Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "sum"

Nazm MATCHES FOR "sum"

Nazm

ye pichhle ishq ki baaten hain

yaaquut pighalte rahte hai.n
ab apnii gum-sum aa.nkho.n me.n

Mohsin Naqvi
Nazm

banjara

mai.n banjaara
vaqt ke kitne shahro.n se guzraa huu.n
lekin
vaqt ke is ik shahr se jaate jaate mu.D ke dekh rahaa huu.n
soch rahaa huu.n
tum se meraa ye naataa bhii TuuT rahaa hai
tum ne mujh ko chho.Daa thaa jis shahr me.n aa kar
vaqt kaa ab vo shahr bhii mujh se chhuuT rahaa hai
mujh ko vidaa.a karne aa.e hai.n
is nagrii ke saare baasii
vo saare din
jin ke ka.ndhe par sotii hai
ab bhii tumhaarii zulf kii KHushbuu
saare lamhe
jin ke maathe par raushan
ab bhii tumhaare lams kaa Tiikaa
nam aa.nkho.n se
gum-sum mujh ko dekh rahe hai.n
mujh ko in ke dukh kaa pataa hai
in ko mere Gam kii KHabar hai
lekin mujh ko hukm-e-safar hai
jaanaa hogaa
vaqt ke agle shahr mujhe ab jaanaa hogaa

Javed Akhtar
Nazm

baiTha hai mere samne wo

baiThaa hai mere saamne vo
jaane kisii soch me.n pa.Daa hai
achchhii aa.nkhe.n milii hai.n us ko
vahshat karnaa bhii aa gayaa hai
bichh jaa.uu.n mai.n us ke raaste me.n
phir bhii kyaa is se faa.eda hai
ham dono.n hii ye to jaante hai.n
vo mere liye nahii.n banaa hai
mere liye us ke haath kaafii
us ke liye saaraa falsafa hai
merii nazro.n se hai pareshaa.n
KHud apnii kashish se hii KHafaa hai
sab baat samajh rahaa hai lekin
gum-sum saa mujh ko dekhtaa hai
jaise mele me.n ko.ii bachcha
apnii maa.n se bichha.D gayaa hai
us ke siine me.n chhup ke ro.uu.n
meraa dil to ye chaahtaa hai
kaisaa KHush-ra.ng phuul hai vo
jo us ke labo.n pe khil rahaa hai
yaa rab vo mujhe kabhii na bhuule
merii tujh se yahii du.aa hai

Fahmida Riaz
Nazm

hamdard

kis soch me.n gum-sum hai tuu
ai be-KHabar naadaa.n na ban
terii fasurda ruuh ko
chaahat ke kaa.nTo.n kii talab
aur us ke daaman me.n faqat
hamdardiyo.n ke phuul hai.n

Ahmad Faraz
Nazm

mohabbat ki intiha par

paapaa
tum mar jaa.o na paapaa
mai.n tum se nafrat kartaa huu.n
kash tum lete ho khaa.nsii mujh ko aatii hai
dil ke daure tumhe.n nahii.n
mujh ko pa.Dte hai.n
aaKHir kab tak
raat me.n uTh kar
light jalaa kar
dekhuu.ngaa mai.n saa.ns tumhaarii
kab tak merii teacher
mujh ko Tokegii
gum-sum rahne par
kaise batlaa.uu.n
mai.n kitnaa Dar jaataa huu.n
jab merii rickshaw mu.Dtii hai
ghar vaale raste par
aaj bhii kam bechain nahii.n mai.n
mo.D vo bas aane vaalaa hai
chain pa.D gayaa
aaj bhii mere ghar ke aage bhii.D nahii.n hai
yaanii
aaj bhii shaayad sab kuchh Thiik hai ghar me.n
yaanii tum zinda ho paapaa

Shariq Kaifi
Nazm

iztirab

jahaa.n me.n iztiraab hai
nahii.n nahii.n
jahaa.n hii iztiraab hai
hazaar-haa kavaakib-o-nujuum-haa-e-kahkashaa.n se
atomo.n kii kokh tak
madaar-dar-madaar har vajuud be-qaraar hai
ye mehr-o-maah o mushtarii se har electron tak
ye jhuum jhuum ghuumne me.n jis tarah kaa raqs hai
mujhe samajh me.n aa gayaa
jahaan teraa aks hai
vo aks jo jagah jagah qadam qadam rythm pe hai
jahaan ain sur me.n hai jahaan ain sum pe hai
jahaa.n tarannumo.n kii list me.n se intiKHaab hai
jo tujh hasii.n dimaaG ke hasiin laa-shu.uur me.n banaa ho
aisaa KHvaab hai
jahaan iztiraab hai
mujhe samajh me.n aa gayaa hai ye jahaa.n
KHalaa makaa.n zamaa.n ke chand taar se banaa hu.aa sitaar hai
use kaho kisii tarah sitaar chhe.Dtii rahe
use kaho ki tho.Dii der aur boltii rahe

Sohaib Mugheera Siddiqi
Nazm

parda aur ismat

KHayaalaat-e-paiham me.n har vaqt gum-sum
dil-e-narm-o-naazuk pe abr-e-tavahhum

Asrarul Haq Majaz
Nazm

sham

mast ghaTaa ma.nDlaa.ii hu.ii hai
baaG pe mastii chhaa.ii hu.ii hai
jhuum rahii hai.n aam kii shaaKHe.n
nii.nd sii jaise aa.ii hu.ii hai
boltaa hai rah rah ke papiihaa
barq sii ik lahraa.ii hu.ii hai
lahke hu.e hai.n phuul shafaq ke
aatish-e-tar chhalkaaii hu.ii hai
sher mire ban ban ke huvaidaa
qaus kii har a.ng.Daa.ii hu.ii hai
re.ngte hai.n KHaamosh taraane
mauj-e-havaa bal khaa.ii hu.ii hai
raunaq-e-aalam sar hai jhukaa.e
jaise dulhan sharmaa.ii hu.ii hai
ghaas pe gum-sum baiThaa hai 'kaifii'
yaad kisii kii aa.ii hu.ii hai

Kaifi Azmi
Nazm

us samne baiThi laDki se

vo baat ki jis kii kirno.n se
har samt ujaalaa ho jaa.e
ye habs jo har suu phailaa hai
KHushbuu kaa havaala ho jaa.e

Ikram Basra
Nazm

nazhad-e-nau

vo manzile.n jin kii jhalkiyo.n ko hamaarii raahe.n
taras rahii hai.n
unhii ke qadmo.n me.n bas rahii hai.n
hasiin KHvaabo.n
kii dhundlii duniyaa.e.n jo saraabo.n
kaa ruup dhaare
hamaare ehsaas par sharaare
u.nDeltii hai.n
unhii.n kii aa.nkho.n me.n kheltii hai.n
unhii ke gum-sum
udaas chehro.n par jhilmilaate hu.e tabassum
me.n Dhal ga.e hai.n hamaare aa.nsuu hamaarii aahe.n

Majeed Amjad
Nazm

alif aur be ke nam

ham dono.n us kamre me.n ho.n
jis kii diivaaro.n pe hamaare sukh ke bandhan
tasviiro.n kii shakl me.n aavezaa.n rahte hai.n
jis me.n rakkhe kaaTh ke gho.De
koT ke haathii
sab ham ko takte rahte hai.n
jis me.n baiThii kaa.nch kii chi.Diyaa.n
ham ko dekh ke Dar sii ga.ii hai.n
jis me.n rakkhii ka.ii kitaabe.n
ham se ruuTh ke mar sii ga.ii hai.n
ham dono.n tanhaa ho.n
tho.Dii der ko gum-sum se baiThe.n

Zehra Nigaah
Nazm

silsile sawalon ke

hazaaro.n sadiyaa.n guzar chukii hai.n
kisii samay me.n vo thii satvantii
kahii.n saavitrii
kahii.n thii miiraa
har ek yug me.n
aqiidato.n kii lahar me.n bhiigii
tapasyaa ke sehr me.n gum-sum
rivaayato.n ke nashe me.n Duubii
tumhaare qadmo.n kii gard ko vo tilak banaatii
diye jalaatii thii naqsh-e-paa par
janam janam kaa aTuuT rishta
nibaahe jaatii
hazaaro.n sadiyo.n safar kiyaa hai
nazar jamaa.e
tumhaare piichhe
tumhaare dukh par dukhii hu.ii hai
tumhaare sukh par sukhii hu.ii hai
magar bataa.o
hazaaro.n sadiyo.n ke darmiyaa.n ko.ii aisaa lamha
jo tum ne is ke liye jiyaa ho
sivaa.e aa.nsuu ke ko.ii jugnuu
kabhii jo aa.nchal me.n ja.D diyaa ho
puraane bargad pe ek dhaagaa
kahii.n to us ke bhii naam kaa ho
a.ndherii taaqo.n pe us kii KHaatir
rakhaa hu.aa bhii to ik diyaa ho
nahii.n hai kuchh bhii
kahii.n nahii.n hai
vo apnii taariiKH me.n tumhaaraa
likhe bhii gar naam
kis tarah se

Kahkashan Tabassum
Nazm

tafsil masafat ki

kab duur talak dekhaa
larzaa.n thii zamii.n kis pal
kab suu-e-falak dekhaa
kab dasht kii tanhaa.ii
aa.nkho.n me.n utar aa.ii
kab vahm samaa.at thii
kab kho ga.ii goyaa.ii
kis mo.D pe hairaa.n the
kis raah me.n viiraa.n the
ijmaal haqiiqat ke
shaayad na raqam ho.nge

Fahmida Riaz
Nazm

nazm ka kuchh bhi nam nahin

shahzaade
ai mulk-e-suKHan ke shahzaade
dekho mai.n ne
nazm likhii hai
nazm ki jaise dil kaa shahr
shahr ki jis me.n tum rahte ho
aadhe ha.ns ha.ns baate.n karte
aur aadhe gum-sum rahte ho
tumhe.n adhuurii baate.n aur adhuurii nazme.n
achchhii lagtii hai.n naa
tum kahte ho baat adhuurii mai.n bhii ik puuraa-pan hotaa hai
KHaamoshii ke kitne ma.anii hote hai.n
kuchh baate.n an-kahii mukammal
shahzaade
mai.n nazm adhuurii likh laa.ii huu.n
tum is nazm ko unvaa.n de do
tum ye nazm mukammal kar do
lekin tum is gahrii chup me.n
kyaa is nazm ko tum anjaam nahii.n doge
is ko naam nahii.n doge

Janan Malik
Nazm

aaine se

aa.ine kuchh to bataa un kaa to hamraaz hai tuu
tuu ne vo zulf vo mukh.Daa vo dahan dekhaa hai
un ke har haal kaa be-saaKHta-pan dekhaa hai
vo na KHud dekh sake.n jis ko nazar bhar ke kabhii
tuu ne jii bhar ke vo har KHatt-e-badan dekhaa hai
un kii tanhaa.ii kaa dildaar hai dam-saaz hai tuu
aa.ine kuchh to bataa un kaa to hamraaz hai tuu
kyaa vo shaa.er kii tarah KHud ko kabhii dekhte hai.n
TikTikii baa.ndh ke kyaa apnii chhabii dekhte hai.n
shoKH ma.asuum javaa.n mast sajal be-parvaa
kyaa vo KHud apne ye andaaz sabhii dekhte hai.n
itnaa gum-sum hai ki KHud apnaa hii andaaz hai tuu
aa.ine kuchh to bataa un kaa to hamraaz hai tuu
kabhii ghabraa.e hu.e bhii to vo aate ho.nge
dil kii dha.Dkan ko jo ruKHsaar pe paate ho.nge
kaa.nptaa jism sambhaale na sambhaltaa hogaa
apnii aa.nkho.n se bhii KHud aa.nkh churaate ho.nge
zabt-e-naa-kaam kaa ghabraayaa hu.aa naaz hai tuu
aa.ine kuchh to bataa un kaa to hamraaz hai tuu
maKHmalii.n zulf banaane vo jab aa.e.nge naa
pahle us chaa.nd se mukh.De kii balaa.e.n lenaa
phir zabaa.n tujh ko jo mil jaa.e sargoshii me.n
husn ko aur nikharne kii du.aa.e.n denaa
KHalvat-e-husn me.n ik ishq kii aavaaz hai tuu
aa.ine kuchh to bataa un kaa to hamraaz hai to

Aziz Qaisi
Nazm

tum naraaz jo ho

kaaGaz gum hai.n aur kitaabe.n
almaarii me.n gum-sum hai.n
manzar mub.ham mub.ham se hai.n
soche.n guttham-gutthaa hai.n
T v par kuchh shakle.n-vakle.n
shor-sharaaba jaarii hai
likhne baiThaa huu.n kuchh lekin
kuchh bhii nahii.n hai likhne ko
tum naaraaz jo ho

Arsalan Ahmad
Nazm

shikast

diivaare.n darvaaze dariiche gum-sum hai.n
baate.n karte bolte kamre gum-sum hai.n
ha.nstii shor machaatii galiyaa.n chup chup hai.n
roz chahakne vaalii chi.Diyaa.n chup chup hai.n
paas pa.Dosii milne aanaa bhuul ga.e
bartan aapas me.n Takraanaa bhuul ga.e
almaarii ne aa.he.n bharnaa chho.D diyaa
sanduuqo.n ne shikva karnaa chho.D diyaa
miTThuu ''bii-bii roTii do'' kahtaa hii nahii.n
suunii sej pe dil bas me.n rahtaa hii nahii.n
singer kii aavaaz ko kaan taraste hai.n
ghar me.n jaise sab guu.nge hai.n baste hai.n
tum kyaa bichh.De samay suhaane biit ga.e
lauT aa.o mai.n haaraa lo tum jiit ga.e!

Mohammad Alvi
Nazm

wahshat

mujhe vahshat kaa matlab kab pata thaa aaj se pahle
kabhii aisaa hu.aa ye dil zaraa ghabraa gayaa
to kah diyaa ki dil bahut vahshat-zada hai
aur aisaa bhii hu.aa
gar saKHt lahje me.n kisii ne baat kii
yaa baat rad kar dii
na ko.ii kaam ho yaa na nii.nd aa.ii
to phir bhii kah diyaa vahshat bahut hai
mujhe ye lafz achchhaa hii bahut lagtaa thaa
par aise nahii.n dekho
ki mai.n ne us kaa matlab aaj samjhaa hai
mai.n gum-sum to nahii.n chup huu.n
mirii saarii tavajjoh mere haatho.n par lagii hai
mere naaKHun yuu.n hathelii me.n khube hai.n
dil ye kahtaa hai
ki merii u.ngliyaa.n is jild ke niiche dabe
ik iztiraabii se KHalaa ko pur kare.n
yaa phaa.D Daale.n ab
ka.ii lahre.n sii bechainii se yuu.n karvaT badaltii hai.n
miraa dil chaahtaa hai ye
ki mai.n khii.nch kar
ajab vahshat ke maqnaatiis se ju.D kar
KHud apne kaa.npte haatho.n kii poro.n se nikal jaa.uu.n
magar mai.n apne siine se ubhar kar
aa aTaktii huu.n halq me.n
KHushk hai jo pyaas se
un aa.nsu.o.n se
jo nahii.n bante
yahaa.n mai.n kahaa.n jaa.uu.n
na aage aa sakuu.n mai.n aur na vaapas jaa sakuu.n mai.n ab
mai.n jaise band huu.n shiishe ke Dabbe me.n
mai.n apne KHvaab se apne halq se
jis qadar koshish karuu.n
baahar nikalne kii ubharne kii
to meraa saa.ns ruktaa hai
ko.ii aavaaz aatii hai
kahii.n andar hii lekin Duub jaatii hai
mujhe sab kahii.n par bhii nahii.n hotii
kisii ko mai.n nazar aatii huu.n par shaayad
use bhii apne andar se nikalne kaa ko.ii rasta nahii.n miltaa

Ambarin Salahuddin
Nazm

sari umr ganwa di humne

saarii umr ga.nvaa dii ham ne
par itnii sii baat bhii ham na jaan sake
khi.Dkii kaa paT khulte hii jo
lash lash kartaa
ek chamaktaa manzar ham ko dikhtaa hai
kyaa vo manzar
khi.Dkii kii chaukhaT se baahar
sabz pahaa.Dii ke qadmo.n me.n
ik shaffaaf nadii se chimTe
patthar par chup chaap kha.De
ik paikar kaa gum-sum manzar hai
jis ko khi.Dkii ke khulne na khulne se
kuchh Garaz nahii.n hai
yaa ham
khi.Dkii ke andar kaa manzar dekh rahe hai.n
saarii umr ga.nvaa dii ham ne

Wazir Agha
Nazm

tanha

ik shaaKH se pattaa TuuT giraa
aur tuu ne ThanDii aah bharii
ik shaaKH pe khiltaa shaguufa thaa
tuu us se bhii bezaar sii thii
tuu apne KHayaal ke kohre me.n
lipTii hu.ii gum-sum baiThii thii

Zia Jalandhari
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now