Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "takabbur"

Nazm MATCHES FOR "takabbur"

Nazm

mere git

mire sarkash taraane sun ke duniyaa ye samajhtii hai
ki shaayad mere dil ko ishq ke naGmo.n se nafrat hai
mujhe ha.ngaama-e-ja.ng-o-jadal me.n kaif miltaa hai
mirii fitrat ko KHuu.n-rezii ke afsaane se raGbat hai
mirii duniyaa me.n kuchh vaq.at nahii.n hai raqs o naGma kii
miraa mahbuub naGma shor-e-aaha.ng-e-baGaavat hai
magar ai kaash dekhe.n vo mirii pur-soz raato.n ko
mai.n jab taaro.n pe nazre.n gaa.D kar aa.nsuu bahaataa huu.n
tasavvur ban ke bhuulii vaardaate.n yaad aatii hai.n
to soz-o-dard kii shiddat se pahro.n tilmilaataa huu.n
ko.ii KHvaabo.n me.n KHvaabiida uma.ngo.n ko jagaatii hai
to apnii zindagii ko maut ke pahluu me.n paataa huu.n
mai.n shaa.er huu.n mujhe fitrat ke nazzaaro.n se ulfat hai
miraa dil dushman-e-naGma-saraa.ii ho nahii.n saktaa
mujhe insaaniyat kaa dard bhii baKHshaa hai qudarat ne
miraa maqsad faqat sho.ala-navaa.ii ho nahii.n saktaa
javaa.n huu.n mai.n javaanii laGzisho.n kaa ek tuufaa.n hai
mirii baato.n me.n ra.ng-e-paarsaa.ii ho nahii.n saktaa
mirii sarkash taraano.n kii haqiiqat hai to itnii hai
ki jab mai.n dekhtaa huu.n bhuuk ke maare kisaano.n ko
Gariibo.n mufliso.n ko be-kaso.n ko be-sahaaro.n ko
sisaktii naazniino.n ko ta.Dapte nau-javaano.n ko
hukuumat ke tashaddud ko imaarat ke takabbur ko
kisii ke chiitha.Do.n ko aur shahanshaahii KHazaano.n ko
to dil taab-e-nashaat-e-bazm-e-ishrat laa nahii.n saktaa
mai.n chaahuu.n bhii to KHvaab-aavar taraane gaa nahii.n saktaa

Sahir Ludhianvi
Nazm

diwar

mai.n ik devtaa-e-anaa
nargisiyyat kaa maaraa hu.aa
aur azal se takabbur me.n Duubaa hu.aa
kaafii KHud-sar huu.n
ziddii huu.n maGruur huu.n
mere chaaro.n taraf merii andhii anaa kii vo diivaar hai
jis me.n aane kii aur mujh se milne kii ghulne kii ko.ii ijaazat kisii ko nahii.n hai
tumhe.n bhii nahii.n hai
use bhii nahii.n hai
mujhe bhii nahii.n hai
mai.n apnii anaa kii diivaaro.n me.n tum se alag ho rahuu.n
mujh pe sajtaa bhii hai ye
mai.n shaa.ir huu.n jo ki fauulun fauulun se bahr-e-ramal tak
har ik naGmagii kaa mukammal KHudaa huu.n
mai.n lafzo.n kaa aaqaa
taKHayyul kaa KHaaliq
mai.n saare zamaane se yaksar judaa huu.n
mujhe zeb detaa hai mai.n apnii diivaar me.n is tarah se muqayyad rahuu.n
yuu.nhii sayyad rahuu.n
mujh pe sajtaa hai ye
.
par jo kal shab tire shabnamii se tabassum me.n lipTii hu.ii
ik nazar be-niyaazii se mujh par pa.Dii
terii pahlii nazar se mirii jaan-e-jaa.n
merii diivaar me.n ik ga.Dhaa par pa.D gayaa
aur ye hii nahii.n mujh pe vo hii nazar
jab dobaara dobaara dobaara pa.Dii
merii diivaar me.n zalzale aa ga.e
aur raKHne shagaafo.n me.n Dhalne lage
mere andar talaatum vo aatish-fishaa.n
vo baguule vo tuufaa.n vo mahshar bapaa thaa
ki mai.n vo ki jis ke tahammul kii hikmat kii
fahm-o-lataafat kii tamsiil shaayad kahii.n bhii nahii.n thii
sulagne lagaa
apnii hiddat se KHud hii pighalne lagaa
tujh se kahnaa thaa ye ki mirii jaan-e-jaa.n
har sitaare kii apnii kashish hogii lekin
KHalaa.o.n me.n murda sitaaro.n kii qismat
vo hawking kii theory ke kaale ga.Dhe
vo vahii vo ki jin me.n hai itnii kashish ki makaa.n to makaa.n
vo zamaa.n ko bhii apne lapeTe me.n le le.n
vo hawking kii theory ke kaale ga.Dho.n kii gravity bhii
terii a.nkho.n kii gahrii kashish ke muqaabil me.n kuchh bhii nahii.n
aur ye to faqat ek diivaar thii
is ko girnaa hii thaa
terii nazro.n se haarii hai bikhrii pa.Dii hai
ki diivaar kaa reza-reza tirii ik nazar se mirii jaan
uj.Daa pa.Daa hai
mai.n jo devtaa-e-anaa nargisiyyat kaa maaraa hu.aa vo jo KHud-sar thaa
ziddii thaa maGruur thaa
jo fauulun fauulun se bahr-e-ramal tak har ik naGmagii kaa mukammal KHudaa thaa
tirii ik nazar se anaa.o.n ke arsh-e-mua.allaa se siidhaa tire paa.nv me.n aa ke
bikhraa pa.Daa hai

Sohaib Mugheera Siddiqi
Nazm

mazdur

june kii garmii ka.Daktii dhuup luu chaltii hu.ii
har gha.Dii mazduur ke sar se qazaa Taltii hu.ii
sar pe gaare kii ka.Dhaa.ii aur diivaar-e-buland
haa.nptaa vo cha.Dh rahaa hai le ke himmat kii kamand
paa.D par pahu.nchaa to ik gaalii sunii me.amaar se
jii me.n aayaa sar ko Takraa de usii diivaar se
haa.e us mazluum kii majbuuriyaa.n naa-chaariyaa.n
jaan kaa aazaar hai.n iflaas kii biimaariyaa.n
dil me.n kahtaa hai ki ye me.amaar bhii mazduur hai
phir yahii jaan-e-hazii.n kyuu.n is qadar maqhuur hai
us kii ujrat mujh se dugunii hai magar kam hai shu.uur
tamkanat kis baat par kis chiiz par itnaa Guruur
mai.n agar naadaar huu.n ye bhii nahii.n sarmaaya-daar
bhuut vo hai kis ba.Daa.ii kaa jo us par hai savaar
ii.nT gaaraa mai.n na duu.n us ko to ye kis kaam kaa
asl me.n me.amaar mai.n huu.n ye faqat hai naam kaa
merii himmat kah rahii.n hai.n kaaKH-e-diivaan-e-buland
aah is par bhii mai.n duniyaa me.n huu.n itnaa mustamand
lag gayaa phir kaam me.n ye soch kar vo bad-nasiib
ai KHudaa duniyaa me.n itnaa bhii na ho ko.ii Gariib
din Dhalaa jis vaqt maalik bhii makaa.n kaa aa gayaa
ik sukuut-e-marg saa diivaar-o-dar par chhaa gayaa
kaa.nptaa rahtaa hai har mazduur jis ke naam se
sab usii dhun me.n the vo KHush ho hamaare kaam se
us kii peshaanii pe lekin bal zaraa aane lage
phan uThaa kar tamkanat ke saa.np lahraane lage
sab se pahle us ne gaalii dii usii me.amaar ko
apnii milkiyyat jo samjhaa thaa har ik diivaar ko
josh-e-naKHvat se kahaa us ne ki ai paajii la.ii.n
kal jahaa.n tak thii ga.ii diivaar ab bhii hai vahii.n
kyaa kiyaa hai tuu ne din-bhar me.n zaraa mujh ko bataa
yuu.n takabbur me.n vo aa kar jaa.eza lene lagaa
dil me.n vo mazduur phir kahne lagaa uf re Gazab
jo bhii is duniyaa me.n hai.n fir.aun hai.n vo sab ke sab
jis kaa jis par bas chale paamaal kartaa hai use
KHud agar KHush-haal hai bad-haal kartaa hai use
kyaa kahuu.n sarmaaya-daaro.n ke sitam kii daastaa.n
diida-e-mazduur hai mazduur se bhii KHuu.nfishaa.n
jis kii laaThii us kii bhai.ns is misl ko saadiq samajh
ye samajh kar is KHudaa-e-paak ko raaziq samajh

Arsh Malsiyani
Nazm

kaen kaen kawwa Ten Ten miTThu

ek Tahnii pe baiThe the miTThuu miyaa.n
aa gayaa ek kavvaa bhii u.D kar vahaa.n
aa.iye aa.iye shauq farmaa.iye
miiThaa amruud hai aap bhii khaa.iye
bolaa kavvaa ki KHaamosh Te.n Te.n na kar
varna mai.n pho.D duu.ngaa abhii teraa sar
bevaquufo.n se mai.n baat kartaa nahii.n
apne darje se niiche utartaa nahii.n
kaun saa tuu uqaab aur shaahiin hai
mu.nh lagaanaa tujhe merii tauhiin hai
bolii.n kavve ne jab aisii ba.D boliyaa.n
to Gusse me.n bole ye miTThuu miyaa.n
tuu ne kyaa tiir maare hai.n mai.n bhii sunuu.n
terii chaalaakiyo.n par zaraa sar dhuno.n
bolaa kavvaa ki o raTTuu tote ye sun
merii daanish kaa har shaKHs gaataa hai gun
kar duu.n raushan abhii tere chaudah tabaq
yaad hai bachche bachche ko meraa sabaq
ek din jab bahut saKHt pyaasaa thaa mai.n
ye samajh le ki bas adh-maraa saa thaa mai.n
ek maTke me.n paanii kii dekhii jhalak
cho.nch Daalii to pahu.nchii na paanii talak
zehn ne kaam karnaa shuruu.a kar diyaa
maTkaa ka.nkar se bharnaa shuruu.a kar diyaa
un kii ta.adaad maTke me.n jab ba.Dh ga.ii
sat.h paanii kii uupar talak cha.Dh ga.ii
mai.n ne paanii gaTaa-gaT gaTaa-gaT piyaa
phir phudakte hu.e kaa.e.n kaa.e.n kiyaa
dekh le kis qadar tez tarraar huu.n
kitnaa chaalaak huu.n kitnaa hushyaar huu.n
bole miTThuu miyaa.n maar kar qahqaha
be-vaquufii kii bas ho ga.ii intihaa
jaane maTke me.n paanii thaa kab se pa.Daa
phir Dhaknaa bhii nahii.n thaa khulaa thaa gha.Daa
gande ka.nkar bhii bhartaa gayaa us me.n tuu
pii gayaa aise paanii ko phir aaKH thuu
aise paanii se lagtii hai.n biimaariyaa.n
pesh aatii hai.n kitnii hii dushvaariyaa.n
KHud ko kahtaa aql-mand-o-daanaa hai tuu
lekin afsos ahmaq kaa naanaa hai tuu
tuu agar gandii chiize.n na khaa.e piye
log paale.n tujhe tuu maze se jiye
saaf hotaa to ghar ghar bulaate tujhe
is tarah maar kar kyuu.n bhagaate tujhe
kavvaa sunte hii ye baat rone lagaa
apne par aa.nsu.o.n se bhigone lagaa
aur kahne lagaa baat sach hai tirii
log karte hai.n nafrat shakl se mirii
kavvaa ro ro ke jab aah bharne lagaa
us pe miTThuu ne ye tars khaa kar kahaa
chho.D de is takabbur ba.Daa.ii ko tuu
apnii aadat banaa le safaa.ii kii tuu
ga.ndaa paanii na pii gandii chiize.n na khaa
un me.n hotaa hai Deraa jaraasiim kaa
ye jaraasiim biimaar kar dete hai.n
achchhe KHaaso.n ko be-kaar kar dete hai.n
yuu.n ba-zaahir thaa kavvaa bahut kaa.iyaa.n
us ko samjhaa ke har baat miTThuu miyaa.n
u.D ga.e apne par pha.D.pha.Daate hu.e
miTThuu beTe ke na.are lagaate hu.e

Ahmad Hatib Siddiqi
Nazm

KHuda ke fazl se huron ke shauhar

ba-zom-e-KHvesh apne daur ke suqraat-e-saanii hai.n
muqaddas log hai.n 'ahmad-razaa-KHaa.n’ kii nishaanii hai.n
Gulaamaan-e-rasuulullaah kii takfiir karte hai.n
hamesha inshiraah-e-sadr se taqriir karte hai.n
zabaan-aavar hai.n lekin zaahida parviin kii lai hai.n
ka.ii naadir kitaabo.n ke musannif hai.n ba.Dii shai hai.n
ra.uunat se jabii.n me.n zohd ke asraar ghulte hai.n
nigaaho.n ke Gazab se sai.nka.Do.n alfaaz khulte hai.n
takabbur zaaviye bantaa hu.aa guftaar kii lau me.n
hazaaro.n KHusruo.n kaa dabdaba raftaar kii ro me.n
zabaan-e-shusta-o-rafta pe nastaaliiq bolii hai
musalle par muraadaabaad ke paano.n kii Dholii hai
ba-zom-e-KHvesh zohd-o-ittiqaa ke biij bote hai.n
KHudaa ke fazl se huuro.n ke shauhar aise hote hai.n

Shorish kashmiri
Nazm

tarana-e-yaum-e-mazdur

jalaa Daalo va.ado.n kii jhuuTii kitaabe.n
Galat likhne vaalaa qalam to.D Daalo
bajaa do takabbur kii ii.nTo.n se ii.nTe.n
dar-o-baam-e-jaah-o-hasham to.D Daalo
pahaa.Do.n me.n rasta banaane kaa din hai
ye din bhuuk ke taish khaane kaa din hai

Anwar Abbas
Nazm

amiron ki duniya

kisii kii tabii.at me.n pindaar-e-mastii
kisii ko Guruur-e-javaanii kii mastii
ko.ii mast mai-KHaana-e-KHud-parastii
amiiro.n kii duniyaa takabbur kii pastii
farebo.n ke saa.e me.n Deraa hai un kaa
gunaaho.n ke ghar me.n baseraa hai un kaa
ko.ii apne zor-e-hukuumat pe naazaa.n
ko.ii maal-o-daulat kii kasrat pe naazaa.n
ko.ii apne aivaa.n kii rif.at pe naazaa.n
ko.ii hashmat-o-jaah-o-sarvat pe naazaa.n
vo nasha cha.Dhaa hai ki bhuulaa KHudaa bhii
ye sunte nahii.n bekaso.n kii du.aa bhii
jo naayaab shai ho use Dhuu.nD laa.e.n
jo marGuub-e-KHaatir ho vo chiiz khaa.e.n
jo garmii ko chaahe.n to sardii banaa.e.n
u.Daa.ii.n pahaa.Do.n kii ThanDii havaa.e.n
zamaane me.n chaltii agar hai to un kii
yahaa.n daal galtii agar hai to un kii
hai dushvaar un ko bulandii na pastii
amiiro.n kii duniyaa me.n mah.ngii bhii sastii
na dekhii unho.n ne kabhii faaqa mastii
ye hai.n be-niyaaz-e-Gam-e-ta.ng-dastii
ye muflis kii mushkil ko kyaa jaante hai.n
ye naadaar ko KHaak pahchaante hai.n
guzartii hai shab jo havas-raaniyo.n me.n
to kaTtaa hai din fitna-saamaaniyo.n me.n
ye hai.n mast apnii tan-aasaaniyo.n me.n
zamaana hai in se pareshaaniyo.n me.n
Gariibo.n ke haq me.n balaa ban.ne vaale
yatiimo.n ke haq me.n qazaa ban.ne vaale
zamaana ho zach jis se vo chaal kar de.n
jo mumkin ho duniyaa kaa paamaal kar de.n
agar ho sake sab ko ka.ngaal kar de.n
jo KHush-haal ho.n un ko bad-haal kar de.n
Garaz un ke dil hai.n mohabbat se KHaalii
uKHuvvat se KHaalii inaayat se KHaalii
jo bole ko.ii to zabaan kaaT Daale.n
jo dekhe ko.ii us kii aa.nkhe.n nikaale.n
nahii.n un se mumkin kisii ko sambhaale.n
ko.ii mar rahaa ho to us ko bachaa le.n
magar shukr hai 'arsh' fazl-e-KHudaa kaa
vo KHallaaq haafiz hai har be-navaa kaa

Arsh Malsiyani
Nazm

yaad hai

yaad hai biich raah ke tum ne
kis tarah laa ke mujh ko chho.Daa thaa
merii ummiid mere KHvaabo.n ko
kis takabbur se tum ne to.Daa saa
yaad hai tum ko bebasii merii
mere aa.nsuu vo be-kasii merii
yaa mujhe hai yaa mere dil ko pata
kis tarah se vo daur guzraa thaa
vaqt lagtaa thaa jaise Thahraa thaa
yaad hai
Gam kii gahrii daldal se
KHud ko KHud mai.n ne jab nikaalaa thaa
kitnii mushkil se dil sa.nbhaalaa thaa
yaad hai
kitne din mai.n ta.Dpii thii
kitnaa ro.ii thii kitnaa siskii thii
ab to ik umr ho ga.ii is ko
ab to vo yaad yaad bhii na rahii
ab to ik vaaqi.a saa lagtaa hai
yaad ke dhu.ndlako.n me.n Duubaa hu.aa
ek dhu.ndlaa saa saaya lagtaa hai
ab na vo mai.n na zindagii vaisii
ab to KHvaabo.n me.n mai.n nahii.n jiitii
tum se ummiid bhii nahii.n rakhtii
tum bhii KHvaabo.n se duur hii rahnaa
ko.ii ummiid mujh se mat rakhnaa

Shagufta Naim Hashmi
Nazm

purani se nai paud tak

raat me.n KHvaab bhii the
raat jab baaG ke ho.nTo.n pe tabassum na rahaa
raat jab baaG kii aa.nkho.n me.n
tamaashaa kaa takallum na rahaa
Gunche kahne lage
ruknaa hai hame.n baaG me.n laa-saal abhii
sub.h jab aa.ii to laa-saal ke
jaa.nkaah mu'ammaa kaa fusuu.n bhii TuuTaa

Noon Meem Rashid
Nazm

muhasba

ajab sachchaa.ii hai ye
vo bachpan thaa jise kho kar
la.Dakpan kii sabhii baate.n javaanii kii hasii.n yaade.n
kitaabo.n me.n raqam kar dii.n
na jaane kitne aalim the
jinhe.n sun kar jinhe.n pa.Dh kar takabbur me.n ye kah baiThe
ki duniyaa me.n
hame.n bhii ilm kii taariif aatii hai
hamaare dil pe bhii ta.aliim ne paiGaam likkhaa hai
achaanak dil ke goshe se
ye ik aavaaz aatii hai
tumhaare paas jitnaa ilm hai us kaa
ahaata kar ke batlaa.o
tumhaare ilm kaa aaGaaz aur anjaam kitnaa hai
ye sun kar jab muhaasib ban ke ham ne zehn me.n jhaa.nkaa
to kyaa dekhaa
hamaare paas jitnaa ilm hai 'shaahid'
sabhii kuchh KHaak par mabnii
haqiiqat sirf itnii hai
hame.n kuchh bhii nahii.n aataa

Shahid Anwar
Nazm

ana

anaa
anaa ke parvat se
tum ko chaahat
bahut hii chhoTii dikhaa.ii degii
tumhe.n takabbur ke Gaar me.n is
sadaa mirii kyaa sunaa.ii degii
tumhaare kuuche se jaa rahaa huu.n vafaa kii mayyat uThaa ke lekin
tumhe.n kabhii na sukuu.n milegaa
sazaa vo tum ko KHudaa.ii degii
mujhe talaashogii dar-ba-dar tum
galii galii tum duhaa.ii dogii

Siraj Faisal Khan
Nazm

ek lamhe ki lapak

pareshaa.n button kasmasaataa hu.aa ye
jo siine pe chaukas mataa’-e-javaanii
pe pahra saa detaa hai KHaamosh rah kar
takabbur me.n Duubaa ba.Daa be-rahm hai
lage 'aashiqo.n ke jigar par kanii saa

Yogender Dutt Tyagi
Nazm

KHasara

mai.n tujh se milne kii
zid pe aataa to mil bhii letaa
na tere Dere mirriiKH par hai.n
na chaa.nd meraa hasiin maskan
janaab dono.n hai.n KHaak-zaade
janaab dono.n hai.n KHaak-zaade
to KHaak-zaado.n me.n kyaa takabbur
zido.n kii zad me.n jahl me.n lipTe
anaa ke pahiye jab apnii zaato.n ke gird ghuume to jaan paa.e
ham apnii apnii zaruurato.n ke hisaar me.n hai.n
uThaa.e kashkol bebasii kii qataar me.n hai.n
hamaarii taaqat kii markaziyat
hai ek jho.nkaa
havaa kaa jho.nkaa
jo saa.ns ban kar aTak gayaa to zamii.n ke uupar se niiche jaane me.n der kitnii
bas ek lamha
bas ek lamhe kaa khel saaraa
phir is ke baa'd janaab-e-'aalii
faqat KHasaara faqat KHasaara faqat KHasaara

Tariq Sindhi
Nazm

samundar

hai samundar diid me.n terii fusuu.n-kaarii bahut
dekhne vaalo.n kii kartaa hai to dildaarii bahut
har udaasii me.n tirii maujo.n kaa dekhaa hai fusuu.n
muztarib zehno.n ko detii hai.n tirii lahre.n sukuu.n
kyaa bataa.uu.n terii maujo.n kii ravaanii kaa amal
gulsitaan-e-shaiKH-'sa.dii' hai ki ruumii kii Gazal
niim-shab mahtaab kii kirno.n kaa vo aks-e-jamiil
tah-ba-tah pighlii hu.ii chaa.ndii hai rashk-e-salsabiil
tujh me.n aa kar mil gayaa aab-e-ravaan-e-mushkbuu
jo rahaa mahv-e-safar dariyaa-ba-dariyaa juu-ba-juu
god se terii jo paanii uTh ke baadal ban gayaa
kisht par baarish to barg-o-gul pe shabnam ban gayaa
fitrat-e-insaan kaa akkaas hai teraa junuu.n
gah talaatum maujzan lahro.n me.n gah rashk-e-sukuu.n
niilguu.n goshe se phir KHaavar su'uud-aamaada hai
shoKHii-e-fitrat kii akkaasii kaa tuu dil-daada hai
mehr kii taabaaniyaa.n jab Gusl detii hai.n tujhe
Dhaa.np lete hai.n hayaa se ghor baadal ke pare
tere siine par ye lahre.n maujzan hai.n kis liye
sang-e-saahil par yuu.nhii taaqat-shikan hai.n kis liye
ba.Dh rahii hai mauj jo saahil se Takraa jaa.egii
tez-ro insaano.n ko shaayad ye samjhaa jaa.egii
josh me.n ba.Dhte hai.n jo aql-o-KHirad se be-niyaaz
kar nahii.n paate vo apnii quvvato.n kaa irtikaaz
nau-e-insaa.n kii KHushii marhuun-e-minnat hai tirii
duusro.n par ho ataa goyaa ye jannat hai tirii
chiirte rahte hai.n siine ko tire jangii jahaaz
hazrat-e-insaa.n kii sannaa.ii hai kaisii kaarsaaz
zindagii paanii se hai aur aab kaa mamba.a hai tuu
dii buzurgii tujh ko KHaaliq ne bahut arfa.a hai tuu
KHushk aur pyaasii zamii.n terii ataa se shaad hai
jis jagah teraa amal hai vo jagah aabaad hai
tuu ba.Daa to hai takabbur se magar mahfuuz hai
azmat-e-maalik tujhe har-aan yuu.n malhuuz hai
terii mauje.n uTh ke jhukne me.n bahut hii tez hai.n
baargaah-e-hazrat-e-KHaaliq me.n sajda-rez hai.n

Salman Ghazi
Nazm

ye hai sab jhuT magar taza KHabar

nannhii sii chyuu.nTii ne lalkaaraa hai ik haathii ko
log karte hai.n salaam us kii javaa.n-mardii ko
ho agar 'azm javaa.n kuchh bhii nahii.n naa-mumkin
haa.n takabbur hii janam detaa hai naakaamii ko
hairat-angez yaqiinan hai ye saaraa manzar
aaj kii taaza KHabar aaj kii taaza KHabar
saa.np ke KHauf se ik nevlaa jhaa.Dii me.n chhupaa
kal jo thaa sher nazar aataa hai giida.D jaisaa
kaam hikmat bhii nahii.n aatii hai be-himmat kii
saa.np ne nevle ko jhaa.Dii me.n ghus kar maaraa
maa'rka nazro.n se aisaa kabhii guzraa na magar
aaj kii taaza KHabar aaj kii taaza KHabar
dekho maa'muulii parindo.n ne kiyaa hai ye kamaal
murGiyaa.n tang hu.ii.n kar diyaa sab ne ha.Dtaal
khaa ga.e le ke maza log sab un ke anDe
nasl ab kaise chale saamne un ke hai savaal
murGiyaa.n baiThii hai.n ha.Dtaal pe taa-hadd-e-nazar
aaj kii taaza KHabar aaj kii taaza KHabar
ghaas khaataa hu.aa ik sher nazar aayaa hai
Gol ne hirno.n ke hairat se use dekhaa hai
us ko majbuur kiyaa hai kisii biimaarii ne
gosht khaane se hakiimo.n ne use rokaa hai
hairat-angez nazar aataa hai saaraa manzar
aaj kii taaza KHabar aaj kii taaza KHabar

Mehdi Pratapgarhi
Nazm

kuza-gar ki maut

ik muddat se ik kuuza-gar
ghuumte chaak par
KHvaahisho.n aarzuu.o.n kii ik
muurtii sii banaataa rahaa
us kaa fan
us kii shohrat kaa baa'is banaa
us ko 'izzat milii aur daulat milii
chain se ho rahii thii basar zindagii
phir achaanak 'ajab sii ik aavaaz dil me.n uThii
aur iThlaa ke bolii
suno ai kuuza-gar
KHuub-suurat bahut hai.n tumhaare sanam
par ye qaamat me.n tum se hai.n kamtar bahut
apne fan kii anaa ke takabbur ko o.Dhe hu.e
kuuza-gar ne ye KHud se kahaa
ek aisii bhii muurat kii taKHliiq ho
jo ujaagar kare qadr-o-qiimat mirii
jis kaa qad aur aakaar mere baraabar kaa ho
tab ga.Dhii us ne muurat pe muurat na.ii
un kaa aakaar ba.Dhtaa gayaa
phir yahaa.n tak ba.Dhaa
us kii sab muurate.n
us ke qad se ba.Dii ho ga.ii.n
chaak chhoTaa thaa aur haath bhii us ke apne puraane hii the
phir hu.aa ye ki vo aaKHirii muurtii
ek tuude se yuu.n TuuT kar gir pa.Dii
chaak aur kuuza-gar
Dher me.n dab ga.e

Dr. Abdullah
Nazm

waba

kuchh apne zo'm-o-takabbur me.n aisaa mast hu.aa
masal rahaa thaa use jo zaraa bhii past hu.aa

Hina Rizvi
Nazm

raqib se!

tuu ne dekhii hai vo peshaanii vo ruKHsaar vo ho.nT
zindagii jin ke tasavvur me.n luTaa dii ham ne
tujh pe uTThii hai.n vo kho.ii hu.ii saahir aa.nkhe.n
tujh ko ma.aluum hai kyuu.n umr ga.nvaa dii ham ne

Faiz Ahmad Faiz
Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now