Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "siilan"

Nazm MATCHES FOR "siilan"

Nazm

silan

bas ek hii sur me.n, ek hii lai pe sub.h se dekh
dekh kaise baras rahaa hai udaas paanii
phuvaar ke malmalii.n dupaTTe se u.D rahe hai.n
tamaam mausam Tapak rahaa hai
palak palak ris rahii hai ye kaa.enaat saarii
har ek shai bhiig bhiig kar dekh kaisii bojhal sii ho ga.ii hai
dimaaG kii giilii giilii socho.n se
bhiigii bhiigii udaas yaade.n Tapak rahii hai.n
thake thake se badan me.n bas dhiire dhiire
saa.nso.n kaa garm lobaan jal rahaa hai

Gulzar
Nazm

hamare kamre mein pattiyon ki mahak ne

cigarette ke raqs karte dhu.e.n se mil kar,
ajiib maahaul kar diyaa hai
aur is pe ab ye gha.Dii kii Tik-Tik ne,
dil udaasii se bhar diyaa hai
kisii zamaane me.n ham ne,
'naasir', 'faraaz', 'mohsin', 'jamaal', 'sarvat' ke sher apnii chahaktii diivaar par likhe the
ab is me.n siilan kyuu.n aa ga.ii hai....?
hamaaraa bistar ki jis me.n ko.ii shikan nahii.n hai, usii pe kab se,
(vo daa.e.n jaanib, mai.n baa.e.n jaanib....)
na jaane kab se daraaz hai.n ham....!!!
mai.n us se shaayad KHafaa nahii.n huu.n,
use bhii ko.ii gila nahii.n hai
magar hamaarii KHamiida pushte.n jo pichhlii kitnii hii saa.ato.n se
bas ek duuje ko tak rahii hai.n....
vo thak ga.ii hai

Fariha Naqvi
Nazm

is zindagi ke badle

is zindagii ke badle
mujhe diivaar par phaile hu.e
siilan-zada dhabbe me.n badal diyaa jaataa
yaa
pahaa.Do.n par Thahrii hu.ii barf
jo kisii ne na dekhii ho
yaa
ek taabuut jo kisii marne vaale se
KHaalii karaa liyaa gayaa ho

Azra Abbas
Nazm

pesh lafz ek mohabbat name ka

kamre kii siilan se uktaa kar
kahii.n chalii ga.ii hai
mere hisse kii dhuup
bandhan se Darne vaalii chi.Diyaa
u.D rahii hai khokhle aakaash me.n

Nomaan Shauque
Nazm

budh

pipe ke gahre lambe kash khii.nchtaa
vo apnii barahnagii ke ehsaas ko
dhuve.n kii shakl me.n
KHalaa me.n tahliil hote dekh kar
muskuraane kii koshish kartaa thaa
us kii naaf ke aas-paas
chipke hu.e
shikasta a.ndhere ke chhoTe chhoTe Tuk.De
me.nDak kii aa.ankho.n me.n
mare hu.e KHvaabo.n kii siilan me.n
Duub rahe the
vo
mujh ko
''gautam'' ke naam se yaad kiyaa jaa.e
aisaa
diivaaro.n par re.ngtii
chiyuu.nTiyo.n se
baar baar kah rahaa thaa

Adil Mansuri
Nazm

sawari unT ki hai

vahii siilan-zada uutaaq kaa gosha
jahaa.n mai.n ek shab us ko
larazte sansanaate zahr vaale
chobii tiiro.n kii ghanii baarish me.n
be-bas aur akelaa chho.D aayaa thaa
mujhe sab yaad hai qissa
baras kar abr bilkul tham chukaa thaa
aur KHalaa me.n chaa.nd
yuu.n lagtaa thaa jaise
taKHt par nau-umr shahzaada ho ko.ii
yuu.n havaa chehre ko mas kar ke guzartii thii
ki jaise reshmii.n kap.Daa ho ko.ii
apne ThanDe aur giile KHol ke andar
galii so.ii hu.ii thii
dam-ba-KHud saare makaa.n
aaise nazar aate the
jaise narm aur baariik kaaGaz ke bane ho.n
mom ke tarshe hu.e ho.n
ik ba.Dii tasviir me.n
jaise azal se iistaada ho.n!

Rafiq Sandelvi
Nazm

band kamra

dekho pardo.n ko achchhii tarah khii.nch duur
aur sab khi.Dkiyaa.n band kar do
aur us band kamre se baahar niklo
us me.n bosiida sofo.n pe ik moTaa kap.Daa cha.Dhaa kar
tum ne un ko is andaaz se rakh diyaa hai
ki ab daa.e.n kone me.n
ukh.Dii safedii pe siilan ke dhabbe
kam-o-besh nazro.n se poshiida hai.n
aur baa.e.n taraf
TuuTe Dibbo.n
puraane KHato.n
za.ng-aaluud TuuTii paleTo.n
aur bosiida pinjro.n ke ik Dher ko
tum ne ik lambii chau.Dii sii chaadar se
achchhii tarah Dhak diyaa hai
aur ab baaqii kamra
ba.Daa saaf-suthraa nazar aa rahaa hai
dekho TuuTii hu.ii carnas ko bhii
ik shoKH kap.De se Dhak kar
us par vo zar-sham.e.n jalaa do
ki jin kii sisaktii hu.ii raushnii me.n
tumhaare KHad-o-KHaal ma.aluum hote hai.n mauzuu.n
aur kone me.n rakhe hu.e
chhoTe recordplayer par havaa disk rakh do
ki jis me.n puraanii sii ek lai me.n
bas chand lafzo.n kii takraar hai

Zahida Zaidi
Nazm

ek manzar

ser-eleven ke smugglers
hiiro.n kii smuggling par baate.n kar rahe hai.n
shumaalii bulgaria ke ilaaqo.n se
umda qism kaa tambaakuu aane vaalaa hai
light-tower kii sii.Dhiyo.n ke niiche
jeans kii nekar me.n kokiin kii thailiyaa.n chhupaa kar
maiDonaa vaapas jaa chukii hai
buu.Dhaa lenos baiThaa hai
fog light kii piilii raushnii me.n
lamha daa.Dhii khuja rahaa hai
saahil kii hathelii par
ret kii u.ngliyo.n me.n lipTii
barahna saa.nso.n kii uljhan par
raat kaa KHuun saraktaa hai
niDhaal jismo.n kii ruumaaniyat me.n
lams kaa siilan-zada shor girtaa hai
samundar barf kii jhiil me.n
tabdiil ho saktaa hai
cigarette jalaane kaa aalaa
giilaa pa.D gayaa hai
bithos
lighter milegaa
oh shukriya

Hasan Alvi
Nazm

omission

kisii daraaz me.n pa.Dii ho.ngii
merii aa.nkho.n se lipTii roGnii putliyaa.n
jin pe bohtaan hai
habs-rasiida kamre kii siskiyaa.n kaaT khaane kaa
tanomand KHaatuun kii tarsiib-zada raano.n ke beach
tasaadum ke halqe me.n pa.Daa
zard siilan ke KHol me.n raKHne buntaa
shahr-e-ma.aduum kaa laasha nochte KHudaa ko ghuurtaa hu.aa mai.n
KHudaa jo surKH doshiiza ke badan par kunda bosa-gaaho.n ke maanind muqaddas
siyaah-mast mallaah kii aurat mere siine pe sar rakhte hu.e chi.nghaa.Dtii hai
vo jahaaz ke mastuul se kuud kar maraa thaa
ja.ng ke dino.n me.n purtagaalii hasiina se mulaaqaat
vo yaqiinan mujhe mubtalaa kar saktii thii
magar
ham jaziiro.n se KHaalii haath lauTne vaale qasam khaate hai.n
hamaare paas mashkiizo.n me.n saste gu.D kii sharaab hai
aur kuchh dost jo vaafar miqdaar me.n tambaakuu ugaa rahe hai.n
sartaanii rutuubato.n me.n luTh.De
hamaare TaKHne baaruud se zaKHmii hai.n
ham apne baazu.o.n se jha.Dte hu.e baal tumhe.n dikhaa sakte hai.n
nam-KHurda banduuqo.n aur naakaara jeepo.n ke alaava
hamaare qabze me.n chand la.Dkiyaa.n aur rasad-KHaane hai.n
dhajjiyaa.n aur chiith.De sameTne ko nahiif u.ngliyaa.n ziyaada nahii.n hai.n
nichlii daraaz se merii bohtaan zada aa.nkhe.n nikaal laa.o
mere bachche
kaash tumhe.n javaanii me.n maut aa jaatii

Hasan Alvi
Nazm

silan

ham ne apne saath kii aaKHirii shab
buu.Dhe pe.D kii jhiinii chhatrii ke niiche
chaa.nd kii bhiigii bhiigii kirno.n ke saath bitaa.ii thii
mai.n ne apne ashko.n kaa ruKH mo.D diyaa thaa
tum ne palko.n se do motii mere ka.ndhe par Taa.nk diye the
aur maathe par kabhii na miTne vaalii
mohr lagaa.ii thii ek giile bose kii
aglii shab
us pe.D ke niiche mai.n tanhaa thaa
chhuuT gayaa thaa tum se jo ruumaal vahaa.n par le aayaa thaa
barso.n baa'd isii shab kaa
jaanii-pahchaanii KHushbuu vaalii bhiigaa-pan
nazmo.n kii ek bhuulii hu.ii sii copy me.n
siilan ban kar ubhraa hai

Subodh Lal Saqi
Nazm

roti hui parchhaiyan

aap ke kamre kii sabz diivaar par
sub.h jo ye siilan dikhaa.ii detii hai
maazii ke riste zaKHmo.n kii hogii
jin ke paivand khul jaate hai.n raat me.n
yaa do saayo.n ke aa.nsuu ho.nge
jo raat me.n ubhar aate hai.n
parchhaa.iyo.n ko rote dekhaa hai kabhii
ye aa.nsuu ye riste zaKHm
diivaar ko khokhlaa na kar de.n
inhe.n rok lo

Seema Bhardwaj
Nazm

sannaTa chiKH uThta hai

havaa laal ii.nTo.n kii galiyo.n se guzartii
siilan-zada koThariyo.n me.n bachche jantii hai
ghuTii ghuTii saa.nse.n letii hu.ii
jab baahar nikaltii hai
to ThanD se kub.Dii ho chukii hotii hai
siidhaa chalne kii KHvaahish me.n
uu.nche niiche rasto.n par
gho.Do.n ke sumo.n tale
kiicha.D me.n lat-pat sar paTaKHtii
uThne kii koshish kartii hai
aur re.ngte re.ngte kisii havelii me.n jaa ghustii hai
jahaa.n raat kaa sannaaTaa bain kar rahaa hotaa hai
qadmo.n kii maanuus sii chaapo.n se
havelii ke sannaaTo.n me.n
guu.nj kii daraa.De.n pa.Dne lagtii hai.n
havaa kise Dhuu.nDhtii hai
vo jaantii hai ki pasaaro.n me.n ajdaad ke fan kaa lohaa
sanduuqo.n me.n bharaa pa.Daa hai
purkho.n ke afkaar
shelfo.n par qariine se saje hai.n
ek ba.De kamre me.n gol mez par
kroshiye se kaa.Dhe hu.e ruumaal me.n
us ne apnii aa.nkhe.n bhii kaa.Dh dii hai.n
vo rotii hu.ii
ruumaal me.n kaa.Dhii hu.ii aa.nkho.n ko chuumtii hai
aur havelii ke dar-o-diivaar se lipTii hu.ii
aaKHirii nishaanii talaash kar rahii hotii hai
ki sannaaTaa chiiKH uThtaa hai

Aliya Mirza
Nazm

chaar-diwari mein chuni hui aurat

band ke us taraf KHud ugii jhaa.Diyo.n me.n lagii ras-bharii beriyaa.n KHuub tayyaar hai.n
par mire vaaste in ko daaman me.n bhar lenaa mumkin nahii.n
ai KHudaa jugnuu.o.n qumqumo.n aur sitaaro.n kii paakiiza taabindagii
vo jagah so rahii hai jahaa.n par chanaaro.n ke uu.nche daraKHto.n se nithrii hu.ii jaa.n-fazaa chaa.ndnii
KHushbuu.e.n KHema-zan hai.n jahaa.n raat din
merii un sarhado.n tak rasaa.ii nahii.n
aur pachchhim kii chanchal suriilii havaa mere aa.ngan se ho kar guzartii nahii.n
mai.n ki baarish ke qatro.n se nithre hu.e sabz patto.n ke boso.n se mahruum huu.n
in kivaa.Do.n kii parlii taraf der se band phaaTak pe Thahre hu.e ajnabii
aas aur be-kalii
harf aur an-kahii
kuchh nahii.n
mai.n ne kuchh bhii to dekhaa nahii.n
mere kamre kii siilan ghuTan aur KHasta divaaro.n ke pyaare KHudaa
aur kuchh na sahii
to mujhe ik gunah kii ijaazat mile

Naina Adil
Nazm

haqq-e-zaujiyat

maa.e.n
mahbuubaa.e.n
aur kuchh
yarGamaalii
shahr kii gunjaan aabaadii me.n vaaqe'
ik havelii
yaa kisii siilan bhare kamre me.n
Thas
ik zindagii

Ekram Khawar
Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

daraKHt-e-zard

tumhaarii arjumand ammii ko mai.n bhuulaa bahut din me.n
mai.n un kii rang kii taskiin se nimTaa bahut din me.n
vahii to hai.n jinho.n ne mujh ko paiham rang thukvaayaa
vo kis rag kaa lahuu hai jo miyaa.n mai.n ne nahii.n thuukaa
lahuu aur thuuknaa us kaa hai kaarobaar bhii meraa
yahii hai saakh bhii merii yahii me.aar bhii meraa
mai.n vo huu.n jis ne apne KHuun se mausam khilaa.e hai.n
na-jaane vaqt ke kitne hii aalam aazmaa.e hai.n
mai.n ik taariiKH huu.n aur merii jaane kitnii fasle.n hai.n
mirii kitnii hii fare.n hai.n mirii kitnii hii asle.n hai.n
havaadis maajraa hii ham rahe hai.n ik zamaane se
shadaa.ed saaneha hii ham rahe hai.n ik zamaane se
hamesha se bapaa ik ja.ng hai ham us me.n qaa.em hai.n
hamaarii ja.ng KHair o shar ke bistar kii hai zaa.ida
ye charKH-e-jabr ke davvaar-e-mumkin kii hai girviida
la.Daa.ii ke liye maidaan aur lashkar nahii.n laazim
sinaan o gurz o shamshiir o tabar KHanjar nahii.n laazim
bas ik ehsaas laazim hai ki ham bu.adain hai.n dono.n
ki nafi-e-ain-e-ain o sar-ba-sar ziddain hai.n dono.n
luis-urbina ne merii ajab kuchh Gam-gusaarii kii
ba-sad dil daanishii guzraan apnii mujh pe taarii kii
bahut us ne pilaa.ii aur piine hii na dii mujh ko
palak tak us ne marne ke liye jiine na dii mujh ko
''mai.n tere ishq me.n ranjiida huu.n haa.n ab bhii kuchh kuchh huu.n
mujhe terii KHayaanat ne Gazab majruuh kar Daalaa
magar taish-e-shadiidaana ke baa'd aaKHir zamaane me.n
razaa kii jaavidaana jabr kii naubat bhii aa pahu.nchii''

Jaun Eliya
Nazm

farar

mere maazii ko andhere me.n dabaa rahne do
meraa maazii mirii zillat ke sivaa kuchh bhii nahii.n
merii ummiido.n kaa haasil mirii kaavish kaa sila
ek be-naam aziyyat ke sivaa kuchh bhii nahii.n

Sahir Ludhianvi
Nazm

farman-e-KHuda

uTTho mirii duniyaa ke Gariibo.n ko jagaa do
kaaKH-e-umraa ke dar o diivaar hilaa do
garmaa.o Gulaamo.n kaa lahuu soz-e-yaqii.n se
kunjishk-e-faromaaya ko shaahii.n se la.Daa do
sulataani-e-jamhuur kaa aataa hai zamaana
jo naqsh-e-kuhan tum ko nazar aa.e miTaa do
jis khet se dahqaa.n ko mayassar nahii.n rozii
us khet ke har KHosha-e-gandum ko jalaa do
kyuu.n KHaaliq o maKHluuq me.n haa.il rahe.n parde
piiraan-e-kaliisaa ko kaliisaa se uThaa do
haq raa ba-sajuude sanamaa.n raa ba-tavaafe
behtar hai charaaG-e-haram-o-dair bujhaa do
mai.n naa-KHush o be-zaar huu.n marmar kii silo.n se
mere liye miTTii kaa haram aur banaa do
tahziib-e-navii kaargah-e-shiishagaraa.n hai
aadaab-e-junuu.n shaa.ir-e-mashriq ko sikhaa do

Allama Iqbal
Nazm

Diary

magar ye satre.n ba.Dii ajab hai.n
kahii.n tavaazun biga.D gayaa hai
yaa ko.ii siivan udha.D ga.ii hai:
''faraar huu.n mai.n ka.ii dino.n se
jo ghup-a.ndhere kii tiir jaisii sura.ng ik kaan se
shuruu.a ho ke duusre kaan tak ga.ii hai,
mai.n us nalii me.n chhupaa hu.aa huu.n,
tum aa ke tinke se mujh ko baahar nikaal lenaa

Gulzar
Nazm

self made logon ka alamiya

self made logo.n kaa alamiya
raushnii mizaajo.n kaa kyaa ajab muqaddar hai
zindagii ke raste me.n bichhne vaale kaa.nTo.n ko
raah se haTaane me.n
ek ek tinke se aashiyaa.n banaane me.n
KHushbu.e.n paka.Dne me.n gulistaa.n sajaane me.n
umr kaaT dete hai.n
umr kaaT dete hai.n
aur apne hisse ke phuul baa.nT dete hai.n
kaisii kaisii KHvaahish ko qatl karte jaate hai.n
darguzar ke gulshan me.n abr ban ke rahte hai.n
sabr ke samundar me.n kashtiyaa.n chalaate hai.n
ye nahii.n ki un ko is roz-o-shab kii kaahish kaa
kuchh sila nahii.n miltaa
marne vaalii aaso.n kaa KHuu.n-bahaa nahii.n miltaa
zindagii ke daaman me.n jis qadar bhii KHushiyaa.n hai.n
sab hii haath aatii hai.n
sab hii mil bhii jaatii hai.n
vaqt par nahii.n miltii.n vaqt par nahii.n aatii.n
yaanii un ko mehnat kaa ajr mil to jaataa hai
lekin is tarah jaise
qarz kii raqam ko.ii qist qist ho jaa.e
asl jo ibaarat ho pas navisht ho jaa.e
fasl-e-gul ke aaKHir me.n phuul un ke khulte hai.n
un ke sahn me.n suuraj der me.n nikalte hai.n

Amjad Islam Amjad
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now