kis ke qadmo.n kii aahaT hai
darvaaze par kaun aayaa hai
aadhii raat ke sannaaTe me.n aa.he.n bharne
us se kah do
ye ghar sadiyo.n se KHaalii hai
ulluu chiiKHaa
bargad bolaa
sard havaa kaa tanhaa jho.nkaa
diivaar-e-dil se sar Takraa kar
lauT gayaa hai

Ali Asghar
Nazm

jangal

shiisham saagii gondaa semal
satkaT bargad aam aur piipal

Kausar Siddiqi
Nazm

thakan

thakan
bojhal mano.n bojhal badan apnaa
uThaa kar chal pa.Dii
chaltii rahii
phir ek din
bhaarii papoTo.n ko uThaa kar
us ne dekhaa
raaste ke beach
ek bargad puraanaa
samaadhii o.Dh kar baiThaa hu.aa thaa
thakan
kub.De asaa ko Tektii
bargad ke saa.e me.n chalii aa.ii
ma.an ThiTkii ThiThak kar ruk ga.ii
bolii
chalo ham bhii yahaa.n ruk kar
samaadhii o.Dh lete hai.n
chalo ham bhii utarte hai.n
KHud apnii tah ke andar
aur KHud ko Dhuu.nDte hai.n
abad tak
nii.nd ke dariyaa me.n ham bhii uu.nghte hai.n

Wazir Agha
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now