Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "phate"

Nazm MATCHES FOR "phate"

Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Nazm

barsat ki bahaaren

jo KHush hai.n vo KHushii me.n kaaTe hai.n raat saarii
jo Gam me.n hai.n unho.n par guzre hai raat bhaarii
siino.n se lag rahii hai.n jo hai.n piyaa kii pyaarii
chhaatii phaTe hai un kii jo hai.n birah kii maarii
kyaa kyaa machii hai.n yaaro barsaat kii bahaare.n

Nazeer Akbarabadi
Nazm

nazm bahut aasan thi pahle

ab sab manzar
badal chuke hai.n
chhoTe chhoTe chauraaho.n se
chau.De raste nikal chuke hai.n
na.e na.e baazaar
puraane galii mohalle nigal chuke hai.n
nazm se mujh tak
ab koso.n lambii duurii hai
in koso.n lambii duurii me.n
kahii.n achaanak
bam phaTte hai.n
kokh me.n maa.o.n ke
sote bachche kaTte hai.n
maz.hab aur siyaasat
dono.n
na.e na.e naare raTte hai.n
bahut se shahro.n
bahut se mulko.n se
ab chal kar
nazm mire ghar jab aatii hai
itnii ziyaada thak jaatii hai
mere likhne kii Table par
KHaalii kaaGaz ko
KHaalii hii chho.D ke ruKHsat ho jaatii hai
aur kisii footpath pe jaa kar
shahr ke sab se buu.Dhe shahrii kii
palko.n par!
aa.nsuu ban kar so jaatii hai

Nida Fazli
Nazm

nahin mera aanchal maila hai

nahii.n meraa aa.nchal melaa hai
aur terii dastaar ke saare pech abhii tak tiikhe hai.n
kisii havaa ne in ko ab tak chhuune kii jur.at nahii.n kii hai
terii ujlii peshaanii par
ga.e dino.n kii ko.ii gha.Dii
pachhtaavaa ban ke nahii.n phuuTii
aur mere maathe kii siyaahii
tujh se aa.nkh milaa kar baat nahii.n kar saktii
achchhe la.Dke
mujhe na aise dekh
apne saare jugnuu saare phuul
sambhaal ke rakh le
phaTe hu.e aa.nchal se phuul gir jaate hai.n
aur jugnuu
pahlaa mauqa.a paate hii u.D jaate hai.n
chaahe o.Dhnii se baahar kii dhuup kitnii hii ka.Dii ho!

Parveen Shakir
Nazm

KHana-ba-dosh

is kaarvaa.n me.n tifl bhii hai.n naujavaa.n bhii hai.n
buu.Dhe bhii hai.n mariiz bhii hai.n naa-tavaa.n bhii hai.n
maile phaTe libaas me.n kuchh deviyaa.n bhii hai.n
sab zindagii se ta.ng bhii hai.n sargiraa.n bhii hai.n
be-zaar zindagii se hai.n piir o javaa.n sabhii
altaaf-e-shahryaar ke hai.n nauha-KHvaa.n sabhii

Asrarul Haq Majaz
Nazm

rikshe wala

dekho Gariib kitnii zahmat uThaa rahaa hai
galiyo.n me.n bhii.D vaalii rickshaw chalaa rahaa hai
mahruum hai agarche duniyaa kii ne.amato.n se
har bojh zindagii kaa ha.ns kar uThaa rahaa hai
barsaat me.n bhii dekho phirtaa hu.aa sa.Dak par
rickshaw bhii bhiigtaa hai KHud bhii nahaa rahaa hai
garmii kii dhuup me.n bhii ruktaa nahii.n hai ghar me.n
pur-pech raasto.n ke phere lagaa rahaa hai
sardii se kaa.nptaa hai kap.De phaTe hu.e hai.n
ThanDii havaa se KHud ko kaise bachaa rahaa hai
mastii me.n dau.Dtaa hai rickshaw liye sa.Dak par
naGma ko.ii suriilaa ab gungunaa rahaa hai
rikshe ke pedalo.n par rakhe hai.n paa.nv dono.n
aa.nkhe.n hai.n raaste par ghanTii bajaa rahaa hai
maa.n baap muntazir hai.n ghar par sabhii ke 'aadil'
bachcho.n ko ab vo lene school jaa rahaa hai

Aadil Aseer Dehlvi
Nazm

ahd-e-tifli

takte rahnaa haa.e vo pahro.n talak suu-e-qamar
vo phaTe baadal me.n be-aavaaz-paa us kaa safar
puuchhnaa rah rah ke us ke koh-o-sahraa kii KHabar
aur vo hairat daroG-e-maslahat-aamez par
aa.nkh vaqf-e-diid thii lab maa.il-e-guftaar thaa
dil na thaa meraa saraapaa zauq-e-istifsaar thaa

Allama Iqbal
Nazm

mazdur aurten

gulnaar dekhtii hai ye mazduur aurte.n
chehro.n pe KHaak dhuul ke po.nchhe hu.e nishaa.n
tuu aur ra.ng-e-Gaaza-o-gulguuna-o-shahaab
sochaa bhii kis ke KHuun kii bantii hai.n surKHiyaa.n
gulnaar dekhtii hai ye mazduur aurte.n
maile phaTe libaas hai.n mahruum-e-shast-o-shuu
tuu aur itr o ambar o mushk o abiir o uud
mazduur ke bhii KHuun kii aatii hai is me.n buu
gulnaar dekhtii hai ye mazduur aurte.n
tan Dhaa.nkne ko Thiik se kap.Daa nahii.n hai paas
tuu aur hariir o atlas o kam-KHvaab o parniyaa.n
chubhtaa nahii.n badan pe tire reshmii libaas
gulnaar dekhtii hai ye mazduur aurte.n
chaa.ndii kaa ko.ii ganjh na sone kaa ko.ii taar
tuu aur haikal-e-zar o aaveza-e-guhar
siine pe ko.ii dam bhii dha.Daktaa hai teraa haar
gulnaar dekhtii hai ye mazduur aurte.n
sadiyo.n se har nigaah hai faaqo.n kii rahguzar
tuu aur ziyaafato.n me.n ba-sad-naaz jalva-gar
kis ke lahuu se garm hai ye mez kii bahaar
gulnaar dekhtii hai ye mazduur aurte.n
taariik maqbaro.n se makaa.n in ke kam nahii.n
tuu aur zeb-o-ziinat-e-alvaan-e-zar-nigaar
kyaa tere qasr-e-naaz kii hiltii nahii.n zamii.n
gulnaar dekhtii hai ye mazduur aurte.n
mehnat hii un kaa saaz hai mehnat hii un kaa raag
tuu aur shuGl-e-raamish-o-raqs-o-rabaab-o-ra.ng
kyaa tere saaz me.n bhii dahaktii hai ko.ii aag
gulnaar dekhtii hai.n ye mazduur aurte.n
mehnat pe apne peT se majbuur aurte.n

Jan Nisar Akhtar
Nazm

waqfa

raasta nahii.n miltaa
munjamid a.ndheraa hai
phir bhii baa-vaqaar insaa.n
is yaqii.n pe zinda hai
barf ke pighalne me.n
pau phaTe kaa vaqfa hai
us ke baa'd suuraj ko
kaun rok saktaa hai

Ahmad Nadeem Qasmi
Nazm

qayamat

ye maanaa raat aa.nkho.n me.n kaTii
ek ek pal but saa ban kar jam gayaa
ik saa.ns to ik sadii ke baad phir se saa.ns lene kaa KHayaal aayaa
ye sab sach hai ki raat ik karb-e-be-paayaa.n thii
lekin karb hii taKHliiq hai
ai pau phaTe ke dilrubaa lamho gavaahii do

Ahmad Nadeem Qasmi
Nazm

bachchon ki eid

eid bahut hii dhuum se aa.ii
baazaaro.n me.n raunaq laa.ii
pahan ke achchhe achchhe kap.De
bachche apne ghar se nikle
kap.De goTe aur phaTe ke
jhilmil karte jham jham karte
eid milan ko pahu.nche ghar ghar
kitne KHush the baaham mil kar
phenii aur miThaa.ii khaa.ii
miiThii miiThii eid manaa.ii
mile unhe.n eidii ke paise
khel khilaune KHuub KHariide
jaa kar baaG me.n jhuulaa jhuule
duniyaa ke saare Gam bhuule
sab ne dil se eid manaa.ii
magar hame.n to zaraa na bhaa.ii
tum jo nahii.n thii.n paas hamaare
dil bhar aayaa Gam ke maare
merii 'siimii.n' merii pyaarii
tum ko mubaarak eid tumhaarii
tum ne manaa.ii KHuub ye eid
hame.n tumhaarii hu.ii na diid
ham to jab tum ko dekhe.nge
eid usii din kii samjhe.nge

Masooda Hayat
Nazm

dusre darje ki pichhli qatar ka aadmi

gosht machhlii sabziyaa.n baniye kaa ration duudh ghii
mujh ko khaatii hai.n ye chiize.n mai.n ne kab khaayaa inhe.n
meraa ghar rahtaa hai mujh me.n ghar me.n mai.n rahtaa nahii.n
biivii bachcho.n ke phaTe kap.Do.n me.n huu.n
aur na.e jo.Do.n kii KHushiyo.n me.n chhupaa jo karb hai vo bhii huu.n mai.n
fees me.n school kii copy kitaabo.n me.n bhii mai.n
mai.n hii huu.n chuulhe kii gas
mai.n hii huu.n stove kaa gas
mere juute jo.nk kii maanind mere paa.nv se lipTe hu.e hai.n
chuuste hai.n meraa KHuun
meraa scooter mere kaa.ndho.n pe baiThaa hai
mai.n us ke tyro.n me.n lipTaa huu.n aur ghistaa huu.n

Shakeel Azmi
Nazm

saDak

sa.Dak masaafat kii ujlato.n me.n
ghire hu.e sab musaafiro.n ko
ba-Gaur fursat se dekhtii hai
kisii ke chehre pe surKH vahshat chamak rahii hai
kisii ke chehre se zard hairat chhalak rahii hai
kisii kii aa.nkhe.n harii-bharii hai.n
kabiir had se ubhar rahaa hai
saGiir qad se guzar rahaa hai
kisii kaa tyre kisii ke pahiye ko khaa rahaa hai
kisii kaa juutaa kisii kii chappal chabaa rahaa hai
kisii ke pairo.n me.n aa rahaa hai kisii kaa bachcha
kisii kaa bachcha kisii ke shaane pe jaa rahaa hai
ko.ii Thikaane pe ko.ii khaane pe jaa rahaa hai
habiib dast-e-raqiib thaame
Gariib-KHaane pe jaa rahaa hai
amiir pi.njra banaa rahaa hai
Gulaam kartab dikhaa rahaa hai
aur apne beTe ke saath chhat par
amiin kunDaa lagaa rahaa hai
nizaam Taa.nga chalaa rahaa hai
kisii kalaa.ii pe jagmagaatii hu.ii gha.Dii hai
magar abhii vo rukii hu.ii hai
kisii ke chehre pe baara bajne me.n paa.nch second rah ga.e hai.n
kisii kii haathii-numaa prado
sa.Dak se aise guzar rahii hai
sivaa.e is ke kahii.n bhii jaise ko.ii nahii.n ho
kisii kii mo.nchhe.n jhukii hu.ii hai.n
kisii kii baa.nchhe.n khilii hu.ii hai.n
kisii kii taxi kisii kii foksii milii hu.ii hai.n
kisii ke lab aur kisii kii aa.nkhe.n silii hu.ii hai.n
kisii ke kap.De phaTe hu.e hai.n
kisii kii pag.Dii chamak rahii hai
kisii kii ra.ngat kisii kii Topii u.Dii hu.ii hai
shariif nazre.n uThaa uThaa kar
kamaan jismo.n pe apnii vahshat ke tiir kab se chalaa rahaa hai
naziir nazre.n churaa rahaa hai
nafiis apne cluff kii shikno.n ko ro rahaa hai
hakiim apne matab ke shiisho.n ko dho rahaa hai
kisii kii aa.nkho.n ke dhu.ndle shiisho.n me.n us ke maazii kii jhalkiyaa.n hai.n
kisii kii aa.nkho.n me.n aane vaale hasiin lamho.n kii mastiyaa.n hai.n
kisii kii aa.nkho.n me.n rat-jago.n kii kuchh arGavaanii sii Doriyaa.n hai.n
kisii ke kaa.ndhe pe us ke KHvaabo.n kii boriyaa.n hai.n
kabaa.D-KHaane pe baasii Tuk.Do.n kii or kitaabo.n kii boriyaa.n hai.n
buzurg bargad ke niiche buu.Dhaa kha.Daa hu.aa hai
aur us ke haatho.n me.n tape lipTii hu.ii chha.Dii hai
police kii gaa.Dii pikiT lagaa kar
sa.Dak pe tirchhii kha.Dii hu.ii hai
aur ek mazduur apnaa daaman uThaa.e be-bas kha.Daa hu.aa hai
aur ik sipaahii ki us ke nefe me.n u.ngliyo.n ko ghumaa rahaa hai
vahii.n pe shaahid siyaah chashma lagaa ke KHud ko chhupaa rahaa hai
news channel kii chhoTii gaa.Dii ba.Dii KHabar kii talaash me.n hai
do sabzii vaale bhii apnii pherii lagaa rahe hai.n
to phuul vaale ke sar pe phuulo.n kii Tokarii hai
kisii kii aa.nkho.n me.n naukrii hai
kisii kii aa.nkho.n me.n chhokrii hai
vaqaar sar ko jhukaa rahaa hai
faraaz khaa.ii me.n jaa rahaa hai
to giilii cigarette ke kash lagaa kar
navaab rickshaw chalaa rahaa hai
saliim kannii ghumaa rahaa hai
vakiil vardii me.n jaa rahaa hai
zamiir baGle.n bajaa rahaa hai
aur ek vaa.iz bataa rahaa hai
KHudaa ko naaraaz karne vaale jahannamii hai.n
KHudaa ko raazii karo KHudaaraa
KHudaa ko raazii karo KHudaaraa
aur us ke aage nasiir akmal kamaal shaadaab Gulaam saare
nazar jhukaa.e kha.De hu.e hai.n
ki chashm-e-biinaa agar kahii.n hai
to samjho paataal tak ga.Dhii hai
kisii ko a-c KHariidnaa hai
kisii ko pii sii KHariidnaa hai
kisii kii bas aur kisii kii bii-sii nikal rahii hai
aqiila KHaala ke dono.n haatho.n me.n aaTh thaile laTak rahe hai.n
aur aate jaate sabhii musaafir
unhe.n musalsal khaTak rahe hai.n
ziyaa a.ndhere me.n jaa rahaa hai
gulaab kachraa jalaa rahaa hai
aziim makkhii a.Daa rahaa hai
kaliim guTkaa chabaa rahaa hai
to ghanTa-package pe jaane kab se
fahiim gappe.n la.Daa rahaa hai
sabaq musaavaat kaa sikhaane
vaziir gaa.Dii me.n jaa rahaa hai
sanaa nidaa ko na.e latiife sunaa rahii hai
hinaa hathelii ko takte takte puraane raste se aa rahii hai
aur apnii bhaavaj kaa haath thaame
zubaida check-up ko jaa rahii hai
vo apnii nazre.n kabhii idhar ko kabhii adhar ko gumaa rahii hai
magar ko.ii shai use musalsal bulaa rahii rahii hai
ajiib ujlat ajiib vahshat ajiib Gaflat kaa maajraa hai
kahuu.n mai.n kis se mire KHudaayaa ye kaisii KHilqat kaa maajraa hai
ki apnii mastii me.n mast ho kar
ye sab musaafir guzar rahe
na.e musaafir ubhar rahe hai.n
sa.Dak jahaa.n thii vahii.n kha.Dii hai
magar haqiiqat bahut ba.Dii hai
sa.Dak pe billii marii pa.Dii hai

Imran Shamshad Narmi
Nazm

dard ki aawaz

desh hai apnaa maante ho naa
dukh jitne hai.n jaante ho naa
pe.D hai ek par Daale.n bahut hai.n
Daalo.n par Tahniyaa.n bahut hai.n
patte hai.n rozaana ugte
piile lekin girte rahte
tum ho maalii nazar kahaa.n hai
chaman kii socho dhyaan kahaa.n hai

Ozair Rahman
Nazm

chup

raat kii kaalii baarish ne
chehro.n kii vardii
kiicha.D se bhar dii hai
mere siine ke pinjre me.n
KHuun kaa gardish karne vaalaa laTTuu
nafrat ke paudo.n ke uupar
ghuum rahaa hai
tum ne aise kaa.nTe
merii shiryaano.n me.n bo.e hai.n
aisii dopahro.n kii zardii
mere gaalo.n pe liipii hai
ki mai.n bistar kii shikno.n me.n
apnii aa.nkhe.n bo kar rotaa huu.n
pahlii baar jab Gam kii putlii qaash ko
chehre se nochaa thaa
jab Gurbat ke auraaq
havaa me.n u.Dte the
jab KHaalii me.ade kii tasviir banaa kar
us me.n chiize.n rakhtaa thaa
phaTe hu.e kap.Do.n me.n jab
tasviir chhupaa kar rakhtaa thaa
merii shahvat
ku.nvaar pane kii dahliizo.n par
apnaa KHutba likhtii thii
biis baras un galiyo.n kii diivaaro.n se
Takraa Takraa kar
mere ka.ndhe ret ke pushte ban kar
Dhete jaate hai.n
mai.n jo terii raano.n ke jangal me.n
kaale phuul ko to.Dne niklaa thaa
ab dekh rahaa huu.n
dil kii korii miTTii me.n
tere jism kii patlii shaaKHe.n ugii hu.ii thii.n
aur ik aavaara sannaaTaa
chhato.n par bhaarii qadmo.n se
ba.Dii aahistagii ke saath chaltaa hai
to vo chupke se mere paas aatii hai
aur apne dhiime lahje me.n
vo saarii daastaane.n kah sunaatii hai
jinhe.n sun kar mai.n dhiimii aa.nch par
pahro.n sulagtaa huu.n
kisii girje ke viiraa.n lawn me.n
jab january
apne sunahrii gesu.o.n ko khol kar
ko.ii puraanaa giit gaatii hai
to vo ik an-chhuu.ii nan kii tarah
patthar ke bencho.n par
mire kaa.ndhe par sar rakhe
mire chehre pe apnii u.ngliyo.n me.n
kabhii jab shaam rotii hai
siyah kaafii ke pyaalo.n se
lapaktii bhaap me.n
phir aa.ndhii kii aamad se aisii gard hu.ii
aisaa habs mirii saa.nso.n me.n phailaa
tere jism kii kashtii me.n
mai.n apne kap.De bhuul aayaa
par tum ne aadhii raat ko aisii chuTkii lii
nii.nd kii Dholak
ghuTno.n kii zarbo.n se chaknaachuur hu.ii
ab mu.nh se shiira bahtaa hai
un zaKHmo.n kaa
jin ke Taa.nke andar hii andar TuuTe hai.n
bijlii kii taaro.n ke uupar
kavve qataar me.n baiThe hai.n
baarish ke paanii me.n jin ke
askarii baazuu hilte hai.n
raano.n kii ye niilii variide.n
jin me.n du.aa kaa naqshii kuuza
ulaT gayaa hai
mai.n ne un galiyo.n me.n
apne marne kii afvaah sunii hai
KHush-ilhaan mo.azzin kii
aavaaz se chi.Diyaa.n u.Dtii hai.n
ai rasto.n kii raadhaa
tere vasl kii KHaatir
jism ke nijii hisse dho kar
lauT ke phir mai.n aayaa huu.n

Abdur Rasheed
Nazm

qarz

ham pe.Do.n ke azaab sahe.n
yaa dukho.n ke phaTe kap.De pahne.n

Sara Shagufta
Nazm

baTla house

gha.Dii kii Tik-Tik bol rahii hai raat ke shaayad ek baje hai.n
baTla house kii ek galii me.n moTe kutte bhau.nk rahe hai.n
ek kha.nDar me.n tez raushnii chaaro.n jaanib phail rahii hai
baGal me.n leTaa saathii meraa ab tak pub jii khel rahaa hai
mai.n bhii ab tak jaag rahaa huu.n aa.nkhe.n muu.nde soch rahaa huu.n
niiche jaanaa kaisaa hogaa baahar kitnii sardii hogii
qutub sitaara kidhar ko hogaa raat kii raanii kaisii hogii
sub.h kaa suuraj kahaa.n pe hogaa abhii KHudaa kyaa kartaa hogaa
sa.Dak kinaare sone vaale jo.De kaise sote ho.nge
in ko machchhar kaaTte ho.nge
naum chomsky lawn me.n baiThe bachche aaKHir kaise ho.nge
un ko kutte chaaTte ho.nge
kyaa in bhuuk-zada bachcho.n ke KHvaab me.n pariyaa.n aatii ho.ngii
kaTe-phaTe haatho.n ke takiye ke niiche kuchh rakhtii ho.ngii
kaisii baate.n karte ho jii kyaa pariyo.n kaa kaam yahii hai
mahal saraa.e chho.D ke ab vo sa.Dak kinaare aa.e.ngii kyaa
raat ke shaayad De.Dh baje hai.n baTla house kaa chauk khulaa hai
raat ko job se aane vaale raat me.n job ko jaane vaale
ek haath me.n liye chaa.e cup ek haath me.n chhoTii cigarette
sa.Dak paar kyo.n dekh rahe hai.n
biryaanii ko Dhuu.nDh rahe hai.n
un ke piichhe sa.Dak kinaare qabristaan kaa gate khulaa hai
andar kutte ghuum rahe hai.n shaayad khaanaa Dhuu.nDh rahe hai.n
baahar cigarette aur coffee hai andar kaafii taariikii hai
mai.n bhii andar jhaa.nk rahaa huu.n haule haule soch rahaa huu.n
qabristaan ke andar me.n ye latrine kis ne banvaayaa
kyo.n banvaayaa
shaayad murde raat me.n uTh kar us ke andar jaate ho.nge
haajat puurii karte ho.nge
yaa phir cigarette piine vaale la.Dke andar jaate ho.nge
KHaakii vardii ghar vaalo.n se chhup kar cigarette piite ho.nge
ek kinaare adab kii malika sab kuchh baiThii dekh rahii hai
aag kaa dariyaa chaa.ndnii begam shiishe kaa ghar likhne vaalii
ainii aapaa soch rahii hai
meraa qaarii kyo.n aayaa hai
shaayad is ko gautam shankar tal.at ne uljhaayaa hogaa
yaa phir us ko KHayaabaa.n kii champaa ne paglaayaa hogaa
yaa phir is paagal la.Dke ne shu.uur kii rau ko chhe.Daa hogaa
yaa phir is ne aag kaa dariyaa aadhaa pa.Dh kar chho.Daa hogaa
falsafyaana baate.n sun kar saare murde sochte ho.nge
ko.ii apnii KHvaab-gaah ko chho.D ke aaKHir kyo.n aayaa hai
mai.n bhii baiThaa soch rahaa huu.n
itnii raat ko kyo.n aayaa huu.n

Asim Badr
Nazm

ahd-e-hazir ki dil-ruba maKHluq

adh-phaTe posTaro.n ke pairaahan
aahanii bilDigo.n ke jismo.n par
kitne dilkash dikhaa.ii dete hai.n
bas kii behis nashisto.n par baiThii
din ke baazaar se KHariidii hu.ii
aarzuu Gam umiid mahruumii
nii.nd kii goliyaa.n gulaab ke phuul
kele amruud santare chaaval
painT gu.Diyaa shamiiz chuuhe-daan
ek ik shai kaa kar rahii hai hisaab
ahd-e-haazir kii dil-rubaa maKHluuq!

Shahryar
Nazm

qartaba ka muhasara

haamila badliyo.n ne
apne kaTe-phaTe kinaaro.n me.n
chaa.ndii kii jhaalare.n laTkaa rakhii thii.n
aur apnii dulaa.iyo.n ke baKHiyo.n me.n
ra.ngo.n kii bichkaariyaa.n chhupaa rakkhii thii.n
ufuq surKH thaa
jaise shahr ke shohde
Darpok dukaan-daaro.n par
apnii dhaak jamaane
na.ii kaTaa.iyaa.n kamaane par muqarrar huu.n
sode kii botalo.n se
ek duusre par hamla-aavar huu.n
aur fuTpaatho.n par
shiisho.n ke Tuk.Do.n se
ajnabii raahgiiro.n ke
na.nge pairo.n se
sirf unnaab dastiyaab ho
zamiin gulnaar bane
bas isii tarah kaa rang aasmaan me.n
khilaa hu.aa milaa
raat kii fasiil ke qariib
shaam kaa muhaasara kiye
pa.Daa hu.aa thaa mai.n

Saqi Faruqi
Nazm

charlie-chaplin

jab 'charlie' ke pairo.n me.n
phaTe hu.e juute hu.aa karte the
ek aurat ne us kii mohabbat
mustarad kar dii thii

Syed Kashif Raza
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now