Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "chahal"

Nazm MATCHES FOR "chahal"

Nazm

main aur meri tanhai

ham samundar se milne zaraa der se pahu.nche
raat samundar se ziyaadaa gahrii ho rahii thii
ham na.nge paa.nv saahil ke saath
bahut duur tak chale
dino.n ke baa'd sarshaarii ne apnaa chehraa dikhaayaa thaa
aur hamaarii bhuulii hu.ii dhun gungunaa.ii thii
samundar hamaarii KHaamoshii me.n Duubne hii vaalaa thaa
jab hamaaraa giit patvaar hu.aa
ajnabii qadmo.n ke nishaan chunte hu.e
KHayaal aayaa
chahal-qadmii karte hu.e vo do saa.e kyaa hu.e
ye lahre.n jin ke paa.nv churaa laa.ii hai.n
tabhii ham ne apne juuto.n me.n jhaa.nk kar dekhaa
saahil abhii puurii tarah nahii.n phislaa thaa
ham ne sochaa
samundar ko ab so jaanaa chaahiye
raat kii KHunkii hamaarii rago.n me.n utar chukii thii
jab ham vaapsii ke liye mu.De
samundar ba.Dii garm-joshii ke saath hame.n ruKHsat karne aayaa

Anjum Saleemi
Nazm

farogh farruKH-zad ke liye ek nazm

musaahib-e-shaah se kaho ki
faqiih-e-aazam bhii aaj tasdiiq kar ga.e hai.n
ki fasl phir se gunaahgaaro.n kii pak ga.ii hai
huzuur kii jumbish-e-nazar ke
tamaam jallaad muntazir hai.n
ki kaun sii had janaab jaarii kare.n
to taamiil-e-bandagii ho
kahaa.n pe sar aur kahaa.n pe dastaar utaarnaa ahsan-ul-amal hai
kahaa.n pe haatho.n kahaa.n zabaano.n ko qat.a kiijiye
kahaa.n pe darvaaza rizq kaa band karnaa hogaa
kahaa.n pe aasaa.isho.n kii bhuuko.n ko maar diije
kahaa.n baTegii lu.aan kii chhuuT
aur kahaa.n par
rajm ke ahkaam jaarii ho.nge
kahaa.n pe nau saala bachchiyaa.n chahal saala mardo.n ke saath
sa.ngiin me.n pirone kaa hukm hogaa
kahaa.n pe iqbaalii mulzimo.n ko
kisii tarah shak kaa faa.eda ho

Parveen Shakir
Nazm

holi

aiyyaargii se pahle apne ta.ii.n chhupaa kar
chaahaa ki mai.n bhii nikluu.n un me.n se chhuT-chhuTaa kar
dau.De ka.ii ye kah kar jaataa hai dam churaa kar
itne me.n gher mujh ko aur shor-o-Gul machaa kar
us dam kamar kamar tak ra.ng-o-gulaal aayaa

Nazeer Akbarabadi
Nazm

dusri raat

ye bhii raat guzar rahii he
kamre kii bikhrii chiize.n sameTte hu.e
tumhaare jaane ke baad
tumhaarii chahal-qadmiyaa.n ghuumtii rahtii hai.n dil ke aa.ngan me.n
guu.njtii rahtii hai.n tumhaarii sargoshiyaa.n mere kaano.n me.n
bistar kii silvaTe.n mu.nh chi.Dhaane lagtii hai.n
is baar cigarette ke jale hu.e Tuk.Do.n par mahsuus kartii huu.n
tumhaare ho.nTo.n kaa lams
idhar-udhar bikhre hu.e tumhaarii baato.n ke Dher
chaa.e kii jhuuTii pyaaliyaa.n
ek ek ko uThaatii huu.n aur rakhtii jaatii huu.n
yaado.n kii almaarii me.n
jis me.n pahle hii se maujuud hai.n
tumhaarii muskuraahaTo.n kii gaThriyaa.n
balcony se jhaa.nktaa hu.aa chaa.nd
mahaktii hu.ii raat kii raanii
kitnaa kuchh sameTnaa baaqii he abhii
mere maathe par tumhaare ho.nTo.n kaa lams
tumhaare naam kaa vird kartii hu.ii dha.Dakne
thak kar chuur ho ga.ii huu.n KHud ko sameTte hu.e
aur aasmaan par chamaktaa hu.aa aaKHirii sitaara bhii
is baar Duub jaanaa chaahtaa hai mere saath
tumhaarii yaado ke be-karaa.n samundar me.n

Varsha Gorchhia
Nazm

jalwa-e-sahar

sa.Dak jo aatii hai chhaavnii se chahal-pahal us pe KHuub hii hai
nikal ke gunjaan bastiyo.n se baraa-e-tafriih sab hai.n aa.e

Nushur Wahidi
Nazm

urus-ul-bilad

vasii.a shahr me.n ik chiiKH kyaa sunaa.ii de
baso.n ke shor me.n railo.n kii ga.Dga.DaahaT me.n
chahal-pahal me.n bhi.Do.n jaisii bhanbhanaahat me.n
kisii ko pak.Do sar-e-raah maar do chaahe
kisii afiifa kii ismat utaar do chaahe!
vasii.a shahr me.n ik chiiKH kyaa sunaa.ii de!

Akhtarul Iman
Nazm

zaitun ka daraKHt

mere paas
ko.ii baaG nahii.n hai dost
kuchh adhuure KHvaab ek balcony
aur do tiin gamle hai.n
jo mujhe duniyaa me.n daraKHto.n ke
baaqii rahne kii vajuuhaat bataate hai.n
aur ja.ngalo.n ko jalaa diye jaane kii KHabre.n pahu.nchaate hai.n
merii bahan mere kamzor pairo.n me.n
zaituun ke tel se jaan Daalne kii koshish kartii hai
maa.n hotii to vo bhii yahii kartii
kaash saarii duniyaa me.n
zaituun ke tel ke ku.e.n ho.n
aur kamzor pairo.n me.n jaan pa.D jaa.e
aur ham apne pyaaro.n ke saath
mohabbat ke baaG me.n roz chahal-qadmii kar sake.n
ek daraKHt tumhaare naam kaa bhii hogaa
mere dost
taaki ham hamesha mohabbat aur shifaa-yaabii ke mo.ajaze me.n
ek duusre ke shariik rahe.n

Zeeshan Sahil
Nazm

buzurgwar

ek umr-e-daraaz chehra
Pacemaker se dha.Daktaa hu.aa dil
aa.nkh kii dhu.ndlaatii raushnii
zindagii kii chamak
puure kumbe kaa juGraafiya
apne ird-gird sameTe
zindagii kii shaam ko
yaado.n me.n lapeTe
umr kii lakiiro.n me.n
tajribe kii chamak
kisii farishte kii tarah
ek buzurg kaa saaya
ghar me.n Tahaltaa hai
apne dhiime qadmo.n se
chahal-qadmii karte hu.e
sab kii KHabar rakhtaa
bas du.aa hai yahii
is du.aa ke haath
sab ke sar par rahe
kaash har buzurg kaa maan
har ghar me.n rahe

Khadija Khan
Nazm

tanhai

mujh saa tanhaa nahii.n duniyaa me.n KHudaayaa ko.ii
mai.n na apnaa huu.n kisii kaa bhii na meraa ko.ii
kyaa milaa mujh ko chahal saala rifaaqat karke
ab kisii par na kare aah bharosaa ko.ii
taabish-e-hijr ne dil kii ye banaa dii suurat
jaise ho dhuup me.n taptaa hu.aa sahraa ko.ii
aatish-e-shauq kii uThtii hai.n kuchh aisii lahre.n
jis tarah aag kaa bha.Dkaa hu.aa dariyaa ko.ii
ek vo din thaa ki roto.n ko ha.nsaa detaa thaa
ab to rotaa huu.n jo dekhaa kahii.n ha.nstaa ko.ii
mai.n huu.n naira.ngii-e-aalam kii mujassam tasviir
mujh se behtar nahii.n ibrat kaa tamaashaa ko.ii
mai.n vo qatra huu.n samundar se jo mahruum rahaa
mujh ko kyaa mauj me.n aayaa kare dariyaa ko.ii
be-ruKHii aah ye kaisii hai ki is aalam me.n
mile laakho.n na hu.aa ek bhii apnaa ko.ii

Azeemuddin Ahmad
Nazm

premchand ko KHiraj-e-aqidat

vo premchand-munshii-e-be-misl-o-be-badal
thii jis ke dam se bazm-e-adab me.n chahal-pahal
afsaane jis ke sham-e-hidaayat the bar-mahal
naa-vaqt aah ho gayaa vo luqma-e-ajal
is soz-e-jaa.n-gusil se har ik dil kabaab hai
fart-e-tapish hai aatish-e-Gam be-hisaab hai
ilmii shaGaf se us ke nahii.n kaun baa-KHabar
har qalb par fasaane hu.e naqsh kal.hajar
hai bahr-e-ilm terii ravaanii se sar-basar
daamaan-o-jeb-e-urdu-o-hindii hai.n pur-guhar
tarz-e-bayaa.n har ek kaa tuu ne dikhaa diyaa
dhabba har ik kaa apne qalam se miTaa diyaa
bazm-e-adab ko KHvaab me.n bhii ye na thaa KHayaal
unniis sau chhattiis kaa nahs hogaa us ko saal
avval vafaat-e-barq kaa us ko hu.aa malaal
phir chal diyaa jahaan se ye munshii-baa-kamaal
naqsh-e-qaraar sail-e-fanaa se miTaa hai aaj
aivaan-e-nazm-o-nasr me.n maatam bapaa hai aaj
tujh ko premchand ye shaayad nahii.n KHabar
kitnaa vafaat kaa tirii duniyaa pe hai asar
'suufii' jahaa.n me.n Dhuu.nDhtii hai us ko har nazar
ai maahtaab-e-ishq bataa tuu chhupaa kidhar
kyaa shauq saama.ii.n kaa faraamosh ho gayaa
afsaana kahte kahte jo KHud haa.e so gayaa

Rangeshwar Dayal Saxena Sufi
Nazm

macha kohram kyun hai

machaa kohraam kyuu.n hai
ghar badalne par
abhii bhii halke kaale
shiishe vaalii
aa.nkh par ainak lagaa kar
halqa-e-yaaraa.n me.n vo akasr
chahal-qadmii ko aataa hai
sunaataa hai Gazal apnii
kabhii taaro.n kii jhurmuT me.n
kabhii raste me.n shabnam ke
kabhii KHushbuu lapeTe jism par
dil-kash fazaa.o.n me.n
kabhii be-had chamaktii dhuup ke
piipal kii chhaa.nv me.n
zaraa saa
chashm-e-baatin ko
munavvar kar ke to dekho
liye dariyaa ko haatho.n me.n
bahut shaadaa.n
bahut farhaa.n
nazar aataa hai masnad par
Gazal kii vo

Jafar Sahni
Nazm

tanhai

mujh saa tanhaa nahii.n duniyaa me.n KHudaayaa ko.ii
mai.n na apnaa huu.n kisii kaa bhii na meraa ko.ii
kyaa milaa mujh ko chahal-saala rifaaqat kar ke
ab kisii par na kare aah bharosaa ko.ii
taabish-e-hijr ne dil kii ye banaa dii suurat
jaise ho dhuup me.n taptaa hu.aa sahraa ko.ii
aatish-e-shauq kii uThii hai.n kuchh aisii lahre.n
jis tarah aag kaa bahtaa hu.aa dariyaa ko.ii
ek vo din thaa ki roto.n ko ha.nsaa detaa thaa
ab to rotaa huu.n jo dekhaa ko.ii ha.nstaa ko.ii
mai.n huu.n naira.ngii-e-aalam kii mujassam tasviir
mujh se behtar nahii.n ibrat kaa tamaashaa ko.ii
mai.n vo qatra huu.n samundar se jo mahruum rahaa
mujh ko kyaa mauj me.n aayaa kare dariyaa ko.ii
be-ruKHii aah ye kaisii hai ki is aalam me.n
mile laakho.n na hu.aa ek bhii apnaa ko.ii

Ahmad Azimabadi
Nazm

dharti ka bojh

ek chahal-qadmii ke liye galii banii
samundar ke paas ye phuulo.n kii kalii banii
me.n bhii bhuule se yahaa.n aa jaataa huu.n
merii umr chalne-phirne ghuumne kii nahii.n hai
aurte.n bachche aur do ik buu.Dhe bhii aate hai.n
mai.n yuu.nhii kachhve kii chaal kii tarah
aahista aahista aayaa thaa
ik jhaa.Dii ke piichhe do saa.e ham-aaGosh the
ek ne baa-aavaaz-e-buland kahaa:
kyaa tum ne is buu.Dhe ko dekhaa?
ha.nsne kii aavaaz aa.ii
ye buu.Dhaa dhartii kaa bojh hai
mai.n ne sunaa magar chup-chaap chaltaa gayaa
us ne shaayad sahii kahaa ye umr chalne-phirne kii nahii.n hai
magar mai.n kyaa karuu.n doctor ne mujhe sau qadam chalne ko kahaa hai

Baqar Mehdi
Nazm

tisri nazm

sairaabii ke is rele ne luk-chhup kaisii raas rachaa.ii
haatho.n baiTh vo barkhaa chehra phuul surekhaa khil uThaa hai
ghup ra.ngo.n ke ghaaT utartii riichh kii ye adhlii sarsaa.ii
dil kii ujlii be sarv saamaanii is me.n kyaa kyaa ThaaT chhapaa hai
jiite jii is chahal pahal kii tah tak kab hotii hai rasaa.ii

Salahuddin Parvez
Nazm

talash-e-jannat

Dal jhiil me.n ho pahle sii phir se chahal-pahal
phir chashm-e-shaahii kii chalo barakat kare.n talaash

Sada Ambalvi
Nazm

nazm

sard havaa darvaaze par dastak detii hai
aur chaap kahii.n duur
dil ke andar ubharne lagtii hai
dhund me.n Duube shahr kii
viiraan sa.Dko.n par
yaado.n ke hayuule
mire saath chahal-qadmii karte hai.n
Tuut jaane vaale
raabto.n aur suukhe gilaaso.n
me.n ko.ii dukh to mushtarak rahaa hogaa
jo palko.n aur ho.nTo.n ke biich jhuultaa rahtaa hai

Ehtisham Ali
Nazm

sham

suuraj Duubaa hu.aa a.ndheraa
chi.Diyaa.n lene lagii.n baseraa
din kaa Gaa.eb hu.aa ujaalaa
taariikii ne parda Daalaa
jalne lage diye ghar ghar me.n
girjaa masjid aur mandar me.n
puujaa me.n hai dhyaan me.n ko.ii
khaane ke saamaan me.n ko.ii
charKH-e-barii.n par chamke taare
be-roGan hai.n raushan saare
halkaa halkaa nuur hai in kaa
bastii se ghar duur hai in kaa
bachche nii.nd me.n Gaafil ho ga.e
lorii sunte sunte so ga.e
jangal se ghar gvaale aa.e
reva.D apnaa sa.nbhaale aa.e
jaa pahu.nche mazduur gharo.n me.n
KHush KHush hai.n biivii bachcho.n me.n
din bhar kab aaraam liyaa hai
KHuun pasiina ek kiyaa hai
shaam ne dii hai kaam se fursat
dam lene kii milii hai mohlat
ab so.e.nge lambii taane
mehnat lagegii KHuub Thikaane
manzil par rahrav jaa pahu.nche
haare thake nii.nd ke maate
kisht-o-chaman sunsaan pa.De hai.n
KHaalii ab maidaan pa.De hai.n
pahlaa saa Gul shor kahaa.n hai
dau.D dhuup kaa zor kahaa.n hai
maa.il-e-raahat hu.aa zamaana
KHatm hu.aa din kaa afsaana
chahal-pahal do-chaar gha.Dii hai
sab ke sirhaane nii.nd kha.Dii hai

Barq Dehlvi
Nazm

suraj ka shahkar

dhartii naache taklii ban kar
suuraj apnii jagah pe baiThaa
vaayuu-manDal ke resham se
gaalo.n jaise narm mulaa.im
baalo.n se baariik
rang-birange dhaage kaate
phir dhaago.n ko piro piro kar
suuraj buntaa jaa.e chaadar
rang-birangii chaadar

Shadab Razi
Nazm

mujhse pahli si mohabbat meri mahbub na mang

mujh se pahlii sii mohabbat mirii mahbuub na maa.ng
mai.n ne samjhaa thaa ki tuu hai to daraKHshaa.n hai hayaat
teraa Gam hai to Gam-e-dahr kaa jhag.Daa kyaa hai
terii suurat se hai aalam me.n bahaaro.n ko sabaat
terii aa.nkho.n ke sivaa duniyaa me.n rakkhaa kyaa hai
tuu jo mil jaa.e to taqdiir niguu.n ho jaa.e
yuu.n na thaa mai.n ne faqat chaahaa thaa yuu.n ho jaa.e
aur bhii dukh hai.n zamaane me.n mohabbat ke sivaa
raahate.n aur bhii hai.n vasl kii raahat ke sivaa

Faiz Ahmad Faiz
Nazm

mujhse pahle

mujh se pahle tujhe jis shaKHs ne chaahaa us ne
shaayad ab bhii tiraa Gam dil se lagaa rakkhaa ho
ek be-naam sii ummiid pe ab bhii shaayad
apne KHvaabo.n ke jaziiro.n ko sajaa rakkhaa ho

Ahmad Faraz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now