Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "masaafat"

Nazm MATCHES FOR "masaafat"

Nazm

ai ishq-e-junun-pesha

umro.n kii masaafat se
thak-haar ga.e aaKHir
sab ahd aziyyat ke
bekaar ga.e aaKHir
aGyaar kii baa.nho.n me.n
dildaar ga.e aaKHir
ro kar tirii qismat ko
Gam-KHvaar ga.e aaKHir

Ahmad Faraz
Nazm

ret par safar ka lamha

kabhii ham KHuub-suurat the
kitaabo.n me.n basii
KHushbuu kii suurat
saa.ns saakin thii
bahut se an-kahe lafzo.n se
tasviire.n banaate the
parindo.n ke paro.n par nazm likh kar
duur kii jhiilo.n me.n basne vaale
logo.n ko sunaate the
jo ham se duur the
lekin hamaare paas rahte the
na.e din kii masaafat
jab kiran ke saath
aa.ngan me.n utartii thii
to ham kahte the
ammii titliyo.n ke par
bahut hii KHuub-suurat hai.n
hame.n maathe pe bosaa do
ki ham ko titliyo.n ke
jugnu.o.n ke des jaanaa hai
hame.n ra.ngo.n ke jugnuu
raushnii kii titliyaa.n aavaaz detii hai.n
na.e din kii masaafat
ra.ng me.n Duubii havaa ke saath
khi.Dkii se bulaatii hai
hame.n maathe pe bosaa do
hame.n maathe pe bosaa do

Ahmed Shamim
Nazm

ai dil-e-be-KHabar

ai dil-e-be-KHabar
jo havaa jaa chukii ab nahii.n aa.egii
jo shajar TuuT jaataa hai phaltaa nahii.n
vaapsii mausamo.n kaa muqaddar to hai
jo samaa.n biit jaa.e palaTtaa nahii.n
jaane vaale nahii.n lauTte umr bhar
ab kise Dhuu.nDhtaa hai sar-e-rahguzar
ai dil-e-kam-nazar ai mire be-KHabar ai mire ham-safar
vo to KHushbuu thaa agle nagar jaa chukaa
chaa.ndnii thaa hu.aa sarf-e-ra.ng-e-qamar
KHvaab thaa aa.nkh khulte hii ojhal hu.aa
pe.D thaa rut badalte hu.aa be-samar
ai dil-e-be-asar ai mire chaara-gar
ye hai kis ko KHabar!
kab havaa-e-safar kaa ishaara mile!
kab khule.n saahilo.n par safiino.n ke par
kaun jaane kahaa.n manzil-e-mauj hai!
kis jaziire pe hai shaah-zaadii kaa ghar ai mire chaara-gar
ai dil-e-be-KHabar kam-nazar mo'tabar
tuu ki muddat se hai zer-e-baar-e-safar
be-qaraar-e-safar
rail kii be-hunar pTriyo.n kii tarah
aas ke be-samar mausamo.n kii tarah
be-jahat manzilo.n kii masaafat me.n hai
rasta bhuule hu.e rahravo.n kii tarah
chob-e-naar-e-safar
e'tibaar-e-nazar kis gumaa.n par kare.n
ai dil-e-be-basar
ye to saahil pe bhii dekhtii hai bha.nvar
ret me.n kisht kartii hai aab-e-baqaa
kholtii hai havaa.o.n me.n baab-e-asar
tujh ko rakhtii hai ye zebdaar-e-safar be-qaraar-e-safar
ai dil-e-be-hunar
garm saa.nso.n kii vo KHushbu.e.n bhuul jaa
vo chahaktii hu.ii dha.Dkane.n bhuul jaa
bhuul jaa narm ho.nTo.n kii shaadaabiyaa.n
harf-e-iqraar kii lazzate.n bhuul jaa
bhuul jaa vo havaa bhuul jaa vo nagar
kaun jaane kahaa.n raushnii kho ga.ii
luT gayaa hai kahaa.n kaarvaan-e-sahar
ab kahaa.n gesu.o.n ke vo saa.e kahaa.n
us kii aahaT se chamke hu.e baam-o-dar ai dil-e-be-basar
ra.ng-e-aasuudgii ke tamaashe kahaa.n
jhuTpuTaa hai yahaa.n rahguzar rahguzar
vo to KHushbuu thaa agle nagar jaa chukaa
ab kise Dhuu.nDhtaa hai are be-KHabar
jaane vaale nahii.n lauTte umr bhar
ai dil-e-kam-nazar ai mire chaara-gar ai mire ham-safar

Amjad Islam Amjad
Nazm

ye wo basti hi nahin

kuchh bhii aa.nkho.n me.n nahii.n ashk-e-nadaamat ke sivaa
kuchh bhii daaman me.n nahii.n daaG-e-malaamat ke sivaa
kuchh bhii chehre pe nahii.n gard-e-masaafat ke sivaa
apnii duukaan me.n sab kuchh hai mohabbat ke sivaa

Qaisarul Jafri
Nazm

kaenat

ye raat kaa chhalnii chhalnii saa kaalaa aasmaa.n hai
ki jis me.n jugnuu kii shakl me.n
be-shumaar suuraj pighal rahe hai.n
shahaab-e-saaqib hai
yaa hamesha kii ThanDii kaalii fazaa.o.n me.n
jaise aag ke tiir chal rahe hai.n
karo.D-haa nuurii barso.n ke faaslo.n me.n phailii
ye kahkashaa.e.n
KHalaa ghere hai.n
yaa KHalaa.o.n kii qaid me.n hai
ye kaun kis ko liye chalaa hai
har ek lamha
karo.Do.n miilo.n kii jo masaafat hai
in ko aaKHir kahaa.n hai jaanaa
agar hai in kaa kahii.n ko.ii aaKHirii Thikaanaa
to vo kahaa.n hai

Javed Akhtar
Nazm

jahan zad

ye masaafat ye nau saal kii be-mahaabaa masaafat
tire dar ke aage mujhe khii.nch laa.ii
magar tuu yahaa.n chaak par apnii dhun me.n magan hai nigaahe.n uThaa
dekh to mai.n jahaa.n zaad terii tire saamne huu.n
magar tuu ne sach hii kahaa thaa
zamaana jahaa.n zaad vo chaak hai
jis pe miina-o-jaam-o-subuu aur faanuus-o-gul-daa.n kii maanind
bante biga.Dte hai.n insaa.n

Ishrat Afreen
Nazm

naya safar hai purane charag gul kar do

bhaTak ke rah ga.ii.n nazre.n KHalaa kii vus.at me.n
hariim-e-shaahid-e-raa.anaa kaa kuchh pata na milaa
taviil raahguzar KHatm ho ga.ii lekin
hanuuz apnii masaafat kaa muntaha na milaa

Sahir Ludhianvi
Nazm

muddat ke baad

muddat ke baa'd tum se milaa huu.n to ye khulaa
ye vaqt aur faasla dhoka nazar kaa thaa
chehre pe umr bhar kii masaafat raqam sahii
dil ke liye tamaam safar lamha bhar kaa thaa

Himayat Ali Shayar
Nazm

intizar baqi hai

daa.imii masaafat hai
be-bas aarzuu.o.n se
dard kii rasaa.ii tak
qaid se rihaa.ii tak

Abdul Ahad Saaz
Nazm

zarurat

hamaare beach kaa rishta
zaruurat ke sivaa kuchh bhii nahii.n shaayad
zaruurat baat karne kii
zaruurat baat sun.ne kii
zaruurat saa.ns lene kii
zaruurat fursato.n ke vaqt ko aasaan karne kii
zaruurat ko mohabbat naam dene se
hamaare beach phailii ye masaafat kam nahii.n hotii
ye apnaa-pan faqat begaanagii par dhuul jaisaa hai
mai.n ghanTo.n baat kartaa huu.n
tumhaarii fursato.n ke vaqt ko aasaan kartaa huu.n
miraa is par ye da.avaa hai mujhe tum se mohabbat hai
tumhaaraa bhii yahii israar mujh se pyaar kartii ho
so ham aasaaniyo.n se jhuuT kii aadat nibhaane me.n
mahaarat siikh lete hai.n
zaruurat ko mohabbat maan lete hai.n
magar sach hai
zaruurat kii qasam sach hai
hamaare beach kaa rishta
shuruu.a din se zaruurat hai

Atif tauqeer
Nazm

tajdid

ab mire shaane se lag kar kis liye rotii ho tum
yaad hai tum ne kahaa thaa
''jab nigaaho.n me.n chamak ho
lafz jazbo.n ke asar se kaa.npte ho.n aur tanaffus
is tarah uljhe.n ki jismo.n kii thakan KHushbuu bane
to vo gha.Dii ahd-e-vafaa kii saa.at-e-naayaab hai
vo jo chupke se bichha.D jaate hai.n lamhe hai.n masaafat
jin kii KHaatir paa.nv par pahre biThaatii hai
nigaahe.n dhund ke pardo.n me.n un ko Dhuu.nDtii hai.n
aur samaa.at un kii miiThii narm aahaT ke liye
daaman bichhaatii hai''
aur vo lamha bhii tum ko yaad hogaa
jab havaa.e.n sard thii.n aur shaam ke maile kafan par haath rakh kar
tum ne lafzo.n aur ta'alluq ke na.e ma.anii bataa.e the, kahaa thaa
''har gha.Dii apnii jagah par saa.at-e-naayaab hai
haasil-e-umr-e-gurezaa.n ek bhii lamha nahii.n
lafz dhoka hai.n ki un kaa kaam iblaaG-e-ma.aanii ke alaava kuchh nahii.n
vaqt ma.anii hai jo har lahza na.e chehre badaltaa hai
jaane vaalaa vaqt saaya hai
ki jab tak jism hai ye aadmii ke saath chaltaa hai
yaad misl-e-nutq paagal hai ki is ke lafz ma.anii se tahii hai.n
ye jise tum Gam aziyyat dard aa.nsuu
dukh vaGaira kah rahe ho
ek lamhaatii ta.assur hai tumhaaraa vahm hai
tum ko meraa mashvara hai, bhuul jaa.o tum se ab tak
jo bhii kuchh mai.n ne kahaa hai''
ab mire shaane se lag kar kis liye rotii ho tum!

Amjad Islam Amjad
Nazm

na-dida rifaqat mein

mahsuus ye hotaa hai
dukh jhele the jo ab tak
be-naam masaafat me.n
likhne kii mohabbat me.n
pa.Dhne kii zaruurat me.n
be-suud riyaazat thii
be-faiz ibaadat thii
jo KHvaab bhii dekhe the
in jaagtii aa.nkho.n ne
sab KHaam-KHayaalii thii
phir bhii tujhe paane kii
dil ke kisii goshe me.n
KHvaahish to bachaa lii thii
lekin tujhe paa kar bhii
aur KHud ko ga.nvaa kar bhii
is habs ke mausam kii khi.Dkii se havaa aa.ii
na phuul se KHushbuu kii ko.ii bhii sadaa aa.ii
ab nii.nd hai aa.nkho.n me.n
naa.n dil me.n vo pahlii sii taaza suKHan-aaraa.ii
naa.n lafz mire nikle
naa.n harf-o-mu.aafii kii daanish mire kaam aa.ii
naadiida rifaaqat me.n
jitnii bhii aziyyat thii
sab mere hii naam aa.ii
kuchh bhii to nahii.n vaisaa
jaisaa tujhe sochaa thaa
jitnaa tujhe chaahaa thaa

Noshi Gilani
Nazm

rahguzar

zindagii tuufaan thii sailaab thii bhau.nchaal thii
vaqt phir bhii karvaTo.n par karvaTe.n letaa rahaa
qaafile is raah par aate rahe jaate rahe
raahbar sab ko masaafat kaa sila detaa rahaa

Qateel Shifai
Nazm

baDa shahr aur tanha aadmi

december kaa mahiina aur dillii kii sardii
sitaaro.n kii jhilmilaatii jhurmuT se pare
aasmaan ke ek sunsaan goshe me.n
puunam kaa TheThurtaa hu.aa ko.ii chaa.nd jaise
baadalo.n me.n khaataa hai mutvaatir hachkole
haule haule
tanhaa musaafir
aur duur tak kohre kii chaadar me.n lipTii
bal khaatii sa.Dke.n
dhund kii Gubaar me.n khoyaa hu.aa india gate
ThanD me.n Thokare.n khaataa musaafir
KHush nasiib hai
baadalo.n me.n ghus jaataa hai chaa.nd
merii christmas kii raunaqe.n phailii hai.n tamaam
sitaaro.n se raushan saje dhaje baazaar
laziiz khaano.n kii KHushbu.e.n jahaa.n phailii hai.n har-suu
baazaar kii garm fazaa.o.n me.n
mai kii sarmastii me.n Duubaa hu.aa hai puure shahr kaa shabaab
tanhaa musaafir kii
chand roza masaafat bhii kyaa shai hai yaaro!
ham-vatano.n se duur
apno se duur
jamunaa taT par jaise bin maa.njhii ke naav
boat club ke sard paanii me.n jaise
tairtaa ruktaa hu.aa ko.ii tanhaa hubaab
tanhaa musaafir sochtaa hai
ko.ii hai jis kaa vo haath thaam le haule haule
ko.ii hai jo us ke saath kuchh daur chale haule haule
dhund me.n kho.ii hu.ii manzile.n
taviil sa.Dke.n
aur tanhaa musaafir
jaise puunam kaa TheThurtaa hu.aa ko.ii chaa.nd
baadalo.n me.n khaataa hai mutvaatir hachkole
haule haule

Perwaiz Shaharyar
Nazm

saDak

sa.Dak masaafat kii ujlato.n me.n
ghire hu.e sab musaafiro.n ko
ba-Gaur fursat se dekhtii hai
kisii ke chehre pe surKH vahshat chamak rahii hai
kisii ke chehre se zard hairat chhalak rahii hai
kisii kii aa.nkhe.n harii-bharii hai.n
kabiir had se ubhar rahaa hai
saGiir qad se guzar rahaa hai
kisii kaa tyre kisii ke pahiye ko khaa rahaa hai
kisii kaa juutaa kisii kii chappal chabaa rahaa hai
kisii ke pairo.n me.n aa rahaa hai kisii kaa bachcha
kisii kaa bachcha kisii ke shaane pe jaa rahaa hai
ko.ii Thikaane pe ko.ii khaane pe jaa rahaa hai
habiib dast-e-raqiib thaame
Gariib-KHaane pe jaa rahaa hai
amiir pi.njra banaa rahaa hai
Gulaam kartab dikhaa rahaa hai
aur apne beTe ke saath chhat par
amiin kunDaa lagaa rahaa hai
nizaam Taa.nga chalaa rahaa hai
kisii kalaa.ii pe jagmagaatii hu.ii gha.Dii hai
magar abhii vo rukii hu.ii hai
kisii ke chehre pe baara bajne me.n paa.nch second rah ga.e hai.n
kisii kii haathii-numaa prado
sa.Dak se aise guzar rahii hai
sivaa.e is ke kahii.n bhii jaise ko.ii nahii.n ho
kisii kii mo.nchhe.n jhukii hu.ii hai.n
kisii kii baa.nchhe.n khilii hu.ii hai.n
kisii kii taxi kisii kii foksii milii hu.ii hai.n
kisii ke lab aur kisii kii aa.nkhe.n silii hu.ii hai.n
kisii ke kap.De phaTe hu.e hai.n
kisii kii pag.Dii chamak rahii hai
kisii kii ra.ngat kisii kii Topii u.Dii hu.ii hai
shariif nazre.n uThaa uThaa kar
kamaan jismo.n pe apnii vahshat ke tiir kab se chalaa rahaa hai
naziir nazre.n churaa rahaa hai
nafiis apne cluff kii shikno.n ko ro rahaa hai
hakiim apne matab ke shiisho.n ko dho rahaa hai
kisii kii aa.nkho.n ke dhu.ndle shiisho.n me.n us ke maazii kii jhalkiyaa.n hai.n
kisii kii aa.nkho.n me.n aane vaale hasiin lamho.n kii mastiyaa.n hai.n
kisii kii aa.nkho.n me.n rat-jago.n kii kuchh arGavaanii sii Doriyaa.n hai.n
kisii ke kaa.ndhe pe us ke KHvaabo.n kii boriyaa.n hai.n
kabaa.D-KHaane pe baasii Tuk.Do.n kii or kitaabo.n kii boriyaa.n hai.n
buzurg bargad ke niiche buu.Dhaa kha.Daa hu.aa hai
aur us ke haatho.n me.n tape lipTii hu.ii chha.Dii hai
police kii gaa.Dii pikiT lagaa kar
sa.Dak pe tirchhii kha.Dii hu.ii hai
aur ek mazduur apnaa daaman uThaa.e be-bas kha.Daa hu.aa hai
aur ik sipaahii ki us ke nefe me.n u.ngliyo.n ko ghumaa rahaa hai
vahii.n pe shaahid siyaah chashma lagaa ke KHud ko chhupaa rahaa hai
news channel kii chhoTii gaa.Dii ba.Dii KHabar kii talaash me.n hai
do sabzii vaale bhii apnii pherii lagaa rahe hai.n
to phuul vaale ke sar pe phuulo.n kii Tokarii hai
kisii kii aa.nkho.n me.n naukrii hai
kisii kii aa.nkho.n me.n chhokrii hai
vaqaar sar ko jhukaa rahaa hai
faraaz khaa.ii me.n jaa rahaa hai
to giilii cigarette ke kash lagaa kar
navaab rickshaw chalaa rahaa hai
saliim kannii ghumaa rahaa hai
vakiil vardii me.n jaa rahaa hai
zamiir baGle.n bajaa rahaa hai
aur ek vaa.iz bataa rahaa hai
KHudaa ko naaraaz karne vaale jahannamii hai.n
KHudaa ko raazii karo KHudaaraa
KHudaa ko raazii karo KHudaaraa
aur us ke aage nasiir akmal kamaal shaadaab Gulaam saare
nazar jhukaa.e kha.De hu.e hai.n
ki chashm-e-biinaa agar kahii.n hai
to samjho paataal tak ga.Dhii hai
kisii ko a-c KHariidnaa hai
kisii ko pii sii KHariidnaa hai
kisii kii bas aur kisii kii bii-sii nikal rahii hai
aqiila KHaala ke dono.n haatho.n me.n aaTh thaile laTak rahe hai.n
aur aate jaate sabhii musaafir
unhe.n musalsal khaTak rahe hai.n
ziyaa a.ndhere me.n jaa rahaa hai
gulaab kachraa jalaa rahaa hai
aziim makkhii a.Daa rahaa hai
kaliim guTkaa chabaa rahaa hai
to ghanTa-package pe jaane kab se
fahiim gappe.n la.Daa rahaa hai
sabaq musaavaat kaa sikhaane
vaziir gaa.Dii me.n jaa rahaa hai
sanaa nidaa ko na.e latiife sunaa rahii hai
hinaa hathelii ko takte takte puraane raste se aa rahii hai
aur apnii bhaavaj kaa haath thaame
zubaida check-up ko jaa rahii hai
vo apnii nazre.n kabhii idhar ko kabhii adhar ko gumaa rahii hai
magar ko.ii shai use musalsal bulaa rahii rahii hai
ajiib ujlat ajiib vahshat ajiib Gaflat kaa maajraa hai
kahuu.n mai.n kis se mire KHudaayaa ye kaisii KHilqat kaa maajraa hai
ki apnii mastii me.n mast ho kar
ye sab musaafir guzar rahe
na.e musaafir ubhar rahe hai.n
sa.Dak jahaa.n thii vahii.n kha.Dii hai
magar haqiiqat bahut ba.Dii hai
sa.Dak pe billii marii pa.Dii hai

Imran Shamshad Narmi
Nazm

aaj aur kal

rahguzaaro.n ke dhundalke to zaraa chhaT jaa.e.n
apne talvo.n se ye kaa.nTe bhii nikal jaa.e.nge
aaj aur kal kii masaafat ko zaraa tai kar le.n
vaqt ke saath iraade bhii badal jaa.e.nge

Qateel Shifai
Nazm

buzdil

mai.n vaadiyo.n kii masaafat se kis liye nikluu.n
safar ik aur pahaa.Do.n ke paar rakkhaa hai

Amjad Islam Amjad
Nazm

aankhen taras gai hain

is ghar me.n yaa us ghar me.n
tuu kahii.n nahii.n hai
darvaaze bajte hai.n
KHaalii kamre
terii baato.n kii mahkaar se bhar jaate hai.n
diivaaro.n me.n
terii saa.nse.n so.ii hai.n
mai.n jaag rahaa huu.n
kaano.n me.n
ko.ii guu.nj sii chakraatii phirtii hai
bhuule-bisre giito.n kii
chaa.ndnii raat me.n khilte hu.e
phuulo.n kii damak hai, yahii.n kahii.n
tere KHvaab
mirii be-saaya zindagii par
baadal kii suurat jhuke hu.e hai.n
yaad ke dasht me.n
aa.nkhe.n kaa.nTe chuntii hai.n
mere haath
tire haatho.n kii ThanDak me.n
Duube rahte hai.n
aaKHir... terii miTTii se mil jaane tak
kitne pal
kitnii sadiyaa.n hai.n
is sarhad se
us sarhad tak
kitnii masaafat aur pa.Dii hai
un rasto.n me.n
kitnii baarishe.n baras ga.ii hai.n
aa.nkhe.n mirii
terii raato.n ko taras ga.ii hai.n

Abrar Ahmad
Nazm

tafsil masafat ki

mauhuum kashiida hai
tasviir qayaamat kii
shaayad na sunaa paa.e.n
tafsiil masaafat kii
lab basta rahe.n shaayad
ye din jo guzaare hai.n
mahram hai ko.ii kis kaa
yaa zaKHm kii sargoshii
yaa hamaare hai.n
aa.nkho.n pe kiye saaya

Fahmida Riaz
Nazm

pagal aurat

vo footpath pe aur kabhii shahraaho.n par
kyaa jaane kis dhun me.n tanhaa phirtii hai
shab ko aaKHir baar-e-masaafat se thak kar
kyaa jaane kis goshe me.n jaa girtii hai

Sahba Akhtar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now