Search result for "sahbaa-e-qanaat" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "sahbaa-e-qanaat"

Nazm MATCHES FOR "sahbaa-e-qanaat"

Nazm

aa ja

duniyaa-e-rang-o-buu me.n jaan-e-bahaar ban kar
hastii ke zamzamo.n me.n saaz-e-qaraar ban kar
sahbaa-e-aatishii.n kaa rangii.n KHumaar ban kar
daur-e-sharaab ban kar jaan-e-sharaab aa jaa
duniyaa-e-dil ke maalik haa.n be-hijaab aa jaa

Sahba lakhnavi

Nazm

bhul gae

taG.iir-e-zamaana ke haatho.n KHud apnii haqiiqat bhuul ga.e
duniyaa ke tariiqe yaad rahe KHud apnii tariiqat bhuul ga.e
gulhaa-e-tamanna chun chun ke aaraa.ish-e-mahfil yaad rahii
kaliyo.n kaa masalnaa yaad rahaa phuulo.n kii nazaakat bhuul ga.e
har shaam fidaa-e-nosh rahe har sub.h KHumaar-aaluud rahe
aaGaaz-e-masarrat yaad rahaa anjaam-e-masarrat bhuul ga.e
daamaan-e-nazar ke partav me.n taKH.iil ke guunaa-guu.n naqshe
ik naqsh-e-tasavvur ban to ga.e par apnii hii suurat bhuul ga.e
allaah-re fareb-e-rang-e-amal mad.hoshii-e-aalam kyaa kahnaa
girdaab-e-havaadis se nikle tuufaan kii haalat bhuul ga.e
iimaan-o-mohabbat ke jalve sab nafs ke taabe ho ke rahe
paimaana-e-ulfat phe.nk diyaa paimaan-e-mohabbat bhuul ga.e
jab aa.nkh lagii majbuur na the bedaar hu.e maayuus hu.e
ai rahrav-e-manzil raah bataa ham raah-e-sadaaqat bhuul ga.e
mahfil bhii vahii mutrib bhii vahii sahbaa bhii vahii saaGar bhii vahii
mai-nosh jo piine aa.e the sahbaa-e-mohabbat bhuul ga.e

Sahba lakhnavi

Nazm

yaad hain

jaan-e-'sahbaa' sach kaho paiham sahaare yaad hai.n
vo nigaah-e-avvalii.n ke kyaa sharaare yaad hai.n
yaad hai.n vo dard kii ba.Dhtii hu.ii betaabiyaa.n
sard aahe.n KHushk-lab aa.nsuu ke dhaare yaad hai.n
vo mai-e-ulfat pilaa denaa nigaah-e-mast se
va.ada-e-rangii.n ke vo alfaaz pyaare yaad hai.n
nau-ba-nau saaz-e-mohabbat kii vo naGma-sanjiyaa.n
vo tarannum vo tabassum vo nazaare yaad hai.n
yaad hai.n vo bazm-e-ishrat kii sukuu.n-saamaaniyaa.n
shab kii KHaamoshii vo dariyaa ke kinaare yaad hai.n
vo fazaa-e-ruuh-parvar vo bahaar-e-jaa.n-fazaa
vasl kii shab ke tumhe.n vo chaa.nd taare yaad hai.n
merii jaanib vo bharii mahfil me.n KHaamoshii ke saath
apnii chashm-e-mast ke rangii.n ishaare yaad hai.n
phir zaraa dhiime suro.n me.n gungunaanaa sher kaa
phuul se jha.Dte hu.e garduu.n ke taare yaad hai.n
aadhii aadhii raat tak shaam-e-mohabbat kii bahaar
sub.h kii tanviir me.n jalve tumhaare yaad hai.n
yaad hai.n 'sahbaa' shabaab-o-sher kii rangiiniyaa.n
haa.n hadiis-e-ishq ke alfaaz saare yaad hai.n
aaj bhii mai.n sun rahaa huu.n naGma-haa-e-jaa.n-fazaa
dau.Dtii hai saaz-e-hastii me.n tirii rangii.n navaa

Sahba lakhnavi

Nazm

chali gain

rangiin KHvaab ban ke samaatii chalii ga.ii.n
mad.hoshiyo.n ko aur ba.Dhaatii chalii ga.ii.n
allah re shaan-e-husn ki tasliim-e-shauq par
nazre.n uThaa.e sar ko jhukaatii chalii ga.ii.n
husn-e-jahaa.n-panaah kii allaah re kashish
har ik nigah ko barq banaatii chalii ga.ii.n
nii.ndo.n me.n husn aur javaanii kii karvaTe.n
KHvaabo.n ke raaz raaz banaatii chalii ga.ii.n
allah re ye naqaab ye husn-e-fusuu.n-taraaz
pardo.n ke taar taar u.Daatii chalii ga.ii.n
un ke jalaal-e-husn kaa charchaa hai har jagah
kal raat chaa.nd ko bhii jhukaatii chalii ga.ii.n
aa.ii ho Thahro ziinat-e-bazm-e-makaa.n bano
jhijkii.n rukii.n Thahar ke lajaatii chalii ga.ii.n
allaah taab kaise mai.n laa.uu.n nigaah kii
rag rag ko jaise barq banaatii chalii ga.ii.n
'sahbaa'-asar nigaah hai har jumbish-e-nigaah
nazro.n se jaam-e-mast pilaatii chalii ga.ii.n

Sahba lakhnavi

Nazm

nazr-e-sauda

kahne ko aam rasm-e-shikaayaat ho ga.ii
lab tak na aa.ii baat magar baat ho ga.ii
ha.ns ha.ns ke pii liye Gam-e-dauraa.n ke talKH jaam
yuu.n saazgaar gardish-e-haalaat ho ga.ii
zindaa.n kii shab nazar ke ujaale KHayaal-e-dost
yakjaa hu.e to pursish-e-haalaat ho ga.ii
mahviyyat-e-hikaayat-e-dauraa.n na pochhiye
kab din hu.aa KHabar nahii.n kab raat ho ga.ii
jo aasmaa.n-nashii.n hai.n unhe.n is kaa ilm hai
jab bhii zamii.n par aa.e unhe.n maat ho ga.ii
gulshan qafas bahaar garebaa.n junuu.n KHirad
marbuut in se bazm-e-KHaraabaat ho ga.ii
'sahbaa' asar nigaah kii allaah re kashmakash
nii.ndo.n me.n kaif-o-kam kii shuruu.aat ho ga.ii

Sahba lakhnavi

Nazm

pasti-e-afkar

majbuur nahii.n fitrat-e-aazaad tumhaarii
phir kyo.n nahii.n karte ho Gulaamii kaa jigar chaak
qudrat ne tumhe.n ashraf-e-maKHluuq banaayaa
kyo.n KHaak hai ye pastii-e-afkaar se namnaak
jo qaum ho pastii ke KHayaalaat pe maa.il
us qaum ko haasil nahii.n phir rif.at-e-aflaak
kyo.n gardish-e-ayyaam kii karte ho shikaayat
kyo.n vus.at-e-aafaaq me.n hote nahii.n bebaak
insaan bhii aazaad hai fitrat bhii hai aazaad
kyo.n rasm-e-Gulaamii se fazaa saarii hai naapaak
'sahbaa' tujhe us qaum kaa Gam hai jise apnii
haalat ke taGayyur kaa na ehsaas na idraak

Sahba lakhnavi

Nazm

aligaDh uniwersity

jaam-dar-jaam hai sahbaa-e-junuun-e-hikmat
dekhnaa ho to ko.ii dekh le saaqii kaa karam

Anjum Azmi

Nazm

shishon ka masiha koi nahin

shaayad ki inhii.n Tuk.Do.n me.n kahii.n
vo saaGar-e-dil hai jis me.n kabhii
sad-naaz se utraa kartii thii
sahbaa-e-Gam-e-jaanaa.n kii parii

Faiz Ahmad Faiz

Nazm

ai zohra-jabin nach

mahkii hu.ii saa.nse.n mirii saa.nso.n me.n samo de
sahbaa-e-shafaq-rang kii mastii me.n Dubo de

Abul Mujahid Zahid

Nazm

mir

shaahid-e-bazm-e-suKHan naazuura-e-ma.anii-taraaz
ai KHudaa-e-reKHta paiGambar-e-soz-o-gudaaz
yuusuf-e-mulk-e-ma.aanii piir-e-kan.aan-e-suKHan
hai tirii har bait ahl-e-dard ko bait-ul-huzan
ai shahiid-e-jalva-e-maanii faqiir-e-be-niyaaz
is tarah kis ne kahii hai daastaan-e-soz-o-saaz
hai adab urdu kaa naazaa.n jis pe vo hai terii zaat
sar-zamiin-e-sher par ai chashma-e-aab-e-hayaat
tafta-dil aashufta-sar aatish-navaa be-KHeshtan
aah terii siina-soz aur naala teraa dil-shikan
KHatm tujh par ho gayaa lutf-e-bayaan-e-aashiqii
marhabaa ai vaaqif-e-raaz-e-nihaan-e-aashiqii
sar-zamiin-e-sher ka.aba aur tuu is kaa KHaliil
shaaKH-e-tuubaa-e-suKHan par hamnavaa-e-jibra.iil
josh-e-istiGnaa tiraa tere liye vaj.h-e-nashaat
shaan-e-KHuddaarii tirii aa.iina-daar-e-ehtiyaat
bazm se guzraa kamaal-e-faqr dikhlaataa hu.aa
taaj-e-shaahii paa-e-istiGnaa se Thukraataa hu.aa
thaa dimaaG-o-dil me.n sahbaa-e-qanaat kaa suruur
thii javaab-e-satvat-e-shaahii tirii tab-e-Gayuur
mauja-e-bahr-e-qanaat terii abruu kii shikan
taKHt-e-shaahii par hasiir-e-faqr teraa KHanda-zan
thaa ye jauhar terii fitrii shaa.irii ke rutba-daa.n
izzat-e-fan thii tirii naazuk-mizaajii me.n nihaa.n
multafit kartaa tujhe kyaa aGniyaa kaa karr-o-farr
thaa tirii rag rag me.n durvesho.n kii sohbat kaa asar
dil tiraa zaKHmo.n se bazm-e-aashiqii me.n chuur hai
jis suKHan ko dekhiye ristaa hu.aa naasuur hai
bazm-gaah-e-husn me.n ik partav-e-faiz-e-jamaal
said-gaah-e-ishq me.n hai ek said-e-KHasta-haal
dekhnaa ho gar tujhe dekhe tire afkaar me.n
hai tirii tasviir tere KHuu.n-chakaa.n ash.aar me.n
sair ke qaabil hai dil sad-paara us naKHchiir kaa
jis ke har Tuk.De me.n ho paivast paikaa.n tiir kaa
aasmaan-e-sher par chamke hai.n sayyaare bahut
apnii apnii raushnii dikhlaa ga.e taare bahut
ahd-e-gul hai aur vahii ra.ngiinii-e-gulzaar hai
KHaak-e-hind ab tak agar dekho tajallii-zaar hai
aur bhii hai.n ma.arke me.n shahsavaar-e-yakka-taaz
aur bhii hai.n mai-kade me.n saaqiyaan-e-dil-navaaz
hai.n to paimaane vahii lekin vo mai miltii nahii.n
naGma-sanjo.n me.n kisii se terii lai miltii nahii.n
saahibaan-e-zauq ke siino.n me.n thii jis kii khaTak
tairte hai.n dil me.n vo sar-tez nashtar aaj tak
kaarvaan-e-rafta ko thaa terii yaktaa.ii pe naaz
asr-e-maujuuda ne bhii maanaa hai teraa imtiyaaz
ho ga.e hai.n aaj tujh ko ek sau baa.iis saal
to nahii.n zinda hai duniyaa me.n magar teraa kamaal
haq hai ham par yaad kar ke tujh ko ronaa chaahiye
maatam apnii naa-shanaasii kaa bhii honaa chaahiye
Dhuu.nDte hai.n qabr kaa bhii ab nishaa.n miltaa nahii.n
ai zamii.n tujh me.n hamaaraa aasmaa.n miltaa nahii.n

Mirza Mohammad Hadi Aziz Lakhnavi

Nazm

dua

har haal rahuu.n KHush vo tabii'at mujhe de de
daulat kii jagah sabr-o-qanaa.at mujhe de de

Sada Ambalvi

Nazm

ban-bas ki ek sham

is shaam ufuq ke ho.nTo.n par
jo laalii hai zahriilii hai
is shaam ne merii aa.nkho.n se
sahbaa-e-tarab sab pii lii hai
ye shaam Gazab tanhaa.ii kii

Ahmad Faraz

Nazm

siri kirshn

hu.aa tuluu.a sitaaro.n kii dilkashii le kar
suruur aa.nkh me.n nazro.n me.n zindagii le kar
KHudii ke hosh u.Daane ba-sad niyaaz aayaa
na.e pyaalo.n me.n sahbaa-e-be-KHudii le kar
fazaa-e-dahr me.n gaataa phiraa vo priit ke giit
nashaat-KHez-o-sukuu.n-rez baa.nsurii le kar
jahaan-e-qalb saraapaa gudaaz ban hii gayaa
har ek zarra mohabbat kaa saaz ban hii gayaa

Seemab Akbarabadi

Nazm

shri-krishn

hu.aa tuluu.a sitaaro.n kii dilkashii le kar
suruur aa.nkh me.n nazro.n me.n zindagii le kar
KHudii ke hosh u.Daane ba-sad niyaaz aayaa
na.e piyaalo.n me.n sahbaa-e-be-KHudii le kar
fazaa-e-dahr me.n gaataa phiraa vo priit ke giit
nashaat-KHez-o-sukuu.n-rez baa.nsurii le kar
jahaan-e-qalb saraapaa-gudaaz ban hii gayaa
har ek zarra mohabbat kaa saaz ban hii gayaa

Seemab Akbarabadi

Nazm

bhaarat ke naujawanon se appeal

sadaa zulm kii aa rahii hai jahaa.n se
ki zaahir hai.n be-daad piir-o-javaa.n se
Tapaktii hai.n gar hasrate.n ab yahaa.n se
lapakte hai.n sho.ale sitam ke vahaa.n se
magar tum ho is pe bhii mahv-e-qanaa.at
qanaa.at nahii.n ye hai zof-o-kasaalat

Aaftab Rais Panipati

Nazm

tumhaari yaad

maqbara merii tamannaa.o.n kaa maazii kaa hariim
jis me.n madfuun hai.n murde mire afsaano.n ke
tum pe maftuun kam-andesha vo majnuun-e-shabaab
aur u.Dte hu.e purze vo garebaano.n ke
baarish-e-ashk phir us garmii-e-vahshat ke baad
jis me.n andaaz machalte hu.e tuufaano.n ke
kabhii raato.n me.n ghulaa nashsha-e-sahbaa-e-bahaar
kabhii sub.ho.n me.n mirii garmii-e-hangaam-e-nushuur
ishq betaab magar husn ko paabandii-e-vaz.a
mere vaarafta taqaaze the magar tum majbuur
bevafaa tum ko jo kah detaa thaa jhu.njhlaahaT me.n
DabDabaa aatii thii.n ashko.n se vo aa.nkhe.n maKHmuur

Safdar Aah Sitapuri

Nazm

watan aazad karne ke liye

hind kaa uj.Daa chaman aabaad karne ke liye
dard ke maare hu.o.n ko shaad karne ke liye
ik nayaa ahd-e-jahaa.n aabaad karne ke liye
qasr-e-istibdaad ko barbaad karne ke liye
jhuum kar uTTho vatan aazaad karne ke liye
safha-e-hastii se baatil ko miTaane ke liye
KHirman-e-aadaa pe ab bijlii giraane ke liye
ahl-e-zar kii be-kasii par muskuraane ke liye
ya.anii arvaah-e-salaf ko shaad karne ke liye
jhuum kar uTTho vatan aazaad karne ke liye
phir se bha.Dkaa.o dilo.n me.n Gairato.n kii aag ko
razm kii jaanib ba.Dhaa.o jur.ato.n kii baag ko
paa.nv ke niiche kuchal do siim-o-zar ke naag ko
zindagaanii ko saraapaa shaad karne ke liye
jhuum kar uTTho vatan aazaad karne ke liye
mastii-e-sahbaa-e-aazaadii se lahraate chalo
abr kii suurat buland-o-past par chhaate chalo
qahqaho.n se lailii-e-maGrib ko sharmaate chalo
phir dayaar-e-hind ko aabaad karne ke liye
jhuum kar uTTho vatan aazaad karne ke liye

Altaf Mashhadi

Nazm

nau-urus

vo jamaal-e-nau-uruusii kii phaban
vo tabassum-rez chashm-e-surmagii.n
sumbulii.n zulfo.n pe afshaa.n kii chamak
vo jabii.n par taabish-e-maah-e-mubii.n
shoKHiyo.n kii bijliyaa.n jazb-e-nazar
a.nkh.Diyo.n me.n jazba-e-naaz-aafrii.n
kaif se labrez sahbaa-e-shabaab
KHuun me.n raqsaa.n sharaab-e-aatishii.n
aarizo.n par chaa.ndnii chhiTkii hu.ii
vo lab-e-gulguu.n pe mauj-e-angbii.n
husn se chhantii hu.ii doshiizgii
shoKH jalvo.n me.n hijaab-e-dil-nashii.n

Syed Ahsan Javed

Nazm

imroz

ye sahbaa-e-imroz jo sub.h kii shaahzaadii kii mast a.nkh.Diyo.n se Tapak kar
ba-daur-e-hayaat aa ga.ii hai ye nannhii sii chi.Diyaa.n jo chhat me.n chahakne lagii hai.n
havaa kaa ye jho.nkaa jo mere dariiche me.n tulsii kii Tahnii ko larzaa gayaa hai
pa.Dosan ke aa.ngan me.n paanii ke nalke pe ye chuu.Diyaa.n jo chhanakne lagii hai.n
ye duniya-e-imroz merii hai mere dil-e-zaar kii dha.Dkano.n kii amii.n hai
ye ashko.n se shaadaab do chaar sub.he.n ye aaho.n se maamuur do chaar shaame.n
inhii chilmano.n se mujhe dekhnaa hai vo jo kuchh ki nazro.n kii zad me.n nahii.n hai

Majeed Amjad

Nazm

kashmir

aamaajgah-e-nuur hai kohsaar-e-himaala
hai Gairat-e-sad-tuur ye bhaarat kaa shivaala
kohsaar nahii.n taaj-e-vatan amn kaa haala
sahbaa-e-mohabbat kaa chhalaktaa hu.aa pyaala
kashmiir himaala kaa dha.Daktaa hu.aa dil hai
is vaadii kaa har phuul mahaktaa hu.aa dil hai
is vaadii kii taariiKH uKHuvvat kaa fasaana
is vaadii kaa har naGma mohabbat kaa taraana
is vaadii kaa har zarra ma.aanii kaa KHazaana
is vaadii kii tahziib ne dekhaa hai zamaana
ye vaadii-e-gul aaj bhii gulzaar-e-iram hai
is vaadii kaa har phuul bahaaro.n kaa sanam hai

Rifat Sarosh

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now