Search result for "piirat" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "piirat"

Nazm MATCHES FOR "piirat"

Nazm

farman-e-KHuda

uTTho mirii duniyaa ke Gariibo.n ko jagaa do
kaaKH-e-umraa ke dar o diivaar hilaa do
garmaa.o Gulaamo.n kaa lahuu soz-e-yaqii.n se
kunjishk-e-faromaaya ko shaahii.n se la.Daa do
sulataani-e-jamhuur kaa aataa hai zamaana
jo naqsh-e-kuhan tum ko nazar aa.e miTaa do
jis khet se dahqaa.n ko mayassar nahii.n rozii
us khet ke har KHosha-e-gandum ko jalaa do
kyuu.n KHaaliq o maKHluuq me.n haa.il rahe.n parde
piiraan-e-kaliisaa ko kaliisaa se uThaa do
haq raa ba-sajuude sanamaa.n raa ba-tavaafe
behtar hai charaaG-e-haram-o-dair bujhaa do
mai.n naa-KHush o be-zaar huu.n marmar kii silo.n se
mere liye miTTii kaa haram aur banaa do
tahziib-e-navii kaargah-e-shiishagaraa.n hai
aadaab-e-junuu.n shaa.ir-e-mashriq ko sikhaa do

Allama Iqbal

Nazm

lenin

ai anfus o aafaaq me.n paidaa tirii aayaat
haq ye hai ki hai zinda o paa.inda tirii zaat
mai.n kaise samajhtaa ki tuu hai yaa ki nahii.n hai
har dam mutaGayyar the KHirad ke nazriyaat
mahram nahii.n fitrat ke suruud-e-azlii se
biinaa-e-kavaakib ho ki daanaa-e-nabaataat
aaj aa.nkh ne dekhaa to vo 'aalam hu.aa saabit
mai.n jis ko samajhtaa thaa kaliisaa ke KHuraafaat
ham band-e-shab-o-roz me.n jak.De hu.e bande
tuu KHaaliq-e-aasaar-o-nigaaranda-e-aanaat
ik baat agar mujh ko ijaazat ho to puuchhuu.n
hal kar na sake jis ko hakiimo.n ke maqaalaat
jab tak mai.n jiyaa KHema-e-aflaak ke niiche
kaa.nTe kii tarah dil me.n khaTaktii rahii ye baat
guftaar ke usluub pe qaabuu nahii.n rahtaa
jab ruuh ke andar mutalaatum ho.n KHayaalaat
vo kaun saa aadam hai ki tuu jis kaa hai maa'buud
vo aadam-e-KHaakii ki jo hai zer-e-samaavaat
mashriq ke KHudaavand safedaan-e-ra.ngii
maGrib ke KHudaavand daraKHshanda filizzaat
europe me.n bahut raushni-e-ilm-o-hunar hai
haq ye hai ki be-chashma-e-haivaa.n hai ye zulmaat
raa.naa.i-e-taamiir me.n raunaq me.n safaa me.n
girjo.n se kahii.n ba.Dh ke hai.n banko.n kii imaaraat
zaahir me.n tijaarat hai haqiiqat me.n ju.aa hai
suud ek kaa laakho.n ke liye marg-e-mufaajaat
ye 'ilm ye hikmat ye tadabbur ye hukuumat
piite hai.n lahuu dete hai.n taaliim-e-musaavaat
bekaarii o 'uryaanii o mai-KHvaarii o iflaas
kyaa kam hai.n fara.ngii madniyat kii futuuhaat
vo qaum ki faizaan-e-samaavii se ho mahruum
had us ke kamaalaat kii hai barq o buKHaaraat
hai dil ke liye maut mashiino.n kii hukuumat
ehsaas-e-muravvat ko kuchal dete hai.n aalaat
aasaar to kuchh kuchh nazar aate hai.n ki aaKHir
tadbiir ko taqdiir ke shaatir ne kiyaa maat
mai-KHaana kii buniyaad me.n aayaa hai tazalzul
baiThe hai.n isii fikr me.n piiraan-e-KHaraabaat
chehro.n pe jo surKHii nazar aatii hai sar-e-shaam
yaa Gaaza hai yaa saaGar o miinaa kii karaamaat
tuu qaadir o 'aadil hai magar tere jahaa.n me.n
hai.n talKH bahut banda-e-mazduur ke auqaat
kab Duubegaa sarmaaya-parastii kaa safiina
duniyaa hai tirii muntazir-e-roz-e-mukaafaat

Allama Iqbal

Nazm

dar-ul-makafat

hai duniyaa jis kaa naa.nv miyaa.n ye aur tarah kii bastii hai
jo ma.nhgo.n ko ye mah.ngii hai aur sasto.n ko ye sastii hai
yaa.n har-dam jhag.De uThte hai.n har-aan adaalat bastii hai
gar mast kare to mastii hai aur past kare to pastii hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo aur kisii kaa maan rakhe to us ko bhii armaan mile
jo paan khilaa de paan mile jo roTii de to naan mile
nuqsaan kare nuqsaan mile ehsaan kare ehsaan mile
jo jaisaa jis ke saath kare phir vaisaa us ko aan mile
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo aur kisii kii jaa.n baKHshe to us kii bhii haq jaan rakhe
jo aur kisii kii aan rakhe to us kii bhii haq aan rakhe
jo yaa.n kaa rahne vaalaa hai ye dil me.n apne jaan rakhe
ye turat-phirat kaa naqsha hai is naqshe ko pahchaan rakhe
kuchh der nahii.n andher nahii.n insaaf aur adl parastii hai
is haath karo us haath mile yaa.n saudaa dast-ba-dastii hai
jo paar utaare auro.n ko us kii bhii paar utarnii hai
jo Garq kare phir us ko bhii Dubko.n Dubko.n karnii hai
shamshiir tabar banduuq sinaa.n aur nashtar tiir nahrnii hai
yaa.n jaisii jaisii karnii hai phir vaisii vaisii bharnii hai
kuchh der nahii.n andher nahii.n insaaf aur adl-parastii hai
is haath karo is haath mile yaa.n saudaa dast-ba-dastii hai
jo uupar uu.nchaa bol kare to us kaa bol bhii baalaa hai
aur de paTke to us ko bhii ko.ii aur paTakne vaalaa hai
be-zulm-o-KHataa jis zaalim ne mazluum zabah kar Daalaa hai
us zaalim ke bhii lohuu kaa phir bahtaa naddii-naalaa hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo misrii aur ke mu.nh me.n de phir vo bhii shakkar khaataa hai
jo aur ta.ii.n ab Takkar de phir vo bhii Takkar khaataa hai
jo aur ko Daale chakkar me.n phir vo bhii chakkar khaataa hai
jo aur ko Thokar maar chale phir vo bhii Thokar khaataa hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo aur kisii ko naahaq me.n ko.ii jhuuTii baat lagaataa hai
aur ko.ii Gariib aur bechaara haq naa-haq me.n luT jaataa hai
vo aap bhii luuTaa jaataa hai aur laaThii-paaThii khaataa hai
jo jaisaa jaisaa kartaa hai phir vaisaa vaisaa paataa hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo aur kii pag.Dii le bhaage us kaa bhii or uchakkaa hai
jo aur pe chaukii biThlaave us par bhii dho.ns-dha.Dakkaa hai
yaa.n pushtii me.n to pushtii hai aur dhakke me.n yaa.n dhakkaa hai
kyaa zor maze kaa jamghaT hai kyaa zor ye bhii.D-bha.Dakkaa hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
hai khaTkaa us ke haath lagaa jo aur kisii ko de khaTkaa
aur Gaib se jhaTkaa khaataa hai jo aur kisii ke de jhaTkaa
chiire ke biich me.n chiiraa hai aur paTke biich jo hai paTkaa
kyaa kahiye aur 'naziir' aage hai zor tamaashaa jhaT-paTkaa
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai

Nazeer Akbarabadi

Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi

Nazm

iqbaal se ham-kalami

kal azaan-e-sub.h se pahle fazaa-e-quds me.n
mai.n ne dekhaa kuchh shanaasaa suurate.n hai.n ham-nashii.n
the hakiim-e-sharq se shaiKH-e-mujaddid ham-kalaam
gosh-bar-aavaaz sab daanish-varaan-e-ilm-o-dii.n
bul-kalaam-'aazaad' se 'Gaalib' the masruuf-e-suKHan
'miir' o 'momin' daur-e-haazir kii Gazal pe nukta-chii.n
is se kuchh haT kar gulaabii shaaKH-cho.n kii chhaa.nv me.n
the valiiullaah ke farzand nukta-aafrii.n
iistaada sarv ke saa.e me.n the maulaa-e-ruum
jin ke farmuudaat me.n muzmar hai.n aayaat-e-mubii.n
soch me.n Duube hu.e the 'haalii'-e-darvesh-KHuu
baa.ndh kar baiThe halqa shiblii-e-ahd-aafrii.n
mai.n ne ba.Dh kar murshid-e-iqbaal se ye arz kii
aap ko ham tiira-baKHto.n kii KHabar hai yaa nahii.n
dil-shikasta ho ke farmaayaa mujhe ma.aluum hai
be-yad-e-baizaa hai piiraan-e-haram kii aastii.n
saltanat le kar KHudaa o mustafaa ke naam par
ab KHudaa o mustafaa kii raah par ko.ii nahii.n
hai abhii shahbaaz kii Gairat par kargas KHanda-zan
''hai vahii sarmaaya-daarii banda-e-momin kaa dii.n''
is se ba.Dh kar aur kyaa fikr o amal kaa inqalaab
''paadshaaho.n kii nahii.n allaah kii hai ye zamii.n''
kaun samjhaa.e a.ndherii raat ko aa.iin-e-mahr
vaa.e bad-baKHtii ki KHud momin hai mahruum-e-yaqii.n
KHuun de kar KHaana-e-sayyaad ko raushan karo
jaa.o mashriq ke KHaraab-aabaad ko raushan karo

Shorish kashmiri

Nazm

mera raj-kumar

mujhe achchhaa na lagaa
ye pyaar sachchaa na lagaa
kuchh to ga.Dba.D chal rahii thii
merii ruuh jal rahii thii
kuchh kahnaa chaahtii thii
kuchh jaan.naa chaahtii thii
kuchh puuchhnaa chaahtii thii
mai.n sahii thii vo akele na the
par saath me.n un ke mehmaa.n na the
vo haivaan the ye haivaan the
mujhe parat dar parat vo kholte ga.e
mai.n chillaatii rahii vo mujhe nochte ga.e
baarii baarii se merii jism shikaar hu.aa
meraa dil bharosa sab taar taar hu.aa

Ankita Garg

Nazm

ek sitara aadarsh ka

kiil sii dahliiz me.n paivast ye kaisii chamak hai
dhuul ajraam-e-falak kii
gutthiyaa.n mauhuum sii rishto.n kii ye kaisii hai.n
suljhaana nahii.n zinhaar varna
huu kaa aalam hai namuudaan kii
sulajh jaane ke baad
sabza-e-naurasta ke parde me.n saare uu.nch niich
paaTte rahne ke ai aanand
bahte paaniyo.n kii aatmaa
kis ke hai.n ye ustuKHvaa.n
malbe me.n Dhalte ustuKHvaa.n
KHaak-e-uftaada kii aglii aur pichhlii
har parat ke
be-zabaa.n ta.amiir-e-kaar
mehrbaa.n saa ik tabassum
aur shaa.ista ishaaraa ghar kii jaanib
jaise ghar ke baam-o-dar par ho navishta
har savaal-e-naa-shakebaa kaa javaab
phir udhar dekhaa to sab kuchh
dasht-e-iKHfaa mai.n thaa adiim
Gaar kuTiyaa.e.n machaane.n
ghar gharau.nde
saare aasaar-o-mazaahir
guu.nj me.n apnii samo kar
le u.Dii baa.ng chiil

Shafiq Fatima Shera

Nazm

mazdur be-chaara

hotaa nahii.n dam-bhar bhii sukuu.n us ko gavaaraa
jis KHaatir-e-betaab kii fitrat hii hai paaraa
mazluum kii fariyaad se jal jaa.egaa aalam
sad-shoa.la-ba-damaa.n hai un aaho.n kaa sharaaraa
Gam-diido.n ko de aish-o-tarab aur ataa kar
taaj-e-sar-e-sultaanii-e-taimuur gadaa-raa
garmaa de rage.n us kii imaarat ke lahuu se
jis hastii-e-be-maaya kaa Gurbat hai sahaaraa
taKHriib ke bando.n ko bas ab ho nahii.n saktii
insaan kii insaan se tafriiq gavaaraa
paaband sahii dahr me.n aa.iin-e-jahaa.n ke
piiraan-e-kaliisaa kaa hai kyaa us me.n ijaaraa
tahziib-o-tamaddun hai.n imaarat ke sahaare
mazduur kii Gurbat kaa nahii.n ko.ii sahaaraa

Hindi gorakhpurii

Nazm

khir kaun kha gaya

thaaliyaa.n bhii saaf hai.n
pyaaliyaa.n bhii saaf hai.n
khiir kaun khaa gayaa
kuchh nahii.n hai degchii me.n taab me.n paraat me.n
ko.ii chor khaa gayaa hai khiir raat raat me.n
saaf hai.n rakaabiyaa.n gha.Doliyaa.n kaToriyaa.n
is me.n do kachauriyaa.n hai.n is me.n chaar toriyaa.n
khiir kaun khaa gayaa
ho na ho ye kaam hai tauqiir bhaa.ii jaan kaa
bhaaluu ehtishaam kaa loma.D imtinaan kaa
ammii jaan
ammii jaan
aap kaa luToraa beTaa merii khiir khaa gayaa
aap kaa chaToraa beTaa merii khiir khaa gayaa
merii khiir khaa gayaa
mai.n bhii phaa.D duu.ngaa dekh lenaa us kii copiyaa.n
kaaT duu.ngaa pencile.n
to.D duu.ngaa botale.n
pho.D duu.ngaa hit hit baal aur haakiyaa.n
jaaj bolii aahuu beTaa ye kyaa dhuum machaa.ii hai
mai.n ne khiir kii baat hii kii thii kis ne ye khiir pakaa.ii hai

Syed Zameer Jafri

Nazm

har sal in subhon

aaj bhii ik aisaa hii din hai
abhii abhii ik aa.Dii tirchhii raushan sii.Dhii sad-haa zaaviyo.n kii pal bhar ko jhuk aa.ii thii
us khi.Dkii tak
ek laraztii hu.ii maujuudgii is sii.Dhii se abhii abhii is kamre me.n utrii thii
baras baras hone ke partav kii ye ek parat is mez par dam bhar yuu.n Dhaltii hai
jaane baahar is honii ke hast me.n kyaa kyaa kuchh hai
aaj ye apne paa.nv to paataalo.n me.n ga.De hu.e hai.n

Majeed Amjad

Nazm

kashmakash

maazii kii soch se
aa.nkho.n kii khi.Dkii par
ek parat sii cha.Dh ga.ii namii kii
phir jo dekhaa mustaqbil kii or
nazar aayaa kuchh bhii nahii.n
ek dhu.nd ke sivaa

Aditya Pant Naaqid

Nazm

abad

maut kis raah par kha.Dii merii raah dekh rahii hai
abhii abhii mai.n ne havaa kii an dekhii chaadar me.n suuraaKH kiyaa hai
aur bahut uupar ke baadalo.n ko chhalnii kar diyaa hai
zamiin bhar kii vo saarii miTTii
jo an-ginat dafn hone vaalo.n
kii kiimiyaa se banii hai
aur chaaro.n dishaa.o.n me.n
an-ginat badan jalo.n kii chitaa.o.n kii jo raakh banii hai
kahaa.n le jaa.egii mujhe
mai.n to ab vo huu.n hii nahii.n jo kabhii hu.aa kartaa thaa
ab na to me.n kabhii sotaa huu.n aur na kabhii jaagtaa huu.n
mai.n na paa.nv chaltaa huu.n na mai.n qadam-saakin huu.n
maut mere paa.nv ke binaa chal saktii hai
maut mere qadam ke binaa saakin ho saktii hai
ab Gilaaf-e-zindagii kii ko.ii bhii ek parat rah ga.ii ho
to use zindagii se haTaa diyaa jaa.e
jab uqaab uu.nchii u.Daan par ho
to us kii aa.nkh me.n ko.ii su.ii chubho.ii nahii.n jaa saktii
maut ne mujhe uqaab banaa diyaa hai
yaa shaayad mujhe kisii farishte me.n tabdiil kar diyaa hai
ab mujhe zamiin par yaa zamiin kii fuzuul duniyaa kii sat.h par Dhuu.nDaa na jaa.e
mai.n ab kisii kii dastaras me.n nahii.n ho

Ahmad Hamesh

Nazm

saheli bujh paheli

parcham sar-e-maidaan-e-viGaa khol rahaa hai
mansuur ke parde me.n KHudaa bol rahaa hai
kyaa sail-e-baGaavat hai muriido.n kii safo.n me.n
piiraan-e-tahii-dast kaa dil Dol rahaa hai
ai vaa.e sabaa aqrab-e-jarraara chaman me.n
sarsar ke ishaaraat pe bis ghol rahaa hai
afrang ke deriina Gulaamo.n kii razaa par
KHud piir-e-haram band-e-qabaa khol rahaa hai
kuchh baat hii aisii hai ki paimaana-e-zar me.n
ik rind-e-tunuk-zarf lahuu tol rahaa hai
buz-Gaala-e-afrang shaGaalo.n ke jilau me.n
kis ThaaTh se zarGaam-sifat bol rahaa hai
taariiKH ke viiraana-e-aabaad me.n 'shorish'
kuchh qiimtii motii hai.n qalam rol rahaa hai

Shorish kashmiri

Nazm

Main kitne barson se roz

mai.n kitne barso.n se roz apne anaa kii ek parat
chhiiltaa huu.n
lahuu lahuu in hazaar parto.n kii tah me.n patthar huu.n
jaantaa huu.n
ye kahkashaa.e.n ye kaa.enaate.n ye raushnii ke siyaah raste
guzar ke terii talaash me.n hai.n
ki ho na ho tum vahaa.n kahii.n merii muntazir ho
mujhe yaqii.n hai ki tum merii baat sun rahii ho
magar nahii.n ho, ki ye jo tum ho, ye tum nahii.n ho
mirii anaa kaa ko.ii nagar ho
ki jis ke raushan siyaah kuucho.n me.n
sar-kaTe ajnabii bhare hai.n
mai.n ruuh ke reshmii libaade haTaa ke KHud se miluu.ngaa lekin
mujhe KHabar hai ki tum vahaa.n bhii nahii.n milogii
ki tum parastish kii aarzuu kaa ko.ii bha.nvar ho
ko.ii KHudaavand-e-lab mile to
ki apnii banjar adaa ke mandir me.n muurtii kii tarah kha.Dii ho
hazaar sadiyo.n se raah tak tak ke jam ga.ii ho

Mubarak Haider

Nazm

shishe ka makan

muTThii bhar KHaak se ziist kaa saamaan
ret ke tuude par shiishe kaa makaan
jo ban jaa.e to makiino.n ke dha.Dakte dil
KHauf se larzaa-o-hiraasaa.n rahe.n har pal
ki puurab se aa.ii aa.ndhii
yaa pachchhim se patthar kii zarb
chahaar-jaanib changez-o-halaakuu ke jaa-nashii.n
amn-o-shaa.ntii ke pardo.n me.n halaakat kii baate.n
jin se laraz jaa.e.n pahaa.Do.n ke parat
kamzor haath du.aa.o.n ke liye uThte hu.e
na.ii tahziib me.n KHud ko tanhaa dekh kar
ki puurab se aa.ii aa.ndhii
yaa pachchhim se patthar kii zarb
muTThii bhar KHaak se ziist kaa saamaan
ret ke tuude par shiishe kaa makaan

Masuda Imam

Nazm

pira-ji sagar

canvas ko
camere kii aa.nkh se tum
dekhte hii dekhte uktaa ga.e the
is zamii.n aur aasmaa.n ke
ra.ng ko tuu ne na.e ma.anii diye
canvas par rang do milte hai.n aise
ajnabii insaa.n gale milte ho.n jaise
aur lakiire.n dha.Dkano.n sii
saa.ns letii hai.n tirii tasviire.n goyaa!

Jayant Parmar

Nazm

hindostan ka rang

rangiin-posh arz ke malbuus-e-naaz par
bad-rangiyo.n kii kaisii parat jam ga.ii hai aaj
rango.n kii shoKH tab.a ghaTaa tham ga.ii hai aaj
be-kaif hai zamiin kaa rang aasmaa.n kaa rang
zad me.n burii nazar ke hai daur-o-zamaa.n kaa rang
hai.n sabz-o-zard chashmo.n se aa.nkhe.n Dhakii hu.ii.n
aa.nkho.n ko kyaa dikhaa.ii de hindostaa.n kaa rang

Anwar Abbas

Nazm

naqab jitne hain

naqaab jitne hai.n mere vo noch Daale.nge
parat utaare.nge chehra kharo.nch Daale.nge

Firoz Natiq Khusro

Nazm

shikasta sipar

naGma-gar saiqal fazaa.e.n
sabz resham kii qabaa pahne zamii.n
haatho.n me.n thaame nastaran nargis saman
naazuk taho.n me.n
zindagii hai kis qadar mahfuuz lekin.......
lahza lahza har parat ma.aduum hotii jaa rahii hai!
ek din jab aaKHirii tah kii sipar hogii shikasta
mehrbaa.n ozone kii chaadar me.n lipTii
ye zamii.n jab be-qabaa ho jaa.egii to
arGavaanii aag mohlik u.ngliyo.n se
us kii shaadaabii ko apnii aa.nch me.n jhulsaa.e-gii aur
ye dhu.aa.n ban kar KHalaa.o.n me.n u.Degii......!

Parvin Shere

Nazm

jidd-o-jahd

samay
merii shaKHsiyat se
KHud-e'timaadii kii parat
is tarah utaar rahaa hai
jaise ko.ii KHaansaamaa.n
pyaaz ke chhilke utaar rahaa ho

Afroz Alam

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now