Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "chhote"

Nazm MATCHES FOR "chhote"

Nazm

zooming

dekhuu.n jo aasmaa.n se to itnii ba.Dii zamii.n
itnii ba.Dii zamiin pe chhoTaa saa ek shahr
chhoTe se ek shahr me.n sa.Dko.n kaa ek jaal
sa.Dko.n ke jaal me.n chhupii viiraan sii galii
viiraa.n galii ke mo.D pe tanhaa saa ik shajar
tanhaa shajar ke saa.e me.n chhoTaa saa ik makaan
chhoTe se ik makaan me.n kachchii zamii.n kaa sahn
kachchii zamii.n ke sahn me.n khiltaa hu.aa gulaab
khilte hu.e gulaab me.n mahkaa hu.aa badan
mahke hu.e badan me.n samundar saa ek dil
us dil kii vus.ato.n me.n kahii.n kho gayaa huu.n mai.n
yuu.n hai ki is zamii.n se ba.Daa ho gayaa huu.n mai.n

Ashfaq Husain
Nazm

KHub-surat zindagi ko humne kaise guzara

aaj kaa din kaise guzregaa kal guzregaa kaise
kal jo pareshaanii me.n biitaa vo bhuulegaa kaise
kitne din ham aur jiye.nge kaam hai.n kitne baaqii
kitne dukh ham kaaT chuke hai.n aur hai.n kitne baaqii
KHaas tarah kii soch thii jis me.n siidhii baat ga.nvaa dii
chhoTe chhoTe vahmo.n hii me.n saarii umar bitaa dii

Muneer Niyazi
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

chand nasihaten

kaaT lenaa har kaThin manzil kaa kuchh mushkil nahii.n
ik zaraa insaan me.n chalne kii himmat chaahiye
mil nahii.n saktii nikammo.n ko zamaane me.n muraad
kaamyaabii kii jo KHvaahish ho to mehnat chaahiye
KHaak mehnat ho sakegii ho na jab haatho.n me.n zor
tandurustii ke liye varzish kii aadat chaahiye
KHush-mizaajii saa zamaane me.n ko.ii jaaduu nahii.n
har ko.ii tahsii.n kahe aisii tabii.at chaahiye
ha.ns ke milnaa raam kar lenaa har har insaan ko
sab se miiThaa bolne kii tum ko aadat chaahiye
ek hii allaah ke bande hai.n sab chhoTe ba.De
apne ham-jinso.n se duniyaa me.n mohabbat chaahiye
hai buraa.ii hii buraa.ii kaam kal par chho.Dnaa
aaj sab kuchh kar ke uTho gar faraaGat chaahiye
jo buro.n ke paas baiThegaa buraa ho jaa.egaa
nek hone ke liye neko.n kii sohbat chaahiye
saath vaale dekhnaa tum se na ba.Dh jaa.e.n kahii.n
josh aisaa chaahiye aisii hamiyyat chaahiye
hukmaraa.n ho ko.ii apnaa ho yaa begaana
dii KHudaa ne jis ko izzat us kii izzat chaahiye
dekh kar chalnaa kuchal jaa.e na chyuu.nTii raah me.n
aadmii ko be-zabaano.n se bhii ulfat chaahiye
hai isii me.n bhed izzat kaa agar samjhe ko.ii
chhoTe bachcho.n ko buzurgo.n kii itaa.at chaahiye
ilm kahte hai.n jise sab se ba.Dii daulat hai ye
Dhuu.nD lo is ko agar duniyaa me.n izzat chaahiye
sab buraa kahte hai.n la.Dne ko burii aadat hai ye
saath ke la.Dke jo ho.n un se rifaaqat chaahiye
ho.n jamaa.at me.n sharaarat karne vaale bhii agar
duur kii un se faqat saahab salaamat chaahiye
dekhnaa aapas me.n phir nafrat na ho jaa.e kahii.n
is qadar had se ziyaada bhii na millat chaahiye
baap-daadaa kii ba.Daa.ii pe na itraanaa kabhii
aadmii ko apne kaamo.n kii sharaafat chaahiye
gar kitaabe.n ho ga.ii.n mailii to kyaa pa.Dhne kaa lutf
kaam kii chiize.n hai.n jo un kii hifaazat chaahiye

Allama Iqbal
Nazm

Dasna station ka musafir

kaun saa station hai?
Daasna hai saahib-jii
aap ko utarnaa hai?
''jii nahii.n, nahii.n,'' lekin
Daasna to thaa hii vo
mere saath 'qiisar' thii
ye ba.Dii ba.Dii aa.nkhe.n
ik talaash me.n kho.ii
raat bhar nahii.n so.ii
jab mai.n us ko pahu.nchaane
is ujaa.D bastii me.n
saath le ke aayaa thaa
mai.n ne un se phir puuchhaa
aap mustaqil shaayad
Daasna me.n rahte hai.n?
''jii yahaa.n pe kuchh merii
suut kii dukaane.n hai.n
kuchh ta.aam-KHaane hai.n''
mai.n sunaa kiyaa baiThaa
boltaa rahaa vo shaKHs
''kuchh zamiin-daarii hai
mere baap daadaa ne
kuchh makaan chho.De the
un ko bech kar mai.n ne
kaarobaar kholaa hai
is haqiir bastii me.n
kaun aa ke rahtaa thaa
lekin ab yahii bastii
bamba.ii hai dillii hai
qiimate.n zamiino.n kii
itnii ba.Dh ga.ii.n saahib
ik zamiin hii kyaa hai
khaane piine kii chiize.n
aam jiine kii chiize.n
bhaa.o das-gune hai.n ab''
boltaa rahaa vo shaKHs
''is qadar giraanii hai
aag lag ga.ii jaise
aasmaan had hai bas''
mai.n ne chau.nk kar puuchhaa
aasmaa.n mahl thaa ik
sayyado.n kii bastii me.n
aasmaa.n nahii.n saahib
ab mahl kahaa.n hogaa?
ha.ns pa.Daa ye kah kar vo
mere zehn me.n us kii
baat pai-ba-pai guu.njii

Akhtarul Iman
Nazm

rishwat

daam ik chhoTe se kuuze ke hai.n sau jaam-e-biluur
mol lene jaa.e.n ik qatra to de.n nahr-o-qusuur
ik diyaa jo bechtaa hai maa.ngtaa hai sham-e-tuur
ik zaraa se sa.ng-reze kii hai qiimat koh-e-nuur

Josh Malihabadi
Nazm

nazm bahut aasan thi pahle

ab sab manzar
badal chuke hai.n
chhoTe chhoTe chauraaho.n se
chau.De raste nikal chuke hai.n
na.e na.e baazaar
puraane galii mohalle nigal chuke hai.n
nazm se mujh tak
ab koso.n lambii duurii hai
in koso.n lambii duurii me.n
kahii.n achaanak
bam phaTte hai.n
kokh me.n maa.o.n ke
sote bachche kaTte hai.n
maz.hab aur siyaasat
dono.n
na.e na.e naare raTte hai.n
bahut se shahro.n
bahut se mulko.n se
ab chal kar
nazm mire ghar jab aatii hai
itnii ziyaada thak jaatii hai
mere likhne kii Table par
KHaalii kaaGaz ko
KHaalii hii chho.D ke ruKHsat ho jaatii hai
aur kisii footpath pe jaa kar
shahr ke sab se buu.Dhe shahrii kii
palko.n par!
aa.nsuu ban kar so jaatii hai

Nida Fazli
Nazm

insaf

mai.n is chhoTe se kamre me.n
aazaad bhii huu.n aur qaid bhii huu.n
is kamre me.n ik khi.Dkii hai
jo chhat ke baraabar uu.nchii hai
jab suuraj Duubne lagtaa hai
kamre kii chhat se guzartaa hai
muTThii bhar kirno.n ke zarre
khi.Dkii se andar aate hai.n
mai.n is raste par chaltii huu.n
aur apne ghar ho aatii huu.n
miraa baap abhii tak mere liye
jab shahr se vaapas aataa hai
chaadar ka.nghii kaajal chuu.Dii
jaane kyaa kyaa le aataa hai

Zehra Nigaah
Nazm

jaDe ki bahaaren

jab maah aghan kaa Dhaltaa ho tab dekh bahaare.n jaa.De kii
aur ha.ns ha.ns puus sambhaltaa ho tab dekh bahaare.n jaa.De kii
din jaldii jaldii chaltaa ho tab dekh bahaare.n jaa.De kii
aur paalaa barf pighaltaa ho tab dekh bahaare.n jaa.De kii
chillaa Gam Tho.nk uchhaltaa ho tab dekh bahaare.n jaa.De kii
tan Thokar maar pichhaa.Daa ho aur dil se hotii ho kushtii sii
thar-thar kaa zor ukhaa.Daa ho bajtii ho sab kii battiisii
ho shor phaphuu huu-huu kaa aur dhuum ho sii-sii sii-sii kii
kalle pe kallaa lag lag kar chaltii ho mu.nh me.n chakkii sii
har daa.nt chane se daltaa ho tab dekh bahaare.n jaa.De kii
har ek makaa.n me.n sardii ne aa baa.ndh diyaa ho ye chakkar
jo har dam kap-kap hotii ho har aan ka.Daaka.D aur thar-thar
paiThii ho sardii rag rag me.n aur barf pighaltaa ho patthar
jha.D-baa.ndh mahaavaT pa.Dtii ho aur tis par lahre.n le le kar
sannaaTaa baav kaa chaltaa ho tab dekh bahaare.n jaa.De kii
har chaar taraf se sardii ho aur sehn khulaa ho koThe kaa
aur tan me.n niimaa shabnam kaa ho jis me.n KHas kaa itr lagaa
chhi.Dkaav hu.aa ho paanii kaa aur KHuub pala.ng bhii ho bhiigaa
haatho.n me.n piyaala sharbat kaa ho aage ik farraash kha.Daa
farraash bhii pa.nkhaa jhaltaa ho tab dekh bahaare.n jaa.De kii
jab aisii sardii ho ai dil tab roz maze kii ghaate.n ho.n
kuchh narm bichhaune maKHmal ke kuchh aish kii lambii raate.n ho.n
mahbuub gale se lipTaa ho aur kuhnii, chuTkii, laate.n ho.n
kuchh bose milte jaate ho.n kuchh miiThii miiThii baate.n ho.n
dil aish-o-tarab me.n paltaa ho tab dekh bahaare.n jaa.De kii
ho farsh bichhaa Gaaliicho.n kaa aur parde chhoTe ho.n aa kar
ik garm a.ngiiThii jaltii ho aur sham.a ho raushan aur tis par
vo dilbar, shoKH, parii, chanchal, hai dhuum machii jis kii ghar ghar
resham kii narm nihaalii par sau naaz-o-adaa se ha.ns ha.ns kar
pahluu ke biich machaltaa ho tab dekh bahaare.n jaa.De kii
tarkiib banii ho majlis kii aur kaafir naachne vaale ho.n
mu.nh un ke chaa.nd ke Tuk.De ho.n tan un ke ruu.ii ke gaale ho.n
poshaake.n naazuk ra.ngo.n kii aur o.Dhe shaal do-shaale ho.n
kuchh naach aur rang kii dhuume.n ho.n aish me.n ham matvaale ho.n
piyaale par pyaala chaltaa ho tab dekh bahaare.n jaa.De kii
har ek makaa.n ho KHalvat kaa aur aish kii sab tayyaarii ho
vo jaan ki jis se jii Gash ho sau naaz se aa jhankaarii ho
dil dekh 'naziir' us kii chhab ko har aan adaa par vaarii ho
sab aish muhayyaa ho aa kar jis jis armaan kii baaii ho
jab sab armaan nikaltaa ho tab dekh bahaare.n jaa.De kii

Nazeer Akbarabadi
Nazm

kachchi basti

galiyaa.n
aur galiyo.n me.n galiyaa.n
chhoTe ghar
niiche darvaaze
TaaT ke parde
mailii bad-ra.ngii diivaare.n
diivaaro.n se sar Takraatii
ko.ii gaalii
galiyo.n ke siine par bahtii
gandii naalii
galiyo.n ke maathe par bahtaa
aavaazo.n kaa ganda naalaa

Javed Akhtar
Nazm

ye basti meri basti hai

sakiina maarvii bhii kyaa ajab la.Dkii thii
jo merii zabaa.n se aur mai.n jis kii zabaa.n se naa-balad thii
phir bhii jaane kis tarah shiir-o-shakar the ham
hamaarii chhoTii chhoTii KHvaahishe.n har taur ham-aaha.ng thii.n itnii

Ishrat Afreen
Nazm

agar aap

agar aap ek daraKHt hai.n
to zaahir hai
sab se pahle
aap ko ban.naa chaahiye
ek saaya-daar jagah
aur agar aap ke patte
kisii KHizaa.n me.n gir jaa.e.n
to aap kii koshish honii chaahiye
ki bahaar kaa pahlaa phuul
yaa baarish ke baa'd khilne vaalii pahlii ko.npal
aap hii ke hisse me.n aa.e
agar aap ek daraKHt ho.n
aur ko.ii aap ko kaaT Daale
to afsos mat kiijiyegaa
ho saktaa hai aap kaa ta.alluq
daraKHto.n ke us KHaandaan se ho
jis me.n hazaaro.n baras pahle
kisii nabii ne panaah lii thii
apne kaaT ke le jaa.e jaane par
afsos mat kiijiyegaa
ho saktaa hai
aap se ek aisii kursii banaa.ii jaa.e
jis par baiTh ke
ko.ii la.Dkii apne mahbuub ko
hamesha yaad kartii rahe
yaa phir aap se bane ek aisii mez
jis ke saamne ko.ii udaas shaa.er
sitaaro.n bharii nazme.n likhtaa rahe
yaa ho saktaa hai
aap se ek aisii sii.Dhii banaa.ii jaa.e jise diivaar ke saath lagaa ke
ham aasmaan tak jaa sake.n
yaa phir aap se
ko.ii aisaa pul banaayaa jaa.e
jis par kha.Dii ho ke
log ek duusre se
hamesha milne ke liye
sikke phe.nkaa kare.n
agar aap daraKHt ban jaa.e.n
to kisii sarkaarii imaarat ke ahaate
yaa kasii chhoTe se raaste ke darmiyaan
mat aa.iyegaa
varna hame.n aap ko haTaane kaa bahut afsos hogaa
aur aap sivaa.e raakh hone ke
aur kuchh nahii.n kar sake.nge

Zeeshan Sahil
Nazm

diwali

diivaalii ke diip jale hai.n
yaar se milne yaar chale hai.n
chaaro.n jaanib dhuum-dha.Daakaa
chhoTe rocket aur paTaaKHa
ghar me.n phul-jha.Diyaa.n chhuuTe
man hii man me.n laDDuu phuuTe
diip jale hai.n ghar aa.ngan me.n
ujyaaraa ho jaa.e man me.n
apno.n kii to baat alag hai
aaj to saare Gair bhale hai.n
diivaalii ke diip jale hai.n
raam kii jai-jai-kaar hu.ii hai
raavan kii jo haar hu.ii hai
sachche kaa har bol hai baalaa
jhuuTe kaa mu.nh hogaa kaalaa
sachchaa.ii kaa Da.nkaa baaje
sach ke sar par sahraa saaje
jhuuT kii lanka KHaak banaa ke
raam ayodhya lauT chale hai.n
diivaalii ke diip jale hai.n
hinduu muslim sikh iisaa.ii
mil kar khaa.e.n yaar miThaa.ii
bhuul ke shikve aur gile sab
ha.nste gaate aaj mile sab
kahne ko har dharm judaa hai
lekin sab kaa ek KHudaa hai
ik maaTii ke putle 'haidar'
is saa.nche me.n KHuub Dhale hai.n
diivaalii ke diip jale hai.n

Haidar Bayabani
Nazm

khel

kisii ke sar pe chuTiyaa rakh de.n
maathe uupar tilak sajaa.e.n
kisii ke chhoTe se chehre par
moTii sii daa.Dhii phailaa.e.n
kuchh din in se jii bahlaa.e.n
aur ye jab maile ho jaa.e.n
daa.Dhii choTii tilak sabhii ko
to.D-pho.D ke gaD-maD kar de.n
milii-julii ye miTTii phir se
alag alag saa.ncho.n me.n bhar de.n
na.e na.e aakaar banaa.e.n

Nida Fazli
Nazm

hashr ki subh daraKHshan ho maqam-e-mahmud

raat daa.Dhii ke a.ndhere se takalluf barte
arsh ke saamne rusvaa.ii kii gardan na uThe
izn-e-sajda pe kamar taKHta na ho jaa.e kahii.n
khokhle lafzo.n me.n lohaa to nahii.n bhar sakte
saika.Do.n saal kii tabliiG ke chaaliis samar
kashtii ban jaa.e to tannuur se paanii uble
saalhaa-saal se aaraam natiija matluub
tiin-sau-saaTh sanam KHaana-e-ka.aba se chale
reg-zaaro.n me.n Gubaar aur khajuurii saa.e
uu.nT kii aa.nkh me.n tash.hiir hu.aa dard-e-safar
ko.ii 'hi.nda' se kahe daa.nt kahaa.n hai.n tere
fat.h-e-makka se magar log hidaayat paa.e.n
KHuun jam jaa.e jo naalain me.n chalte chalte
arsh kii aa.nkh se rahmat kaa samundar uble
jibra.iil apnii hai.at me.n hai.n numaa.ish-manzar
paa.nv paataal me.n sar charKH se Takraa.e kahii.n
par jo khole to har ik samt pe parde laTke.n
aur jaltaa hu.aa suuraj abhii kho jaa.e kahii.n
qaafila aayaa hai 'buu-bakr' se mansuub magar
maal taqsiim hu.aa daaman-e-haajat-ma.nda.n
nuur ka.ndhe pe uThaa.e shab-e-hijrat ke safiir
Gaar me.n saath rahe paas hii paivand hu.e
masjid-e-nabvii me.n ambaar-e-Ganiimat raushan
log rote hu.e nikle hai.n pareshaa.n-manzar
raushnii pahu.nchii 'abuu-jahl' kii diivaaro.n tak
ghar kii taariikii me.n rasta na bane biinaa.ii
pe.D ke saa.e kii pahchaan yahuudii raahib
ruk gayaa aab-e-ravaa.n beva ke darvaaze par
dast-e-zohraa me.n nishaanaat ayaa.n chakkii se
ilm ke baab 'alii' umr me.n sab se chhoTe
chaa.nd kaa naam tire chaak-garebaano.n me.n
mubtadii Dhuu.nDte hai.n masjid-e-aqsaa me.n imaam
sidrat-ul-muntahaa jibriil ijaazat maa.nge
kaun thaa kis ne pukaaraa ki chale bhii aa.o
kaun maujuud thaa pahle se vahaa.n kaun gayaa
kaun suntaa thaa vahaa.n kis ne pukaaraa kis ko
kis kii aavaaz kii tanviir se aalim chamke
sar-bulandii thii muqaddar me.n qalam se pahle
bakriyaa.n kaun 'haliima' kii charaane jaa.e
'aamina' batn se iz.haar hai aadam kaa uruuj
mujtam.a kis ne kiyaa logo.n ko parbat ke qariib
kis ne lalkaaraa zalaalat ko musalsal tanhaa
jau kii roTii kabhii mil jaa.e kabhii faaqa-kashii
bhuuk se peT pe patthar kabhii baa.ndhe kis ne
tiin-sau-terah kii ta.adaad hai kis gintii me.n
fikr pe daa.era-kun KHandaqe.n khodii jaa.e.n
duur kii dhuup me.n hai faisla-kun rah-e-tabuuk
'ha.nzala' saamne aa jaa.e.n jo chhaT jaa.e Gubaar
mai.n ne pahu.nchaa diyaa tum tak jo mujhe pahu.nchaa thaa
mai.n ne pahu.nchaa diyaa tum tak jo mujhe pahu.nchaa thaa
mai.n ne pahu.nchaa diyaa tum tak jo mujhe pahu.nchaa thaa
ko.ii pardesii hai KHeme pe pareshaa.n-surat
aur 'faaruuq' chale biivii ko ham-raah liye
faasle to.D kar aavaaz ke saa.e phaile
haakim-e-vaqt kaa kurtaa ka.ii paivand lagaa
bakriyaa.n jis se sambhaalii nahii.n jaatii.n thii.n kabhii
nisf duniyaa pe KHilaafat ke alam lahraa.e
yaad hai saahibo KHaibar ko ukhaa.Daa kis ne
kis kii talvaar thii aa.iina zamaane ke liye
kis ne zarKHez shujaa.at ke sitaare bo.e
jaan dii jaavedaa.n lamhaat tilaavat mashGuul
KHuun ke dhabbe hai.n qur.aan pe taabinda nazar

Adil Mansuri
Nazm

ek bachcha aur jugnu ki baaten

sunaa.uu.n tumhe.n baat ik raat kii
ki vo raat a.ndherii thii barsaat kii
chamakne se jugnuu ke thaa ik samaa.n
havaa par u.Dii.n jaise chi.ngaariyaa.n
pa.Dii ek bachche kii un pe nazar
paka.D hii liyaa ek ko dau.D kar
chamakdaar kii.Daa jo bhaayaa use
to Topii me.n jhaT-paT chhupaayaa use
vo jham jham chamaktaa idhar se udhar
phiraa ko.ii rasta na paayaa magar
to Gamgiin qaidii ne kii iltijaa
jugnuu
ai chhoTe shikaarii mujhe kar rihaa
KHudaa ke liye tuu mujhe chho.D de
merii qaid ke jaal ko to.D de
bachcha
karuu.ngaa na aazaad us vaqt tak
ki mai.n dekh luu.n din me.n terii chamak
jugnuu
chamak merii din me.n na dekhoge tum
ujaale me.n ho jaa.egii vo to gum
bachcha
are chhoTe kii.De na de dam mujhe
ki hai vaaqafiyyat abhii kam tujhe
ujaale me.n din ke khulegaa kamaal
ki itne se kii.De me.n kyaa hai kamaal
dhu.aa.n hai na sho.ala na garmii na aa.nch
chamakne kii tere karuu.ngaa mai.n jaa.nch
jugnuu
ye qudrat kii kaariigarii hai janaab
ki zarra ko chamkaa.e juu.n aaftaab
mujhe dii hai is vaaste ye chamak
ki tum dekh kar mujh ko jaa.o ThiThak
na alha.D-pane se karo paa.emaal
sa.nbhal kar chalo aadmii kii sii chaal

Ismail Merathi
Nazm

maro na hamein daddy

maaro na hame.n daddy bachpan kaa zamaana hai
mausam hai ye ha.nsne kaa ha.ns ha.ns ke bitaanaa hai
chhoTe se ye bachche hai.n aur itnii ba.Dii lak.Dii
shaitaan kii ye KHaala haatho.n me.n hai kyuu.n pak.Dii
ik din isii lak.Dii ko chuulhe me.n jalaanaa hai
maaro na hame.n daddy bachpan kaa zamaana hai
sofo.n pe agar naache.n daddy hame.n mat roko
kuchh apnii bhii izzat hai har baat pe mat Toko
vo aap kii kursii hai ye apnaa Thikaanaa hai
maaro na hame.n daddy bachpan kaa zamaana hai
barsaat me.n nadiyaa kii saire.n hame.n karne do
gar Duub ke marte hai.n daddy hame.n marne do
is duniyaa se tan aa.e us duniyaa ko jaanaa hai
maaro na hame.n daddy bachpan kaa zamaana hai
tum bhii kabhii bachche the school se bhaage the
kahte hai.n sharaarat me.n shaitaa.n se bhii aage the
ham aap ke bachche hai.n aur aap pe jaanaa hai
maaro na hame.n daddy bachpan kaa zamaana hai

Raja Mehdi Ali Khan
Nazm

aao chalen man

aa.o chale.n maa.n ThanDii fazaa.o.n me.n
shahro.n se duur kahii.n chhoTe se gaa.nv me.n
maanaa ye chaa.ndii kii duniyaa hasiin hai
dhartii kii huuro.n kaa jalva hasiin hai
uu.nche uu.nche mahlo.n kaa naGma hasiin hai
kaise yahaa.n ghuumuu.n ki zor nahii.n paa.nv me.n
aa.o chale.n maa.n ThanDii fazaa.o.n me.n
shahro.n se duur kahii.n chhoTe se gaa.nv me.n
chaar taraf apnii taraqqii kaa zor hai
naach rahaa jaise ki jangal me.n mor hai
ba.Dii ba.Dii zinda mashiino.n kaa shor hai
saa.ns ghuTii jaa.e yahaa.n kii havaa.o.n me.n
aa.o chale.n maa.n ThanDii fazaa.o.n me.n
shahro.n se duur kahii.n chhoTe se gaa.nv me.n
sa.Dko.n pe galiyo.n me.n filmii taraana
yaad nahii.n lekin KHushii kaa fasaana
in ko mubaarak mohazzab zamaana
kaun rahe sundar manohar balaa.o.n me.n
aa.o chale.n maa.n ThanDii fazaa.o.n me.n
shahro.n se duur kahii.n chhoTe se gaa.nv me.n
insaan jaise ho.n baasii mazaar ke
phir bhii ha.nse.n ham ko dehaatii pukaar ke
TuuT ga.e taar yahaa.n man ke sitaar ke
jannat hamaarii vahii.n piipal kii chhaa.nv me.n
aa.o chale.n maa.n ThanDii fazaa.o.n me.n
shahro.n se duur kahii.n chhoTe se gaa.nv me.n
abbaa jii aa.e hai.n roTii kamaane
biit rahii kyaa in pe allaah jaane
apne mile.n is tarah jaise begaane
jaan nahii.n ko.ii bhii naqlii adaa.o.n me.n
aa.o chale.n maa.n ThanDii fazaa.o.n me.n
shahro.n se duur kahii.n chhoTe se gaa.nv me.n

Salam Machhli shahri
Nazm

dard ki aawaz

ba.De bhaa.ii ho sabaq to siikho
chaaro.n or hai.n chhoTe dekho
la.D la.D kar barbaad hai.n saare
kaaTnaa maarnaa dharm banaa re
vahaa.n masjido.n me.n bam phaTte
dharm hai ek vo phir bhii la.Dte
chale the faKHr se sar uu.nchaa thaa
ga.Dhe the haa.el kab dekhaa thaa
aaj hu.e kyaa dekh rahe ho
chakkar gidh ke dekh rahe ho

Ozair Rahman
Nazm

kachchi diwaren

merii maa.n kitnii bholii hai
barso.n kii siilii diivaare.n
chhoTe-moTe paivando.n se
aaKHir kab tak ruk paa.e.ngii
jab ko.ii baadal garjegaa
har har kartii Dheh jaa.e.ngii

Nida Fazli
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now