Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "matanabbe"

Nazm MATCHES FOR "matanabbe"

Nazm

shor-e-barbat-o-nai

hastii kii mataa-e-be-paayaa.n jaagiir tirii hai na merii hai
is bazm me.n apnii mish.al-e-dil bismil hai to kyaa raKHshaa.n hai to kyaa
ye bazm charaaGaa.n rahtii hai ik taaq agar viiraa.n hai to kyaa
afsurda hai.n gar ayyaam tire badlaa nahii.n maslak-e-shaam-o-sahar
Thahre nahii.n mausam-e-gul ke qadam qaa.em hai jamaal-e-shams-o-qamar
aabaad hai vaadii-e-kaakul-o-lab shaadaab-o-hasii.n gulgasht-e-nazar
maqsuum hai lazzat-e-dard-e-jigar maujuud hai nemat-e-diida-e-tar
is diida-e-tar kaa shukr karo is zauq-e-nazar kaa shukr karo
is shaam o sahar kaa shukr karo in shams o qamar kaa shukr karo

Faiz Ahmad Faiz
Nazm

daraKHt mere dost

daraKHt! mere dost
tum mil jaate ho kisii na kisii mo.D par
aur aasaan kar dete ho safar
tumhaare pair kii u.ngliyaa.n
jamii rahii.n paataal ke bhedo.n par
qaa.em rahe mere dost
tumhaare tane kii mataanat aur quvvat
dhuup aur baarish tumhe.n apne tohfo.n se navaaztii rahe
tum bahut pur-vaqaar aur saada ho
mere thaile ko jaan.naa chaahte ho
zaruur.... ye lo mai.n ise kholtaa huu.n
roTiyaa.n du.aa.e.n aur nazme.n
mere paas is se ziyaada kuchh nahii.n
ek shaa.er ke paas is se ziyaada kuchh nahii.n hotaa
dost dukh denaa tum ne siikhaa hii nahii.n
tum ne na to mujh se shaa.erii kaa matlab puuchhaa
aur na kabhii mere mutaale.e par shak kiyaa
aisaa hii honaa chaahiye dosto.n ko
agar mere paas ik aur zindagii hotii to
to mai.n apnii pahlii zindagii tumhaarii ja.Do.n par guzaar detaa
magar mai.n ghar se KHaandaan bhar KHushiyo.n ke liye niklaa huu.n
aur vahaa.n meraa intizaar kiyaa jaa rahaa hai
tum ne mere dost
haa.n tum ne
bahut kuchh sikhaayaa hai mujhe
maslan zamiin aur aasmaanii bijlii
aur havaa
aur intizaar
aur duusro.n ke liye zinda rahnaa
bahut qiimtii hai.n ye baate.n
mai.n kyaa de saktaa huu.n is fayyaazii kaa javaab
mere paas tumhaare liye
ek roTii aur du.aa hai
roTii: tumhaarii chiyuu.nTiyo.n ke liye
du.aa tumhaare aaKHirii din ke liye
mujhe ma.aluum hai tum ne kulhaa.Dii ke musaafahe
aur aarii kii ha.nsii se kabhii KHauf nahii.n khaayaa
magar tum rok nahii.n sakte inhe.n
ko.ii bhii nahii.n rok saktaa
KHudaa kare
KHudaa kare tumhaarii shaaKHo.n se ek jho.npa.Dii banaa.ii jaa.e
baazu.o.n ke ghere me.n na aane vaale tumhaare
tane kii lak.Dii
bahut kaafii hai
do pahiyo.n aur ek kashtii ke liye
dost: ham phir mile.nge
musaafir aur chhak.Daa
musaafir aur kashtii
kahii.n na kahii.n ham phir ek saath ho.nge
kahii.n na kahii.n
ek saath.... ham saamnaa kare.nge
havaa kaa aur raasto.n kaa
masarrat aur maut kaa....

Sarvat Husain
Nazm

agar main chiKHun

agar mai.n chiiKHuu.n
mai.n apne dil kii tamaam gahraa.iyo.n se chiiKHuu.n
to kaa.enaatii nizaam me.n kyaa KHalal pa.Degaa
yahii ki
andhe ku.e.n se ik baaz-gasht hogii
kahegii kyuu.n tum ko kyaa hu.aa hai?
tumhii ba.De aa.e ho kahii.n ke
ye aasmaan o zamii.n
ye suuraj ye chaa.nd taare
tamaam maa.n baap saare ajdaad
shahr ke sab shariif-zaade
inhe.n bhii dekho
ye sab musiibat-zada, mataanat se
burd-baarii me.n sah rahe hai.n
tumhii me.n bardaasht kii kamii hai
agar mai.n chiiKHuu.n to
merii aavaaz bhii malaamat karegii mujh ko
vo sab kahe.nge
ki kaun ye shor kar rahaa hai
hamaarii niinde.n uchaaT kar dii.n
agar mai.n chiiKHuu.n
to saaraa amn-o-sukuun
nazm aur nasq
mujh ko KHilaaf-e-qanuun dushman-e-KHalq kah kar
saliib degaa
magar ye chiiKHo.n-bharaa hu.aa dil
kisii bhii lamhe
mujhe kahii.n KHaufnaak raaho.n pe Daal degaa
salaah degaa
ki zor se ciiKHo
ki jism ke saath
ruuh bhii sard ho ga.ii phir
to kyaa karoge

Farhat Ehsas
Nazm

hama-ust

mire dosto.n me.n bahut ishtiraakii hai.n
jo har mohabbat me.n maayuus ho kar
yuu.nhii ik na.e daura-e-shaadmaanii kii hasrat me.n
karte hai.n dil-juu.ii ik duusre kii
aur ab aisii baato.n pe mai.n
zer-e-lab bhii kabhii muskuraataa nahii.n huu.n
aur us shaam jashn-e-uruusii me.n
husn o mai o raqs o naGma ke tuufaan bahte rahe the
fara.ngii sharaabe.n to anqaa thii.n
lekin mai-e-naab-e-qazviin o KHullaar-e-shiiraaz ke daur-e-paiham se
ra.ngii.n libaaso.n se
KHushbuu kii be-baak lahro.n se
be-saaKHta qahqaho.n hamhamo.n se
mazaamiir ke zer-o-bam se
vo ha.ngaama barpaa thaa
mahsuus hotaa thaa
tehraan kii aaKHirii shab yahii hai!
aachaanak kahaa mursida ne:
''tumhaaraa vo saathii kahaa.n hai?
abhii ek sofe pe dekhaa thaa mai.n ne
use sar-ba-zaanuu!''
to ham kuchh pareshaan se ho ga.e
aur kamra-ba-kamra use Dhuu.nDne mil ke nikle!
lo ik gosha-e-niim-raushan me.n
vo ishtiraakii zamii.n par pa.Daa thaa
use ham bulaayaa kiye aur jhi.njho.Daa kiye
vo to saakit thaa jaamid thaa!
ruusii adiibo.n kii sar-chashma-gaaho.n kii us ko KHabar ho ga.ii thii

Noon Meem Rashid
Nazm

nazr-e-Khaalida

ahl-e-mahfil ke liye mushkil hai ab taab-e-nashaat
aaj paimaano.n se chhalkegii mai-e-naab-e-nashaat

Asrarul Haq Majaz
Nazm

waqt guzarta nahin

vaqt ko.ii shaam nahii.n
jise vahshat se Dhaa.npaa jaa sake
na ko.ii giit, jis kii lai
hamaare ho.nTo.n kii giraft me.n ho
ye ek laa-matanaahii laa-ta.alluq hai
vaqt Thahraa rahtaa hai
un zamiino.n par
jahaa.n se na.e qaafile nikal pa.Dte hai.n
vaqt-guzaarii ke kaThin safar par
guzishta bahut piichhe rah gayaa
jahaa.n tak ko.ii sa.Dak nahii.n jaatii
gaa.Dii kii khaT-khaT se
shahr kii viiraanii kahaa.n kam hotii hai
muqaffal gharo.n
aur qahva-KHaano.n kii bhunbhunaahat me.n
saarii baate.n to log karte hai.n!
kitaabo.n kii jilde.n, kaaGazo.n kaa shor
mobile ke paiGaamaat
aur vaqt guzar jaataa hai
haalaa.nki nahii.n guzartaa
bachcho.n ko sii.Dhiyaa.n cha.Dhaa chukne ke ba.ad
dahliiz par baiTh kar
kisii be-samt ufuq ko ghuurte hu.e?
hisaab karte hu.e
un KHvaabo.n kaa, jo dekhe

Abrar Ahmad
Nazm

intizar

dekh kar surKHii-e-ruKHsaar-e-gulistaa.n gulchii.n
apne dastuur me.n tarmiim kiye jaataa hai
mutanabbe bhii kiye jaataa hai har patte ko
naam bhii fasl-e-bahaaraa.n kaa liye jaataa hai

Parvez Shahidi
Nazm

muskurahaT

dard ke laa-matanaahii sahraa se guzarne ke baad maa.n ne aa.nkhe.n kholii.n
dekhaa du.aa ke liye uThe haath gir chuke the kyuu.nki mai.n
ro rahii thii
mai.n rotii rahii aur maa.n muskuraa dii

Asim Badr
Nazm

intellectual

thaa husn-e-ittifaaq ki tea-corner me.n kal
qismat se merii mil ga.e ik intellectual
baiThe hu.e the zaaviya-e-qaa.ima bane
jaise mahaaz par ho ko.ii field-marshal
rakkhaa thaa portfolio bag ek mez par
aur us se muttasil thii.n kitaabe.n double double
moTii sii magazine bhii thii ik dharii hu.ii
jis ke sar-e-varaq pe the sir-john-michael
yuu.n aalam-e-KHayaal me.n Duube hu.e the aap
jaise dimaaG me.n ho kisii mas.ale kaa hal
uljhe hu.e the baal hajaamat bhii thii ba.Dhii
chehre pe idda.aa-e-mataanat jabiin pe bal
mai.n ne ba-sad KHuluus-o-adab chaa.e pesh kii
aur us ke baa'd aayaa ruKH-e-guftuguu nikal
mausam ke tazkire se chalii baat adab kii samt
apnii jagah par aap kaa har qaul thaa aTal
har baat me.n kahii.n kaa havaala zaruur thaa
is se Garaz na thii ki havaala ho bar-mahal
urdu ke irtiqaa kii taraf baat jab mu.Dii
kahne lage ki tez hai raftaar aaj-kal
mai.n ne kahaa ki zehn abhii tak Gulaam hai.n
jaataa nahii.n dimaaG se taqliid kaa KHalal
afkaar musta.aar hai.n taKH.iil musta.aar
har nukta be-maqaam hai har lafz be-mahal
tanqiid chhe.D-chhaa.D hai tahqiiq khod-khaad
chalte hai.n yuu.n qalam ki chale jis tarah se hal
afsaano.n ke mizaaj me.n afsaana-pan nahii.n
is shutr-e-be-mahaar kii siidhii hai kaun kal
pariyo.n ke badle is me.n mashiino.n kaa naach hai
ik Jute mill banaa hai parii-KHaana-e-Gazal
pahle thaa faarsii ke tatabbo par iftiKHaar
ab maGribii adab kii Gulaamii hai be-KHalal
bole fuzuul aap na bakvaas kiijiye
ab kaarvaan-e-fikr kii raahe.n ga.ii.n badal
mai.n ne kahaa ki chand adiibo.n kaa naam le.n
apnii Dagar banaa ke jo chalte hai.n aaj-kal
bole ki ek monsieur-jean-paul sartre
jis ne banaa diyaa hai hame.n intellectual
aur duusraa hai james-joyce adiib-e-asr
purze dil-o-dimaaG ke detaa hai jo badal
mai.n ne kahaa huzuur ye urdu kaa thaa savaal
bole ki aap bahs kare.n mujh se ye majaal

Raza Naqvi Vahi
Nazm

ghaalib

zaraafat us kii fitrat kaa taqaaza
mataanat us ke fikr-o-fan kaa jauhar
mohabbat ruuh us kii shaa.irii kii
kahaa.n ho.nge bhalaa aise suKHnavar
zamaana kis liye us ko miTaataa
vo insaa.n thaa na thaa harf-e-mukarrar

Rifat Sarosh
Nazm

zawiye

mujhe to be-sukuu.n saa kar gayaa us shoKH kaa kahnaa
haqiiqat ke taraazuu me.n kabhii taulaa hai jazbo.n ko
mohabbat ke taqaddus kaa bharam rakkhaa kabhii tuu ne
kabhii be-saaKHta lipTaa hai mahruum-e-sabaahat se
kabhii haal-e-kajii puuchhaa hai mas.huur-e-qabaahat se
kabhii dasht-e-junuu.n paaTaa hai jazbaat-e-iraadat se
kabhii sarsar se talKHii kaa sabab puuchhaa mataanat se
kabhii tarjiih dii KHaak-e-chaman par reg-e-sahraa ko
gul-o-bulbul se haT kar bhii kabhii dekhaa hai fitrat ko
gul-o-bulbul bajaa lekin chaman me.n KHaar bhii to hai
sabaahat vaqf-e-gulshan hii nahii.n kohsaar bhii to hai.n
ka.ii poshiida az fikr-o-nazar shahkaar bhii to hai.n
Galat hai.n naasiya-farsaa.iyaa.n terii talab terii
tirii raahe.n judaa hai.n ahl-e-dil se ahl-e-hasrat se
tiraa husn-e-nazar mahduud hai zaatii maqaasid tak
tirii ye shapra-chashmii hii tujhe barbaad kar degii

Mohammad Tanviruzzaman
Nazm

intizar

bazm-e-KHaamosh me.n chhi.Dne ko hai phir saaz-e-hayaat
muntazir baiThe hai.n sab gosh-bar-aavaaz-e-hayaat
qaabil-e-diid hai tuufaan se pahle kaa sukuu.n
josh-o-hangaama-o-haijaan se pahle kaa sukuu.n
yaas-o-ummiid me.n tafriiq hai mushkil is dam
hama-tan saakit-o-mabhuut hai mahfil is dam
TikTikii baa.ndhe ba-yak-taur hazaaro.n aa.nkhe.n
ik kaf-e-piir-e-muGaa.n aur hazaaro.n aa.nkhe.n
ko.ii aagaah nahii.n daur kidhar aa.egaa
kis ke haatho.n me.n KHat-e-jaam nazar aa.egaa
har gha.Dii siino.n me.n hai kashmakash-e-shakk-o-yaaqii.n
majlis-e-aish me.n bhii suurat-e-aaraam nahii.n
kis ne aaGaaz kiyaa zamzama-e-bazm-e-tarab
lab-e-jaa.n-baKHsh kii tho.Dii sii bhii jumbish hai Gazab
muzhda-e-amn-o-amaa.n sulh kaa paiGaam hai kyaa
jang-e-aazaadii-e-insaa.n kaa sar-anjaam hai kyaa
saaz-e-ulfat kii navaa soz-e-mohabbat to nahii.n
naGma-e-adl-o-musaavaat-o-uKHuvvat to nahii.n
matlab-e-ziist kii tafhiim me.n kyaa der hai ab
ne.amat-e-aam kii taqsiim me.n kyaa der hai ab
taalib-e-saaGar-e-nau bazm-e-kuhan hai saaqii
intizaar aaKHir-e-shab sabr-shikan hai saaqii

Fazlurrahman
Nazm

jawani

javaanii kyaa hai tum se kyaa kahe.n ham
javaanii kaa hai ab piirii me.n maatam
javaanii sho'la-e-aatish-fishaa.n hai
javaanii ziist kaa raaz-e-nihaa.n hai
javaanii hai javaab-e-KHanda-e-gul
javaanii ehtimaam-e-saaGar-o-mul
javaanii iztiraab-e-zindagii hai
javaanii pech-o-taab-e-zindagii hai
javaanii zindagii kaa ik tabassum
javaanii zindagii kaa ik tarannum
javaanii matla’-e-nuur-e-sahar hai
javaanii rashk-e-KHurshiid-o-qamar hai
javaanii zindagii kaa KHuun-e-taaza
javaanii chehra-e-insaa.n kaa Gaaza
javaanii kyaa sharaab-e-zindagii hai
javaanii iltihaab-e-zindagii hai
javaanii garmii-e-baazaar-e-'aalam
javaanii gesuu-e-KHamdaar-e-'aalam
javaanii KHaamushii kii guftuguu hai
javaanii KHuub-suurat KHuub-ruu hai
javaanii hai bahaar-e-zindagaanii
javaanii laala-zaar-e-zindagaanii
javaanii me.n 'ajab ik dilkashii hai
javaanii me.n 'ajab ik mah-vashii hai
javaanii zindagii kaa naqsh-e-avval
javaanii ek shorish ek halchal
javaanii saaya-e-baal-e-humaa hai
javaanii me.n jahaa.n bhii zer-e-paa hai
javaanii jaise paanii kii ravaanii
javaanii me.n har ik Gam paanii paanii
javaanii me.n nihaa.n ik baa.nkpan hai
javaanii zindagaanii kii dulhan hai
javaanii ibtidaa-e-zauq-e-parvaaz
javaanii intihaa-e-shauq-e-parvaaz
javaanii ek harf-e-dil-nashii.n hai
javaanii ziist kaa taaj-o-nagii.n hai
javaanii zindagaanii kaa hai dam-KHam
javaanii taaqat-e-sohraab-o-rustam
javaanii aasmaan-e-zindagii hai
javaanii hii nishaan-e-zindagii hai
javaanii kohkan kaa zor-e-baazuu
javaanii ek afsuu.n ek jaaduu
javaanii joshish-e-kirdaar-e-paiham
javaanii garmii-e-raftaar-e-paiham
javaanii maKHzan-e-harf-o-hikaayaat
javaanii markaz-e-kashf-o-karaamaat
javaanii chashma-e-tasniim-o-kausar
javaanii aab-e-rahmat kaa samundar
javaanii laGzish-e-mastaana-e-'ishq
javaanii baazii-e-tiflaana-e-'ishq
javaanii daastaan-e-'qais-o-lailaa'
javaanii qissa-e-yuusuf-zuleKHaa
javaanii kyaa hai barq-e-tuur goyaa
javaanii kyaa jamaal-e-huur goyaa
javaanii sozish-e-roz-e-qayaamat
javaanii ek hiddat ik haraarat
javaanii KHud-sitaa.ii KHud-numaa.ii
javaanii jang-juu.ii kaj-adaa.ii
javaanii zindagii kaa zamzama hai
javaanii zindagii kaa tantana hai
magar ab zindagii ko saath le kar
javaanii jaa chukii piirii ko de kar
javaanii ko na puuchho ab kahaa.n hai
javaanii sham'-e-kushta kaa dhu.aa.n hai

Amjad Najmi
Nazm

nazm

na puuchho kis jahaan-e-rang-o-buu se ho ke aa.e hai.n
jahaa.n dil se mataa-e-be-bahaa ham kho ke aa.e hai.n
qayaamat thaa nazaara us gulistaan-e-mohabbat kaa
nam-e-ruKHsaar-e-gul se chashm-e-tar ham dho ke aa.e hai.n
KHudaa us KHitta-e-gulzaar ko phuulaa phalaa rakhe
jahaa.n ham nau-ba-nau tuKHm-e-mohabbat bo ke aa.e hai.n
mohabbat karne vaalo.n kii mohabbat se bahut kam thaa
dam-e-ruKHsat ham un ke aage jitnaa ro ke aa.e hai.n
hamaarii KHvaab kii rangiiniyo.n kaa puuchhnaa kyaa thaa
mohabbat kii fazaa me.n farsh-e-gul par so ke aa.e hai.n
alaa.uddiin se mil kar idhar lauTe hai.n ham jab se
sab ahl-e-dil ye kahte hai.n ki ham kuchh ho ke aa.e hai.n
'ziyaa.ii' aur 'nayyar' ke sivaa aur naam bhii ho.nge
mohabbat ke sahiifo.n me.n faqat in do ke aa.e hai.n
Thaharte hii Thaharte ye dil-e-betaab Thahregaa
abhii kai din hu.e jab ham karachi ho ke aa.e hai.n

Nawab Syed Hakeem Ahmad Naqwi badayuni
Nazm

sanpole

tumhaarii sab mataa-e-be-bahaa
phir se guphaa.o.n kii amaanat ho ga.ii hai
aur vo saa.np us ke pahre-daar

Yahya Khan Yusuf Zai
Nazm

sar-e-rahguzar ek manzar

qafas kaa dar khulaa ik niim-jaa.n kam-sin
parinda chand KHasta zaa.icho.n par raqs ke andaaz me.n aage
ba.Dhaa, phir cho.nch se apnaa pasandiida
musavvar zaa.icha us ne uThaayaa aur apne hii
hidaayat-kaar ke aage
adab se rakh diyaa jhuk kar
hidaayat-kaar garche nuur se thaa bad-gumaa.n mahruum naa-KHvaa.nda
sar-e-sail-e-ravaa.n ik barg-e-be-maaya
navisht-e-baKHt ke asraar se vaaqif thaa vo shaayad
nazar ke ruu-ba-ruu us ne
mataa-e-be-nihaayat ke fasaane se mujhe KHush-haal kar Daalaa
mujhe paamaal kar Daalaa
sabhii mauj-e-ziyaa me.n the
sabhii ke chashm o dil me.n ek shola thaa
sabhii KHaamosh gum-sum hai.n
yahaa.n se kaun jaa.egaa
yahaa.n par kaun aa.egaa
parinda niim-jaa.n kam-sin
qafas me.n jaa chukaa kab kaa
hidaayat-kaar kii aa.nkho.n me.n lauT aa.ii hai viiraanii
jo kal KHaalii thaa vo dast-e-talab hai aaj bhii KHaalii
labo.n par lutf-e-andaam-e-nihaa.n kii an-sunii gaalii

Balraj Komal
Nazm

sham pahli farwari ki

shaam pahlii farvarii kii
writers building se bas do qadam
ik galii ke mo.D par
ik javaa.n
KHuun se tar shirt siine ke qariib
aur chehre par nuquush-e-karbnaakii-e-ajal
ek purza yuu.n thaa muTThii me.n dabaa
jaise ho ko.ii mataa.a-e-be-bahaa
ek gu.Diyaa
chocolate
lactogen
copiyaa.n pencil kitaab
chuu.Diyaa.n surma lipstick
chaa.e pattii
aur phir
KHuun ke dhabbe siyaahii
bebasii kii daastaa.n

Alqama Shibli
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now