Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "khilnaa"

Nazm MATCHES FOR "khilnaa"

Nazm

farar

vahii gesuu vahii nazre.n vahii aariz vahii jism
mai.n jo chaahuu.n to mujhe aur bhii mil sakte hai.n
vo ka.nval jin ko kabhii un ke liye khilnaa thaa
un kii nazro.n se bahut duur bhii khil sakte hai.n

Sahir Ludhianvi
Nazm

fursat ki tamanna mein

yuu.n vaqt guzartaa hai
fursat kii tamannaa me.n
jis tarah ko.ii pattaa
bahtaa hu.aa dariyaa me.n
saahil ke qariib aa kar
chaahe ki Thahar jaa.uu.n
aur sair zaraa kar luu.n
us aks-e-moshajjar kii
jo daaman-e-dariyaa par
zebaa.ish-e-dariyaa hai
yaa baad kaa vo jho.nkaa
jo vaqf-e-ravaanii hai
ik baaG ke goshe me.n
chaahe ki yahaa.n dam luu.n
daaman ko zaraa bhar luu.n
us phuul kii KHushbuu se
jis ko abhii khilnaa hai
fursat kii tamannaa me.n
yuu.n vaqt guzartaa hai

Hafeez Jalandhari
Nazm

sangam

prayaag pe bichh.Dii hu.ii bahne.n jo milii hai.n
paanii kii zamii.n par bhii to kaliyaa.n sii khilii hai.n
kuchh ga.ngaa kaa ruknaa
kuchh jamunaa kaa jhuknaa
phir dono.n kaa milnaa
vo phuul se khilnaa
kis shauq se iThlaatii hu.ii saath chalii hai.n
ye ishq-o-mohabbat ke nazzaare azalii hai.n
kahte hai.n ki jannat se bhii aa.ii hai bahan ek
go tiino.n kaa hii asl me.n ghar ek vatan hai
ghar jab se chhuTaa thaa
dil sard hu.aa thaa
vo koh se girnaa
vo dasht me.n phirnaa
raato.n ko vo sunsaan bayaabaan me.n chalnaa
sahme hu.e taaro.n kaa vo siine me.n machalnaa
thaa vo safar dasht me.n maidaan me.n ban me.n
KHaamosh pahaa.Do.n me.n gulistaa.n me.n chaman me.n
ja.ngal se nikalnaa
rukte hu.e chalnaa
kuchh ba.Dh ke palaTnaa
Dar Dar ke simaTnaa
mar mar ke akele ye guzaaraa hai zamaana
jaise ko.ii duniyaa me.n na ho apnaa yagaana
KHaalii kabhii jaatii nahii.n be-lafz sadaa.e.n
aaKHir ko asar kar ga.ii.n KHaamosh du.aa.e.n
jaagaa hai muqaddar
prayaag pe aa kar
ab Gam na sahe.nge
tanhaa na rahe.nge
prayaag pe bahno.n ko milaayaa hai KHudaa ne
muddat me.n ye din aaj dikhaayaa hai KHudaa ne
kyaa josh-e-mohabbat se baGal-giir hu.ii hai.n
vaaraftagii-e-shauq kii tasviir hu.ii hai.n
allaah re mohabbat
sarmaaya-e-raahat
ye kis ko KHabar thii
dil milte hai.n yuu.n bhii
ho.ngii na judaa hashr tak ab aise milii hai.n
KHush bahne.n hai.n yaa paanii pe kaliyaa.n sii khilii hai.n

Hamidullah Afsar
Nazm

aape ranjha hoi

maGribii sahraa ke kinaare kundan ke phuul khilnaa shuruu.a ho ga.e hai.n
mashriqii sahraa ke biicho.n-biich kha.Dii sundarii kii naak kaa lau.ng murjhaa gayaa hai
ye kis taariiKH ke aKHbaar kii KHabar hai
ko.ii ishtihaar hai kyaa
diivaaro.n pe lakiire.n na Daalo miTaa.oge to tumhaare hii haath kaale ho.nge
haa.n khel khel me.n hii dallaalii siikh jaa.oge ko.elo.n kaa to bahaana hai
ko.ele chaar-din aur dahak rahe hai.n
pa.nkhe mere dil me.n lage hai.n mujhe ab bhii sardii lagtii hai
barf kii vo Dalii pighaltii kyuu.n nahii.n jis kii aa.iine jaisii sat.h par
meraa chehra bhii mujhe dikhaa.ii kyuu.n nahii.n detaa darmiyaan kaun haa.il hai
garm larazte hu.e aa.nsuu aur milne kii taa-ha.ng
aa.nsu.o.n ke jhakole me.n hamaare chehre Dislocate ho ga.e hai.n
aur phir saa.ns se saa.ns na milii
dam me.n dam na aayaa
raa.njhaa raa.njhaa kuukdii mai.n aape raa.njhan ho.ii

Nasreen Anjum Bhatti
Nazm

tazabzub

ho to saktaa hai kisii dev ke jaise mai.n bhii
le u.Duu.n tujh ko kahii.n duur kii duniyaa.o.n me.n
dil kii diivaaro.n me.n lau terii muqayyad kar ke
tishna aashaa.o.n ke qile ko munavvar kar luu.n
KHvaab-e-deriina kii ta.abiir banaa kar tujh ko
apnii aa.nkho.n ke kivaa.Do.n me.n muqaffal kar luu.n
saarii duniyaa kii nigaaho.n se chhupaa kar tujh ko
le u.Duu.n re.ngte bal khaate hu.e rasto.n par
jo pahaa.Do.n ke badan kaaT ke uupar kii taraf
sabz kaa.ii se aTe mahlo.n pe jaa rukte hai.n
KHud-Garaz ho ke tujhe qaid me.n rakkhuu.n aise
zii-nafas ko.ii na ho chaar-chfere tere
apnii tanhaa.ii kii vahshat ko miTaane ke liye
Dhuu.nD paa.e na kisii ko tuu sivaa.e mere
sirf ik mai.n huu.n aur ik tuu ho rifaaqat ke liye
maa-sivaa mere na ho ko.ii mohabbat ke liye
lekin ai phuul-sifat dekh ke suurat terii
sochtaa huu.n ki agar baaG-e-jahaa.n se tujh ko
to.D bhii luu.ngaa to tuu kaise jiyegii aaKHir
ra.ng-haa-ra.ng mahakte hu.e phuulo.n se pare
duur uftaada pur-asraar KHaraabe me.n qayaam
dard ke phailte saa.e me.n kahaa.n mumkin hai
tujh tar-o-taaza kaa KHush rahnaa chaTaknaa khilnaa
merii viiraan-saraa.e me.n kahaa.n mumkin hai

Mohammad Owais Malik
Nazm

numu

tumhe.n KHabar hai
mire sirhaane ke bel-buuTo.n me.n
ik shaguufa nayaa khilaa hai
tumhe.n KHabar hai
ki KHushk-saalii ke zard mausam me.n
phuul khilnaa daliil hai ki
mai.n apne KHvaabo.n ko rehn rakh kar
tamaam shab
ik aziyyat se kaaTtii huu.n
ravish ravish ko sa.nvaartii huu.n
mujhe ye Dar hai
tumhaarii yaado.n se meraa rishta na TuuT jaa.e
kahii.n ye gulshan na suukh jaa.e

Safiya Chaudhry
Nazm

chiDiyan

mil mil kar haTnaa patto.n kaa
tham tham kar khilnaa kaliyo.n kaa
Takraa.e jaanaa lahro.n kaa
jagmag hai mandir naGmo.n kaa
pyaarii chi.Diyo chahke jaa.o
suuraj kii chanchal kirno.n se
Dhalte hai.n jab raag tumhaare
aise rangii.n aise miiThe
kyaa ho.nge duniyaa ke gaane
pyaarii chi.Diyo chahke jaa.o
aa.nkhe.n hai.n har dam ha.nsnaa hai
dil ik raahat kii duniyaa hai
ek ta.Dap hai ek maza hai
jaane tum me.n kaun chhupaa hai
pyaarii chi.Diyo chahke jaa.o
ruuThii hu.ii qismat ko manaa.e.n
bhaTke hu.e hai.n raah pe aa.e.n
apnii apnii manzil paa.e.n
haa.n jab tak sab jaag na jaa.e.n
pyaarii chi.Diyo chahke jaa.o

Sahar Rampuri
Nazm

subh-e-watan

vo jalva sahar kaa vo chi.Diyo.n kaa gaanaa
vo ThanDii havaa.e.n vo manzar suhaanaa
vo phuulo.n kaa khilnaa vo buu bhiinii-bhiinii
masarrat se kaliyo.n kaa vo muskuraanaa
ufuq par vo surKHii vo rangiin baadal
vo puurab me.n suuraj kaa jalva dikhaanaa
daraKHto.n kaa vo jhuumnaa mast ho kar
vo patto.n kaa KHush ho ke taalii bajaanaa
KHudaa ke vo bando.n kaa bedaar honaa
vo mu.nh haath dhonaa vo un kaa nahaanaa
vo phir kaam me.n apne masruuf rah kar
mashaqqat se mehnat se rozii kamaanaa
vo bailo.n ke ghu.ngruu vo Tan Tan suhaanii
kisaano.n kaa uTh kar vo kheto.n me.n jaanaa
vo sarsabz kheto.n ke dilkash nazaare
vo shaadaab khetii kaa manzar suhaanaa
vo ek ek bastii ke ghar ghar me.n raunaq
vo jhaa.Duu buhaaruu vo khaanaa pakaanaa
vo aazaad rahne kii dil se du.aa.e.n
vatan kii mohabbat ke vo giit gaanaa
niraalii hai.n yuu.n to fazaa.e.n vatan kii
magar is kaa vaqt-e-sahar hai yagaana
chalo ham bhii 'nayyar' kaa ik giit gaa.e.n
vahii ya.anii apne vatan kaa taraana

Mohammad Shafiuddin Nayyar
Nazm

dastur

phuul shaaKHo.n pe khilne lage tum kaho
jaam rindo.n ko milne lage tum kaho
chaak siino.n ke silne lage tum kaho
is khule jhuuT ko zehn kii luuT ko
mai.n nahii.n maantaa mai.n nahii.n jaantaa

Habib Jalib
Nazm

ek bar kaho tum meri ho

jab saavan baadal chhaa.e ho.n
jab phaagun phuul khilaa.e ho.n
jab chandaa ruup luTaataa ho
jab suuraj dhuup nahaataa ho
yaa shaam ne bastii gherii ho

Ibn۔e۔Insha
Nazm

main pal do pal ka shair hun

mai.n pal do pal kaa shaa'ir huu.n pal do pal mirii kahaanii hai
pal do pal merii hastii hai pal do pal mirii javaanii hai
mujh se pahle kitne shaa'ir aa.e aur aa kar chale ga.e
kuchh aahe.n bhar kar lauT ga.e kuchh naGme gaa kar chale ga.e
vo bhii ik pal kaa qissa the mai.n bhii ik pal kaa qissa huu.n
kal tum se judaa ho jaa.uu.ngaa go aaj tumhaaraa hissa huu.n
pal do pal me.n kuchh kah paayaa itnii hii sa'aadat kaafii hai
pal do pal tum ne mujh ko sunaa itnii hii ‘inaayat kaafii hai
kal aur aa.e.nge naGmo.n kii khiltii kaliyaa.n chun.ne vaale
mujh se behtar kahne vaale tum se behtar sun.ne vaale
har nasl ik fasl hai dhartii kii aaj ugtii hai kal kaTtii hai
jiivan vo mah.ngii madiraa hai jo qatra qatra baTtii hai
saagar se ubhrii lahar huu.n mai.n saagar me.n phir kho jaa.uu.ngaa
miTTii kii ruuh kaa sapnaa huu.n miTTii me.n phir so jaa.uu.ngaa
kal ko.ii mujh ko yaad kare kyuu.n ko.ii mujh ko yaad kare
masruuf zamaana mere liye kyuu.n vaqt apnaa barbaad kare

Sahir Ludhianvi
Nazm

nisar main teri galiyon ke

yuu.nhii hamesha ulajhtii rahii hai zulm se KHalq
na un kii rasm na.ii hai na apnii riit na.ii
yuu.nhii hamesha khilaa.e hai.n ham ne aag me.n phuul
na un kii haar na.ii hai na apnii jiit na.ii
isii sabab se falak kaa gila nahii.n karte
tire firaaq me.n ham dil buraa nahii.n karte

Faiz Ahmad Faiz
Nazm

ye mahlon ye taKHton ye tajon ki duniya

yahaa.n ik khilaunaa hai insaa.n kii hastii
ye bastii hai murda-parasto.n kii bastii
yahaa.n par to jiivan se hai maut sastii
ye duniyaa agar mil bhii jaa.e to kyaa hai

Sahir Ludhianvi
Nazm

daraKHt-e-zard

tumhaarii arjumand ammii ko mai.n bhuulaa bahut din me.n
mai.n un kii rang kii taskiin se nimTaa bahut din me.n
vahii to hai.n jinho.n ne mujh ko paiham rang thukvaayaa
vo kis rag kaa lahuu hai jo miyaa.n mai.n ne nahii.n thuukaa
lahuu aur thuuknaa us kaa hai kaarobaar bhii meraa
yahii hai saakh bhii merii yahii me.aar bhii meraa
mai.n vo huu.n jis ne apne KHuun se mausam khilaa.e hai.n
na-jaane vaqt ke kitne hii aalam aazmaa.e hai.n
mai.n ik taariiKH huu.n aur merii jaane kitnii fasle.n hai.n
mirii kitnii hii fare.n hai.n mirii kitnii hii asle.n hai.n
havaadis maajraa hii ham rahe hai.n ik zamaane se
shadaa.ed saaneha hii ham rahe hai.n ik zamaane se
hamesha se bapaa ik ja.ng hai ham us me.n qaa.em hai.n
hamaarii ja.ng KHair o shar ke bistar kii hai zaa.ida
ye charKH-e-jabr ke davvaar-e-mumkin kii hai girviida
la.Daa.ii ke liye maidaan aur lashkar nahii.n laazim
sinaan o gurz o shamshiir o tabar KHanjar nahii.n laazim
bas ik ehsaas laazim hai ki ham bu.adain hai.n dono.n
ki nafi-e-ain-e-ain o sar-ba-sar ziddain hai.n dono.n
luis-urbina ne merii ajab kuchh Gam-gusaarii kii
ba-sad dil daanishii guzraan apnii mujh pe taarii kii
bahut us ne pilaa.ii aur piine hii na dii mujh ko
palak tak us ne marne ke liye jiine na dii mujh ko
''mai.n tere ishq me.n ranjiida huu.n haa.n ab bhii kuchh kuchh huu.n
mujhe terii KHayaanat ne Gazab majruuh kar Daalaa
magar taish-e-shadiidaana ke baa'd aaKHir zamaane me.n
razaa kii jaavidaana jabr kii naubat bhii aa pahu.nchii''

Jaun Eliya
Nazm

ye khel kya hai

agar mai.n samjhuu.n
ke ye jo mohre hai.n
sirf lak.Dii ke hai.n khilaune
to jiitnaa kyaa hai haarnaa kyaa
na ye zaruurii
na vo aham hai
agar KHushii hai na jiitne kii
na haarne kaa hii ko.ii Gam hai
to khel kyaa hai
mai.n sochtaa huu.n
jo khelnaa hai
to apne dil me.n yaqiin kar luu.n
ye mohre sach-much ke baadshaah o vaziir
sach-much ke hai.n payaade
aur in ke aage hai
dushmano.n kii vo fauj
rakhtii hai jo ki mujh ko tabaah karne ke
saare mansuube
sab iraade
magar aisaa jo maan bhii luu.n
to sochtaa huu.n
ye khel kab hai
ye ja.ng hai jis ko jiitnaa hai
ye ja.ng hai jis me.n sab hai jaa.ez
ko.ii ye kahtaa hai jaise mujh se
ye ja.ng bhii hai
ye khel bhii hai
ye ja.ng hai par khilaa.Diyo.n kii
ye khel hai ja.ng kii tarah kaa
mai.n sochtaa huu.n
jo khel hai
is me.n is tarah kaa usuul kyuu.n hai
ki ko.ii mohara rahe ki jaa.e
magar jo hai baadshaah
us par kabhii ko.ii aa.nch bhii na aa.e
vaziir hii ko hai bas ijaazat
ki jis taraf bhii vo chaahe jaa.e

Javed Akhtar
Nazm

bahut KHub-surat ho tum

bahut KHuub-suurat ho tum bahut KHuub-suurat ho tum
kabhii mai.n jo kah duu.n mohabbat hai tum se
to mujh ko KHudaa raa Galat mat samajhnaa
ki merii zaruurat ho tum bahut KHuub-suurat ho tum
hai.n phuulo.n kii Daalii pe baa.nhe.n tumhaarii
hai.n KHaamosh jaaduu nigaahe.n tumhaarii
jo kaa.nTe huu.n sab apne daaman me.n rakh luu.n
sajaa.uu.n mai.n kaliyo.n se raahe.n tumhaarii
nazar se zamaane kii KHud ko bachaanaa
kisii aur se dekho dil mat lagaanaa
ki merii amaanat ho tum
bahut KHuub-suurat ho tum
hai chehraa tumhaaraa ki din hai sunahraa
hai chehraa tumhaaraa ki din hai sunahraa
aur is par ye kaalii ghaTaa.o.n kaa pahraa
gulaabo.n se naazuk mahaktaa badan hai
ye lab hai.n tumhaare ki khiltaa chaman hai
bikhero jo zulfe.n to sharmaa.e baadal
farishte bhii dekhe.n to ho jaa.e.n paagal
vo paakiiza muurat ho tum bahut KHuub-suurat ho tum
jo ban ke kalii muskuraatii hai aksar
shab-e-hijr me.n jo rulaatii hai aksar
jo lamho.n hii lamho.n me.n duniyaa badal de
jo shaa.ir ko de jaa.e pahluu Gazal ke
chhupaanaa jo chaahe.n chhupaa.ii na jaa.e
bhulaanaa jo chaahe.n bhulaa.ii na jaa.e
vo pahlii mohabbat ho tum bahut KHuub-suurat ho tum

Tahir Faraz
Nazm

zooming

dekhuu.n jo aasmaa.n se to itnii ba.Dii zamii.n
itnii ba.Dii zamiin pe chhoTaa saa ek shahr
chhoTe se ek shahr me.n sa.Dko.n kaa ek jaal
sa.Dko.n ke jaal me.n chhupii viiraan sii galii
viiraa.n galii ke mo.D pe tanhaa saa ik shajar
tanhaa shajar ke saa.e me.n chhoTaa saa ik makaan
chhoTe se ik makaan me.n kachchii zamii.n kaa sahn
kachchii zamii.n ke sahn me.n khiltaa hu.aa gulaab
khilte hu.e gulaab me.n mahkaa hu.aa badan
mahke hu.e badan me.n samundar saa ek dil
us dil kii vus.ato.n me.n kahii.n kho gayaa huu.n mai.n
yuu.n hai ki is zamii.n se ba.Daa ho gayaa huu.n mai.n

Ashfaq Husain
Nazm

urdu

dakkan ke 'valii' ne mujhe godii me.n khelaayaa
'saudaa' ke qasiido.n ne miraa husn ba.Dhaayaa
hai 'miir' kii azmat ki mujhe chalnaa sikhaayaa
mai.n daaG ke aa.ngan me.n khilii ban ke chamelii

Iqbal Ashhar
Nazm

chakle

ta.affun se pur niim-raushan ye galiyaa.n
ye maslii hu.ii adh khilii zard kaliyaa.n

Sahir Ludhianvi
Nazm

KHamosh aawaz

itnii muddat baa'd to piriitam
aaj kalii hirdai kii khilii hai
kitnii raate.n jaag ke saajan
aaj mujhe ye raat milii hai

Jan Nisar Akhtar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now