Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "kaatib-e-taqdiir"

Nazm MATCHES FOR "kaatib-e-taqdiir"

Nazm

kiya kya ai sada tu ne bata aa kar zamane mein

gila kartaa rahaa tuu kaatib-e-taqdiir se naahaq
milaa hai jo tujhe kitno.n ko miltaa hai zamaane me.n

Sada Ambalvi
Nazm

wo lamha kaisa hota hai

jo baar-aavar nahii.n hotaa
vo lamha kaisaa hotaa hai
jo ra.ng-o-KHusbuu.o.n ke aabgiine to.D detaa hai
jo yaado.n kii khulii aa.nkho.n ko
apne sard haatho.n ke asar se muu.nd detaa hai
jo din kii raushnii me.n shab kii aamezish se
aisii saa.ate.n taKHliiq kartaa hai
jo aasuuda hii hotii hai.n na afsurda hii hotii hai.n
kabhii ha.nstii kabhii be-tarah rotii hai.n
jo rasta khojtii aur manzilo.n ko bhuul jaatii hai.n
jo zinda hai.n na martii hai.n
jo Dartii hai.n adaa-e-vaqt se
ruktii na chaltii hai.n
fasiil-e-be-yaqiinii par rakhii
sham.o.n kii suurat
aas me.n bujhtii na jaltii hai.n
jo aisii saa.ate.n taKHliiq kartaa hai
vo lamha kaisaa hotaa hai
kisii paadaash kii takmiil kaa hissa
ki harf-e-kaatib-e-taqdiir hotaa hai

Yasmeen Hameed
Nazm

harf-e-aKHir

ye aadmii kii guzargaah-e-shaahraah-e-hayaat
hazaaro.n saal kaa baar-e-garaa.n uThaa.e hu.e
jabii.n pe kaatib-e-taqdiir kii jalii tahriir
gale se saik.Do.n naqsh-e-qadam lagaa.e hu.e
guzarte vaqt ke gard-o-Gubaar ke niiche
hasiin jism kii taabindagii chhupaa.e hu.e
guzishta daur kii tahziib kii manaazil ko
javaan maa.n kii tarah god me.n sulaa.e hu.e
ye aadmii kii guzargaah-e-shaahraah-e-hayaat
hazaaro.n saal kaa baar-e-garaa.n uThaa.e hu.e
idhar se guzre hai.n cha.ngez-o-naadir-o-taimuur
lahuu me.n bhiigii hu.ii mish.ale.n jalaa.e hu.e
Gulaamo.n aur kaniizo.n ke kaarvaa.n aa.e
KHud apne KHuun me.n Duube hu.e nahaa.e hu.e
shikasta dosh pe diivaar-e-chiin ko laade
saro.n pe misr ke ehraam ko uThaa.e hu.e
jalaal-e-shaiKH-o-shikoh-e-barhamanii ke juluus
havas ke siino.n me.n aatish-kade chhupaa.e hu.e
jahaalato.n kii taviil-o-ariiz parchhaa.ii.n
tavahhumaat kii taariikiyaa.n jagaa.e hu.e
safed qaum ke ayyaar taajiro.n ke giroh
fareb-o-makr se apnii dukaa.n sajaa.e hu.e
shikast-KHurda siyaasii gadaagaro.n ke hujuum
adab se TuuTii hu.ii gardane.n jhukaa.e hu.e
Gamo.n se chuur musaafir thake hu.e raahii
charaaG-e-ruuh ke dil ke ka.nval bujhaa.e hu.e
ye aadmii kii guzargaah-e-shaahraah-e-hayaat
hazaaro.n saal kaa baar-e-garaa.n uThaa.e hu.e
na.e ufuq se na.e qaafilo.n kii aamad hai
charaaG-e-vaqt kii ra.ngiin lau ba.Dhaa.e hu.e
baGaavato.n kii sipah inqalaab ke lashkar
zamii.n pe paa.nv falak pe nazar jamaa.e hu.e
Guruur-e-fat.h ke parcham havaa me.n lahraate
sabaat-o-azm ke uu.nche alam uThaa.e hu.e
hatheliyo.n pe liye aaftaab aur mahtaab
baGal me.n kurra-e-arz-e-hasii.n dabaa.e hu.e
uTho aur uTh ke inhe.n qaafilo.n me.n mil jaa.o
jo manzilo.n ko hai.n gard-e-safar banaa.e hu.e
qadam ba.Dhaa.e hu.e hai.n mujaahidaan-e-vatan
mujaahidaan-e-vatan hai.n qadam ba.Dhaa.e hu.e

Ali Sardar Jafri
Nazm

tamir-e-gulistan

maqsad ko na paaband-e-taqdiir karo yaaro
ta.amiir-e-gulistaa.n kii tadbiir karo yaaro

Takmiil Rizvi Lakhnavi
Nazm

hindostan

ek gahrii nii.nd me.n kab tak sulaayaa jaa.egaa
parda-e-taqdiir me.n kab tak chhupaayaa jaa.egaa

Maikash Akbarabadi
Nazm

dilli mein hain

jo ba-zaahir but-shikan hai.n aur ba-baatin but-taraash
KHuubii-e-taqdiir se vo mehrbaa.n dehlii me.n hai.n

Izhaar Malihabadi
Nazm

subhash-chandr-bos bahadur-shah-zafar ke mazar par

gardish-e-taqdiir ke haatho.n vatan se duur huu.n
ek bulbul huu.n magar sehn-e-chaman se duur huu.n

Jagan Nath Azad
Nazm

ahd-e-hazir ki dil-ruba maKHluq

zard balbo.n ke baazu.o.n me.n asiir
saKHt be-jaan lambii kaalii sa.Dak
apnii be-nuur dhundlii aa.nkho.n se
pa.Dh rahii hai navishta-e-taqdiir

Shahryar
Nazm

musafir ke Thikane nahin hote

ai mire maazii kii
bichh.Dii hu.ii raaho
KHayaal-e-yaar se ba.Dh kar
hasiin shaah-raaho
sadaa na do mujh ko
ki sar-zamiin-e-vatan par
kisii bhii aa.ngan ke
kisii daraaz badan dar ke
KHuub-ruu se maathe par
mere KHayaal me.n dilkash
hasiin naam kii tahriir
kaatib-e-vaqt ne nahii.n likhii
ki mai.n havaa-e-dahr huu.n
bhaTaknaa nagar nagar
ajnabii dayaaro.n me.n
meraa muqaddar hai
musaafiro.n ke Thikaane
kahii.n nahii.n hote
ki dastaras me.n ho.n
jin ke sirf Ganiim-e-dauraa.n
rafiiq un ke
zamaane nahii.n hote

Naghmana Kanwal
Nazm

ab to kuchh aisa lagta hai

ab to kuchh aisaa lagtaa hai
saaraa jag mujh se chhoTaa hai
aa.nkhe.n bhii mirii bojhal bojhal
shaano.n par bhii kuchh rakkhaa hai
kaatib-e-vaqt ne jaate jaate
chehre par kuchh likh saa diyaa hai
aa.iine me.n chehra khole
dekh rahii huu.n kyaa likhkhaa hai
likhkhaa hai tire ruup kaa haala
aur kisii ke gird sajaa hai
likhkhaa hai zulfo.n kaa do-shaala
aur kisii ne o.Dh liyaa hai
likhkhaa hai aa.nkho.n kaa piyaala
kahii.n kahii.n se TuuT rahaa hai
pa.Dh kar mus.haf-e-ruKH kii ibaarat
dil ko itmiinaan hu.aa hai
ruuh talak sarshaar hai merii
aa.iina hairaan hu.aa hai
us ko shaayad ilm nahii.n hai
meraa daaman ab bhii bharaa hai
jo rakhnaa thaa rakkhe hu.e huu.n
jo denaa thaa baa.nT diyaa hai

Zehra Nigaah
Nazm

aah be-tasir

abhii ham aah-e-be-taasiir kii taasiir dekhe.nge
abhii taqdiir se uljhii hu.ii tadbiir dekhe.nge
bahut dushvaar hai daaman chhu.Daa kar yuu.n nikal jaanaa
qayaamat tak vo merii KHaak daaman-giir dekhe.nge
tire gesuu ke saudaa.ii tirii zulfo.n ke diivaane
sahar tak KHvaab me.n u.Dtii hu.ii zanjiir dekhe.nge
hamaare saamne tum ho tumhaare saamne ham hai.n
na dekhii thii na dekhii hai na ye tasviir dekhe.nge
hamaarii KHaak u.D kar aastaan-e-yaar tak pahu.nche
kabhii aisii bhii gardish gardish-e-taqdiir dekhe.nge
agar fursat milii ham ko zamaane kii kashaakash se
tujhe bhii ek din ai aah-e-pur-taasiir dekhe.nge

Sakeena Mahmood
Nazm

mazdur

terii taqdiir hai aa.iina-e-taqdiir jahaa.n
KHuub ma.aluum hai teraa Gam-e-tanhaa mujh ko
tujh me.n uThne ke nishaa.n tujh me.n sambhalne ke nishaa.n
terii suurat me.n nazar aataa hai fardaa mujh ko

Daud Ghazi
Nazm

na-rasai

nuz.hat-e-shaam ne jab raKHt-e-safar baa.ndh liyaa
dard ne ruuh ko bedaarii kaa paiGaam diyaa
aah naasuur-e-vafaa
ghar se ham ishrat-e-aazaad ke shaidaa nikle
ho ke jaa.n-sozii tanhaa.ii se paspaa nikle
le kar apne dil-e-biimaar ko tanhaa nikle
soch rakkhaa thaa ki ab yuu.n use bahlaa.e.nge
raqs me.n mai me.n kisii saaz me.n kho jaa.e.nge
hosh se aaj to mahruum se ho jaa.e.nge
taaki ho jins-e-tamannaa ke fusuu.n se chhuuTe
maslahat kosh bane qaid-e-junuu.n se chhuuTe
sar se dil-daarii-e-aazaad kaa saudaa nikle
dard miT jaa.e tirii yaad kaa kaa.nTaa nikle
lekin is shuumii-e-taqdiir kaa kyaa ho shikva
sar hii jab naaz-gah-e-vaar se uu.nchaa nikle

Arsh Siddiqui
Nazm

tan-e-nahif se amboh-e-jabr haar gaya

ab aa.nsu.o.n ke dhu.ndlako.n me.n raushnii dekho
hujuum-e-marg se aavaaz-e-zindagii ko suno
suno ki tishna-dahan maalik-e-sabiil hu.e
suno ki KHaak-basar vaaris-e-fasiil hu.e
ridaa-e-chaak ne dastaar-e-shah ko taar kiyaa
tan-e-nahiif se amboh-e-jabr haar gayaa
suno ki hirs-o-havas qahr-o-zahr kaa relaa
Gubaar-o-KHaar o KHash-o-KHaak hii ne thaam liyaa
siyaahiyaa.n hii muqaddar ho.n jin nigaaho.n kaa
KHudaa bachaa.e un aa.nkho.n kii shola-baarii se
Daro ki zard-ruKHaa.n niim-jaa.n o KHasta-tanaa.n
hazaar baar mare aur laakh baar jiye!
vo log jin ko mayassar na aa.e marham-e-vaqt!
vo log talKHii-e-taqdiir baa.nT lete hai.n
vo haath jin pe ho nafrat kaa za.ng sadiyo.n se
vo haath lohe kii diivaar kaaT dete hai.n

Zehra Nigaah
Nazm

idhar bhi aa

ye johd-o-kashmakash ye KHarosh-e-jahaa.n bhii dekh
adbaar kii, saro.n pe ghanii badliyaa.n bhii dekh
ye top ye tufa.ng ye teG o sinaan bhii dekh
o kushta-e-nigaar-e-dil-aaraa idhar bhii aa
aa, aur bigul kaa naGma-e-''jaa.n-aafrii.n'' bhii sun
aa, be-kaso.n kaa naala-e-andoh-gii.n bhii sun
aa, baaGiyo.n kaa zamzama-e-aatishii.n bhii sun
o mast-e-saaz-o-barbat-o-naGma idhar bhii aa
taqdiir kuchh ho, kaavish-e-tadbiir bhii to hai
taKHriib ke libaas me.n ta.amiir bhii to hai
zulmaat ke hijaab me.n tanviir bhii to hai
aa muntazir hai ishrat-e-fardaa idhar bhii aa

Asrarul Haq Majaz
Nazm

insan

zarra-e-taariik mehr-e-zau-fishaa.n hone ko hai
qatra-e-naachiiz bahr-e-bekaraa.n hone ko hai
juzv kul karte hai.n apnii quvvate.n nazr-e-bashar
banda-e-majbuur muKHtaar-e-jahaa.n hone ko hai
ye zamii.n thii.n zillat-e-aafaaq jis kii pastiyaa.n
rif.ato.n me.n ruu-kash-e-haft-aasmaa.n hone ko hai
nusKHa-e-iijaad-e-aalam paa na le insaa.n kahii.n
aashkaara fitrat-e-kaun-o-makaa.n hone ko hai
barq-o-aatish se hu.aa barbaad jis kaa KHaanumaa.n
ab vo aagaah-e-naved-e-bazm-e-jaa.n hone ko hai
maut ke saamaa.n kii paiham justujuu jis ko rahii
raaz-e-hastii us kii mahfil me.n ayaa.n hone ko hai
ibn-e-aadam ya.anii ye parvarda-e-jaur-e-falak
shaayad ab is par mashiyyat mehrbaa.n hone ko hai
bebas aur bechaara thaa gahvaara-e-taqdiir me.n
lekin ab ye kaudak-e-naadaa.n javaa.n hone ko hai
zarra-e-taariik mehr-e-zau-fishaa.n hone ko hai
qatra-e-naachiiz bahr-e-be-karaa.n hone ko hai

Fazlurrahman
Nazm

dilli ka purana qila

zamaane Dhal ga.e haalaat kii tahriir baaqii hai
puraane husn kii TuuTii hu.ii tasviir baaqii hai
na vo shamshiir baaqii hai na vo tauqiir baaqii hai
magar taariiKH me.n lipTii hu.ii ta.amiir baaqii hai
fazaa-e-hast ke raahii maqaam-e-buud par pahu.nche
nuquush-e-rahguzar me.n partav-e-rahgiir baaqii hai
jo shohrat aam thii pahle ga.ii sadiyo.n ke madfan me.n
magar aasaar me.n simTii hu.ii tash.hiir baaqii hai
baqaa ke KHvaab saare Dhal ga.e KHvaab-e-musalsal me.n
ye un KHvaabo.n kii pathraa.ii hu.ii ta.abiir baaqii hai
mazaaq-e-aam sarf-e-kam-nigaahii hai to rahne do
dil-e-shaa.ir kii aa.nkho.n me.n abhii tanviir baaqii hai
tilaa.ii nuqra.ii jazbaat ke saa.nche me.n Dhalne ko
rag-e-taKH.iil par ik nashtar-e-taasiir baaqii hai
ye buniyaado.n kii gahraa.ii ye diivaaro.n kii bebaakii
jahaa.n tamhiid qaa.em hai vahii.n ta.amiir baaqii hai
ye mazbuutii kii a.ng.Daa.ii ye bal khaatii fasiil-e-sang
vahii ik aahanii fitrat vahii zanjiir baaqii hai
kamii.n-gaaho.n kii peshaanii kanakhiyo.n se murassaa hai
tahaffuz kii ka.Dii aa.nkho.n kii kuchh taasiir baaqii hai
ye be-tartiib patthar jhaa.Diyaa.n khaDDe ye hariyaalii
kahii.n aaGosh-e-fitrat hai kahii.n ta.amiir baaqii hai
sarishk-e-yaad naa-mumkin sahii duniyaa kii aa.nkho.n me.n
zabaan-e-haal par ik aalam-e-taqdiir baaqii hai
ye KHalvat-zaar ruumaano.n se vaabasta rahe yaa-rab
ki tadbiiro.n kii gardan par abhii taqdiir baaqii hai

Ram Parkash Rahi
Nazm

ruh-e-arzi aadam ka istiqbaal karti hai

khol aa.nkh zamii.n dekh falak dekh fazaa dekh!
mashriq se ubharte hu.e suuraj ko zaraa dekh!
is jalva-e-be-parda ko parda me.n chhupaa dekh!
ayyaam-e-judaa.ii ke sitam dekh jafaa dekh!
betaab na ho maarka-e-biim-o-rajaa dekh!
hai.n tere tasarruf me.n ye baadal ye ghaTaa.e.n
ye gumbad-e-aflaak ye KHaamosh fazaa.e.n
ye koh ye sahraa ye samundar ye havaa.e.n
thii.n pesh-e-nazar kal to farishto.n kii adaa.e.n
aa.iina-e-ayyaam me.n aaj apnii adaa dekh!
samjhegaa zamaana tirii aa.nkho.n ke ishaare!
dekhe.nge tujhe duur se garduu.n ke sitaare!
naapaid tire bahr-e-taKHayyul ke kinaare
pahu.nche.nge falak tak tirii aaho.n ke sharaare
taamiir-e-KHudii kar asar-e-aah-e-rasaa dekh
KHurshiid-e-jahaa.n-taab kii zau tere sharar me.n
aabaad hai ik taaza jahaa.n tere hunar me.n
jachte nahii.n baKHshe hu.e firdaus nazar me.n
jannat tirii pinhaa.n hai tire KHuun-e-jigar me.n
ai paikar-e-gul koshish-e-paiham kii jazaa dekh!
naala.nda tire uud kaa har taar azal se
tuu jins-e-mohabbat kaa KHariidaar azal se
tuu piir-e-sanam-KHaana-e-asraar azal se
mehnat-kash o KHuu.n-rez o kam-aazaar azal se
hai raakib-e-taqdiir-e-jahaa.n terii razaa dekh!

Allama Iqbal
Nazm

dawat-e-nazar

mai.n hii mai.n huu.n ko.ii hushyaar kahe jaataa hai
vo hii vo hai.n ko.ii sarshaar kahe jaataa hai
hama-uust us kii KHudii ke liye markaz ai dost
us kaa naadaan anaa bhii hai mataa-e-hama-uust
hosh-afzaa hai mujhe GalGala-e-hushyaarii
kaash samjhe use tuu bhii jaras-e-bedaarii
inhisaar-e-mann-o-tuu Thiik nahii.n sab samjhe.n
vaqt hai KHud ko samajhne kaa yahii ab samjhe.n
KHud-shanaasii se hai ummiid ki ban jaa.egaa kaam
varna is haal-e-zabuu.n kaa hai tabaahii anjaam
na basaarat na basiirat na aziimat ham me.n
kaam karne kii nahii.n naam ko himmat ham me.n
ik KHudii thii so kiyaa us ko bhii Gaflat ke sipurd
zindagii kii hu.ii ye lahar bhii yuu.n dariyaa burd
is taraf dekh fariisaan-e-aruupaa kii numuud
aaj bil-fe.al jo saabit hai vo un kaa hai vajuud
raaz-e-taqdiir khulaa un ke amal se un par
apne dar pai hai faqat be-amalii kaa chakkar
husn-kaarii kaa mazaaq un se hu.aa aa.iina
na.ii duniyaa kaa ye manzar hai nayaa aa.iina
aisii vahdat pe na ho kis liye kasrat shaidaa
ek manzil se hai.n haftaa-o-manaazil paidaa
un kii duniyaa hai na.ii apnii puraanii duniyaa
ban ga.ii apne liye raam kahaanii duniyaa
aur baato.n me.n to kyaa KHaak milegii jiddat
jab zabaa.n me.n bhii gavaaraa nahii.n ko.ii jiddat
chashm-ba-raah nazar aate hai.n vo naqd-e-nigaar
jin kii fitrat ko upaj se nahii.n bilkul sarokaar
na.ii tarkiib agar un ko kahii.n mil jaa.e
barham itne ho.n ki paamaal zamii.n hil jaa.e
phir ye hai.n aur adab-soz mudaaraate.n hai.n
kyaa zamaane me.n panapne kii yahii baate.n hai.n

Ali Manzoor Hyderabadi
Nazm

KHuddari

teraa ye kahte hu.e siine me.n dil hiltaa nahii.n
ham-nashii.n kyo.n KHud-parastaaro.n se mai.n miltaa nahii.n
puuchhtaa hai mujh se is mohmal se fiqre kaa javaab
sun kiye detaa huu.n mai.n saarii haqiiqat be-naqaab
siina-e-shaa.ir me.n pinhaa.n jazba-e-KHuddaar hai
aa.nkh bhii raushan hai merii ruuh bhii bedaar hai
un ke aage ruuh merii pech-o-KHam khaatii rahii
phabtiyaa.n kastaa rahaa dil ruuh sharmaatii rahii
sard-mehrii se tamannaa-e-dilii shal ho ga.ii
baar-e-Gam se Gairat-e-taqdiir bojhal ho ga.ii
garmii-e-KHurshiid se sonaa pighaltaa hai kahii.n
jauharii bhii nuqs ke saa.nche me.n Dhaltaa hai kahii.n
jab ra.uunat chhe.Dtii hai KHud-parastii kaa sitaar
bhes me.n aaho.n ke dil hotaa hai meraa naGma-baar
qalb meraa daulat-e-ehsaas kho saktaa nahii.n
aab-o-taab-e-zar me.n KHuddaarii Dubo saktaa nahii.n
miT nahii.n saktaa miTaa.e se Gayuuraana-shikoh
kyaa banaa saktaa hai aKHlaaqii darindo.n kaa giroh
jazba-e-Gairat kisii ke paa.nv pa.D saktaa nahii.n
mar to saktaa huu.n zamii.n me.n zinda ga.D saktaa nahii.n
rahzan-e-insaaniyat rahte hai.n har dam ghaat me.n
apnii azmat kaa ko.ii rakhte hai.n pahluu baat me.n
Gairat-e-muKHlis halaak-e-jazba-e-pindaar ho
ai hariif-e-zehn-o-dil bedaar ho bedaar ho
un kii behis khaal par ko.ii asar hotaa nahii.n
tang-nazro.n me.n haqiiqat kaa guzar hotaa nahii.n
merii taariiKH-o-adab hii me.n nahii.n alfaaz-e-laaf
banda-parvar hai mujhe kam-maa.egii kaa e'tiraaf
aisii haalat me.n kisii se jhuk ke milnaa hai gunaah
ye KHuluus-e-be-mahal kartaa hai ruuho.n ko siyaah
apnaa dil apne hii haatho.n se masal saktaa nahii.n
ham-nashii.n mai.n apnii fitrat ko badal saktaa nahii.n

Nakhshab Jaarchawi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now