Search result for "mah.nge" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "mah.nge"

Nazm MATCHES FOR "mah.nge"

Nazm

thak jaogi

paagal aa.nkho.n vaalii la.Dkii
itne mah.nge KHvaab na dekho
thak jaa.ogii
kaa.nch se naazuk KHvaab tumhaare
TuuT ga.e to
pachhtaa.ogii
soch kaa saaraa ujlaa kundan
zabt kii raakh me.n ghul jaa.egaa
kachche-pakke rishto.n kii KHushbuu kaa resham
khul jaa.egaa
tum kyaa jaano
KHvaab safar kii dhuup ke teshe
KHvaab adhuurii raat kaa dozaKH
KHvaab KHayaalo.n kaa pachhtaavaa
KHvaabo.n kii manzil rusvaa.ii
KHvaabo.n kaa haasil tanhaa.ii
tum kyaa jaano
mah.nge KHvaab KHariidnaa ho.n to
aa.nkhe.n bechnaa pa.Dtii hai.n yaa
rishte bhuulnaa pa.Dte hai.n

Mohsin Naqvi

Nazm

aansu

mere pahluu me.n jo bah nikle tumhaare aa.nsuu
ban ga.e shaam-e-mohabbat ke sitaare aa.nsuu
dekh saktaa hai bhalaa kaun ye paare aa.nsuu
merii aa.ankho.n me.n na aa jaa.e.n tumhaare aa.nsuu
sham.a kaa aks jhalaktaa hai jo har aa.nsuu me.n
ban ga.e bhiigii hu.ii raat ke taare aa.nsuu
me.nh kii buu.ndo.n kii tarah ho ga.e saste kyuu.n aaj
motiyo.n se kahii.n mah.nge the tumhaare aa.nsuu
saaf iqraar-e-mohabbat ho zabaa.n se kyuu.nkar
aa.nkh me.n aa ga.e yuu.n sharm ke maare aa.nsuu
hijr abhii duur hai mai.n paas huu.n ai jaan-e-vafaa
kyuu.n hu.e jaate hai.n bechain tumhaare aa.nsuu
sub.h-dam dekh na le ko.ii ye bhiigaa aa.nchal
merii chuGlii kahii.n khaa de.n na tumhaare aa.nsuu
apne daamaan o garebaa.n ko mai.n kyuu.n pesh karuu.n
hai.n mire ishq kaa in.aam tumhaare aa.nsuu
dam-e-ruKHsat hai qariib ai Gam-e-furqat KHush ho
karne vaale hai.n judaa.ii ke ishaare aa.nsuu
sadqe us jaan-e-mohabbat ke mai.n 'aKHtar' jis ke
raat bhar bahte rahe shauq ke maare aa.nsuu

Akhtar Shirani

Nazm

zindagi pen hai

zindagii pen hai
is ke riifill ho tum
pen kii paa.ii jaatii hai.n qisme.n bahut
ko.ii montex hai ko.ii piolet hai
pen mah.nge hai.n jo un kii ik KHaasiyat
man kare jab aap riifill badal sakte ho
lekin mai.n pen huu.n 3 ruupa.e vaalaa
jis me.n aisii ko.ii KHaasiyat to nahii.n
ik kamii hai magar
ye TuuT jaa.egaa par riifill badaltaa nahii.n

Abhishek Kumar Amber

Nazm

ghair-mutawaqqa mulaqat

barso.n baa'd jab us ko dekhaa phuul saa chehra badal chukaa thaa
peshaanii par fikr kii aayat aa.nkhe.n ab sanjiida thii.n
ho.nT ka.nval ab bhii vaise par shaadaabii kuchh kam kam thii
pakke phalo.n kaa bojh uThaa.e jism tanaa bal khaataa thaa
ra.ngii.n pairaahan me.n ab bhii
KHvaab kii suurat lagtii thii
jaane kaisii kaisii hikaayat dekh use yaad aatii thii
pahlii daf.a jab saath the baiThe class ke andar ham dono.n
us ke jism ke lams ne mujh ko
pahle to bulaayaa thaa phir pakkaa dost banaayaa thaa
shaam talak mele me.n kaise phirte rahe the idhar-udhar
raat ga.e mammy ne us ko khoTii-kharii sunaa.ii thii
rail ke andar baiTh ke kaise sharmaa.e ghabraa.e the
baGair ticket ke pahu.nch ke ghar par kitnii mauj manaa.ii thii
dopahar ko Dhaabe me.n
chaa.e aur cigarette ke saath
tho.De se ruumaanii ho kar
kyaa kyaa baate.n karte the
ghar ke baahar lawn bhii hogaa ge.ndaa aur gul-mohar ke phuul
kharii khaaT nahii.n rakhe.nge bed ba.De mah.nge ho.nge
suiT miraa aisaa hogaa terii saarii resham kii
beTe kaa jo naam rakhe.nge hinduu na muslim hogaa
bil chukaate vaqt me.n aksar paise kam pa.D jaate the
dekh ke dadduu ha.nstaa thaa phir
jaane kyuu.n KHush hotaa thaa
ko.ii baat nahii.n hai beTe
kal jab aa.o de jaanaa
jaate hu.e jab seTh ne us kii kamar me.n baazuu pahnaayaa
dekh ke us kii aa.nkhe.n mujh ko chhalak pa.Dii thii.n chup ke se
soch rahaa thaa palaT ke ab vo
puuchhegii tum kaise ho
ye hai aap kii coffee saahab aur bhii kuchh chahiye hogaa

Abu Bakr Abbad

Nazm

hawas

ba-zaahir KHuub-suurat hai.n
takallum kaa tariiqa bhii bahut umda saa un kaa
badan par Daal kar poshaak mah.nge daam vaalii vo
samajhte hai.n nigaaho.n kii havas bhii Dhaa.np lii ham ne
magar vo jaante kab hai.n
havas kaa jism na.ngaa hai

Neel Ahmed

Nazm

nai duniya mein purana aadmi

Guruur-e-aagahii ne mujh ko diivaana banaa rakkhaa thaa shaayad
agar mai.n vo rasiile KHvaab le letaa to achchhaa thaa
haqiiqat maut hai vo mujh ko KHud hii Dhuu.nD letii
zindagii KHvaabo.n kaa mausam hai
na.ii duniyaa me.n lekin mausamii meve bhii mah.nge hai.n
agar mai.n vo puraane KHvaab le letaa to achchhaa thaa

Ali Minai

Nazm

waqt ke manzar

bistar pe mah.nge mah.nge na nii.nd ho mayassar
apne sukuu.n kii KHaatir vaare dhanii jo dhan ko
aur aasmaan o.Dhe footpath pe ho soyaa
chuume.n havaa.e.n aa kar mazduur ke badan ko
insaaf tab KHudaa kaa kitnaa lage hai behtar
sab khel vaqt kaa hai sab vaqt ke hai.n manzar

Ejazulhaq Shahab

Nazm

akaD shah mal-dar ho gaya

the ab us kii gaa.Dii me.n KHuddaam bhii
vo khaataa thaa mah.nge se ab aam bhii

Mohammad Osama Sarsari

Nazm

nasur

mah.nge hotel me.n qalam-kaaro.n ko daa'vat diijiye
naaqido.n se KHaas darje kii mohabbat kiijiye

Jabbar Wasif

Nazm

halki-phulki likhai

dhuul me.n lipTii
dublii sii halkii-phulkii
merii ye likhaa.ii
kyaa hu.aa
jo mah.nge kap.De nahii.n pahantii
kisii ke banaa.e hu.e raste pe nahii.n chaltii
zaraa saa mu.nh dho le agar
Thokaro.n se bhar ke peT apnaa
tho.Daa miiThaa bhii khaa le agar
to use bhii mah.nge kap.De dilaa de.nge ham
ko.ii naam de de.nge use ik din
saaf-suthre kisii raste pe Tahlaa karegii ye
aur mujhe bulaa.e.nge
ek din

Manish chandra

Nazm

bajaT

har saal bajaT ye aataa hai
har saal bajaT ye aa.egaa
tum ko 'aadat pa.D jaa.egii
jo kuchh anubhau ho jaa.egaa
kap.Daa tho.Daa mah.ngaa hogaa
chhoTe gher kaa lah.ngaa hogaa
dhotii hogii tho.Dii chhoTii
kurtaa bhii kuchh uu.nchaa hogaa

Munish Narayan Saxena

Nazm

lafz

lafz bahut tho.De hote hai.n
lekin un ko jo.D baTor ke
ik aisii chhoTii sii araazii to KHariidii jaa saktii hai
jis me.n sunahrii KHvaab hii kaasht kiye jaa.e.n
lafz bahut mah.nge hote hai.n
lekin un ko kaaT-kuuT kar qisto.n par ik baajaa to aa saktaa hai

Ishrat Afreen

Nazm

?

kitnii baar ye taale TuuTe
mohre.n chun-chun le jaa.e.nge saa.ns ku.nvaare
dhandaa karvaT
dhandaa aahaT goyaa soch hai taane-baane
vaqt puraane pahluu pahluu na.e Thikaane
kaun sii aisii jins yahaa.n
jo ab bhii mah.ngii
mah.nge sikke sai.nka.Do.n gode.n
KHushii manaa.o diye jalaa.o
chaa.ndii sonaa naata jo.De

Aazam Khursheed

Nazm

mujhse pahli si mohabbat meri mahbub na mang

mujh se pahlii sii mohabbat mirii mahbuub na maa.ng
mai.n ne samjhaa thaa ki tuu hai to daraKHshaa.n hai hayaat
teraa Gam hai to Gam-e-dahr kaa jhag.Daa kyaa hai
terii suurat se hai aalam me.n bahaaro.n ko sabaat
terii aa.nkho.n ke sivaa duniyaa me.n rakkhaa kyaa hai
tuu jo mil jaa.e to taqdiir niguu.n ho jaa.e
yuu.n na thaa mai.n ne faqat chaahaa thaa yuu.n ho jaa.e
aur bhii dukh hai.n zamaane me.n mohabbat ke sivaa
raahate.n aur bhii hai.n vasl kii raahat ke sivaa

Faiz Ahmad Faiz

Nazm

main pal do pal ka shair hun

mai.n pal do pal kaa shaa'ir huu.n pal do pal mirii kahaanii hai
pal do pal merii hastii hai pal do pal mirii javaanii hai
mujh se pahle kitne shaa'ir aa.e aur aa kar chale ga.e
kuchh aahe.n bhar kar lauT ga.e kuchh naGme gaa kar chale ga.e
vo bhii ik pal kaa qissa the mai.n bhii ik pal kaa qissa huu.n
kal tum se judaa ho jaa.uu.ngaa go aaj tumhaaraa hissa huu.n
pal do pal me.n kuchh kah paayaa itnii hii sa'aadat kaafii hai
pal do pal tum ne mujh ko sunaa itnii hii ‘inaayat kaafii hai
kal aur aa.e.nge naGmo.n kii khiltii kaliyaa.n chun.ne vaale
mujh se behtar kahne vaale tum se behtar sun.ne vaale
har nasl ik fasl hai dhartii kii aaj ugtii hai kal kaTtii hai
jiivan vo mah.ngii madiraa hai jo qatra qatra baTtii hai
saagar se ubhrii lahar huu.n mai.n saagar me.n phir kho jaa.uu.ngaa
miTTii kii ruuh kaa sapnaa huu.n miTTii me.n phir so jaa.uu.ngaa
kal ko.ii mujh ko yaad kare kyuu.n ko.ii mujh ko yaad kare
masruuf zamaana mere liye kyuu.n vaqt apnaa barbaad kare

Sahir Ludhianvi

Nazm

nisar main teri galiyon ke

bujhaa jo rauzan-e-zindaa.n to dil ye samjhaa hai
ki terii maa.ng sitaaro.n se bhar ga.ii hogii
chamak uThe hai.n salaasil to ham ne jaanaa hai
ki ab sahar tire ruKH par bikhar ga.ii hogii
Garaz tasavvur-e-shaam-o-sahar me.n jiite hai.n
giraft-e-saaya-e-diivaar-o-dar me.n jiite hai.n

Faiz Ahmad Faiz

Nazm

aaKHiri mulaqat

kuchh uj.Dii maa.nge.n shaamo.n kii
aavaaz shikasta jaamo.n kii
kuchh Tuk.De KHaalii botal ke
kuchh ghu.ngruu TuuTii paa.el ke
kuchh bikhre tinke chilman ke
kuchh purze apne daaman ke
ye taare kuchh tharraa.e hu.e
ye giit kabhii ke gaa.e hu.e
kuchh sher puraanii Gazlo.n ke
unvaan adhuurii nazmo.n ke
TuuTii hu.ii ik ashko.n kii la.Dii
ik KHushk qalam ik band gha.Dii
mat roko inhe.n paas aane do
ye mujh se milne aa.e hai.n
mai.n KHud na jinhe.n pahchaan sakuu.n
kuchh itne dhu.ndle saa.e hai.n

Jan Nisar Akhtar

Nazm

wo subh kabhi to aaegi

1
vo sub.h kabhii to aa.egii
in kaalii sadiyo.n ke sar se jab raat kaa aa.nchal Dhalkegaa
jab dukh ke baadal pighle.nge jab sukh kaa saagar chhalkegaa
jab ambar jhuum ke naachegaa jab dhartii naGme gaa.egii
vo sub.h kabhii to aa.egii
jis sub.h kii KHaatir jug jug se ham sab mar mar kar jiite hai.n
jis sub.h ke amrit kii dhun me.n ham zahr ke pyaale piite hai.n
in bhuukii pyaasii ruuho.n par ik din to karam farmaa.egii
vo sub.h kabhii to aa.egii
maanaa ki abhii tere mere armaano.n kii qiimat kuchh bhii nahii.n
miTTii kaa bhii hai kuchh mol magar insaano.n kii qiimat kuchh bhii nahii.n
insaano.n kii izzat jab jhuuTe sikko.n me.n na taulii jaa.egii
vo sub.h kabhii to aa.egii
daulat ke liye jab aurat kii ismat ko na bechaa jaa.egaa
chaahat ko na kuchlaa jaa.egaa Gairat ko na bechaa jaa.egaa
apne kaale kartuuto.n par jab ye duniyaa sharmaa.egii
vo sub.h kabhii to aa.egii
biite.nge kabhii to din aaKHir ye bhuuk ke aur bekaarii ke
TuuTe.nge kabhii to but aaKHir daulat kii ijaara-daarii ke
jab ek anokhii duniyaa kii buniyaad uThaa.ii jaa.egii
vo sub.h kabhii to aa.egii
majbuur bu.Dhaapaa jab suunii raaho.n kii dhuul na phaa.nkegaa
ma.asuum la.Dakpan jab gandii galiyo.n me.n bhiik na maa.ngegaa
haq maa.ngne vaalo.n ko jis din suulii na dikhaa.ii jaa.egii
vo sub.h kabhii to aa.egii
faaqo.n kii chitaa.o.n par jis din insaa.n na jalaa.e jaa.e.nge
siino.n ke dahakte dozaKH me.n armaa.n na jalaa.e jaa.e.nge
ye narak se bhii gandii duniyaa jab sovarg banaa.ii jaa.egii
vo sub.h kabhii to aa.egii
2
vo sub.h hamii.n se aa.egii
jab dhartii karvaT badlegii jab qaid se qaidii chhuuTe.nge
jab paap gharau.nde phuuTe.nge jab zulm ke bandhan TuuTe.nge
us sub.h ko ham hii laa.e.nge vo sub.h hamii.n se aa.egii
vo sub.h hamii.n se aa.egii
manhuus samaajii Dhaa.ncho.n me.n jab zulm na paale jaa.e.nge
jab haath na kaaTe jaa.e.nge jab sar na uchhaale jaa.e.nge
jailo.n ke binaa jab duniyaa kii sarkaar chalaa.ii jaa.egii
vo sub.h hamii.n se aa.egii
sansaar ke saare mehnat-kash kheto.n se milo.n se nikle.nge
be-ghar be-dar be-bas insaa.n taariik bilo.n se nikle.nge
duniyaa amn aur KHush-haalii ke phuulo.n se sajaa.ii jaa.egii
vo sub.h hamii.n se aa.egii

Sahir Ludhianvi

Nazm

kitaben

vo saaraa ilm to miltaa rahegaa aa.inda bhii
magar vo jo kitaabo.n me.n milaa karte the suukhe phuul aur
mahke hu.e ruq.e
kitaabe.n maa.ngne girne uThaane ke bahaane rishte bante the
un kaa kyaa hogaa
vo shaayad ab nahii.n ho.nge!

Gulzar

Nazm

ye baaten jhuTi baaten hain

gar ishq kiyaa hai tab kyaa hai kyuu.n shaad nahii.n aabaad nahii.n
jo jaan liye bin Tal na sake ye aisii bhii uftaad nahii.n
ye baat to tum bhii maanoge vo 'qais' nahii.n farhaad nahii.n
kyaa hijr kaa daaruu mushkil hai kyaa vasl ke nusKHe yaad nahii.n
ye baate.n jhuuTii baate.n hai.n ye logo.n ne phailaa.ii hai.n
tum 'inshaa'-jii kaa naam na lo kyaa 'inshaa'-jii saudaa.ii hai.n

Ibn۔e۔Insha

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now