Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "bhai.ns"

Nazm MATCHES FOR "bhai.ns"

Nazm

hubb-e-watan

ai dil ai banda-e-vatan hoshiyaar
KHvaab-e-Gaflat se ho zaraa bedaar
o sharaab-e-KHudii ke matvaale
ghar kii chaukhaT ke chuumne vaale
naam hai kyaa isii kaa hubb-e-vatan
jis kii tujh ko lagii hu.ii hai lagan
kabhii bachcho.n kaa dhyaan aataa hai
kabhii yaaro.n kaa Gam sataataa hai
yaad aataa hai apnaa shahr kabhii
lau kabhii ahl-e-shahr kii hai lagii
naqsh hai.n dil pe kuucha-o-baazaar
phirte aa.nkho.n me.n hai.n dar-o-diivaar
kyaa vatan kyaa yahii mohabbat hai
ye bhii ulfat me.n ko.ii ulfat hai
is me.n insaa.n se kam nahii.n hai.n darind
is se KHaalii nahii.n chairnd o parind
Tuk.De hote hai.n sang Gurbat me.n
suukh jaate hai.n ruukh furqat me.n
jaa ke kaabul me.n aam kaa paudaa
kabhii parvaan cha.Dh nahii.n saktaa
aa ke kaabul se yaa.n bihii-o-anaar
ho nahii.n sakte baarvar zinhaar
machhlii jab chhuuTtii hai paanii se
haath dhotii hai zindagaanii se
aag se jab hu.aa samundar duur
us ko jiine kaa phir nahii.n maqduur
gho.De jab khet se bichha.Dte hai.n
jaan ke laale un ke pa.Dte hai.n
gaa.e, bhai.ns uu.nT ho yaa bakrii
apne apne Thikaane KHush hai.n sabhii
kahiye hubb-e-vatan isii ko agar
ham se haivaa.n nahii.n hai.n kuchh kam-tar
hai ko.ii apnii qaum kaa hamdard
nau-e-insaa.n kaa samjhe.n jis ko fard
jis pe itlaaq-e-aadmii ho sahiih
jis ko haivaa.n pe de sake.n tarjiih
qaum par ko.ii zad na dekh sake
qaum kaa haal-e-bad na dekh sake
qaum se jaan tak aziiz na ho
qaum se ba.Dh ke ko.ii chiiz na ho
samjhe un kii KHushii ko raahat-e-jaa.n
vaa.n jo nau-roz ho to iid ho yaa.n
ra.nj ko un ke samjhe maaya-e-Gam
vaa.n agar sog ho to yaa.n maatam
bhuul jaa.e sab apnii qadr-e-jaliil
dekh kar bhaa.iyo.n ko KHvaar-o-zaliil
jab pa.De un pe gardish-e-aflaak
apnii aasaa.isho.n pe Daal de KHaak

Altaf Hussain Hali
Nazm

east india company ke farzandon se KHitab

kis zabaa.n se kah rahe ho aaj tum saudaagaro
dahr me.n insaaniyat ke naam ko uu.nchaa karo
jis ko sab kahte hai.n hitler bhe.Diyaa hai bhe.Diyaa
bhe.Diye ko maar do golii pa.e-amn-o-baqaa
baaG-e-insaanii me.n chalne hii pe hai baad-e-KHizaa.n
aadamiyyat le rahii hai hichkiyo.n par hichkiyaa.n
haath hai hitler kaa raKHsh-e-KHud-sarii kii baag par
teG kaa paanii chhi.Dak do germany kii aag par
saKHt hairaa.n huu.n ki mahfil me.n tumhaarii aur ye zikr
nau-e-insaanii ke mustaqbil kii ab karte ho fikr
jab yahaa.n aa.e the tum saudaagarii ke vaaste
nau-e-insaanii ke mustaqbil se kiyaa vaaqif na the
hindiyo.n ke jism me.n kyaa ruuh-e-aazaadii na thii
sach bataa.o kyaa vo insaano.n kii aabaadii na thii
apne zulm-e-be-nihaayat kaa fasaana yaad hai
company kaa phir vo daur-e-mujrimaana yaad hai
luuTte phirte the jab tum kaarvaa.n-dar-kaarvaa.n
sar-barahna phir rahii thii daulat-e-hindostaa.n
dast-kaaro.n ke a.nguuThe kaaTte phirte the tum
sard laasho.n se ga.Dho.n ko paaTte phirte the tum
san.at-e-hindostaa.n par maut thii chhaa.ii hu.ii
maut bhii kaisii tumhaare haat kii laa.ii hu.ii
allaah allaah kis qadar insaaf ke taalib ho aaj
miir-ja.afar kii qasam kyaa dushman-e-haq thaa 'siraaj'
kyaa avadh kii begamo.n kaa bhii sataanaa yaad hai
yaad hai jhaa.nsii kii raanii kaa zamaana yaad hai
hijrat-e-sultaan-e-dehlii kaa samaa.n bhii yaad hai
sher-dil 'Tiipuu' kii KHuunii.n daastaa.n bhii yaad hai
tiisare faaqe me.n ik girte hu.e ko thaamne
kas ke tum laa.e the sar shaah-e-zafar ke saamne
yaad to hogii vo maTiyaa-burj kii bhii daastaa.n
ab bhii jis kii KHaak se uThtaa hai rah rah kar dhu.aa.n
tum ne qaisar-e-baaG ko dekhaa to hogaa baarhaa
aaj bhii aatii hai jis se haa.e 'aKHtar' kii sadaa
sach kaho kyaa haafize me.n hai vo zulm-e-be-panaah
aaj tak ragoon me.n ik qabr hai jis kii gavaah
zehn me.n hogaa ye taaza hindiyo.n kaa daaG bhii
yaad to hogaa tumhe.n jallianwala-bagh bhii
puuchh lo is se tumhaaraa naam kyuu.n taabinda hai
'dyer'-e-gurg-e-dahan-aaluud ab bhii zinda hai
vo 'bhagat-singh' ab bhii jis ke Gam me.n dil naashaad hai
us kii gardan me.n jo Daalaa thaa vo phandaa yaad hai
ahl-e-aazaadii rahaa karte the kis hanjaar se
puuchh lo ye qaid-KHaano.n ke dar-o-diivaar se
ab bhii hai mahfuuz jis par tantana sarkaar kaa
aaj bhii guu.njii hu.ii hai jin me.n ko.Do.n kii sadaa
aaj kashtii amn ke amvaaj par khete ho kyuu.n
saKHt hairaa.n huu.n ki ab tum dars-e-haq dete ho kyuu.n
ahl-e-quvvat daam-e-haq me.n to kabhii aate nahii.n
''bankii'' aKHlaaq ko KHatre me.n bhii laate nahii.n
lekin aaj aKHlaaq kii talqiin farmaate ho tum
ho na ho apne me.n ab quvvat nahii.n paate ho tum
ahl-e-haq raushan-nazar hai.n ahl-e-baatin kor hai.n
ye to hai.n aqvaal un qaumo.n ke jo kamzor hai.n
aaj shaayad manzil-e-quvvat me.n tum rahte nahii.n
jis kii laaThii us kii bhai.ns ab kis liye kahte nahii.n
kyaa kahaa insaaf hai insaa.n kaa farz-e-avvalii.n
kyaa fasaad-o-zulm kaa ab tum me.n kas baaqii nahii.n
der se baiThe ho naKHl-e-raastii kii chhaa.nv me.n
kyaa KHudaa-naa-karda kuchh moch aa ga.ii hai paa.nv me.n
guu.nj Taapo.n kii na aabaadii na viiraane me.n hai
KHair to hai asp-e-taazii kyaa shifaa-KHaane me.n hai
aaj kal to har nazar me.n rahm kaa andaaz hai
kuchh tabii.at kyaa nasiib-e-dushmanaa.n naa-saaz hai
saa.ns kyaa ukh.Dii ki haq ke naam par marne lage
nau-e-insaa.n kii havaa-KHvaahii kaa dam bharne lage
zulm bhuule raagnii insaaf kii gaane lage
lag ga.ii hai aag kyaa ghar me.n ki chillaane lage
mujrmo.n ke vaaste zebaa nahii.n ye shor-o-shain
kal 'yaziid' o 'shimr' the aur aaj bante ho 'husain'
KHair ai saudaagaro ab hai to bas is baat me.n
vaqt ke farmaan ke aage jhukaa do gardane.n
ik kahaanii vaqt likkhegaa na.e mazmuun kii
jis kii surKHii ko zaruurat hai tumhaare KHuun kii
vaqt kaa farmaan apnaa ruKH badal saktaa nahii.n
maut Tal saktii hai ab farmaan Tal saktaa nahii.n

Josh Malihabadi
Nazm

uT-paTang

kaano.n kii ik nagrii dekhii jis me.n saare kaane dekhe
ek taraf se ahmaq saare ek taraf se siyaane the
kaano.n kii is nagrii ke sab riit rivaaj alaahada the
rog alaahada bastii me.n the aur ilaaj alaahada the
do do kaane mil kar puuraa sapnaa dekhaa karte the
ga.ngaa ke sa.ngam se kaane jamunaa dekhaa karte the
chaa.ndnii raat me.n chhatrii le kar baahar jaayaa karte the
os gire to kahte hai.n vaa.n sar phaT jaayaa karte the
dariyaa pul par chaltaa thaa paanii me.n raile.n chaltii thii.n
la.nguuro.n kii dum par a.nguuro.n kii bele.n paktii thii.n
chhuut kii ik biimaarii phailii ek dafa un kaano.n me.n
bhuuk ke kii.De sunte hai.n nikle gandum ke daano.n me.n
roz ka.ii kaane bechaare marte the biimaarii me.n
kahte hai.n raajaa sotaa thaa sone kii almaarii me.n
ghanTii baa.ndh ke chuuhe jab billii se dau.D lagaate the
peT pe dono.n haath bajaa kar sab qavvaalii gaate the
tab kaanii bhai.ns ne phuul phulaa kar chhe.Daa biin kaa baajaa
aur kaalaa chashma pahan ke singhaasan par aayaa raajaa
dukh se chashme kii dono.n hii aa.nKHe.n paanii paanii thii.n
dekhaa us kaane raajaa kii dono.n aa.nKHe.n kaanii thii.n
jhuuTaa hai jo andho.n me.n kaanaa raajaa hai kahtaa hai
jaa kar dekho kaanii nagrii andhaa raajaa rahtaa hai

Gulzar
Nazm

ab jidhar bhi jate hain

pahle aisaa hotaa thaa
bhaa.nt bhaa.nt ke bandar
shahr kii fasiilo.n par
mahfile.n jamaate the
ghar me.n kuud aate the
haath me.n se bachcho.n ke
roTii noch jaate the
ab to vo madaarii bhii
KHaalii haath aataa hai
bhiik maa.ng kar ghar ghar
ghar ko lauT jaataa hai
ab gharo.n me.n chi.Diyo.n kaa
shor kyuu.n nahii.n hotaa
raat ko ko.ii ulluu
pe.D par nahii.n rotaa
pe.D par nahii.n rotaa
la.Dte la.Dte chi.Diyaa.n kyuu.n
farsh par nahii.n girtii.n
billiyaa.n chhato.n par kyuu.n
ghuumtii nahii.n phirtii.n
ab na ko.ii bulbul hai
aur na ko.ii mainaa hai
ab na ko.ii tiitar hai
aur na ko.ii totaa hai
kis se puuchhne jaa.e.n
mor kaisaa hotaa hai
Toliyaa.n kabuutar kii
kho ga.ii.n fazaa.o.n me.n
titliyo.n ke ra.ngii.n par
bah ga.e havaa.o.n me.n
mu.nh-a.ndhere ab murGaa
baa.ng kyuu.n nahii.n detaa
ghar me.n ko.ii bakrii kaa
naam kyuu.n nahii.n letaa
kyaa hu.e daraKHto.n par
gho.nsle parindo.n ke
ko.ii bhii nahii.n kahtaa
qisse ab darindo.n ke
nanhe nanhe chuuzo.n par
chiil kaa jhapaTnaa ab
dekhne kahaa.n jaa.e.n
raaste me.n saa.nDo.n kaa
pahro.n la.Dte rahnaa ab
dekhne kahaa.n jaa.e.n
chhipkilii kii jiitii dum
ab thiraktii kyaa paa.e.n
ra.ng badalte girgiT ko
maarte kahaa.n jaa.e.n
gaa.e bhai.ns kaa reva.D
ab idhar nahii.n aataa
uu.nT Te.Dhaa-me.Dhaa saa
ab nazar nahii.n aataa
ab na gho.De haathii hai.n
aur na vo baraatii hai.n
ab galii me.n kutto.n kaa
bhau.nknaa nahii.n hotaa
raat chhat pe sote hai.n
bhuut dekh kar ko.ii
chau.nknaa nahii.n hotaa
ab jidhar bhii jaate hai.n
aadmii ko paate hai.n

Mohammad Alvi
Nazm

aql baDi ya bhains

ek thaa raaja mehdii alii KHaa.n ek thii us kii raanii
raanii kii ik maa.n thii ya.anii bachcha log kii naanii
karnaa KHudaa kaa aisaa hu.aa ik roz ko.ii ham-saaya
raaja ke darbaar me.n ik chhoTii sii chuhiyaa laayaa
dekhaa jab us chuhiyaa ko hairaan hu.e darbaarii
piitii thii vo coca-cola khaatii thii tarkaarii
a.ngrezii me.n baate.n kar ke filmii gaane gaatii
rang bira.nge Dance dikhaa kar sab kaa jii bahlaatii
parde se ye manzar dekhaa jab raanii kii maa.n ne
sochaa ham-saa.e se le le chuhiyaa kisii bahaane
bu.Dhiyaa ne sar piiTaa apnaa KHuub kiyaa vaavailaa
o.Dh liyaa phir vo dopaTTa rang thaa jis kaa mailaa
kahne lagii chillaa chillaa kar raaja terii duhaa.ii
ye hai meraa chor ki is ne merii bhai.ns churaa.ii
chhiin lo is se bhai.nse.n merii aur mu.nh par maaro chaa.nTaa
dekho dekho suukh ke merii bhai.nse.n hu.ii hai kaa.nTaa
raaja meh.ndii alii KHaa.n jo the raajaa.o.n ke raaja
kaam na kuchh bhii karte aaTho.n-pahar bajaate baajaa
garaj ke bole o marduud bataa kyuu.n bhai.ns churaa.ii
ham ne to us bhai.ns ke aage barso.n biin bajaa.ii
raaja kii ye baat sunii to kahne lagaa ham-saayaa
jiye vo saas ki chuhiyaa ko bhii jis ne bhai.ns banaayaa
raaj hai teraa is nagrii me.n KHuub sazaa de mujh ko
aql ba.Dii yaa bhai.ns bas itnii baat bataa de mujh ko

Qateel Shifai
Nazm

dal ki fariyaad

ek la.Dkii baghaartii hai daal
daal kartii hai arz yuu.n ahvaal
ek din thaa harii-bharii thii mai.n
saarii aafaat se barii thii mai.n
thaa haraa khet meraa gahvaara
vo vatan thaa mujhe bahut pyaaraa
paanii pii pii ke thii mai.n lahraatii
dhuup letii kabhii havaa khaatii
me.nh barastaa thaa jho.nke aate the
godiyo.n me.n mujhe khilaate the
yahii suuraj zamii.n the maa.n baavaa
mujh se karte the nek bartaavaa
jab kiyaa mujh ko paal-pos ba.Daa
aah zaalim kisaan aan pa.Daa
ga.ii taqdiir yak-ba-yak jo palaT
khet kaa khet kar diyaa talpaT
KHuub luuTaa dha.Dii dha.Dii kar ke
mujh ko gauno.n me.n le ga.e bhar ke
ho ga.ii dam ke dam me.n barbaadii
chhin ga.ii haa.e merii aazaadii!
kyaa bataa.uu.n kahaa.n kahaa.n khii.nchaa
daal-manDii me.n mujh ko jaa bechaa
ek zaalim se vaa.n pa.Daa paalaa
jis ne chakkii me.n mujh ko dal Daalaa
hu.aa taqdiir kaa likhaa puuraa
dono.n paaTo.n ne kar diyaa chuuraa
na sunii merii aah aur zaarii
KHuub baniye ne kii KHariidaarii
chhaanaa chhalnii me.n chhaaj me.n phaTkaa
qaid-KHaana miraa banaa maTkaa
phir muqaddar mujhe yahaa.n laayaa
tum ne to aur bhii Gazab Dhaayaa
khaal khii.nchii alag kiye chhilke
zaKHm kyuu.n-kar hare na ho.n dil ke
Daalii.n marche.n namak lagaayaa KHuub
rakh ke chuulhe pe jii jalaayaa KHuub
us pe kaf-giir ke bhii Thoke hai.n
aur naaKHun ke bhii kachoke hai.n
mere galne kii le rahii ho KHabar
daa.nt hai aap kaa mire uupar
garm ghii kar ke mujh ko daaG diyaa
haa.e tum ne bhii kuchh na rahm kiyaa
haath dho kar pa.Dii ho piichhe tum
jaan par aa banii havaas hai.n gum
achchhii bii-bii tumhii.n karo insaaf
zulm hai yaa nahii.n qusuur-mu.aaf
kahaa la.Dkii ne merii pyaarii daal
mujh ko ma.aluum hai tiraa sab haal
tuu agar khet se nahii.n aatii
KHaak me.n mil ke KHaak ho jaatii
yaa ko.ii gaa.e bhai.ns char letii
peT me.n apne tujh ko bhar letii
mai.n to rutba tiraa ba.Dhaatii huu.n
ab chapaatii se tujh ko khaatii huu.n
na sataanaa na jii jalaanaa thaa
yuu.n tujhe aadmii banaanaa thaa
aglii biitii kaa tuu na kar kuchh Gam
mehrbaanii thii sab, na thaa ye sitam

Ismail Merathi
Nazm

mazdur

june kii garmii ka.Daktii dhuup luu chaltii hu.ii
har gha.Dii mazduur ke sar se qazaa Taltii hu.ii
sar pe gaare kii ka.Dhaa.ii aur diivaar-e-buland
haa.nptaa vo cha.Dh rahaa hai le ke himmat kii kamand
paa.D par pahu.nchaa to ik gaalii sunii me.amaar se
jii me.n aayaa sar ko Takraa de usii diivaar se
haa.e us mazluum kii majbuuriyaa.n naa-chaariyaa.n
jaan kaa aazaar hai.n iflaas kii biimaariyaa.n
dil me.n kahtaa hai ki ye me.amaar bhii mazduur hai
phir yahii jaan-e-hazii.n kyuu.n is qadar maqhuur hai
us kii ujrat mujh se dugunii hai magar kam hai shu.uur
tamkanat kis baat par kis chiiz par itnaa Guruur
mai.n agar naadaar huu.n ye bhii nahii.n sarmaaya-daar
bhuut vo hai kis ba.Daa.ii kaa jo us par hai savaar
ii.nT gaaraa mai.n na duu.n us ko to ye kis kaam kaa
asl me.n me.amaar mai.n huu.n ye faqat hai naam kaa
merii himmat kah rahii.n hai.n kaaKH-e-diivaan-e-buland
aah is par bhii mai.n duniyaa me.n huu.n itnaa mustamand
lag gayaa phir kaam me.n ye soch kar vo bad-nasiib
ai KHudaa duniyaa me.n itnaa bhii na ho ko.ii Gariib
din Dhalaa jis vaqt maalik bhii makaa.n kaa aa gayaa
ik sukuut-e-marg saa diivaar-o-dar par chhaa gayaa
kaa.nptaa rahtaa hai har mazduur jis ke naam se
sab usii dhun me.n the vo KHush ho hamaare kaam se
us kii peshaanii pe lekin bal zaraa aane lage
phan uThaa kar tamkanat ke saa.np lahraane lage
sab se pahle us ne gaalii dii usii me.amaar ko
apnii milkiyyat jo samjhaa thaa har ik diivaar ko
josh-e-naKHvat se kahaa us ne ki ai paajii la.ii.n
kal jahaa.n tak thii ga.ii diivaar ab bhii hai vahii.n
kyaa kiyaa hai tuu ne din-bhar me.n zaraa mujh ko bataa
yuu.n takabbur me.n vo aa kar jaa.eza lene lagaa
dil me.n vo mazduur phir kahne lagaa uf re Gazab
jo bhii is duniyaa me.n hai.n fir.aun hai.n vo sab ke sab
jis kaa jis par bas chale paamaal kartaa hai use
KHud agar KHush-haal hai bad-haal kartaa hai use
kyaa kahuu.n sarmaaya-daaro.n ke sitam kii daastaa.n
diida-e-mazduur hai mazduur se bhii KHuu.nfishaa.n
jis kii laaThii us kii bhai.ns is misl ko saadiq samajh
ye samajh kar is KHudaa-e-paak ko raaziq samajh

Arsh Malsiyani
Nazm

baba guru-nanak dev

ek jism-e-naa-tavaa.n itnii dabaao.n kaa hujuum
ik charaaG-e-sub.h aur itnii havaa.o.n kaa hujuum
manzile.n gum aur itne rahnumaa.o.n kaa hujuum
e'tiqaad-e-KHaam aur itne KHudaa.o.n kaa hujuum
kashmakash me.n apne hii ma.abad se katraataa hu.aa
aadmii phirtaa thaa dar dar Thokare.n khaataa hu.aa
haq ko hotii thii har ik maidaa.n me.n baatil se shikast
sar-niguu.n sar-dar-garebaa.n sar-basar the zerdast
fan thaa ik matlab-baraarii log the matlab-parast
is-qadar big.Daa hu.aa thaa zindagii kaa bandobast
haamii-e-jaur-o-sitam har tarah maalaa-maal thaa
jis kii laaThii thii usii kii bhai.ns thii ye haal thaa
kyaa KHudaa kaa KHauf kaisaa jazba-e-hubb-e-vatan
barsar-e-paikaar the aapas me.n shaiKH-o-barahman
baaGbaa.n jo the vo KHud the mahv-e-taKHriib-e-chaman
al-Garaz big.Dii hu.ii thii anjuman kii anjuman
maz.hab-e-insaaniyat kaa paasbaa.n ko.ii na thaa
kaarvaa.n laakho.n the miir-e-kaarvaa.n ko.ii na thaa
ruuh-e-insaa.n ne KHudaa ke saamne fariyaad kii
jo zamii.n par ho rahaa thaa sab bayaa.n ruudaad kii
aur kahaa had ho chukii hai kufr kii ilhaad kii
ek duniyaa muntazir hai aap ke irshaad kii
tab ye farmaayaa KHudaa ne sab ko samjhaa.uu.ngaa mai.n
aadmii kaa ruup dhaaran kar ke KHud aa.uu.ngaa mai.n
is tarah aaKHir hu.aa duniyaa me.n naanak kaa zuhuur
farsh-e-tilwanDii pe utraa arsh se rabb-e-Gafuur
uTh gayaa zulmaat kaa Deraa ba.Dhaa har samt nuur
mamba.a-e-anvaar se phailii.n shu.aa.e.n duur duur
mehr-e-taabaa.n ne do-aalam me.n ujaalaa kar diyaa
aadmii ne aadmii kaa bol-baalaa kar diyaa

Kunwar Mahendra Singh Bedi Sahar
Nazm

abstract art

abstract art kii dekhii thii numaa.ish mai.n ne
kii thii az-raah-e-muravvat bhii sataa.ish mai.n ne
aaj tak dono.n gunaaho.n kii sazaa paataa huu.n
log kahte hai.n ki kyaa dekhaa to sharmaataa huu.n
sirf kah saktaa huu.n itnaa hii vo tasviire.n thii.n
yaar kii zulf ko suljhaane kii tadbiire.n thii.n
ek tasviir ko dekhaa jo kamaal-e-fan thii
bhai.ns ke jism par ik uu.nT kii sii gardan thii
Taa.ng khii.nchii thii ki misvaak jise kahte hai.n
naak vo naak KHatarnaak jise kahte hai.n
naqsh-e-mahbuub musavvir ne sajaa rakkhaa thaa
mujh se puuchho to tipaa.ii pe gha.Daa rakkhaa thaa
bolii tasviir jo mai.n ne use ulTaa palTaa
mai.n vo jaama huu.n ki jis kaa nahii.n siidhaa ulTaa
us ko naqqaad to ik chashma-e-haivaa.n samjhaa
mai.n use hazrat-e-majnuu.n kaa garebaa.n samjhaa
ek tasviir ko dekhaa ki ye kyaa rakkhaa hai
varaq-e-saaf pe ra.ngo.n ko giraa rakkhaa hai
aa.Dii-tirchhii sii lakiire.n thii.n vahaa.n jalva-figan
jaise TuuTe hu.e aa.iine pe suuraj kii kiran
thaa kiub-izm mai.n kaaGaz pe jo ik rashk-e-qamar
mujh ko ii.nTe.n nazar aatii thii.n ise husn-e-bashar
bolaa naqqaad nazar aate yahii kuchh ham tum!
KHuld me.n hazrat-e-aadam jo na khaate gandum
abstract art ke malbe se ye daulat niklii
jis ko samjhaa thaa anannaas vo aurat niklii
abstract art kii is chiiz pe dekhii hai asaas
''tan kii uryaanii se behtar nahii.n duniyaa me.n libaas''
is numaa.ish me.n jo atfaal chale aate the
Dar ke maa.o.n ke kalejo.n se lipaT jaate the

Syed Mohammad Jafri
Nazm

pura chand nikalta hai to bheDiya aksar rota hai

bhai.ns ke kaan se kaalaa kavvaa juu.e.n chugtaa jaataa hai
bolii bhai.ns ki ''ai kavve kyuu.n mere kaan tuu khaataa hai''

Jameel Usman
Nazm

manafi shuur ka ek waraq

kyaa is nizaam ko jagiir-daar badlegaa?
jo
mere vote se muntaKHab hotaa hai
aur
mere KHvaabo.n par tex lagaataa hai
kyaa
is nizaam ko sarmaaya-daar badlegaa?
jo
mujh se baara ghanTe kii begaar letaa hai
magar
aaTh ghanTe kii ujrat dene par bhii tayyaar nahii.n!
kyaa daanish-var is nizaam ko badal saktaa hai?
magar vo to
ek plot yaa Gair-mulkii daure ke evaz
hukmaraano.n ke liye luGat me.n se sataa.ishii alfaaz
jam.a kartaa rahtaa hai!
taajir is nizaam ko kaise badlegaa?
vo to bajaT kii tamaam muraa.aat sameT kar
saarii mah.ngaa.ii
mere khaate me.n darj kar detaa hai
siyasat-daan is nizaam kaa muhaafiz kyuu.n na ho!
ki us kii barkat se
vo sarkaarii school aur dispensary me.n apnii bhai.ns baa.ndh saktaa hai
aur
saaya dene vaale Gair-sarkaarii daraKHt ke niiche
class lene vaale ziddii teacher ko
apnii pajero se baa.ndh kar ghasiiTe jaane kii dhamkii detaa hai
mai.n ne
sahaafii se is nizaam ko badalne kii darKHvaast kii
magar vo
thaana muharrir ke paas baiTh kar chaa.e piine aur KHabre.n likhne me.n magan thaa
ye sab jaante hu.e
mai.n agle paa.nch saal ke liye
apnaa chehraa apne halqe ke paTvaarii ko de duu.ngaa
jo use
aks-e-shajra me.n lapeT kar rakh legaa
aur
vote kii parchii par meraa a.nguuThaa KHud hii lagaa legaa

Zahid Masood
Nazm

KHuda

kyaa KHudaa tujh ko bhuul jaa.uu.n mai.n
kis liye tere gun gaa.uu.n mai.n
mujh ko insaa.n banaa diyaa tuu ne
siidhaa rasta bataa diyaa tuu ne
phir samajh dii ki nek kaam karuu.n
kitnaa uu.nchaa uThaa diyaa tuu ne
kyaa ye ehsaan bhuul jaa.uu.n mai.n
kis liye tere gun na gaa.uu.n mai.n
chaa.nd suuraj jo jagmagaate hai.n
garmii aur raushnii bahaate hai.n
zindagii kaa yahii sahaaraa hai.n
khetiyaa.n bhii yahii pakaate hai.n
ye na chamke.n to kuchh na khaa.uu.n mai.n
kis liye tere gun na gaa.uu.n mai.n
ye ghaTaa.e.n ye ThanDii ThanDii havaa
ye samundar pahaa.D ye dariyaa
ye ghane aur ye lahlahaate khet
tuu ne mere liye kiye paidaa
den ko terii kyaa ginaa.uu.n mai.n
kis liye tere gun na gaa.uu.n mai.n
gaay yaa bhai.ns bail yaa bakrii
uu.nT gho.De pahaa.D se haathii
duudh ghii de.n mujhe savaarii de.n
jote.n bo.e.n yahii merii khetii
kyaa diyaa tuu ne kyaa bataa.uu.n mai.n
kis liye teraa gun na gaa.uu.n mai.n
tuu ne maataa pitaa kaa pyaar diyaa
phir mujhe ilm se sa.nvaar diyaa
ba.Dh ke in sab se tandurustii dii
jo diyaa tuu ne be-shumaar diyaa
chaahiye sar tujhe jhukaa.uu.n mai.n
kis liye tere gun na gaa.uu.n mai.n

Abr Ahsani Ganauri
Nazm

jangal mein mangal

ik jangal me.n hu.e ikaTThe
saare jaanvaro.n ke bachche
bhe.D ne apnaa lallaa bhejaa
gaay ne bhii bachh.Daa bhejaa
kutte kaa pillaa bhii aayaa
ulluu kaa paTThaa bhii aayaa
bakrii ne bhii memne bheje
aur billii ne bilauTe bheje
murGii ke chuuze bhii aa.e
bataKH ke bachche bhii aa.e
gho.De kaa chaalaak bachheraa
bhai.ns ke ka.De ke saath aayaa
baaz kabuutar kavvaa chi.Diyaa
haathii uu.nT uqaab aur shikraa
bandar sher hiran aur kachhvaa
tiitar mor baTer aur bagulaa
totaa mainaa faaKHta sab ne
apne apne bachche bheje
kahii.n thii.n chii.n chii.n kahii.n chyaa.uu.n
kahii.n thii me.n me.n kahii.n myaa.un
sab ne mil kar shor machaayaa
ik KHiKHyaayaa ik mimyaayaa
ko.ii chiiKHaa ko.ii bhau.nkaa
ulluu bhii sote me.n chau.nkaa
KHuub ye jalsa chamkaa ya.anii
baat na samjhaa ko.ii kisii kii

Khatir Ghaznavi
Nazm

chali dulhan ki palki

bhai.ns aa.ii le kar aslii ghii
me.nDhe kii sii.ngo.n me.n gobhii
tiin kabuutar laa.e chiTThii
chhattaa laa.ii shahd kii makkhii

Muzaffar Hanfi
Nazm

kabutar aur kawwe ki hui laDai

duur kahii.n dariyaa ke kinaare
rahte the do dost pyaare
ek thaa kavvaa ek kabuutar
khaate piite the vo mil kar
ik din un kii shaamat aa.ii
dono.n me.n hu.ii KHuub la.Daa.ii
pahle apne mu.nh ko kholaa
phir Gusse se kabuutar bolaa
kavve hote hai.n kanjuus
kaale bhadde aur manhuus
kaa.n-kaa.n shor machaate hai.n
saaraa din sar khaate hai.n
shor se mai.n to Dartaa huu.n
aur bas guu.n-guu.n kartaa huu.n
mujh ko apne husn pe naaz
uu.nchii hai merii parvaaz
kaale ho kaluuTe ho
tum to bhai.ns ke kaTTe ho
baat ye sun kar kavvaa bolaa
tuu ne merii zaat ko tolaa
le ab merii baarii hai
jaantii duniyaa saarii hai
tuu buzdil hai aur Darpok
baat kahuu.ngaa mai.n do-Tuuk
jab ko.ii billii aatii hai
jaa.n terii tab jaatii hai
kaa.nptaa hai tharraataa hai
Dar kar hii mar jaataa hai
logo.n kaa ye kahnaa hai
kavvaa bahut syaanaa hai
itne me.n ik loma.D aaya
pe.D ke niiche aa kar bolaa
la.Dte ho kuchh sharm karo
lahje apne narm karo
allaah allaah kiyaa karo
us kaa naam hii liyaa karo
mai.n tum ko samjhaataa huu.n
phir se dost banaataa huu.n
jaldii se tum niiche aa.o
aa kar mujh se haath milaa.o
dono.n pe.D se niiche aa.e
la.Dne se par baaz na aa.e
maut thii un ke sar par aa.ii
loma.D ne ik jast lagaa.ii
gardan se dono.n ko pak.Daa
aur apne panjo.n me.n jak.Daa
daavat us ne KHuub u.Daa.ii
apne peT kii aag bujhaa.ii
baarii baarii un ko khaayaa
dono.n ko ik sabaq sikhaayaa
la.Dnaa bachcho kaam buraa hai
la.Dne kaa anjaam buraa hai

Ziyaullah Mohsin
Nazm

chuhiya aur chiDiya

ik chuhiyaa aur ik chi.Diyaa me.n bahut hii gahrii chhantii thii
saath saath mil kar thii rahtii.n KHuub hii un me.n bantii thii
gaagar le kar ga.ii.n vo ik din nadii se paanii laane
chi.Diyaa ne bharaa cho.nch se paanii lagii chuhiyaa Dubkii khaane
dum ko paka.D kar cho.nch se chi.Diyaa paanii ke baahar laa.ii use
dost kii jaan bachaa ke KHushii se maajraa sab batlaa.ii use
aah sakhii tuu Duub chalii thii maujuud na gar mai.n hotii yahaa.n
shukr hu.aa tirii dum lagii hatthe jis ko paka.D kar laa.ii yahaa.n
ehsaan se ho kar laa-parvaah chuhiyaa ne us ko diyaa bayaa.n
un pe Gota thaa mai.n ne to lagaayaa Duub chalii thii bhalaa kahaa.n
ik roz jab kar ke sulh nahaane ko dono.n jaatii thii.n
usii raah se bhai.ns bhii paanii piine ko jaatii thii.n
chi.Diyaa u.Dtii jaatii thii aur chuhiyaa niiche chaltii thii
aisii jagah par pahuu.nchii chuhiyaa gobar bhai.ns jahaa.n kartii thii
lat-pat gobar me.n dab ga.ii chuhiyaa niiche shor machaatii thii
cho.nch se gauhar haTaa ke chi.Diyaa us ko baahar laatii thii
gobar se chuhiyaa niklii tab chi.Diyaa ne gahrii saa.ns bharii
haa.e sakhii is baar to samjhaa mai.n ne bahan tuu marii marii
agar na hotii mai.n to tumhaarii jaan thii bachnaa naa-mumkin
tere liye thaa Dher se gobar ke to nikalnaa naa-mumkin
ehsaan se ho kar laa-parvaah chuhiyaa ne us ko diyaa bayaan
u.nh ubTan thaa mai.n ne to lagaayaa marne lagii thii bhalaa kahaa.n
paanii nahaa kar niklii chi.Diyaa pe.D pe jism sukhaane lagii
cha.Dhne ko uupar daraKHt ke chuhiyaa bhii chhalaa.nge.n bharne lagii.n
kiikar kaa thaa daraKHt jo ki kaa.nTo.n se thaa bharaa hu.aa
ik thaa kaa.nTaa siidh me.n naak kii chuhiyaa ke vaa.n kha.Daa hu.aa
uchhlii chuhiyaa baar baar kaa.nTe par jaakar aTak ga.ii
kiikar ke kaa.nTe ke sahaare jhaa.D se chuhiyaa laTak ga.ii
dekhaa chi.Diyaa ne ki chuhiyaa uljhii phir na.e dushman se
cho.nch se koshish karke chhu.Daayaa KHaar ko us ke daaman se
KHush ho ke rihaa.ii par us kii chi.Diyaa ne kahaa ai pyaarii sakhii
is baar to laale the jaan ke ye aa.ii musiibat thii kaisii
agar na hotii saath tere phir kaun bachaataa thaa tujh ko
laTak laTak kar Tahnii par hii mar jaanaa hotaa tujh ko
ehsaan se ho kar laa-parvaa chuhiyaa ne us ko diyaa bayaan
u.nh naak chhidaane ga.ii thii un me.n marne lagii thii bhalaa kahaa.n
naa-shukrii chuhiyaa kii dekho be-Garzii chi.Diyaa kii dekho
ehsaan ke badle ho mamnuun naa-shukro.n par ehsaan karo

Nazm

jahan-naward

chaak-e-taKHliiq par ek jaisii hii aadam kii shakle.n bane.n
ruuh kii aabiyaarii bhii yaksaa.n hu.ii
be-karaa.n zindagii kii du.aa.e.n liye kitne shams-o-qamar roz ugne lage
sabz chaaragarii ke sahiife dimaaGo.n kii banjar taho.n me.n farozaa.n hu.e
mausamo.n ke jaziire zamii.n ke badan se nikaale ga.e
raushnii ke zaKHiire chhupaa.e ga.e aasmaa.n me.n kahii.n
phir ta.affun-zada chand zehno.n me.n taKHriib kii ga.Dga.DaahaT hu.ii
be-zamiiro.n ne rabb-e-musaavaat ke aa.ine reza-reza kiye
sharq aur Garb me.n bhai.ns us kii hu.ii
jo ma.iishat kii laaThii chalaane me.n ayyaar hai
phir bhii kuchh sar-phire
qiir-guu.n ja.ngalo.n barf-zaaro.n kii jaanib
mashaqqat bharii rasm-e-duniyaa nibhaane chale aa.e hai.n

Irfan Shahood
Nazm

ek kahani

baat hai kaafii puraanii ek chhoTe gaa.nv me.n
ek saahab loTte rahte the ThanDii chhaa.nv me.n
kuchh mashaqqat aur mehnat se na un kaa kaam thaa
bechte the duudh un kaa shaiKH-chillii naam thaa
shaiKH-chillii be-vaquufii ke liye mash.huur the
bhaa.ng ke nashshe me.n rahte the sadaa hii chuur se
ek din vo baalTii ik duudh kii sar par rakhe
jaa rahe the shahr ke raste pe kuchh kuchh sochte
der hone kaa KHayaal aayaa to jaldii se ba.Dhe
aur phir kuchh soch kar khaTke ruke phir chal pa.De
dil me.n ye sochaa ki jo kuchh duudh ke paise mile.n
in ko chaT karne ke badle kyo.n na anDe mol le.n
biis anDe to bilaa-shakk-o-shub.h mil jaa.e.nge
aur kuchh din baa'd bachche bhii nikal hii aa.e.nge
KHuub daana un ko duu.ngaa aur karuu.ngaa dekh-bhaal
bante bante murGiyaa.n murGe lagegaa ek saal
KHuub anDe ho.nge kuchh bechuu.ngaa kuchh khaa jaa.uu.ngaa
ek do moTe se murGe bhii safaa kar jaa.uu.ngaa
aur phir un murGiyo.n ko uu.nche daamo.n bech kar
ek gaa.e mol luu.ngaa moTii-taazii dekh kar
gaa.e se phir bhai.ns hogii bhai.ns se hogii dukaan
dhiire dhiire ek achchhaa saa banaa luu.ngaa makaan
kuchh dino.n me.n mai.n ba.Daa ik aadmii ban jaa.uu.ngaa
shaiKH-chillii kii bajaa.e shaiKH-jii kahlaa.uu.ngaa
sab mirii 'izzat kare.nge KHuub hogaa meraa naam
ye KHayaal aate hii gardan zor se un kii hilii
baalTii kaa duudh saaraa raaste me.n bah gayaa
shaiKH-chillii kaa havaa.ii mahl saaraa Dhah gayaa

Farhat Qamar
Nazm

banjara-nama

Tuk hirs-o-havaa ko chho.D miyaa.n mat des bides phire maaraa
qazzaaq ajal kaa luuTe hai din raat bajaa kar naqqaaraa
kyaa badhiyaa bhai.nsaa bail shutur kyaa gaune.n pallaa sar-bhaaraa
kyaa gehuu.n chaa.nval moTh maTar kyaa aag dhu.aa.n aur a.ngaaraa
sab ThaaTh pa.Daa rah jaavegaa jab laad chalegaa banjaaraa

Nazeer Akbarabadi
Nazm

o des se aane wale bata

o des se aane vaale bataa
kyaa gaa.nv pe ab bhii saavan me.n
barkhaa kii bahaare.n chhaatii hai.n
ma.asuum gharo.n se bhor-bhai.e
chakkii kii sadaa.e.n aatii hai.n
aur yaad me.n apne maike kii
bichh.Dii hu.ii sakhiyaa.n gaatii hai.n
o des se aane vaale bataa

Akhtar Shirani
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now