Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "kabuutaro.n"

Nazm MATCHES FOR "kabuutaro.n"

Nazm

safir-e-laila-1

safiir-e-lailaa yahii kha.nDar hai.n jahaa.n se aaGaaz-e-daastaa.n hai
zaraa saa baiTho to mai.n sunaa.uu.n
fasiil-e-qarya ke surKH patthar aur un pe azhdar-nishaan burje.n gavaah qarya kii azmato.n kii
chahaar jaanib naKHiil-e-tuubaa aur us me.n bahte faraavaa.n chashme
buland pe.Do.n ke ThanDe saa.e the shaaKH-e-zaituu.n isii jagah thii
yahii sutuu.n the jo dekhte ho pa.De hai.n murda giddho.n ke maanind
uThaa.e rakhte the in ke shaane aziim qasro.n kii sa.ngii.n saqfe.n
yahii vo dar hai.n safiir-e-lailaa ki jin ke taKHte u.Daa liye hai.n dino.n kii aavaara sarsaro.n ne
yahii.n se guzrii thii.n surKH uu.nTo.n kii vo qataare.n
ki un kii pushte.n sanobaro.n ke safed paalaan le ke chaltii.n
uThaa.e phirtii.n javaan pariyo.n kii mahmalo.n ko
ye sehan-e-qarya hai un jag.ho.n par ghanii khajuuro.n kii sabz shaaKHe.n
falak se taaza phalo.n ke KHoshe churaa ke bhartii thii.n pahlu.o.n me.n
safed paanii ke sau ku.e.n yuu.n bhare hu.e the
ki chau.Dii mashko.n ko haath bhar kii hii rassiyaa.n thii.n
mazaaf-e-qarya me.n sabza-gaahe.n aur in me.n chartii thii.n farba bhe.De.n
shimaal-e-qarya me.n niil-gaa.e.n manaar-e-masjid se dekhte the
pare hazaaro.n kabuutaro.n ke fasiil-e-qarya se gumbado.n tak
paro.n ko zoro.n se pha.D.pha.Daate the aur sehno.n me.n dau.Dte the
yahii.n thaa sab kuchh safiir-e-lailaa
isii jagah par jahaa.n babuulo.n ke KHaar phirte hai.n chuuhiyo.n kii savaariyo.n par
jahaa.n parindo.n ko haul aate hai.n raakh u.Dtii hai haDDiyo.n kii
yahii vo vahshat-saraa hai jis me.n dilo.n kii aa.nkhe.n laraz rahii hai.n
safiir-e-lailaa tum aaj aa.e ho to bataa.uu.n
tire musaafir yahaa.n se nikle ufuq ke parbat se us taraf ko
vo aise nikle ki phir na aa.e
hazaar kohna du.aa.e.n garche buzurg ho.nTo.n se uTh ke baam-e-falak pe pahu.nchii.n
magar na aa.e
aur ab yahaa.n par na ko.ii mausam na baadalo.n ke shafiiq saa.e
na suurajo.n kii safed dhuupe.n
faqat sazaa.e.n hai.n uu.ngh-bhartii kariih chehro.n kii deviyaa.n hai.n
safiir-e-lailaa
yahaa.n jo din hai.n vo din nahii.n hai.n
yahaa.n kii raate.n hai.n be-sitaara
sahar me.n ko.ii namii nahii.n hai

Ali Akbar Natiq
Nazm

nazm

vo ek lamha
jo sar paTaktaa hai pattharo.n par
pa.Daa hu.aa hai jo shaam ke phailte dhuve.n me.n lahuu me.n lat-pat
vo ek lamha
ki jis kii KHaatir hazaaro.n sadiyaa.n karo.Do.n barso.n se aabla-paa
magar vo lamha
safar kii piilii udaasiyo.n ke kabuutaro.n ke paro.n se uljhaa
savaad-e-manzil kii mish.alo.n me.n
pighal pighal kar ayaa.n hu.aa hai
vo ek lamha
sulagte shabdo.n kii u.ngliyo.n se giraa jo niiche
to dha.ns gayaa phir aTal ma.aanii kii daldalo.n me.n
magar ye achchhaa hu.aa ki us dam
khajuur bhar kar jahaaz aa.e
tamaam nazre.n khajuur kii guThliyo.n me.n inzaal Dhuu.nDtii thii.n
vo chhe mahiine hamal uThaa.e hamaare ghar kii qadiim ziinat
na sii.Dhiyo.n par
na khi.Dkiyo.n me.n
na chaa.e kii pyaaliyo.n se uThte dhuve.n ke piichhe
tamannaa kaaGaz pe phail jaa.e to us kii shiddat kaa naam TuuTe
safed bakrii kii aa.nkh se kaun jhaa.nktaa hai
tumhe.n KHabar hai
tumhe.n KHabar ho to mujh se kah do
mai.n apne vaalid kii qabr kaa raasta talaashuu.n
idhar bhii suuraj me.n saaraa manzar lahuu lahuu hai
udhar bhii saayo.n me.n saarii aa.nhke.n dhu.aa.n dhu.aa.n hai.n
ye band aa.nkho.n me.n kaun chhup kar
badan ke andar ko jhaa.nktaa hai
KHamoshiyo.n ke kha.nDar me.n guu.njii
KHamoshiyo.n ke kha.nDar me.n guu.njii azaa.n fajar kii
vazuu ke paanii ke saath saare gunaah Tapke
du.aa me.n us ne sharaab maa.ngii to
tishnagii ke saraab chhalke
sitaare niiche utar ke aa.e
vo ek lamha
shikastagii ke badan ke andar
vo ek lamha
shikastagii ke badan se baahar
vo ek lamha hazaar sadiyo.n ke bandhano.n se nikal kar aayaa
vo ek lamha jo dastaras ke vasii.a halqo.n se duur rah kar
rutuubato.n me.n ba.Dii tamaazat se muskuraayaa
muqaddaro.n me.n hazaar lamho.n ke darmiyaa.n jis kaa taKHt KHaalii
lahuu me.n lat-pat vo ek lamha
vo ek lamha jo sar paTaktaa hai pattharo.n par!

Adil Mansuri
Nazm

ek tha raja chhoTa sa

'alii-iftiKHaar' kii maa.n se mai.n ne bataa diyaa hai ki apne beTe ko
titliyo.n ke qariib jaane se rokiye
use rokiye ki pa.Dosiyo.n ke gharo.n me.n jhuule pa.De hu.e hai.n to us se kyaa
use kyaa pa.Dii ki kabuutaro.n ko bataa.e kaise havaa.e.n us kii pata.ng chhiin ke le ga.ii.n
'alii-iftiKHaar' kii maa.n se mai.n ne bataa diyaa hai ki apne beTe
ko titliyo.n ke qariib jaane se rokiye
kahii.n yuu.n na ho ki phir ek baar bharii bahaar me.n e'tibaar ke saare zaKHm mahak uThe.n
kahii.n yuu.n na ho ki na.e sire se hamaare zaKHm mahak uThe.n
'alii-iftiKHaar' kii maa.n se mai.n ne bataa diyaa hai ki apne beTe ko
titliyo.n ke qariib jaane se rokiye

Iftikhar Arif
Nazm

zamin un ke liye phul khilati hai

jab aag jalii naaf ke niiche to zamii.n phail ga.ii
aag jalii aur badan phail ga.e
aa.nkho.n kii aavaargii be-ra.ng hu.ii
dhuup havaa chaa.ndnii
sab bastiyo.n me.n KHaak u.Dii
qaafile hii qaafile the
qaafile jo dard ke vatano.n se chale
chalte ga.e ajnabii KHushbuu kii taraf
us kii taraf jis ke liye saarii kitaabo.n me.n likhaa hai
vo kabhii haath nahii.n aatii kabuutaro.n se chaTaatii hai
magar raat ke darvaaze pe pahu.nche to sitaare na mile
log abhii sub.h kii ummiid me.n shab kaaTte hai.n
log dukhii log akele hai.n
unhe.n raasta do siine se chimTaa lo
har ik raaste me.n jaltii hu.ii aag bujhaa do ki badan
phailte jaate hai.n zamii.n ta.ng hu.ii jaatii hai

Abbas Athar
Nazm

lafz paron ki tarah hote hain

tamaam din tumhaare messages mere dil kii mu.nDero.n par kabuutaro.n kii tarah utarte hai.n
safed duudhiyaa siyaah chashm sharbatii aur surma.ii maa.il ja.ngalii kabuutar jin ke siine ke baal
ka.ii rango.n me.n damakte hai.n
sabz-guu.n niilguu.n aur taabdaar tapte hu.e taa.nbe ke jaise

Janan Malik
Nazm

apne shahr mein fasad

safed kabuutaro.n se aaj saaraa aakaash KHaalii hai
dhuup Darii hu.ii faaKHta sii lagtii hai
mu.nDero.n pe baiThii hu.ii zard hai
kaa.np kaa.np uThtii hai havaa aadmii kii tarah
curfew se bhare hu.e shahr kii sa.Dko.n pe gho.Do.n kii vahshii Taape.n
aag u.Daatii hai.n
makaan jalte hai.n mire tumhaare
indar hamaare dhu.aa.n dhu.aa.n saa kuchh rah rah uThtaa hai
daur me.n aur paas me.n bhii zoro.n ke dhamaake hote hai.n
goliyaa.n taaba.D-to.D sansanaatii hai.n
haDDiyo.n me.n utrii jaatii hai.n
din lahuu KHaak me.n lipTaa hu.aa guzartaa hai
shaam bhii lahuuluhaan chhipkilii kii tarah sahmii hu.ii chup-chaap udaas udaas
dhiire se nadii me.n Duubtii hai
phir siyaah hote hu.e pe.Do.n pe Dher saare gidh
apnii puurii taaqat se apne par pha.D.pha.Daate hai.n
sannaaTaa kaa.enaat me.n aur bhii gahraataa hai
kuchh dhu.aa.n dhu.aa.n saa andar andar mere tumhaare or bhii ba.Dh jaataa hai

Akhtar Yusuf
Nazm

amn

use ham Dhuu.nDne to nikle hai.n
magar pahchaane.nge kaise
jang-e-badr-o-uhad se
vaaqi.a-e-karbalaa tak
hiroshima
nagasaki
filistiin-o-iraq tak
safed kabuutaro.n ke jhunD me.n
zaituu.n kii shaaKHo.n me.n
alam-e-abyaz me.n
kahii.n to hai vo
zaa.iqa-daar khaano.n me.n
aaliishaan aivaano.n me.n
phuulo.n ke dasto.n me.n
kaaGaz ke basto.n me.n
qalam kii raushnaa.ii me.n
lafzo.n kii tanhaa.ii me.n
kahii.n bhaTak rahaa hai vo
naslo.n ke jhag.De
zabaano.n ke qaziye
rango.n ke khel
sarhad ke fe.al
us ke aa.De aa rahe hai.n
ab se duniyaa kii har hasiin shai ko
jis kaa ham naam nahii.n jaante
roke.nge aur puuchhe.nge
tumhaaraa naam amn to nahii.n

Shahnaz Nabi
Nazm

ajib laDki

ajiib la.Dkii hai vo
ki us ko KHudaa banaayaa to vo KHafaa hai
chahaar jaanib
ibaadato.n kaa hisaar khii.nchaa
masaafato.n ke shajar ugaa.e
hiraas kii vus.ato.n ko mai.n ne
tilism-e-saut-o-sadaa se baa.ndhaa
havaa.o.n ko samt-e-aagahii dii
shabo.n ke zaKHmii kabuutaro.n ko lahuu pilaayaa
falak pe niilaahaTe.n bikherii.n
KHalaa me.n qaus-e-quzah ke rangiin par u.Daa.e
nigaah-o-dil kii fasiil par jism-o-jaa.n sajaa.e badan ugaa.e
magar vo la.Dkii
KHudaa.ii paa kar bhii muzmahil hai
vo KHush nahii.n hai
vo kah rahii thii
ki tum ne mujh ko KHudaa banaayaa
to kyaa ye samjhuu.n
ki ko.ii mujh se bhii baalaa-tar hai

Zafar Zaidi
Nazm

aadhe raste mein

mujhe ghar jaane do
mai.n chhat ko jaane vaalii sii.Dhii par baiTh kar
ra.ng-bira.ngii pata.ngo.n
aur u.Dte hu.e safed kabuutaro.n ko dekhnaa chaahtaa huu.n
mujhe ghar jaane do
mere ghar kii pichhlii galii me.n sarsaraatii ThanDii havaa
ek dhaanii aa.nchal
aur khi.Dkiyo.n me.n saje phuul mere muntazir hai.n
mai.n shiisham ke tane par khudaa hu.aa aadhaa din
chhoTe chhoTe KHvaabo.n vaalii sanduuqchii
aur miTTii ke aab-KHore me.n pa.Daa vaapsii kaa ta.aviiz
vahii.n bhuul aayaa huu.n
mujhe ghar jaane do

Zahid Masood
Nazm

babul ke daraKHt se kaho

babuul ke daraKHt se kaho
abhii mashaam-e-jaa.n me.n har si.nghaar kii shaguftagii
ba.De hii inhimaak se bahaar-paash hai yahaa.n
jo mu.D ke dekhtaa huu.n adh-jale gulaab kaa badan
shahaadato.n ke ramz par si.nghaar bhii luTaa gayaa
jo mu.D ke dekhtaa huu.n faaKHta kaa ahmarii.n lahuu
jabiin-e-jaur kii sabhii ra.uunate.n miTaa gayaa
mire KHilaaf saazisho.n kaa ye muhiib silsila
mirii anaa ke baa.nkpan me.n daf.atan samaa gayaa
chiinaar ke daraKHt se hai naariyal ke pe.D tak
ravaa.n davaa.n hamaarii KHushbu.o.n kaa shoKH silsila
kabuutaro.n ke Gol kii phaban hiran kii chauk.Dii
havaa ke dosh-e-maGzaar ko dulhan banaa ga.ii
abhii mirii zamiin kii fazaa.e.n sub.h-e-faam hai.n
dhue.n ke naag se kaho
ba.Dii hii saKHt-jaan hai.n hamaarii vaadiyo.n me.n ra.ng-o-nuur kii lataafate.n
samundaro.n kii siipiyo.n se pokharo.n kii ghoghiyo.n ne
bai.ato.n ke vaaste sipurd kab kiyaa hai Gairato.n ke laala-zaar ko
abhii hisaar-e-sa.ng me.n ka.nval ke phuul hai.n khile
zabaan-e-reg-e-surKH se kaho
hamaare paa.nv jal ga.e to kyaa hu.aa
bahaar-e-sabz ke liye zamii.n to aaj mil ga.ii

Ambar Bahraichi
Nazm

shayad gulab shayad kabutar

phir jo vo ek duusre par jhapTe hai.n
to aise jhapTe
ki mu.nDere.n kabuutaro.n se
aur kiyaariyaa.n gulaabo.n se
bhar ga.ii.n
us din ke baa'd ham ne madaarii ko kabhii nahii.n dekhaa
achchhaa ab tum
mere liye paan lagaa do
aur achchhe KHvaabo.n pe dhyaan jamaa ke
so jaa.o

Rais Farogh
Nazm

safed ghoDe par sawar ajnabi

mire makaa.n ke saamne
vo juu.nhii aayaa
yak-ba-yak
ko.ii barq zan-zanaatii aa.nkh me.n utar ga.ii
lahuu me.n jaise an-ginat
kabuutaro.n kii pha.Dpha.DaahaTo.n ne sab
rago.n ke taar jhanjhanaa diye
tamaam khi.Dkiyo.n ke paT
''khaTaak'' se badan ne band kar liye
magar safed gho.De par savaar ajnabii kii aa.nkh
mere gird-o-pesh
iistaada jismo.n kii fasiil
to.D kar
mire sirhaane aa ga.ii
mirii har ek saa.ns jaise
KHanjaro.n kii nok me.n piro ga.ii
na jaane kitnii mehrbaan suurate.n
na jaane kitne bhuule-bisre vaaqiye
na jaane kitnii hasrato.n ke qaafile
shikasta kaa.nch kii tarah
bikhar ga.e
mai.n ik taraf to un ko jo.Dne
sameTne kii rau me.n mubtalaa-e-karb thaa
aur duusrii taraf
hazaaro.n KHanjaro.n se apnii saa.ns kii tanaab ko
sambhaalne kii had me.n
zaKHm zaKHm thaa
is ek lamhe me.n hii saarii umr kii
masaafato.n se bhii taviil-tar safar adaa hu.aa
magar na itnaa hausla hu.aa
ki us se ham-kalaam ho sakuu.n

Sultan Subhani
Nazm

nashr mukarrar

vo shaam
jab sa.Dke.n gul-e-surKH se bharii hu.ii.n thii.n
aivaan-e-insaaf par a.ndheraa utar rahaa thaa
mai.n ne
gardan aur kaano.n ko coat ke lambe collar me.n chhupaa liyaa
taaki
baaqii-maa.nda lahuu kii gardish chehre tak na aa sake
abaabiile.n
apne maskano.n se diivaana-vaar nikal aa.ii.n
aur
gumbado.n me.n bolne vaale kabuutaro.n ne chup-chaap
apnii cho.nche.n
KHaamosh taalaab me.n Dubo dii.n
vo shaam
jab khi.Dkiyo.n me.n sab chehre ek jaise nazar aane lage.n

Zahid Masood
Nazm

wapsi mumkin nahin

aziim qaatil ga.e zamaano.n ke maKHfii auhaam ke shikanjo.n me.n
saada-lauhii ke sikka sikka bikaa.uu gaahak
sisaktii KHilqat lahuu me.n lat-pat
uqaabii panjo.n me.n aabruu.e.n ta.Dap rahii hai.n
sazaa ke mehvar se TuuT girnaa
shadiid mushkil
ga.e yagaano.n ke jubbe ab tak lahuu me.n tar hai.n
shanaas-naame gale me.n laTkaa.e phirne vaale
talaash-e-zar me.n
badan ghumaatii havaa ke jhakka.D se girne vaale
musaafiro.n ke qadam
gadaa.ii ke KHaarzaaro.n me.n
zaKHm-KHurda
shikam-siparda
Galiiz saa.il
ga.e savaaro.n kii baKHshisho.n se
hatheliyo.n pe larazte kaase
musiibato.n kii kasiif KHairaat se
labaalab bhare hu.e hai.n
har ek jaanib hamaare kuucho.n me.n
haDDiyo.n se bane makaano.n ke baam-o-dar munhadim
fasiilo.n pe duurbiine.n liye
muqaabil
ga.e shikaaro.n se utre
majbuuriyo.n ke aajar
la.iim saudaagaro.n ke Tole
hamaare malbo.n ke baar-daane havas ke baaTo.n se tolte hai.n
hamaarii khaalo.n kaa KHasta resham gadho.n pe laade
amiir KHitto.n me.n bechte hai.n
maluul bastii me.n uryaa.n laashe.n
girii hai jin pe azaab ohdo.n kii
bhaarii sil
ga.e Thikaano.n pe ullu.o.n ke udaas maskan
kabuutaro.n ke vo aalne hai.n ki jin me.n sannaaTe bolte hai.n
saudaagaro aafiyat ke parcham khule
shikaare palaT bhii aa.e
magar ye socho ki mauj dar mauj tangnaa.o.n me.n
koh-paikar javaar-bhaaTe
musaafirat me.n tamaam ghaaTe
zaliil ghaayal
ga.e musaafir ki jin ke thailo.n me.n zar ba.ndhaa thaa
taho.n kii qabro.n me.n jaa chhupe hai.n
lahiim whalo.n ne un ke jismo.n ko noch Daalaa

Saadat Saeed
Nazm

zahr hi zahr ki dawa hai

barahna pinDlii pe
saa.np KHvaahish kii u.ngliyo.n ke
jo sarsaraa.e
to lazzato.n kii hatheliyo.n me.n
kabuutaro.n ke gudaaz jismo.n
kii dhiimii garmii
sulag uThii hai
ki karb apne badan kaa
suukhe labo.n se
ab jhaa.nkne lagaa hai
KHud apne KHuu.n kaa tezaab
rag rag me.n dau.Dtaa hai
mujhe to ab ko.ii naag Das le
ki zahr hii zahr kii davaa hai

Saba Ikram
Nazm

kahin kuchh jal raha hai

jab parinde lahuuluhaan ho kar aasmaan se gir rahe the
mai.n paanii ke qatre se motii chun rahii thii
jab kabuutaro.n ke Gol Gaa.eb the
aasmaan par shamshiire.n chamak rahii thii.n
mai.n baadalo.n ko bosa de rahii thii
aasmaanii baKHshish ne mere kore canvaas par
likh dii ek nazm
vahaa.n saahilo.n par u.Dte hu.e parinde the
baarish thii
aur kabuutaro.n ke Gol
aasmaan kaa rang niilaa thaa
pariyaa.n koh-e-qaaf se du.aa.e.n le kar lauTii thii.n

Tabassum Fatma
Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

saqi-nama

hu.aa KHema-zan kaarvaan-e-bahaar
iram ban gayaa daaman-e-koh-saar
gul o nargis o sosan o nastaran
shahiid-e-azal laala-KHuunii.n kafan
jahaa.n chhup gayaa parda-e-ra.ng me.n
lahuu kii hai gardish rag-e-sang me.n
fazaa niilii niilii havaa me.n suruur
Thaharte nahii.n aashiyaa.n me.n tuyuur
vo juu-e-kohistaa.n uchaktii hu.ii
aTaktii lachaktii saraktii hu.ii
uchhaltii phisaltii sambhaltii hu.ii
ba.De pech khaa kar nikaltii hu.ii
ruke jab to sil chiir detii hai ye
pahaa.Do.n ke dil chiir detii hai ye
zaraa dekh ai saaqii-e-laala-faam
sunaatii hai ye zindagii kaa payaam
pilaa de mujhe vo mai-e-parda-soz
ki aatii nahii.n fasl-e-gul roz roz
vo mai jis se raushan zamiir-e-hayaat
vo mai jis se hai masti-e-kaa.enaat
vo mai jis me.n hai soz-o-saaz-e-azal
vo mai jis se khultaa hai raaz-e-azal
uThaa saaqiyaa parda is raaz se
la.Daa de mamuule ko shahbaaz se
zamaane ke andaaz badle ga.e
nayaa raag hai saaz badle ga.e
hu.aa is tarah faash raaz-e-fara.ng
ki hairat me.n hai shiisha-baaz-e-fara.ng
puraanii siyaasat-garii KHvaar hai
zamii.n miir o sultaa.n se be-zaar hai
gayaa daur-e-sarmaaya-daarii gayaa
tamaashaa dikhaa kar madaarii gayaa
giraa.n KHvaab chiinii sambhalne lage
himaala ke chashme ubalne lage
dil-e-tuur-e-siinaa-o-faaraan do-niim
tajallii kaa phir muntazir hai kaliim
musalmaa.n hai tauhiid me.n garam-josh
magar dil abhii tak hai zunnaar-posh
tamaddun tasavvuf sharii.at-e-kalaam
butaan-e-ajam ke pujaarii tamaam
haqiiqat KHuraafaat me.n kho ga.ii
ye ummat rivaayaat me.n kho ga.ii
lubhaataa hai dil ko kalaam-e-KHatiib
magar lazzat-e-shauq se be-nasiib
bayaa.n is kaa mantiq se suljhaa hu.aa
luGat ke bakhe.Do.n me.n uljhaa hu.aa
vo suufii ki thaa KHidmat-e-haq me.n mard
mohabbat me.n yaktaa hamiiyat me.n fard
ajam ke KHayaalaat me.n kho gayaa
ye saalik maqaamaat me.n kho gayaa
bujhii ishq kii aag andher hai
musalmaa.n nahii.n raakh kaa Dher hai
sharaab-e-kuhan phir pilaa saaqiyaa
vahii jaam gardish me.n laa saaqiyaa
mujhe ishq ke par lagaa kar u.Daa
mirii KHaak jugnuu banaa kar u.Daa
KHirad ko Gulaamii se aazaad kar
javaano.n ko piiro.n kaa ustaad kar
harii shaaKH-e-millat tire nam se hai
nafas is badan me.n tire dam se hai
ta.Dapne pha.Dakne kii taufiiq de
dil-e-murtazaa soz-e-siddiiq de
jigar se vahii tiir phir paar kar
tamannaa ko siino.n me.n bedaar kar
tire aasmaano.n ke taaro.n kii KHair
zamiino.n ke shab zinda-daaro.n kii KHair
javaano.n ko soz-e-jigar baKHsh de
miraa ishq merii nazar baKHsh de
mirii naav girdaab se paar kar
ye saabit hai to is ko sayyaar kar
btaa mujh ko asraar-e-marg-o-hayaat
ki terii nigaaho.n me.n hai kaa.enaat
mire diida-e-tar kii be-KHvaabiyaa.n
mire dil kii poshiida betaabiyaa.n
mire naala-e-niim-shab kaa niyaaz
mirii KHalvat o anjuman kaa gudaaz
uma.nge.n mirii aarzuu.e.n mirii
ummiide.n mirii justuju.e.n mirii
mirii fitrat aa.iina-e-rozgaar
Gazaalaan-e-afkaar kaa murG-zaar
miraa dil mirii razm-gaah-e-hayaat
gumaano.n ke lashkar yaqii.n kaa sabaat
yahii kuchh hai saaqii mataa-e-faqiir
isii se faqiirii me.n huu.n mai.n amiir
mire qaafile me.n luTaa de ise
luTaa de Thikaane lagaa de ise
damaa-dam ravaa.n hai yam-e-zindagii
har ik shai se paidaa ram-e-zindagii
isii se hu.ii hai badan kii numuud
ki sho'le me.n poshiida hai mauj-e-duud
giraa.n garche hai sohbat-e-aab-o-gil
KHush aa.ii ise mehnat-e-aab-o-gil
ye saabit bhii hai aur sayyaar bhii
anaasir ke phando.n se be-zaar bhii
ye vahdat hai kasrat me.n har dam asiir
magar har kahii.n be-chugo.n be-naziir
ye aalam ye but-KHaana-e-shash-jihaat
isii ne taraashaa hai ye somnaat
pasand is ko takraar kii KHuu nahii.n
ki tuu mai.n nahii.n aur mai.n tuu nahii.n
man o tuu se hai anjuman-aafrii.n
magar ain-e-mahfil me.n KHalvat-nashii.n
chamak us kii bijlii me.n taare me.n hai
ye chaa.ndii me.n sone me.n paare me.n hai
usii ke bayaabaa.n usii ke babuul
usii ke hai.n kaa.nTe usii ke hai.n phuul
kahii.n us kii taaqat se kohsaar chuur
kahii.n us ke phande me.n jibra.iil o huur
kahii.n jaza hai shaahiin siimaab ra.ng
lahuu se chakoro.n ke aaluuda chang
kabuutar kahii.n aashiyaane se duur
pha.Daktaa hu.aa jaal me.n naa-subuur
fareb-e-nazar hai sukuun o sabaat
ta.Daptaa hai har zarra-e-kaa.enaat
Thahartaa nahii.n kaarvaan-e-vajuud
ki har lahz hai taaza shaan-e-vajuud
samajhtaa hai tuu raaz hai zindagii
faqat zauq-e-parvaaz hai zindagii
bahut us ne dekhe hai.n past o buland
safar us ko manzil se ba.Dh kar pasand
safar zindagii ke liye barg o saaz
safar hai haqiiqat hazar hai majaaz
ulajh kar sulajhne me.n lazzat use
ta.Dapne pha.Dakne me.n raahat use
hu.aa jab use saamnaa maut kaa
kaThin thaa ba.Daa thaamnaa maut kaa
utar kar jahaan-e-makaafaat me.n
rahii zindagii maut kii ghaat me.n
mazaaq-e-du.ii se banii zauj zauj
uThii dasht o kohsaar se fauj fauj
gul is shaaKH se TuuTte bhii rahe
isii shaaKH se phuuTte bhii rahe
samajhte hai.n naadaa.n use be-sabaat
ubhartaa hai miT miT ke naqsh-e-hayaat
ba.Dii tez jaulaa.n ba.Dii zuud-ras
azal se abad tak ram-e-yak-nafs
zamaana ki zanjiir-e-ayyaam hai
damo.n ke ulaT-pher kaa naam hai
ye mauj-e-nafs kyaa hai talvaar hai
KHudii kyaa hai talvaar kii dhaar hai
KHudii kyaa hai raaz-daruun-hayaat
KHudii kyaa hai bedaari-e-kaa.enaat
KHudii jalva badmast o KHalvat-pasand
samundar hai ik buu.nd paanii me.n band
a.ndhere ujaale me.n hai taabnaak
man o tuu me.n paidaa man o tuu se paak
azal us ke piichhe abad saamne
na had us ke piichhe na had saamne
zamaane ke dariyaa me.n bahtii hu.ii
sitam us kii maujo.n ke sahtii hu.ii
tajassus kii raahe.n badaltii hu.ii
damaa-dam nigaahe.n badaltii hu.ii
subuk us ke haatho.n me.n sa.ng-e-giraa.n
pahaa.D us kii zarbo.n se reg-e-ravaa.n
safar us kaa anjaam o aaGaaz hai
yahii us kii taqviim kaa raaz hai
kiran chaa.nd me.n hai sharar sang me.n
ye be-ra.ng hai Duub kar rang me.n
ise vaasta kyaa kam-o-besh se
nasheb o faraaz o pas-o-pesh se
azal se hai ye kashmakash me.n asiir
hu.ii KHaak-e-aadam me.n suurat-paziir
KHudii kaa nasheman tire dil me.n hai
falak jis tarah aa.nkh ke til me.n hai
KHudii ke nigahbaa.n ko hai zahr-naab
vo naa.n jis se jaatii rahe us kii aab
vahii naa.n hai us ke liye arjumand
rahe jis se duniyaa me.n gardan buland
KHudii faal-e-mahmuud se darguzar
KHudii par nigah rakh ayaazii na kar
vahii sajda hai laa.iq-e-ehtimaam
ki ho jis se har sajda tujh par haraam
ye aalam ye ha.ngaama-e-ra.ng-o-saut
ye aalam ki hai zer-e-farmaan-e-maut
ye aalam ye but-KHaana-e-chashm-o-gosh
jahaa.n zindagii hai faqat KHurd o nosh
KHudii kii ye hai manzil-e-avvalii.n
musaafir ye teraa nasheman nahii.n
tirii aag is KHaak-daa.n se nahii.n
jahaa.n tujh se hai tuu jahaa.n se nahii.n
ba.Dhe jaa ye koh-e-giraa.n to.D kar
tilism-e-zamaan-o-makaa.n to.D kar
KHudii sher-e-maulaa jahaa.n us kaa said
zamii.n us kii said aasmaa.n us kaa said
jahaa.n aur bhii hai.n abhii be-numuud
ki KHaalii nahii.n hai zamiir-e-vajuud
har ik muntazir terii yalGaar kaa
tirii shauKHi-e-fikr-o-kirdaar kaa
ye hai maqsad gardish-e-rozgaar
ki terii KHudii tujh pe ho aashkaar
tuu hai faatah-e-aalam-e-KHuub-o-zisht
tujhe kyaa bataa.uu.n tirii sarnavisht
haqiiqat pe hai jaama-e-harf-e-ta.ng
haqiiqat hai aa.iina-e-guftaar-e-za.ng
farozaa.n hai siine me.n sham-e-nafas
magar taab-e-guftaar rakhtii hai bas
agar yak-sar-e-muu-e-bartar param
faroG-e-tajallii ba-sozad param

Allama Iqbal
Nazm

wajud apna mujhe de do

tumhaare hai.n kaho ik din
kaho ik din
ki jo kuchh bhii hamaare paas hai sab kuchh tumhaaraa hai
kaho ik din
jise tum chaa.nd saa kahte ho vo chehra tumhaaraa thaa
sitaara sii jinhe.n kahte ho vo aa.nkhe.n tumhaarii hai.n
jinhe.n tum shaaKH sii kahte ho vo baa.nhe.n tumhaarii hai.n
kabuutar tolte hai.n par to parvaaze.n tumhaarii hai.n
jinhe.n tum phuul sii kahte ho vo baate.n tumhaarii hai.n
qayaamat sii jinhe.n kahte ho raftaare.n tumhaarii hai.n
kaho ik din
kaho ik din
ki jo kuchh bhii hamaare paas hai sab kuchh tumhaaraa hai
agar sab kuchh ye meraa hai to sab kuchh baKHsh do ik din
vajuud apnaa mujhe de do mohabbat baKHsh do ik din
mire ho.nTo.n pe apne ho.nT rakh kar ruuh merii khii.nch lo ik din

Obaidullah Aleem
Nazm

ali-bin-muttaqi roya

puraanii baat hai
lekin ye anhonii sii lagtii hai
alii-bin-muttaqii masjid ke mimbar par kha.Daa
kuchh aayato.n kaa vird kartaa thaa
jum.a kaa din thaa
masjid kaa sehn
allaah ke bando.n se KHaalii thaa
ye pahlaa din thaa masjid me.n ko.ii aabid nahii.n aayaa
alii-bin-muttaqii royaa
muqaddas aayato.n ko maKHmalii.n juz-daan me.n rakkhaa
imam-e-dil-giraftaa
niiche mimbar se utar aayaa
KHalaa me.n duur tak dekhaa
fazaa me.n har taraf phailii hu.ii thii
dhund kii kaa.ii
hu.aa phir yuu.n
mu.nDero.n gumbado.n par an-ginat par pha.D pha.Daa.e
kaasnii kaale kabuutar
sehn me.n niiche utar aa.e
vazuu ke vaaste rakkhe hu.e loTo.n par
ik ik kar ke aa baiThe
imam-e-dil-giraftaa
phir se mimbar par cha.Dhaa
juz-daan ko kholaa
safo.n par ik nazar Daalii
ye pahlaa din thaa masjid me.n
vazuu kaa hauz KHaalii thaa
safe.n ma.amuur thii.n saarii!

Zubair Rizvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now