Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "katthaa"

Nazm MATCHES FOR "katthaa"

Nazm

is basti ke ek kuche mein

har baat kii khoj to Thiik nahii.n tum ham ko kahaanii kahne do
us naar kaa naam maqaam hai kyaa is baat pe pardaa rahne do
ham se bhii to saudaa mumkin hai tum se bhii jafaa ho saktii hai
ye apnaa bayaa.n ho saktaa hai ye apnii kathaa ho ho saktii hai
vo naar bhii aaKHir pachhtaa.ii kis kaam kaa aisaa pachhtaanaa?
is bastii ke ik kuuche me.n ik 'inshaa' naam kaa diivaanaa

Ibn۔e۔Insha
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

mahadev-ji ka byah

pahle naa.nv ganesh kaa, liijiye siis navaa.e
jaa se kaaraj sidh ho.n, sadaa mahuurat laa.e
bol bachan aanand ke, prem, piit aur chaah
sun lo yaaro, dhyaan dhar, mahaadev kaa byaah
jogii ja.ngam se sunaa, vo bhii kiyaa bayaan
aur kathaa me.n jo sunaa, us kaa bhii parmaan
sun.ne vaale bhii rahe.n ha.nsii KHushii din rain
aur pa.Dhe.n jo yaad kar, un ko bhii sukh chain
aur jis ne is byaah kii, mahimaa kahii banaa.e
us ke bhii har haal me.n, shiv-jii rahe.n suhaa.e
KHushii rahe din raat vo, kabhii na ho dil-giir
mahimaa us kii bhii rahe jis kaa naam 'naziir'

Nazeer Akbarabadi
Nazm

panwaDi

buu.Dhaa panvaa.Dii us ke baalo.n me.n maa.ng hai nyaarii
aa.nkho.n me.n jiivan kii bujhtii agnii kii chi.ngaarii
naam kii ik haTTii ke andar bosiida almaarii
aage piital ke taKHte par us kii duniyaa saarii
paan katthaa cigarette tambaakuu chuunaa lau.ng supaarii

Majeed Amjad
Nazm

jap

aa mere andar aa
pavitra mahraan ke paanii
ThanDe miiThe maTyaale paanii
maTiyaale jiivan rang jal
dho de saaraa krodh kapaT
shahro.n kii dishaa.o.n kaa sab chhal
yuu.n sii.nch mujhe kar de merii miTTii jal-thal
tire tal kii kaalii chiknii miTTii se
maathe par tilak lagaa.uu.n
haath jo.D Da.nDvat karuu.n
o man ke bhed se gahre
haule haule saa.ns khii.nchte
om samaan amar
o mahaan saagar
mai.n utrii tere ThanDe jal me.n kamar kamar
tere ThanDe miiThe mehrbaan paanii se mu.nh dho luu.n
aur dho luu.n aa.nsuu
khaare aa.nsuu
tere miiThe paanii se dho luu.n
o mahaan maTiyaale saagar aa
sun mirii kathaa
mai.n ba.Dii abhaagan bhaag meraa
bedard haath me.n rahaa sadaa
TuuTaa meraa miTTii se naata
kaise TuuTaa
ik aa.ndhii ba.Dii bhayaanak laal chu.Dail
mujhe le u.Dii
uThaa kar paTkaa us ne kahaa.n se kahaa.n
tere charno.n me.n siis jhukaatii ek akelii jaan
mere saath meraa ko.ii miit nahii.n
ko.ii rang ruup ko.ii priit nahii.n
mirii an-ga.Dh phiikii murjhaatii bolii me.n ko.ii sa.ngiit nahii.n
mirii pii.Dhiyo.n ke biite yug mere saath nahii.n
bas ik nirda.ii dharam hai
jis kaa bharam nahii.n
vo dharam jo kahtaa hai miTTii mirii bairan hai
jo mujhe sikhaataa hai saagar meraa dushman hai
haa.n duur kahii.n
aakaash kii uu.nchaa.ii se pare
rahtaa hai KHudaa
itnaa ruukhaa
miTTii se jo.D nahii.n jis kaa
sab naate priit aur bair ke us kii kaaran mai.n kaise jo.Duu.n
mai.n miTTii meraa janam miTTii
mai.n miTTii ko kaise chho.Duu.n
o maTiyaale balvaan mahaa-saagar
mai.n ukh.Dii dhartii se
bhagvaan miraa ras suukh gayaa
phir bhii suntii huu.n apne lahuu me.n biite samay kii narm dhamak
vo samay jo mere janam se pahle biit gayaa
mere kaano.n me.n
ik shor hai jhar-jhar bahte naddii naalo.n kaa
aur ko.ii mahak ba.Dii be-kal hai
jo guu.nj banii mirii chhaatii se Takraatii hai
o mahaan saagar
jiivan-ras de
apne tal me.n jal-paudaa ban kar ja.D lene de
sadaa jiye
o mahaan saagar sindhuu
tuu sadaa jiye
aur ji.e.n tire paanii me.n phisaltii machhliyaa.n
shaant sukhii yuu.nhii
tire paanii me.n naav khete
tire baalak sadaa ji.e.n
o paalan-haar hamaare
dhartii ke rakhvaale
ann-daataa
tirii dhartii
narm retiilii mehrbaan sindh kii dhartii
sadaa jiye

Fahmida Riaz
Nazm

jawahar-lal uniwersity ke talaba ke liye

hame.n ek din KHatm karnaa pa.Degaa
hamaare dilo.n me.n jo kuchh faasla hai
hame.n dhuup me.n KHuub chalnaa pa.Degaa
mohabbat kaa bas ek hii raasta hai
ham insaan hai.n aur insaa.n rahe.nge
jo haivaan hai.n ek din ta.ng aa kar
chale jaa.e.nge apne jangal me.n vaapas
jahaa.n vo rahe.nge vahii.n la.D mare.nge
jo baaqii bache.nge vo shahro.n me.n aa kar
gharo.n ko jalaane kii koshish kare.nge
javaano.n ko khaane kii koshish kare.nge
vo college se jaatii hu.ii la.Dkiyo.n ko
a.ndhere me.n laane kii koshish kare.nge
ham insaan hai.n aur insaa.n kii izzat
hamesha bachaane kii koshish kare.nge
hame.n ko.ii ashlok aataa nahii.n hai
suvaamii kaa tirshuul bhaataa nahii.n hai
hamaarii kaviitaa, hamaarii kathaa hai
hamaarii kitaabe.n hamaaraa jathaa hai
agar ko.ii diimak hamaaraa asaasa
miTaane kii aashaa liye aa rahii hai
vo ye jaan le ki hamaare dilo.n me.n
mohabbat kii lau jagmagaane lagii hai
hame.n apne siino.n kii sii.Dhii banaa ke
kisii raat ambar pe jaanaa pa.Degaa
diye kii jagah phuul rakhne pa.De.nge
parindo.n ke hamraah gaanaa pa.Degaa

Zeeshan Sahil
Nazm

gharib

kyo.n us jhanjheluu ne tujh se kahaa kyaa
ye kyaa terii aa.nkhe.n bhiig ga.ii.n kyo.n
us ne tujh se kahaa kyaa saato.n aasmaano.n ke maalik
itne patle dil vaale maalik ham bhii roz us chehre kii kathaa sunte hai.n
ham to ka.Daa kar lete hai.n jii aise mauqo.n par

Majeed Amjad
Nazm

pichhle bis barson mein

ye kathaa mirii biivii
sun ke khilkhilaa uThii
aur apnii din biitii
KHud hii phir shuruu.a kar dii
aaj merii maasii ne
phir gilaas shiishe kaa
chaknaa-chuur kar Daalaa
sirf ye nahii.n balki
kap.De dhone vaalii ne
silk kaa vo dupaTTa
kal hii jo KHariidaa thaa
bor bor kar Daalaa
mai.n ne bhii lagii-lipTii
kuchh bachaa nahii.n rakkhii
jis qadar thii.n salvaate.n
be-nuqat sunaa Daalii.n
apnii apnii din-biitii
dono.n jab bhii kah chukte
qahqahe lagaate the
yuu.n ham apnii Gurbat kii
KHud ha.nsii u.Daate the
vo sukuu.n jo Gurbat ke
un dino.n me.n haasil thaa
vo sukuu.n nahii.n miltaa
vo jo ghar kabhii jis me.n
dil hamaaraa lagtaa thaa
us me.n dil nahii.n lagtaa

Firoz Natiq Khusro
Nazm

mashwara

shaam kaa vaqt kisii dost ke saath
chaa.e KHaane me.n bitaa.o
tabsira gardish-e-dauraa.n pe karo
jaa.eza vaqt kaa lo aur kathaa apnii sunaa.o

Ameer Ahmad Khusro
Nazm

suKHanwaran-e-ahd se KHitab

ai nukta-varaan-e-suKHan-aaraa-o-suKHan-sanj
ai naGma-giraan-e-chamnistaan-e-ma.afii
maanaa ki dil-afroz hai afsaana-e-azraa
maanaa ki dil-aavez hai salmaa kii kahaanii
maanaa ki agar chhe.D hasiino.n se chalii jaa.e
kaT jaa.egaa is mashGale me.n ahd-e-javaanii
garmaa.egaa ye hamhama afsurda dilo.n ko
ba.Dh jaa.egii dariyaa-e-tabii.at kii ravaanii
maanaa ki hai.n aap apne zamaane ke 'naziirii'
maanaa ki har ik aap me.n hai urfi-e-saanii
maanaa kii hadiis-e-KHat-o-ruKHsaar ke aage
bekaar hai mashshaa.iiyo.n kii falsafa-daanii
maanaa ki yahii zulf o KHat-o-KHaal kii ruudaad
hai maaya-e-gul-kaarii-e-aivaan-e-ma.aafii
lekin kabhii is baat ko bhii aap ne sochaa
ye aap kii taqviim hai sadiyo.n kii puraanii
ma.ashuuq na.e bazm na.ii rang nayaa hai
paidaa na.e KHaame hu.e hai.n aur na.e 'maanii'
mizhgaa.n kii sinaa.n ke evaz ab suntii hai mahfil
kaa.nTo.n kii kathaa barhana-paa.ii kii zabaanii
lazzat vo kahaa.n la.al-e-lab-e-yaar me.n hai aaj
jo de rahii hai peT ke bhuuko.n kii kahaanii
badlaa hai zamaana to badliye ravish apnii
jo qaum hai bedaar ye hai us kii nishaanii
ai ham-nafaso yaad rahe KHuub ye tum ko
bastii na.ii mashriq me.n hamii.n ko hai basaanii

Zafar Ali Khan
Nazm

tin rang ek rang

tum patang ban ke havaa.o.n me.n tairtii phiro
aur Dor mire haatho.n ko kaaTtii rahe
par par zaKHmii aur aa.nkhe.n tere rango.n me.n uljhii rahe.n
lahuu bahtaa rahe
aur aas tujhe chaahne kii
aasmaan ban ke tire chaaro.n taraf bikhar jaa.e
shaam utre to terii aa.nkho.n kaa rang
mujhe apnii panaah me.n sameT le
aur terii raaho.n par meraa ik ik lams bikher de
terii raaho.n kaa kuchh pataa to hogaa
aur tere vaqt kii ko.ii manzil to hogii jaan
(2)
ek mai.n tanhaa ek vo tanhaa
ek vo jis se mai.n tumhaarii kathaa kahtaa huu.n
ek vo jo kisii kii kathaa se mujh me.n zinda
aur tum tanhaa
lo ye bhii ko.ii baat hu.ii tum ne kahaa
haa.n ye baate.n aur in baato.n ke nukiile ku.ngre
jab terii jaan me.n aTakte hai.n
to tumhaare naaKHuno.n me.n aisii shafaq dahaktii hai
jo sun na sake kuchh kah na sake
tab merii uma.ngo.n par ik aag lahraatii hai
aur mai.n tujhe un KHud-rav ja.ngalii phuulo.n se tashbiih detaa huu.n
jo sirf apnii vahshat me.n zinda rahte hai.n
(3)
zaKHm khul ga.e hai.n jaanaa.n
aur havaa.e.n chaaro.n taraf se umDii pa.Dii hai.n

Faheem Jozi
Nazm

dil ka moamla

ham kisii ko na chaahte hu.e bhii
kisii se mansuub ho jaate hai.n
sadiyo.n kii taviil judaa.ii
vo sulagte dil par muskuraate guzar jaatii hai
dil ka mo.aamla a.ndhere me.n mashkuuk ho jaataa hai
kohar-aaluud dil me.n ye kaun dha.Daktaa hai
patthar ke aadmii kii tarah gum-sum
jo agnii kathaa sunaa bhii na sake
piital ke naaKHun vaalaa zaalim
vo lohe ke haatho.n vaalaa qaatil

Ahmed Sohail
Nazm

an-chhui katha

mai.n ko.ii KHvaab likhuu.n kahaanii me.n biitii kisii raat kaa
kahkashaa.o.n kii nagrii se guzre hu.e
raat o.Dhe hu.e ik hasiin saath kaa
is gagan kii kathaa bhii likhuu.n
jis pe naino.n ke jhilmil diye jagmagaa uThe the
jis pe baadal hamaarii tarah khilkhilaa uThe the
jis pe kohre kii chaadar tale chaa.nd chup-chaap thaa
aur kahii.n duur murlii pe bajtaa ko.ii saaz thaa
vo jo KHvaahish sii bahtii hu.ii kaasnii nahr thii
vo jo aa.nkho.n se koso.n pare an-chhuu.ii sehr thii
haa.n vahii haa.n vahii haa.n vahii qahr thii
mujh ko baa.nho.n me.n apne chhupaa.e hu.e
barf kii silvaTo.n se sarakte hu.e
dhu.nd o.Dhe hu.e
duudhiyaa raushnii se pare
chaa.nd kii oT me.n
tere pahluu me.n simTii hu.ii
raat KHaamosh thii
mai.n bhii miiraa ke jaisii kisii kirshn kii yoginii thii magar
mai.n bhii nirdosh thii

Injeel Saheefa
Nazm

hijrat

vo pattharo.n ke qabiile kii reshmii la.Dkii
rivaayato.n kii fasiilo.n me.n KHud ko qaid kiye
fareb-e-zaat kii ik KHushnumaa havelii me.n
akele-pan kii kathaa sun rahii thii phuulo.n se
aur apne aap ko bahlaa.e thii parindo.n se
ki us kii ruuh kii vaadii me.n ik hiran-jazba
qulaa.nche.n bhartaa hu.aa khaa.iyo.n me.n dau.D gayaa
ye pattharo.n ke qabiile kii shaahzaadii bhii
har e'timaad kii zanjiir to.D kar niklii
talaash kartii hu.ii apnaa vo hiran-jazba
dukho.n kii jhiil kinaare udaas aa baiThii

Ishrat Afreen
Nazm

inhiraf

mai.n KHvaaja-saraa.o.n ke shahr me.n paidaa hu.aa
mai.n apnii takmiil kaa lagaan kis kis ko duu.n
maa.n aaTaa guu.ndh kar bhuukii so ga.ii
aur mai.n ne miTii guu.ndh kar apne liye ek KHudaa banaa liyaa
sajda merii peshaanii kaa zaKHm hai
magar meraa marham safar-e-suqraat ke pyaale me.n pa.Daa hai
KHudaa kaa bosa meraa pahnaavaa thaa
mujhe be-libaas kar ke kaT.haa pahnaa diyaa gayaa
merii zabaan ne jalte ko.ele kii gavaahii chaKHii
aur munsif ne merii aavaaz apne taraazuu se churaa lii
mai.n kyaa karuu.n diivaaro.n
diimak kaa rizq ban jaa.uu.n
yaa chuuho.n ko apne badan me.n bal banaa lene duu.n
jo merii chhaTii his katartaa chaahte hai.n

Anjum Saleemi
Nazm

sadiqin

tum ThiThurtii guzartii ho.ii shaam kii mad-bharii raushnii se
churaa.e hu.e chaar pal kii kathaa
sun sako to suno
saadiqiin ik galii me.n kha.Daa thaa
nasq-o-taa'liiq kii uljhano.n me.n ghirii zindagii
ik galii
jis ke chaaro.n taraf
hasrato.n kaa KHat-e-nasKH
fiisaa Gauris ke mas.alo.n me.n uljhaa hu.aa
laa-sa.ii pa.Dh rahaa thaa
saadqiinii faraasat riyaazat kii manzil pe faa.ez ibaadat kaa ras pii rahii thii
chaa.nd kii gardishe.n puurii hone na paa.ii thii.n us raat bhii
jab use us ke fan ne
KHudaavand se mahv-e-suKHan dekh kar
ek bhar puur ta.aziimii sajda kiyaa
nuqra.ii raushnii us ke maathe se phuuTii thii jis ne galii ko mo.attar kiyaa
nasq-o-taa'liiq kii uljhano.n me.n ghirii zindagii ik galii
jis ke duujii taraf
ilm-o-irfaan ke shaaKH imkaan ke daa.ere ban chuke haashiye lag chuke the
magar vo ilaahii-sifat painT kii botale.n kaaGazo.n par u.nDele hu.e
naqsh-gardii me.n khoyaa rahaa
use is se matlab hii kyaa thaa ki kaun us ke khii.nche hu.e ik sulus haashiye tak pahu.nchne kii KHaatir mare jaa rahaa hai
magar raat ke ik pahar
chaa.nd jab baadalo.n me.n chhupaa
ahrman ne kahaa
meraa ik naqsh bhii bikne vaalaa nahii.n
to ab aisaa karo us kii har qaus par ism-e-aazam likho

Sidra Afzal
Nazm

intibah

ai mere beTo!
mai.n sochtii huu.n
ki qadmo.n se
mai.n apne tan ke hayaat-aagii.n lahuu ke chashme
bahaa rahii huu.n
tumhaare saare
nazaar jismo.n nahiif zehno.n kii murdanii ko
miTaa rahii huu.n
azal se apne za.iif chehre kii aa.Dii-tirchhii
sii jhurriyo.n kii lakiir me.n to
udaas aa.nkho.n maluul palko.n
se Tapke qatre
milaa rahii huu.n
hasiin KHvaabo.n ke buu.Dhe bargad
ke zard patte bhii chun rahii huu.n
vo KHvaab jin ke
chamakte jugnuu
asiir karne ko merii baa.nho.n ke saahilo.n par
safed chehre siyaah qaalib
Ganiim utre
hasiin KHvaabo.n ke jugnu.o.n ko
asiir kar ke
KHud apnii maa.o.n kii sard aa.nkho.n ko zindagii dii
mire dafiine mire KHaziine
se apnii kashtii
kii god bhar bhar ke le ga.e aur
mere beTo.n ke zehn-o-dil me.n
tafaavuto.n aur adaavato.n kii
kariih faslo.n ke biij bo.e
vo fasle.n jin ko
aziiz beTo.n ne apne apne lahuu se sii.nchaa
ki jin ke siine kii paak miTTii
ko garm taaza lahuu se
har dam
Galiiz rakkhaa
aur mere beTo!
mai.n sochtii huu.n
isii tarah gar
tafaavuto.n aur adaavato.n ke
ye biich bote
rahe to ik din
ye dekhnaa tum
na tum rahoge na mai.n rahuu.ngii
faqat hamaarii kathaa rahegii!

Yusuf Taqi
Nazm

lok-gatha ka jadu

is ik lok gaathaa ne
bachpan ke vo din
mujhe phir dilaa.e hai.n yaad
ki jab mai.n ka.ii baar
paapaa ki godii me.n baiThii
ba.Dii aa.nkh vaale
bhayaanak ba.De azhdahaa kii kathaa sun rahii thii
jise shaahzaade ne hii maar Daalaa thaa aaKHir
ye kuchh is tarah lag rahaa thaa
ki jaise ye kal hii hu.aa ho
bhaya.nkar nazar aane vaalaa ba.Daa azhdahaa jab
idhar shaahzaade ko khaane ko lapkaa
to mai.n ne jhaT apnaa chehra
chhupaa Daalaa paapaa ke kaa.ndho.n ke biich
yahii jaan kar mere paapaa bachaa le.nge mujh ko
agar azhdahe ne yahii faisla kar liyaa ho ki meraa badan
shaahzaade se ziyaada laziiz hii to hogaa
jo ab is qadar apne paapaa se duur
miluu.n azhdahaa se
la.Duu.ngii mai.n us se zaruur
apne paapaa kii gahrii mohabbat ke bal par
ki vo azhdahaa ab bhii rahtaa hai
tahziib ke maare logo.n ke biich
ki aaKHir mire paapaa kii lok-gaathaa.o.n ne hii
dikhaayaa hai mujh ko
ki achchhaa.iyo.n hii kii hotii jiit is jahaa.n me.n
chunaa.nche mujhe jis qadar apne paapaa pe pakkaa yaqii.n hai
un kii sab lok-gaathaa.o.n par bhii hai utnaa yaqii.n

Anjum Shakeel
Nazm

nasri nazm ki manzum katha

aur phir kuchh yuu.n hu.aa
lafz kii takraar se
murta.ish iz.haar se
uqda-e-dushvaar se
shaa.irii uktaa ga.ii
shaa.irii kii be-karaa.n mauj-e-taKHayyul yuu.n uThii
ta.ngnaa-e-nazm-o-naGma gum hu.ii
imtiyaaz-e-bahr-o-bar miTtaa gayaa
ehtimaam-e-zauq-tar jaataa rahaa
chashma-e-vahm-o-gumaa.n
phuuTtaa hai vaadii-e-ijz-e-bayaaa.n ke vast se
phailtii hai KHiirgii
lamha-e-maakuus hai
aab-juu-e-KHvaab hai paiham ravaa.n
jhiil suurat harf saakit hai.n magar
jhilmilaate hai.n ma.aanii lafz ke taalaab me.n
baat gahrii hai bahut
saaz bhii KHaamosh hai
gunjalak sanjog se
maujib-e-naa-guftanii
qaabil-e-iz.haar hai
haa.n magar vo sheriyat
duur ik laaya.aniyat ke be-amaa.n paataal me.n
barsar-e-paikaar hai

Salman Sarwat
Nazm

taga taga mujhe kaun khole

ai mirii be-dilii ke shikasta kinaaro
mire KHvaab-e-hastii ke
mauhuum resham ko
kis dhuup kii
zard diimak ne chaaTaa
kaun sii KHvaahisho.n kii
harii Tahniyo.n par
barahna havaa.o.n ke panje pa.De
kis talab kii kathaa
un ke raasto.n me.n kahii.n raah-e-gum-karda rahrav kii suurat
KHajil aur kam-raKHt rahne lagii
mai.n udaasii kii gahrii sahelii huu.n
tiikhii pahelii huu.n
aur merii uljhan kii suljhan bhii dushvaar hai
mai.n yugo.n se kisii dard kii KHush-hunar u.ngliyo.n kii
tunuk-taab poro.n se
apnaa pataa puuchhtii huu.n
bahut kaar-e-uqda-kushaa.ii kaThin hai
magar mai.n kisii ranj-e-barsar
KHayaal-e-junuu.n-pesha kii
aarzuu kar rahii huu.n
ye gunjal sulajh jaa.e
is dhun me.n
dil ke nashebo.n ko
kyaa kyaa lahuu kar rahii huu.n

Mahnaz Anjum
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now