Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "bhatak"

Nazm MATCHES FOR "bhatak"

Nazm

kabhi kabhi

kabhii kabhii mire dil me.n KHayaal aataa hai
ki zindagii tirii zulfo.n kii narm chhaa.nv me.n
guzarne paatii to shaadaab ho bhii saktii thii
ye tiirgii jo mirii ziist kaa muqaddar hai
tirii nazar kii shu.aa.o.n me.n kho bhii saktii thii
ajab na thaa ki mai.n begaana-e-alam ho kar
tire jamaal kii ra.anaa.iyo.n me.n kho rahtaa
tiraa gudaaz-badan terii niim-baaz aa.nkhe.n
inhii hasiin fasaano.n me.n mahv ho rahtaa
pukaartii.n mujhe jab talKHiyaa.n zamaane kii
tire labo.n se halaavat ke ghuu.nT pii letaa
hayaat chiiKHtii phirtii barahna sar aur mai.n
ghanerii zulfo.n ke saa.e me.n chhup ke jii letaa
magar ye ho na sakaa aur ab ye aalam hai
ki tuu nahii.n tiraa Gam terii justujuu bhii nahii.n
guzar rahii hai kuchh is tarah zindagii jaise
ise kisii ke sahaare kii aarzuu bhii nahii.n
zamaane bhar ke dukho.n ko lagaa chukaa huu.n gale
guzar rahaa huu.n kuchh an-jaanii rahguzaaro.n se
muhiib saa.e mirii samt ba.Dhte aate hai.n
hayaat o maut ke pur-haul KHaarzaaro.n se
na ko.ii jaada-e-manzil na raushnii kaa suraaG
bhaTak rahii hai KHalaa.o.n me.n zindagii merii
inhii KHalaa.o.n me.n rah jaa.uu.ngaa kabhii kho kar
mai.n jaantaa huu.n mirii ham-nafas magar yuu.nhii
kabhii kabhii mire dil me.n KHayaal aataa hai

Sahir Ludhianvi
Nazm

baisakhi

mirii nazro.n me.n
aa.inda ke afsos ke saa.e larzaa.n hai.n
mujhe qaid-e-KHauf se rihaa karo
mai.n apne dard kii na.ngii dhuup se
ghanii tasallii maa.ng maa.ng ke haar gayaa
ai dard miraa faisla karo
mirii KHaalii aa.nkhe.n
manzar manzar bhaTak rahii
la.Dkha.Daa rahii hai.n
dayaa karo
mujhe KHvaabo.n kii baisaakhii do

Saqi Faruqi
Nazm

jugnu

rukii rukii sii safe.n malgajii ghaTaa.o.n kii
utaar par hai sar-e-sahn raqs piipal kaa
vo kuchh nahii.n hai ab ik jumbish-e-KHafii ke sivaa
KHud apnii kaifiyat-e-niil-guu.n me.n har lahza
ye shaam Duubtii jaatii hai chhuptii jaatii hai
hijaab-e-vaqt sire se hai be-his-o-harakat
rukii rukii dil-e-fitrat kii dha.Dkane.n yak-laKHt
ye ra.ng-e-shaam ki gardish hii aasmaa.n me.n nahii.n
bas ek vaqfa-e-taariik, lamha-e-shahlaa
samaa me.n jumbish-e-mub.ham sii kuchh hu.ii fauran
tulii ghaTaa ke tale bhiige bhiige patto.n se
harii harii ka.ii chi.ngaariyaa.n sii phuuT pa.Dii.n
ki jaise khultii jhapaktii ho.n be-shumaar aa.nkhe.n
ajab ye aa.nkh-micholii thii nuur-o-zulmat kii
suhaanii narm lave.n dete an-ginat jugnuu
ghanii siyaah KHunuk pattiyo.n ke jhurmuT se
misaal-e-chaadar-e-shab-taab jagmagaane lage
ki thartharaate hu.e aa.nsu.o.n se saaGar-e-shaam
chhalak chhalak pa.De jaise baGair saan gumaan
butuun-e-shaam me.n in zinda qumqumo.n kii damak
kisii kii so.ii hu.ii yaad ko jagaatii thii
vo be-panaah ghaTaa vo bharii bharii barsaat
vo scene dekh ke aa.nkhe.n mirii bhar aatii thii.n
mirii hayaat ne dekhii hai.n biis barsaate.n
mire janam hii ke din mar ga.ii thii maa.n merii
vo maa.n ki shakl bhii jis maa.n kii mai.n na dekh sakaa
jo aa.nkh bhar ke mujhe dekh bhii sakii na vo maa.n
mai.n vo pisar huu.n jo samjhaa nahii.n ki maa.n kyaa hai
mujhe khilaa.iyo.n aur daa.iyo.n ne paalaa thaa
vo mujh se kahtii thii.n jab ghir ke aatii thii barsaat
jab aasmaan me.n har suu ghaTaa.e.n chhaatii thii.n
ba-vaqt-e-shaam jab u.Dte the har taraf jugnuu
diye dikhaate hai.n ye bhuulii-bhaTkii ruuho.n ko
maza bhii aataa thaa mujh ko kuchh un kii baato.n me.n
mai.n un kii baato.n me.n rah rah ke kho bhii jaataa thaa
par is ke saath hii dil me.n kasak sii hotii thii
kabhii kabhii ye kasak huuk ban ke uThtii thii
yatiim dil ko mire ye KHayaal hotaa thaa!
ye shaam mujh ko banaa detii kaash ik jugnuu
to maa.n kii bhaTkii hu.ii ruuh ko dikhaataa raah
kahaa.n kahaa.n vo bichaarii bhaTak rahii hogii
kahaa.n kahaa.n mirii KHaatir bhaTak rahii hogii
ye soch kar mirii haalat ajiib ho jaatii
palak kii oT me.n jugnuu chamakne lagte the
kabhii kabhii to mirii hichkiyaa.n sii ba.ndh jaatii.n
ki maa.n ke paas kisii tarah mai.n pahu.nch jaa.uu.n
aur us ko raah dikhaataa hu.aa mai.n ghar laa.uu.n
dikhaa.uu.n apne khilaune dikhaa.uu.n apnii kitaab
kahuu.n ki pa.Dh ke sunaa to mirii kitaab mujhe
phir is ke baa'd dikhaa.uu.n use mai.n vo copy
ki te.Dhii-me.Dhii lakiire.n banii thii.n kuchh jis me.n
ye harf the jinhe.n mai.n ne likkhaa thaa pahle-pahal
aur us ko raah dikhaataa hu.aa mai.n ghar laa.uu.n
dikhaa.uu.n phir use aa.ngan me.n vo gulaab kii bel
sunaa hai jis ko usii ne kabhii lagaayaa thaa
ye jab ki baat hai jab merii umr hii kyaa thii
nazar se guzrii thii.n kal chaar paa.nch barsaate.n

Firaq Gorakhpuri
Nazm

KHatun-e-mashriq

aurte.n aqvaam-e-aalam kii bhaTak jaa.e.ngii jab
tuu rahegii ban ke us tuufaa.n me.n ik mauj-e-tarab

Josh Malihabadi
Nazm

gunah aur mohabbat

gunaah ke tund-o-tez sho.alo.n se ruuh merii bha.Dak rahii thii
havas kii sunsaan vaadiyo.n me.n mirii javaanii bhaTak rahii thii
mirii javaanii ke din guzarte the vahshat-aaluud ishrato.n me.n
mirii javaanii ke mai-kado.n me.n gunaah kii mai chhalak rahii thii
mire hariim-e-gunaah me.n ishq devtaa kaa guzar nahii.n thaa
mire fareb-e-vafaa ke sahraa me.n huur-e-ismat bhaTak rahii thii
mujhe KHas-e-naa-tavaa.n ke maanind zauq-e-isyaa.n bahaa rahaa thaa
gunaah kii mauj-e-fitna-saamaa.n uThaa uThaa kar paTak rahii thii
shabaab ke avvalii.n dino.n me.n tabaah o afsurda ho chuke the
mire gulistaa.n ke phuul jin se fazaa-e-tiflii mahak rahii thii
Garaz javaanii me.n ahrman ke tarab kaa saamaan ban gayaa mai.n
gunah kii aalaa.isho.n me.n luth.Daa hu.aa ik insaan ban gayaa mai.n

Noon Meem Rashid
Nazm

ahd-e-saza

ye ek ahd-e-sazaa hai jazaa kii baat na kar
du.aa se haath uThaa rakh davaa kii baat na kar
KHudaa ke naam pe zaalim nahii.n ye zulm ravaa
mujhe jo chaahe sazaa de KHudaa kii baat na kar
hayaat ab to inhii.n mahbaso.n me.n guzregii
sitamgaro.n se ko.ii iltijaa kii baat na kar
unhii ke haath me.n patthar hai.n jin ko pyaar kiyaa
ye dekh hashr hamaaraa vafaa kii baat na kar
abhii to paa.ii hai mai.n ne rihaa.ii rahzan se
bhaTak na jaa.uu.n mai.n phir rahnumaa kii baat na kar
bujhaa diyaa hai havaa ne har ek dayaa kaa diyaa
na Dhuu.nD ahl-e-karam ko dayaa kii baat na kar
nuzuul-e-habs hu.aa hai falak se ai 'jaalib'
ghuTaa ghuTaa hii sahii dam ghaTaa kii baat na kar

Habib Jalib
Nazm

khanDar

mai.n kha.nDaro.n kii zamii.n pe kab se bhaTak rahaa huu.n
qadiim raato.n kii TuuTii qabro.n ke maile katbe
dino.n kii TuuTii hu.ii saliibe.n girii pa.Dii hai.n
shafaq kii ThanDii chitaa.o.n se raakh u.D rahii hai
jagah jagah gurz vaqt ke chuur ho ga.e hai.n
jagah jagah Dher ho ga.ii hai.n aziim sadiyaa.n

Gulzar
Nazm

diwaron ka jangal jis ka aabaadi hai nam

diivaaro.n ke is jangal me.n bhaTak rahe insaan
apne apne uljhe daaman jhaTak rahe insaan

Sahir Ludhianvi
Nazm

naya safar hai purane charag gul kar do

bhaTak ke rah ga.ii.n nazre.n KHalaa kii vus.at me.n
hariim-e-shaahid-e-raa.anaa kaa kuchh pata na milaa
taviil raahguzar KHatm ho ga.ii lekin
hanuuz apnii masaafat kaa muntaha na milaa

Sahir Ludhianvi
Nazm

be-rozgar 2

galii galii
sab bhaTak rahe hai.n
ki coach traino.n ke ghar bane hai.n
mai.n KHud bhii
traine.n badal rahaa huu.n
na jaane kab se bhaTak rahaa huu.n

Siraj Faisal Khan
Nazm

yakum may

ba.az aise the jo sarmaa.e ke Thekedaar the
kahte the mazduur ko KHar aur KHud KHar-kaar the
chor-baazaarii kii ja.D the aur ba.De baT-maar the
naf.a-KHorii ke sivaa har kaam se bezaar the
ab halaq me.n un ke jo khaayaa aTak kar jaa.egaa
Gair-mulko.n me.n na sarmaaya bhaTak kar jaa.egaa

Syed Mohammad Jafri
Nazm

shua-e-farda

aur kuchh der bhaTak le mire darmaa.nda nadiim
aur kuchh din abhii zahraab ke saaGar pii le

Sahir Ludhianvi
Nazm

hawa ko aawara kahne walo

havaa ko aavaara kahne vaalo
kabhii to socho, kabhii to likkho
havaa.e.n kyuu.n apnii manzilo.n se bhaTak ga.ii hai.n
na un kii aa.nkho.n me.n KHvaab ko.ii
na KHvaab me.n intizaar ko.ii

Noshi Gilani
Nazm

sahaara man hai

tapte sahraa.o.n me.n kis tarah bhaTak saktii huu.n
mujh ko jo raah dikhaa.e vo sitaara maa.n hai

Najma Shaheen Khosa
Nazm

samundar aasman aur main

khulii.n jo aa.nkhe.n to sar pe niilaa falak tanaa thaa
chahaar-jaanib siyaah paanii kii tund maujo.n kaa GalGala thaa
havaa.e.n chiiKHo.n ko aur karaaho.n ko le ke chaltii thii.n aur miTTii
kii zard KHushbuu me.n maut-mausam kaa zaa.iqa thaa
nazar manaazir me.n Duub kar bhii misaal-e-shiisha tahii thii yaanii
gul-e-tamaashaa nahii.n khilaa thaa
hiraas jazbo.n kii rahguzar me.n dil-e-ta.ajjub-zada akelaa
KHamosh tanhaa bhaTak rahaa thaa

Amjad Islam Amjad
Nazm

agar yahi hai shaeri to shaeri haram hai!

nigaah me.n liye hu.e ghuTii ghuTii sii justujuu
bhaTak rahe hai.n vaadii-e-KHizaa.n me.n bahr-e-ra.ng-o-buu

Mohsin Bhopali
Nazm

rah-numa ban jaun

dard jis dil me.n ho us dil kii davaa ban jaa.uu.n
ko.ii biimaar agar ho to shifaa ban jaa.uu.n
dukh me.n hilte hu.e lab kii mai.n du.aa ban jaa.uu.n
uf vo aa.nkhe.n ki hai.n biinaa.ii se mahruum kahii.n
raushnii jin me.n nahii.n nuur jin aa.nkho.n me.n nahii.n
mai.n in aa.nkho.n ke liye nuur-e-ziyaa ban jaa.uu.n
haa.e vo dil jo ta.Daptaa hu.aa ghar se nikle
uf vo aa.nsuu jo kisii diida-e-tar se nikle
mai.n us aa.nsuu ke sukhaane ko havaa ban jaa.uu.n
duur manzil se agar raah me.n thak jaa.e ko.ii
jab musaafir kahii.n raste se bhaTak jaa.e ko.ii
KHizr kaa kaam karuu.n raah-numaa ban jaa.uu.n
umr ke bojh se jo log dabe jaate hai.n
naa-tavaanii se jo har roz jhuke jaate hai.n
un za.iifo.n ke sahaare ko asaa ban jaa.uu.n
KHidmat-e-KHalq kaa har samt me.n charchaa kar duu.n
maadar-e-hind ko jannat kaa namuuna kar duu.n
ghar kare dil me.n jo 'afsar' vo sadaa ban jaa.uu.n

Hamidullah Afsar
Nazm

faisla

aaj sochaa hai ki ehsaas ko zaa.il kar duu.n
apne shoriida iraade ko apaahij kar luu.n
apnii majruuh tamannaa kaa mudaavaa na karuu.n
apnii KHvaabiida mohabbat kaa alamnaak ma.aal
apnii be-KHvaab javaanii ko sunaayaa na karuu.n
apne be-kaif tasavvur ke sahaare ke liye
ek bhii sham.a sar-e-raah jalaayaa na karuu.n
apne be-suud taKHayyul ko bhaTak jaane duu.n
zindagii jaise guzartii hai guzar jaane duu.n
chand lamho.n me.n guzarne ko hai ha.ngaama-e-shab
so ga.e jaam suraahii kaa sahaaraa le kar
sard pa.Dne lagaa uj.Dii hu.ii mahfil kaa gudaaz
thak ga.ii gardish-e-yak-ra.ng se saaqii kii nazar
chand bedaar fasaano.n kaa asar luuT gayaa
dab gayaa talKH haqiiqat me.n nasha taa-ba-kamar
mai.n abhii aaKHirii mai-nosh huu.n maiKHaane me.n
dekhnaa kyaa hai mirii samt ba.Dhaa jaam ba.Dhaa
laa suraahii ko mire paas shikasta hii sahii
chhe.D TuuTe hu.e taaro.n ko karaahe.n to zaraa
sochtaa kyaa hai u.nDel aur u.nDel aur u.nDel
sard pa.Dtii hu.ii mahfil ke mukaddar pe na jaa
apne bedaar tafakkur kii halaakat pe ha.nsuu.n
aaj sochaa hai ki ehsaas ko zaa.il kar duu.n

Akhtarul Iman
Nazm

ek kahani

mere kamre me.n phailii hai ek kahaanii
abhii zaraa sii der hu.ii hai
mai.n ne ik maile kaaGaz par
harfo.n ke Tuk.De jo.De the
aur kahaanii ko tho.Dii sii jagah milii thii
phir lafzo.n ke taane baane bikhar ga.e the
jin lafzo.n se aa.nkh-micholii khelte khelte
biit gayaa hai itnaa vaqt
ki ab to yaad bhii kab aataa hai
apne jism kii qaid me.n hai.n ham yaa baahar hai.n
itnaa vaqt ki manzar saare pighal ga.e hai.n
ojhal hai.n tasviir ke rang me.n yaa zaahir hai.n
aur kahaanii kaaGaz se bah niklii hai
saare kamre me.n phailii hai
sab darvaazo.n aur dariicho.n se lipTii hai
saarii kitaabe.n au.ndhii kar ke
un se vo sab lafz nikaal ke le aa.ii hai
jo ham ne ik saath pa.Dhe the
merii almaarii se band lifaafe khol ke
saare KHvaab uThaa laa.ii hai
jo ham ne ik saath bune the
aur zamii.n se chhat tak kaise bechainii se bhaTak rahii hai
thak jaatii hai aur mirii aa.nkho.n se bahne lag jaatii hai
bistar ke niiche chhup kar aa.he.n bhartii hai
mere ka.ndhe par sar rakh ke so jaatii hai
aur kabhii khi.Dkii ke paT par maathaa Tek ke kho jaatii hai
mere kamre me.n phailii ye ek kahaanii
ghaat me.n hai ab
ko.ii rauzan-e-dar darvaaza khul jaa.e to
ye is habs-zada kamre se baahar nikle
jaise mere dil kii ek ik rag ko chiir ke bah niklii thii

Ambarin Salahuddin
Nazm

rad

sharaab aa.nkho.n se ugtaa jharnaa
bhaTak ke rasta saa ban rahaa hai
ba.Dhaa ta.addud suruur-o-mai kaa
junuun dastak ko jan rahaa hai

Atif tauqeer
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now