Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "mastoorat"

Nazm MATCHES FOR "mastoorat"

Nazm

koi ye kaise batae

ko.ii ye kaise bataa.e ki vo tanhaa kyuu.n hai
vo jo apnaa thaa vahii aur kisii kaa kyuu.n hai
yahii duniyaa hai to phir aisii ye duniyaa kyuu.n hai
yahii hotaa hai to aaKHir yahii hotaa kyuu.n hai
ik zaraa haath ba.Dhaa de.n to paka.D le.n daaman
un ke siine me.n samaa jaa.e hamaarii dha.Dkan
itnii qurbat hai to phir faasla itnaa kyuu.n hai
dil-e-barbaad se niklaa nahii.n ab tak ko.ii
is luTe ghar pe diyaa kartaa hai dastak ko.ii
aas jo TuuT ga.ii phir se ba.ndhaataa kyuu.n hai
tum masarrat kaa kaho yaa ise Gam kaa rishta
kahte hai.n pyaar kaa rishta hai janam kaa rishta
hai janam kaa jo ye rishta to badaltaa kyuu.n hai

Kaifi Azmi
Nazm

etiraf

merii har fatah me.n hai ek haziimat pinhaa.n
har masarrat me.n hai raaz-e-Gam-o-hasrat pinhaa.n

Asrarul Haq Majaz
Nazm

waqt

ye vaaqiye
haadse
tasaadum
har ek Gam
aur har ik masarrat
har ik aziyyat
har ek lazzat
har ik tabassum
har ek aa.nsuu
har ek naGma
har ek KHushbuu
vo zaKHm kaa dard ho
ki vo lams kaa ho jaaduu
KHud apnii aavaaz ho ki maahaul kii sadaa.e.n
ye zehn me.n bantii aur biga.Dtii hu.ii fazaa.e.n
vo fikr me.n aa.e zalzale ho.n ki dil kii halchal
tamaam ehsaas
saare jazbe
ye jaise patte hai.n
bahte paanii kii sat.h par
jaise tairte hai.n
abhii yahaa.n hai.n
abhii vahaa.n hai.n
aur ab hai.n ojhal
dikhaa.ii detaa nahii.n hai lekin
ye kuchh to hai
jo ki bah rahaa hai
ye kaisaa dariyaa hai
kin pahaa.Do.n se aa rahaa hai
ye kis samundar ko jaa rahaa hai
ye vaqt kyaa hai

Javed Akhtar
Nazm

parchhaiyan

tumhaarii aa.nkh masarrat se jhuktii jaatii hai
na jaane aaj mai.n kyaa baat kahne vaalaa huu.n

Sahir Ludhianvi
Nazm

aaKHiri KHat

al-qissa ma.aal-e-Gam-e-ulfat pe ha.nso tum
yaa ashk bahaatii raho fariyaad karo tum
maazii pe nadaamat ho tumhe.n yaa ki masarrat
KHaamosh pa.Daa so.egaa vaamaa.nda-e-ulfat

Faiz Ahmad Faiz
Nazm

kisi ko udas dekh kar

tumhe.n udaas saa paataa huu.n mai.n ka.ii din se
na jaane kaun se sadme uThaa rahii ho tum
vo shoKHiyaa.n vo tabassum vo qahqahe na rahe
har ek chiiz ko hasrat se dekhtii ho tum
chhupaa chhupaa ke KHamoshii me.n apnii bechainii
KHud apne raaz kii tash.hiir ban ga.ii ho tum
merii umiid agar miT ga.ii to miTne do
umiid kyaa hai bas ik pesh-o-pas hai kuchh bhii nahii.n
mirii hayaat kii Gamgiiniyo.n kaa Gam na karo
Gam-e-hayaat Gam-e-yak-nafas hai kuchh bhii nahii.n
tum apne husn kii ra.anaa.iyo.n pe rahm karo
vafaa fareb hai tuul-e-havas hai kuchh bhii nahii.n
mujhe tumhaare taGaaful se kyuu.n shikaayat ho
mirii fanaa mire ehsaas kaa taqaazaa hai
mai.n jaantaa huu.n ki duniyaa kaa KHauf hai tum ko
mujhe KHabar hai ye duniyaa ajiib duniyaa hai
yahaa.n hayaat ke parde me.n maut paltii hai
shikast-e-saaz kii aavaaz ruuh-e-naGma hai
mujhe tumhaarii judaa.ii kaa ko.ii ranj nahii.n
mire KHayaal kii duniyaa me.n mere paas ho tum
ye tum ne Thiik kahaa hai tumhe.n milaa na karuu.n
magar mujhe ye bataa do ki kyuu.n udaas ho tum
KHafaa na honaa mirii jur.at-e-taKHaatub par
tumhe.n KHabar hai mirii zindagii kii aas ho tum
miraa to kuchh bhii nahii.n hai mai.n ro ke jii luu.ngaa
magar KHudaa ke liye tum asiir-e-Gam na raho
hu.aa hii kyaa jo zamaane ne tum ko chhiin liyaa
yahaa.n pe kaun hu.aa hai kisii kaa socho to
mujhe qasam hai mirii dukh-bharii javaanii kii
mai.n KHush huu.n merii mohabbat ke phuul Thukraa do
mai.n apnii ruuh kii har ik KHushii miTaa luu.ngaa
magar tumhaarii masarrat miTaa nahii.n saktaa
mai.n KHud ko maut ke haatho.n me.n sau.np saktaa huu.n
magar ye baar-e-masaa.ib uThaa nahii.n saktaa
tumhaare Gam ke sivaa aur bhii to Gam hai.n mujhe
najaat jin se mai.n ik lahza paa nahii.n saktaa
ye uu.nche uu.nche makaano.n kii Dev.Dhiyo.n ke tale
har ek gaam pe bhuuke bhikaariyo.n kii sadaa
har ek ghar me.n hai aflaas aur bhuuk kaa shor
har ek samt ye insaaniyat kii aah-o-bukaa
ye kaar-KHaano.n me.n lohe kaa shor-o-Gul jis me.n
hai dafn laakho.n Gariibo.n kii ruuh kaa naGma
ye shaah-raaho.n pe ra.ngiin saa.Diyo.n kii jhalak
ye jho.npa.Do.n me.n Gariibo.n ke be-kafan laashe
ye maal-road pe caro.n kii rel-pel kaa shor
ye pTriyo.n pe Gariibo.n ke zard-ruu bachche
galii galii me.n ye bikte hu.e javaa.n chehre
husain aa.ankho.n me.n afsurdagii sii chhaa.ii hu.ii
ye ja.ng aur ye mere vatan ke shoKH javaa.n
KHariidii jaatii hai.n uThtii javaaniyaa.n jin kii
ye baat baat pe qaanuun o zaabte kii giraft
ye zillate.n ye Gulaamii ye daur-e-majbuurii
ye Gam bahut hai.n mirii zindagii miTaane ko
udaas rah ke mire dil ko aur ranj na do

Sahir Ludhianvi
Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal
Nazm

KHuda wo waqt na lae

KHudaa vo vaqt na laa.e ki sogvaar ho tuu
sakuu.n kii nii.nd tujhe bhii haraam ho jaa.e
tirii masarrat-e-paiham tamaam ho jaa.e
tirii hayaat tujhe talKH jaam ho jaa.e
Gamo.n se aa.iina-e-dil gudaaz ho teraa
hujuum-e-yaas se betaab ho ke rah jaa.e
vufuur-e-dard se siimaab hoke rah jaa.e
tiraa shabaab faqat KHvaab ho ke rah jaa.e
Guruur-e-husn saraapaa niyaaz ho teraa
taviil raato.n me.n tuu bhii qaraar ko tarse
tirii nigaah kisii Gam-gusaar ko tarse
KHizaa.n-rasiida tamannaa bahaar ko tarse
ko.ii jabii.n na tire sa.ng-e-aastaa.n pe jhuke
ki jins-e-ijz-o-aqiidat se tujh ko shaad kare
fareb-e-vaada-e-fardaa pe e'timaad kare
KHudaa vo vaqt na laa.e ki tujh ko yaad aa.e
vo dil ki tere liye be-qaraar ab bhii hai
vo aa.nkh jis ko tiraa intizaar ab bhii hai

Faiz Ahmad Faiz
Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

mirza ghaalib

fikr-e-insaa.n par tirii hastii se ye raushan hu.aa
hai par-e-murG-e-taKHayyul kii rasaa.ii taa-kujaa
thaa saraapaa ruuh tuu bazm-e-suKHan paikar tiraa
zeb-e-mahfil bhii rahaa mahfil se pinhaa.n bhii rahaa
diid terii aa.nkh ko us husn kii manzuur hai
ban ke soz-e-zindagii har shai me.n jo mastuur hai
mahfil-e-hastii tirii barbat se hai sarmaaya-daar
jis tarah naddii ke naGmo.n se sukuut-e-kohsaar
tere firdaus-e-taKHayyul se hai qudrat kii bahaar
terii kisht-e-fikr se ugte hai.n aalam sabza-vaar
zindagii muzmar hai terii shoKHi-e-tahriir me.n
taab-e-goyaa.ii se jumbish hai lab-e-tasviir me.n
nutq ko sau naaz hai.n tere lab-e-ejaaz par
mahv-e-hairat hai surayyaa rif.at-e-parvaaz par
shaahid-e-mazmuu.n tasadduq hai tire andaaz par
KHanda-zan hai Guncha-e-dillii gul-e-shiiraaz par
aah tuu uj.Dii hu.ii dillii me.n aaraamiida hai
gulshan-e-viimar me.n teraa ham-navaa KHvaabiida hai
lutf-e-goyaa.ii me.n terii ham-sarii mumkin nahii.n
ho taKHayyul kaa na jab tak fikr-e-kaamil ham-nashii.n
haa.e ab kyaa ho ga.ii hindostaa.n kii sar-zamii.n
aah ai nazzaara-aamoz-e-nigaah-e-nukta-bii.n
gesu-e-urduu abhii minnat-paziir-e-shaana hai
sham.a ye saudaa.i-e-dil-sozi-e-parvaana hai
ai jahaanaabaad ai gahvaara-e-ilm-o-hunar
hai.n saraapaa naala-e-KHaamosh tere baam dar
zarre zarre me.n tire KHvaabiida hai.n shams o qamar
yuu.n to poshiida hai.n terii KHaak me.n laakho.n guhar
dafn tujh me.n ko.ii faKHr-e-rozgaar aisaa bhii hai
tujh me.n pinhaa.n ko.ii motii aabdaar aisaa bhii hai

Allama Iqbal
Nazm

eid ka din

zahe-qismat hilaal-e-eid kii suurat nazar aa.ii
jo the ramzaan ke biimaar un sab ne shifaa paa.ii
pahaa.Do.n se vo utre qaafile roza-guzaaruu.n ke
gayaa garmii kaa 'mausam aur aa.e din bahaaro.n ke
uThaa hotel kaa 'parda saamne parda-nashii.n aa.e
jo chhup kar kar rahe the ehtiraam-e-hukm-e-dii.n aa.e
hu.ii anguur kii beTii se ''mastii-KHaan'' kii shaadii
khule dar mai-kado.n ke aur milii rindo.n ko aazaadii
naved-e-kaamraanii laa rahe hai.n race ke gho.De
masarrat ke taraane gaa rahe hai.n race ke gho.De
mubaarak ho ki phir se ho gayaa ''dance'' aur ''dinner'' chaaluu
KHalaas ahl-e-nazar ho.nge hu.aa dard-e-jigar chaaluu
namaaz-e-eid pa.Dhne ke liye sarkaar aa.e hai.n
aur un ke saath saare taalib-e-diidaar aa.e hai.n
yahii din ahl-e-dil ke vaaste ummiid kaa din hai
tumhaarii diid kaa din hai hamaarii eid kaa din hai

Majeed Lahori
Nazm

krishn kanhayya

ai dekhne vaalo
is husn ko dekho
is raaz ko samjho
ye naqsh-e-KHayaalii
ye fikrat-e-aalii
ye paikar-e-tanviir
ye krishn kii tasviir
ma.anii hai ki suurat
san.at hai ki fitrat
zaahir hai ki mastuur
nazdiik hai yaa duur
ye naar hai yaa nuur
duniyaa se niraalaa
ye baa.nsurii vaalaa
gokul kaa gvaalaa
hai sehr ki e.ajaaz
khultaa hii nahii.n raaz
kyaa shaan hai vallaah
kyaa aan hai vallaah
hairaan huu.n kyaa hai
ik shaan-e-KHudaa hai
but-KHaane ke andar
KHud husn kaa but-gar
but ban gayaa aa kar
vo turfa nazzaare
yaad aa ga.e saare
jamunaa ke kinaare
sabze kaa lahaknaa
phuulo.n kaa mahaknaa
ghanghor ghaTaa.e.n
sarmast havaa.e.n
ma.asuum uma.nge.n
ulfat kii tara.nge.n
vo gopiyo.n ke saath
haatho.n me.n diye haath
raqsaa.n hu.aa brijnaath
bansii me.n jo lai hai
nashsha hai na mai hai
kuchh aur hii shai hai
ik ruuh hai raqsaa.n
ik kaif hai larzaa.n
ek aql hai mai-nosh
ik hosh hai mad.hosh
ik KHanda hai sayyaal
ik girya hai KHush-haal
ik ishq hai maGruur
ik husn hai majbuur
ik sehr hai mas.huur
darbaar me.n tanhaa
laachaar hai kirishnaa
aa shyaam idhar aa
sab ahl-e-KHusuumat
hai.n dar pa.e izzat
ye raaj dulaare
buzdil hu.e saare
parda na ho taaraaj
bekas kii rahe laaj
aa jaa mere kaale
bhaarat ke ujaale
daaman me.n chhupaa le
vo ho ga.ii an-ban
vo garm hu.aa ran
Gaalib hai duryodhan
vo aa ga.e jagdiish
vo miT ga.ii tashviish
arjun ko bulaayaa
updesh sunaayaa
Gam-zaad kaa Gam kyaa
ustaad kaa Gam kyaa
lo ho ga.ii tadbiir
lo ban ga.ii taqdiir
lo chal ga.ii shamshiir
siirat hai aduu-soz
suurat nazar-afroz
dil kaifiyat-andoz
Gusse me.n jo aa jaa.e
bijlii hii giraa jaa.e
aur lutf par aa.e
to ghar bhii luTaa jaa.e
pariyo.n me.n hai gulfaam
raadhaa ke liye shyaam
balraam kaa bhayyaa
mathuraa kaa basayyaa
bindraa me.n kanhayyaa
ban ho ga.e viiraa.n
barbaad gulistaa.n
sakhiyaa.n hai.n pareshaa.n
jamunaa kaa kinaaraa
sunsaan hai saaraa
tuufaan hai.n KHaamosh
maujo.n me.n nahii.n josh
lau tujh se lagii hai
hasrat hii yahii hai
ai hind ke raajaa
ik baar phir aa jaa
dukh dard miTaa jaa
abr aur havaa se
bulbul kii sadaa se
phuulo.n kii ziyaa se
jaaduu-asarii gum
shoriida-sarii gum
haa.n terii judaa.ii
mathuraa ko na bhaa.ii
tuu aa.e to shaan aa.e
tuu aa.e to jaan aa.e
aanaa na akele
ho.n saath vo mele
sakhiyo.n ke jhamele

Hafeez Jalandhari
Nazm

jugnu

ye soch soch ke aa.nkhe.n mirii bhar aatii thii.n
to jaa ke suune bichhaune pe leT rahtaa thaa
kisii se ghar me.n na raaz apne dil ke kahtaa thaa
yatiim thii mirii duniyaa, yatiim merii hayaat
yatiim shaam-o-sahar thii, yatiim the shab-o-roz
yatiim merii pa.Dhaa.ii thii mere khel yatiim
yatiim merii masarrat thii meraa Gam bhii yatiim
yatiim aa.nsu.o.n se takiya bhiig jaataa thaa
kisii se ghar me.n na kahtaa thaa apne dil kaa bhed
har ik se duur akelaa udaas rahtaa thaa
kisii shamaa.il-e-naadiida ko mai.n taktaa thaa
mai.n ek vahshat-e-be-naam se ha.Daktaa thaa

Firaq Gorakhpuri
Nazm

tin aawazen

mazluum
raat chhaa.ii to har ik dard ke dhaare chhuuTe
sub.h phuuTii to har ik zaKHm ke Taa.nke TuuTe
dopahar aa.ii to har rag ne lahuu barsaayaa
din Dhalaa KHauf kaa ifriit muqaabil aayaa
yaa KHudaa ye mirii gardaan-e-shab-o-roz-o-sahar
ye mirii umr kaa be-manzil o aaraam safar
kyaa yahii kuchh mirii qismat me.n likhaa hai tuu ne
har masarrat se mujhe aaq kiyaa hai tuu ne
vo ye kahte hai.n tuu KHush-nuud har ik zulm se hai
vo ye kahte hai.n har ik zulm tire hukm se hai
gar ye sach hai to tire adl se inkaar karuu.n?
un kii maanuu.n ki tirii zaat kaa iqraar karuu.n?

Faiz Ahmad Faiz
Nazm

ek taswir-e-rang

tuu ne sarmaa.e kii chhaa.nv me.n panapne ke liye
apne dil apnii mohabbat kaa lahuu bechaa hai
din kii taz.iin-e-fasurda kaa asaasa le kar
shoKH raato.n kii masarrat kaa lahuu bechaa hai

Sahir Ludhianvi
Nazm

daraKHt mere dost

daraKHt! mere dost
tum mil jaate ho kisii na kisii mo.D par
aur aasaan kar dete ho safar
tumhaare pair kii u.ngliyaa.n
jamii rahii.n paataal ke bhedo.n par
qaa.em rahe mere dost
tumhaare tane kii mataanat aur quvvat
dhuup aur baarish tumhe.n apne tohfo.n se navaaztii rahe
tum bahut pur-vaqaar aur saada ho
mere thaile ko jaan.naa chaahte ho
zaruur.... ye lo mai.n ise kholtaa huu.n
roTiyaa.n du.aa.e.n aur nazme.n
mere paas is se ziyaada kuchh nahii.n
ek shaa.er ke paas is se ziyaada kuchh nahii.n hotaa
dost dukh denaa tum ne siikhaa hii nahii.n
tum ne na to mujh se shaa.erii kaa matlab puuchhaa
aur na kabhii mere mutaale.e par shak kiyaa
aisaa hii honaa chaahiye dosto.n ko
agar mere paas ik aur zindagii hotii to
to mai.n apnii pahlii zindagii tumhaarii ja.Do.n par guzaar detaa
magar mai.n ghar se KHaandaan bhar KHushiyo.n ke liye niklaa huu.n
aur vahaa.n meraa intizaar kiyaa jaa rahaa hai
tum ne mere dost
haa.n tum ne
bahut kuchh sikhaayaa hai mujhe
maslan zamiin aur aasmaanii bijlii
aur havaa
aur intizaar
aur duusro.n ke liye zinda rahnaa
bahut qiimtii hai.n ye baate.n
mai.n kyaa de saktaa huu.n is fayyaazii kaa javaab
mere paas tumhaare liye
ek roTii aur du.aa hai
roTii: tumhaarii chiyuu.nTiyo.n ke liye
du.aa tumhaare aaKHirii din ke liye
mujhe ma.aluum hai tum ne kulhaa.Dii ke musaafahe
aur aarii kii ha.nsii se kabhii KHauf nahii.n khaayaa
magar tum rok nahii.n sakte inhe.n
ko.ii bhii nahii.n rok saktaa
KHudaa kare
KHudaa kare tumhaarii shaaKHo.n se ek jho.npa.Dii banaa.ii jaa.e
baazu.o.n ke ghere me.n na aane vaale tumhaare
tane kii lak.Dii
bahut kaafii hai
do pahiyo.n aur ek kashtii ke liye
dost: ham phir mile.nge
musaafir aur chhak.Daa
musaafir aur kashtii
kahii.n na kahii.n ham phir ek saath ho.nge
kahii.n na kahii.n
ek saath.... ham saamnaa kare.nge
havaa kaa aur raasto.n kaa
masarrat aur maut kaa....

Sarvat Husain
Nazm

hazrat-e-insan

jahaa.n me.n daanish o biinish kii hai kis darja arzaanii
ko.ii shai chhup nahii.n saktii ki ye aalam hai nuuraanii
ko.ii dekhe to hai baariik fitrat kaa hijaab itnaa
numaayaa.n hai.n farishto.n ke tabassum-haa-e-pinhaanii
ye duniyaa daavat-e-diidaar hai farzand-e-aadam ko
ki har mastuur ko baKHshaa gayaa hai zauq-e-uryaanii
yahii farzand-e-aadam hai ki jis ke ashk-e-KHuunii.n se
kiyaa hai hazrat-e-yazdaa.n ne dariyaa.o.n ko tuufaanii
falak ko kyaa KHabar ye KHaak-daa.n kis kaa nasheman hai
Garaz anjum se hai kis ke shabistaa.n kii nigahbaanii
agar maqsuud-e-kul mai.n huu.n to mujh se maavaraa kyaa hai
mire ha.ngaama-haa-e-nau-ba-nau kii intihaa kyaa hai

Allama Iqbal
Nazm

alwida

hamaare vaaste tuu ek laafaanii masarrat hai
hame.n school tere zarre zarre se mohabbat hai

Abdul Ahad Saaz
Nazm

aurat

duniyaa ke liye tohfa-e-naayaab hai aurat
afsaana-e-hastii kaa hasii.n baab hai aurat
dekhaa thaa jo aadam ne vahii KHvaab hai aurat
be-misl hai aa.iina-e-aadaab hai aurat
qaa.em usii aurat se mohabbat kii fazaa hai
aurat kii ataa asal me.n ehsaan-e-KHudaa hai
hai maa.n to dil-o-jaa.n se luTaatii hai sadaa pyaar
mamtaa ke liye phirtii hai daulat sar-e-baazaar
aasaan banaatii hai du.aa se rah-e-dushvaar
apne Gam-o-aalaam kaa kartii nahii.n iz.haar
qadmo.n me.n liye rahtii hai jannat kaa KHazaana
aurat ke tasavvur me.n hai ta.amiir-e-zamaana
biivii hai to Gam-KHvaar hai paikar hai vafaa kaa
aa.nchal ko banaa letii hai faanuus hayaa kaa
ruKH dekh ke rakhtii hai qadam apnaa havaa kaa
girviida banaatii hai tabassum kii adaa kaa
KHvaab-e-nigah-e-ishq kii ta.abiir hai aurat
mardo.n ke liye husn kii zanjiir hai aurat
hai shakl me.n beTii kii bahaar-e-sahr-o-shaam
qudrat kaa atiya hai ye qudrat kaa hai in.aam
detii hai masarrat kaa dil-e-zaar ko paiGaam
hai ruuh ko taskiin jigar kaa hai ye aaraam
duKHtar hai to anmol guhar kahte hai.n us ko
allaah kii rahmat kaa samar kahte hai.n is ko
suurat me.n bahan kii hai chaman kaa ye hasii.n phuul
iisaar-o-mohabbat hai shab-o-roz kaa ma.amuul
be-kaar kii ranjish ko kabhii detii nahii.n tuul
ehsaas-e-muravvat me.n rahaa kartii hai mashGuul
likhii hai har ik rang me.n aurat kii kahaanii
kahte hai.n use azmat-e-insaa.n kii nishaanii
mariyam hai to paakiiza-o-shaffaf hai.n a.amaal
ban jaa.e zuleKHaa to hayaa ko kare paamaal
gar hai cleopatra to siyaasat kii chale chaal
lailaa hai to kartii hai ye diivaana-o-bad-haal
Dhal jaanaa har ik ruup me.n aasaan hai us ko
badle hu.e haalaat kii pahchaan hai us ko
'hinda' hai to saalaarii kaa dikhlaatii hai jauhar
hai 'raabi.a-basrii' to ye valiyo.n kii hai ham-sar
baiThii hai agar husn kaa baazaar sajaa kar
Gairat ko banaatii hai asiir-e-havas-e-zar
vaaqif hai bahar-taur ye jiine ke hunar se
be-KHauf guzar jaatii hai har raahguzar se
ik pal me.n ye sho.ala hai to ik pal me.n hai shabnam
ya.anii hai kabhii gul to kabhii KHaar-e-mujassam
ho sabr pe aamaada to sah jaa.e har ik Gam
ho jaa.e muKHaalif to palaT de saf-e-aalam
paaband-e-vafaa ho to dil-o-jaan luTaa de
aa jaa.e baGaavat pe to duniyaa ko hilaa de

Rahbar Jaunpuri
Nazm

mahadev-ji ka byah

pahle naa.nv ganesh kaa, liijiye siis navaa.e
jaa se kaaraj sidh ho.n, sadaa mahuurat laa.e
bol bachan aanand ke, prem, piit aur chaah
sun lo yaaro, dhyaan dhar, mahaadev kaa byaah
jogii ja.ngam se sunaa, vo bhii kiyaa bayaan
aur kathaa me.n jo sunaa, us kaa bhii parmaan
sun.ne vaale bhii rahe.n ha.nsii KHushii din rain
aur pa.Dhe.n jo yaad kar, un ko bhii sukh chain
aur jis ne is byaah kii, mahimaa kahii banaa.e
us ke bhii har haal me.n, shiv-jii rahe.n suhaa.e
KHushii rahe din raat vo, kabhii na ho dil-giir
mahimaa us kii bhii rahe jis kaa naam 'naziir'

Nazeer Akbarabadi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now