Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "taraavaT"

Nazm MATCHES FOR "taraavaT"

Nazm

jugnu

ye mast mast ghaTaa, ye bharii bharii barsaat
tamaam hadd-e-nazar tak ghulaavaTo.n kaa samaa.n
fazaa-e-shaam me.n Dore se pa.Dte jaate hai.n
jidhar nigaah kare.n kuchh dhu.aa.n saa uThtaa hai
dahak uThaa hai taraavat kii aa.nch se aakaash
ze-farsh taa-falak a.ng.Daa.iyo.n kaa aalam hai
ye mad-bharii hu.ii purvaa.iyaa.n sanaktii hu.ii
jhinjho.Dtii hai harii Daaliyo.n ko sard havaa

Firaq Gorakhpuri
Nazm

ek husn-farosh se

mohabbat aah terii ye mohabbat raat bhar kii hai
tirii ra.ngiin KHalvat kii lataafat raat bhar kii hai
tire shaadaab ho.nTo.n kii inaayat raat bhar kii hai
tire mastaana boso.n kii halaavat raat bhar kii hai
mah-e-raushan hai tuu aur terii tal.at raat bhar kii hai
gul-e-shabbuu hai tuu aur terii nik.hat raat bhar kii hai
tuu kyaa jaane ki saudaa-e-mohabbat kis ko kahte hai.n
mohabbat aur mohabbat kii lataafat kis ko kahte hai.n
Gam-e-hijraa.n hai kyaa aur soz-e-ulfat kis ko kahte hai.n
junuu.n hotaa hai kaisaa aur vahshat kis ko kahte hai.n
tuu kyaa jaane Gam-e-shab-haa-e-furqat kis ko kahte hai.n
tire iz.haar-e-ulfat kii fasaahat raat bhar kii hai
nigaah-e-mast se dil ko mire ta.Dpaa rahii hai tuu
ada-e-shauq se jazbaat ko bha.Dkaa rahii hai tuu
mujhe bachche kii suurat naaz se phuslaa rahii hai tuu
khilaune de ke boso.n ke mujhe bahlaa rahii hai tuu
magar naadaan hai tuu aah dhokaa khaa rahii hai tuu
tiraa ruu-e-daraKHshaa.n hai ba-zaahir maahtaab-aasaa
tire ho.nTo.n kii shaadaabii hai ra.ngat me.n sharaab-aasaa
tire ruKHsaar kii mahtaabiyaa.n hai.n aaftaab-aasaa
magar in kii haqiiqat hai habaab-aasaa saraab-aasaa
ki Gaaze kii sabaahat us pe chhaa.ii hai naqaab-aasaa
aur is Gaaze kii bhii jhuuTii sabaahat raat bhar kii hai
ye maanaa terii KHalvat kii fazaa ruuh-e-gulistaa.n hai
tirii KHalvat kaa har faanuus ik mahtaab-e-larzaa.n hai
tiraa abreshmii bistar nahii.n ik KHvaab-e-KHandaa.n hai
tiraa jism aafat-e-dil teraa siina aafat-e-jaa.n hai
tuu ik zinda sitaara hai jo tanhaa.ii me.n taabaa.n hai
magar kahte hai.n taaro.n kii hukuumat raat bhar kii hai
lataafat se hai.n KHaalii tere kumhlaa.e hu.e bose
taraavat se hai.n KHaalii tere murjhaa.e hu.e bose
nazaakat se hai.n KHaalii tere ghabraa.e hu.e bose
haqiiqat se hai.n KHaalii tere sharmaa.e hu.e bose
mohabbat se hai.n KHaalii tere ghabraa.e hu.e bose
aur in boso.n kii ye jhuuTii halaavat raat bhar kii hai
tire zahriile bose mujh ko jis dam yaad aa.e.nge
mire ho.nTo.n pe kaale naag ban kar thartharaa.e.nge
pashemaanii ke jazbe mujh ko diivaana banaa.e.nge
mire inkaar ko nafrat ke KHanjar gudgudaa.e.nge
mire dil kii rago.n me.n Gam ke sho.ale tair jaa.e.nge
mai.n samjhaa! aah samjhaa! ye masarrat raat bhar kii hai
mujhe diivaana karne kii masarrat be-KHabar kab tak
rahegii mere dil me.n terii ulfat kaargar kab tak
mujhe mas.huur rakkhegaa ye ishq-e-be-samar kab tak
haqiiqat kii sahar aaKHir na hogii parda-dar kab tak
mujhe maGluub kar ke KHush hai tuu zaalim magar kab tak
tirii ye fat.h merii ye haziimat raat bhar kii hai

Akhtar Shirani
Nazm

dard-e-dil

ilm-o-iimaa.n kii taraavat kaa dilo.n me.n hai guzaar
dho ga.e chashma-e-aKHlaaq se siino.n ke Gubaar

Chakbast Braj Narayan
Nazm

aalam-e-barzaKH

ye to barzaKH hai yahaa.n vaqt kii iijaad kahaa.n
ik baras thaa ki mahiina hame.n ab yaad kahaa.n
vahii taptaa hu.aa garduu.n vahii a.ngaaraa zamii.n
jaa-ba-jaa tishna o aashufta vahii KHaak-nashii.n
shab-garaa.n ziist-garaa.n-tar hii to kar jaatii thii
suud-KHoro.n kii tarah dar pe sahar aatii thii
ziist karne kii mashaqqat hii hame.n kyaa kam thii
mustazaad us pe pirohit kaa junuun-e-taaza
sab ko mil jaa.e gunaaho.n kaa yahii.n KHamyaaza
naa-ravaa-daar fazaa.o.n kii jhulastii hu.ii luu!
mohtasib kitne nikal aa.e gharo.n se har suu
taa.Dte hai.n kisii chehre pe taraavat to nahii.n
ko.ii lab nam to nahii.n bashre pe farhat to nahii.n
kuucha kuucha me.n nikaale hu.e KHuunii diide
gurz uThaa.e hu.e dhamkaate phiraa karte hai.n
nau-e-aadam se bahar-taur riyaa ke taalib
ruuh be-zaar hai kyuu.n chho.D na jaa.e qaalib
zindagii apnii isii taur jo guzrii 'Gaalib'
ham bhii kyaa yaad kare.nge ki KHudaa rakhte the

Fahmida Riaz
Nazm

girya-e-mast

shaayad mire ahbaab ko ma.aluum nahii.n hai
iz.haar masarrat kabhii hotaa hai jo ro kar
sau baar kaa ha.nsnaa bhii use chhuu nahii.n saktaa
aa.nsuu hai.n vo motii
palko.n ke sadaf se jo nikalte hai.n usii dam
jab dil ke samundar me.n
KHushii kaa ko.ii tuufaan bapaa ho
tuufaan samaa saktaa nahii.n sirf ha.nsii me.n
aa.nsuu hii use apnii taraavaT me.n sameTe.n to sameTe.n
aa.nsuu ki jasaamat me.n hai.n qatre se bhii kuchh kam
iz.haar masarrat me.n samundar se ba.De hai.n

Qateel Shifai
Nazm

nazm

KHushii chhuutii nahii.n
dukh bastaa hai
man musaafir hai
jaane kin zamaano.n kii
taraavat khojne
har pal safar me.n rahtaa hai
banjar sar-zamiino.n me.n
KHunuk chashmo.n ke
KHvaab bo detaa hai
ta.abiire.n phuuTtii nahi.n
dukh ug jaataa hai
dukh jab ugne lagtaa hai
man kii saarii namii
le letaa hai
aa.ankho.n kii namii aur KHvaab
dono.n suukh jaate hai.n
aur dukh
bas jaataa hai

Shabnam Ashai
Nazm

maTi tere rang hain gahre

mai.n raakh zada muskuraahaT jantii huu.n
khi.nchtii hai.n lakiire.n
aur nuquush biga.Dte chale jaate hai.n
tumhaarii muskuraahaT kii taraavat kyo.n nahii.n jaatii
ye to aur hii rang kaa gaaraa hai
kis ne guu.ndhii hai merii miTTii
ra.ng hii nahii.n badaltaa
mai.n apne rang me.n
tumhaaraa rang milaatii huu.n
na mai.n rahtii huu.n
aur na tum
aave kaa KHaalii-pan qahqahe lagaane lagtaa hai
Dhale Dhalaa.e
tarshe tarshaa.e
tumhe.n pahchaan.naa mushkil to nahii.n
magar merii pore.n
tumhe.n pahchaan.ne se qaasir hai.n
tumhaaraa vajuud kis miTTii se banaa hai
gaare kii khan-khanaahaT hii nahii.n jaatii

Arifa Shahzad
Nazm

id ka chand

chaa.nd ke ruup me.n paakiiza tamannaa.o.n me.n
KHuub-ruu.ii tirii allaah salaamat rakkhe
ye du.aa hai mirii mahbuub mire shauq kii jaa.n
jab bhii tuu ubhre to aa.nkho.n me.n taraavat rakhe

Nashir Naqvi
Nazm

ghas mein chhupe sanp

mai.n ghaas huu.n
harii-bharii ghaas
paanii mile to harii-bharii na mile to ghaas-phuus
tho.Dii nargisiyat kii ijaazat diijiye
are jab ugtii huu.n to kyaa joban hotaa hai mujh par
na.ii na.ii ghaas par suuraj kii kirne.n pa.Dtii hai.n to
andho.n kii aa.nkho.n me.n bhii taraavat utar aatii hai janaab
aur haa.e vo taaza taaza ghaas kii KHushbuu
par afsos jab der tak baarish na ho to piilii pa.D jaatii huu.n
magar dhuup pahle mujhe sonaa aur phir kundan banaa detii hai
zamiin par iistaada hazaaro.n pahaa.Diyo.n par meraa hii rang cha.Dhaa hotaa hai
aa.nkh rakhne vaale kahte hai.n
sabze se Dhakii pahaa.Diyaa.n kitnii bhii hasiin ho.n
sone se Dhakii pahaa.Diyo.n kii baat hii alag hai
lekin ye mai.n kyaa ba.D haa.nkne baiTh ga.ii
aamdan barsar-e-matlab mai.n saa.npo.n ke baare me.n kuchh kahnaa chaahtii huu.n
saa.np jo ghaas me.n chhup kirdaar karte hai.n
ghaas se Dhake lawn baaG aur park
karo.Do.n insaano.n ko taskiin dete hai.n
bachche ghaas par bhaagte dau.Dte uchhalte kuudte aur loT-poT hote hai.n
javaan mujh par chalte hu.e mohabbato.n kaa iz.haar aur iqraar karte hai.n
umr-rasiida log duur duur tak phaile sabze ko dekh kar
dil kii ghuTan aur ehsaas-e-ziyaa.n bhuul jaate hai.n
mai.n KHush hotii huu.n ki kisii ke kaam aa hii huu.n
lekin merii KHushii dukh aur sharmindagii me.n badal jaatii hai
jab mere andar chhupe hu.e saa.np insaano.n ko Das lete hai.n
sochtii huu.n in saa.npo.n kaa kyaa ilaaj karuu.n
sochtii huu.n in saa.npo.n kaa ko.ii ilaaj hai bhii yaa nahii.n
sochtii huu.n saa.np mujhii me.n to nahii.n chhupe
vo to zamiin ke kone kone me.n maujuud hai.n
us ke andar bhii us ke baahar bhii
sochtii huu.n jis tezii se saa.npo.n kii ta.adaad ba.Dh rahii hai
kal ye saarii zamiin par na chhaa jaa.e.n
sochtii huu.n ko.ii sailaab hii aa jaa.e jo unhe.n bahaa le jaa.e
phir KHayaal aataa hai ye bah kar jaa.e.nge kahaa.n
aaKHir ek na ek din paanii utregaa aur ye dobaara KHushkii par cha.Dh aa.e.nge
aur mere hii daaman me.n panaah le le.nge
sochtii huu.n KHudaa ne mujhe banaayaa thaa to unhe.n kyuu.n banaayaa
aur agar banaayaa hii thaa to un ke andar zahar kyuu.n bhar diyaa
kyuu.n ho ga.e ye insaan ke dushman
magar saare saa.np to zahriile nahii.n hote
aur kyaa insaano.n ke andar bhii zahr nahii.n bhartaa jaa rahaa hai ab
sochtii huu.n insaan saa.np se Dartaa hai to
saa.np bhii insaan se Dartaa hai
insaan ne saa.np me.n shaitaan kii shakl dekhii thii
jis ne use jannat se nikalvaa diyaa thaa
insaan ke andar shaitaan se baraabar utarne kii talab rakh dii ga.ii hai
jahaa.n kahii.n saa.np ko dekhtaa hai use maarne kii koshish kartaa hai
saa.np ko bhii insaan ke us azlii-o-abdii iraade kii KHabar hai
isii liye to insaan kii aahaT yaa buu paate hii bhaag kha.Daa hotaa hai
KHaraabii to merii vaj.h se hotii hai
ghaas me.n chhupaa saa.np insaan ko dekh kar bhaagtaa hai
lekin insaan use dekh nahii.n paataa aur naa-daanista us kaa paa.nv saa.np par pa.D jaataa hai
aur saa.np apnii jaan bachaane ke liye use Das letaa hai
yuu.n mai.n zariiya ban jaatii huu.n insaan kii maut kaa
mujhe apnaa ye kirdaar hargiz pasand nahii.n
sochtii huu.n insaano.n aur saa.npo.n ne aapas me.n la.Dnaa hii hai to
merii aa.D me.n na la.De.n
sa.Dko.n par la.De.n gharo.n ke andar la.De.n
chaTyal maidaano.n me.n la.De.n sahraa.o.n me.n la.De.n
phir KHayaal aataa hai in jag.ho.n par to pahle hii ghamsaan kii la.Daa.ii ho rahii hai
insaan insaan se la.D rahaa hai
aur us ne tarah tarah ke
mohlik kiimiyaa.ii jauharii aur nafsiyaatii hathiyaar iijaad kar liye hai.n
ek duusre ko dukh dene aur maarne ke liye

Mohammad Haneef Rame
Nazm

aatma tarang

phuulo.n kii lataafat jhuuTii hai
shabnam kii taraavat jhuuTii hai
ye prem ye chaahat jhuuTii hai
ye ruup ye rangat jhuuTii hai
jis des me.n aanii raaj nahii.n
us des me.n chal sansaar kare.n

Basheerunnisaa Begam Basheer
Nazm

kin sochon mein Dube ho

haa.n
mai.n usii paanii kii buu.nd huu.n
jo tumhaare kamre ke kone me.n pa.Dii
suraahii me.n rahtaa thaa aaKHir-kaar
tumhaaraa samundar
na jaane kitne dariyaa.o.n kaa
pyaasaa thaa aur
jag jag phirtaa thaa
mai.n
har shaam
suraahii kii hade.n paar kartii
tumhaare ho.nT
taraavat ke zaa.iqe lete
jag jag phirne kii
thakan miT jaatii
par har jag se laayaa gayaa gyaan
tumhe.n svayam bhagvaan banaa gayaa
phir tumhaare
pathriile haath uThe
kone me.n pa.Dii suraahii
to.D baiThe aur
choT
paanii ko lagii
buu.nd buu.nd dard se ta.Dap uThii
sar paTakne lagii
tum apnii suukhii aatmaa ko le chalo yahaa.n se
kin socho.n me.n Duube ho
mai.n usii paanii kii buu.nd huu.n

Shabnam Ashai
Nazm

waqt ek mahbub hai

ajab mahbuubiyat sii vaqt kii fitrat me.n hotii hai
kabhii dil ko lubhaataa hai
to phir us kii inaayat kaa tasalsul kam nahii.n hotaa
musalsal abr-e-rahmat kii tarah
dil kii daraa.Do.n me.n bhii rastaa hai
mohabbat kii piyaasii sarzamii.n sairaab kartaa hai
kabhii din kii sabaahat zeb-e-tan kar ke
ujaale baa.nTtaa hai
aur kabhii kaalii ridaa.e.n o.Dh kar
shab ke sukuut-e-jaa.n-fizaa me.n saa.ns letaa hai
kabhii ye paas aa kar baiTh jaataa hai
ye kahtaa hai
chalo guzre zamaane kii mohabbat yaad karte hai.n
to mere zehn-aa.ngan me.n
yaade.n bachpanaa aur phir la.Dakpan o.Dh kar
itraa ke chaltii hai.n
ko.ii dil ke kivaa.Do.n ko
achaanak niim-vaa kar ke zaraa saa muskuraataa hai
mirii banjar zamiino.n par taraavat aatii-jaatii hai
kasaafat dhultii jaatii hai
kabhii ye chalte chalte dau.D kar aage nikaltaa hai
ki aa.o aur mujhe chhuu lo
magar mai.n naa-rasaa.ii-aashnaa
us se hamesha do-qadam piichhe hii rahtaa huu.n
kabhii baahe.n gale me.n Daal detaa hai
ba.Dii mahjuub sii nazro.n se taktaa hai
to Gam kii sa.nglaaKHii me.n daraa.De.n Daal detaa hai
kabhii ik sham.a raushan kar ke kahtaa hai
lapaktii dau.Dtii is zindagii me.n
aaj tum kitne baras ke ho
achaanak ruuTh jaataa hai
ko.ii minnat ko.ii zaarii nahii.n suntaa
kisii suurat nahii.n mantaa
use apnaa banaa.o bhii
to ye apnaa nahii.n rahtaa
kabhii ye dastaras me.n hii nahii.n rahtaa
havaa par paa.nv rakhtaa hai
KHalaa me.n phail jaataa hai
had-e-imkaan se baahar nikaltaa hai
makaa.n se laa-makaa.n tak jis qadar vus.at mayassar hai
vahaa.n tak jhilmilaataa hai
mai.n sar-taa-paa tahayyur huu.n
magar us kii tilismii qaid me.n KHush huu.n
usii zindaa.n me.n rahtaa huu.n
usii me.n saa.ns letaa huu.n

Salman Basit
Nazm

fawwara

aa.o chale.n favvaara dekhe.n
paanii kaa nazzaara dekhe.n
dekh kar manzar pyaaraa pyaaraa
jii KHush ho jaa.e hamaaraa
favvaara hai hauz ke andar
jaise ho taalaab me.n mandar
hauz ke chaaro.n jaanib gamle
KHuub hai.n qariine se rakkhe
gamlo.n me.n paudo.n ke patte
aa.ankho.n ko hai.n taraavat dete
favvaare kaa ubalnaa dekho
phir paanii kaa uchhalnaa dekho
yuu.n u.Dte hai.n paanii ke qatre
jaise ko.ii mahtaabii chhuuTe
paudo.n pe qatro.n kaa bikharnaa
patto.n kaa dhul dhul ke nikharnaa
kaam ye kab ho aur kisii se
baaG ne raunaq paa.ii isii se
'nayyar' dekhne aa.o tum bhii
aa.o dil bahlaa.o tum bhii

Mohammad Shafiuddin Nayyar
Nazm

chae

chaa.e ko chaa.e nahii.n aab-e-taraavat kahiye
ik junuu.n kahiye ise yaa ise 'aadat kahiye

Salim Husain
Nazm

grihasti

ik tazabzub kii saraa.e
saa.ato.n ke mel se
bojhal magar raushan chhate.n diivaar-o-dar
aur raah-darii me.n ubhartii
ajnabii qadmo.n kii
halkii tez chaap
aur KHaamoshii kaa lams jaise saa.ibaa
phir sahn me.n aa kar utarte
qaafilo.n kii faaslo.n se chor aavaaze.n
safar me.n yuu.n achaanak aane vaale
is pa.Daav kii
lipaTtii mezbaa.n ThanDak se
sehar-aagii.n taraavat paa rahii hai.n
sii.Dhiyo.n se duur
daalaano.n ke goshe me.n kha.Daa ik aks
apne ham-nashiino.n
ham-rakaabo.n kaa amiir
un kaa muhibbii
phir bhii
is tashkiik kii
billor saa.at me.n
har ik se bad-gumaa.n
is soch me.n Galtaa.n
ki jaise
is safar ho raa.egaa.n

Sajjad Babar
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

tarana-e-hindi

saare jahaa.n se achchhaa hindostaa.n hamaaraa
ham bulbule.n hai.n is kii ye gulsitaa.n hamaaraa
Gurbat me.n ho.n agar ham rahtaa hai dil vatan me.n
samjho vahii.n hame.n bhii dil ho jahaa.n hamaaraa
parbat vo sab se uu.nchaa ham-saaya aasmaa.n kaa
vo santarii hamaaraa vo paasbaa.n hamaaraa
godii me.n kheltii hai.n is kii hazaaro.n nadiyaa.n
gulshan hai jin ke dam se rashk-e-jinaa.n hamaaraa
ai aab-ruud-e-ga.ngaa vo din hai yaad tujh ko
utraa tire kinaare jab kaarvaa.n hamaaraa
maz.hab nahii.n sikhaataa aapas me.n bair rakhnaa
hindii hai.n ham vatan hai hindostaa.n hamaaraa
yuunaan o misr o ruumaa sab miT ga.e jahaa.n se
ab tak magar hai baaqii naam-o-nishaa.n hamaaraa
kuchh baat hai ki hastii miTtii nahii.n hamaarii
sadiyo.n rahaa hai dushman daur-e-zamaa.n hamaaraa
'iqbaal' ko.ii mahram apnaa nahii.n jahaa.n me.n
maaluum kyaa kisii ko dard-e-nihaa.n hamaaraa

Allama Iqbal
Nazm

tarana-e-milli

chiin-o-arab hamaaraa hindostaa.n hamaaraa
muslim hai.n ham vatan hai saaraa jahaa.n hamaaraa
tauhiid kii amaanat siino.n me.n hai hamaare
aasaa.n nahii.n miTaanaa naam-o-nishaa.n hamaaraa
duniyaa ke but-kado.n me.n pahlaa vo ghar KHudaa kaa
ham is ke paasbaa.n hai.n vo paasbaa.n hamaaraa
teGo.n ke saa.e me.n ham pal kar javaa.n hu.e hai.n
KHanjar hilaal kaa hai qaumii nishaa.n hamaaraa
maGrib kii vaadiyo.n me.n guu.njii azaa.n hamaarii
thamtaa na thaa kisii se sail-e-ravaa.n hamaaraa
baatil se dabne vaale ai aasmaa.n nahii.n ham
sau baar kar chukaa hai tuu imtihaa.n hamaaraa
ai gulistaan-e-undulus vo din hai.n yaad tujh ko
thaa terii Daaliyo.n me.n jab aashiyaa.n hamaaraa
ai mauj-e-dajla tuu bhii pahchaantii hai ham ko
ab tak hai teraa dariyaa afsaana-KHvaa.n hamaaraa
ai arz-e-paak terii hurmat pe kaT mare ham
hai KHuu.n tirii rago.n me.n ab tak ravaa.n hamaaraa
saalaar-e-kaarvaa.n hai miir-e-hijaaz apnaa
is naam se hai baaqii aaraam-e-jaa.n hamaaraa
'iqbaal' kaa taraana baa.ng-e-daraa hai goyaa
hotaa hai jaada-paimaa phir kaarvaa.n hamaaraa

Allama Iqbal
Nazm

saqi-nama

hu.aa KHema-zan kaarvaan-e-bahaar
iram ban gayaa daaman-e-koh-saar
gul o nargis o sosan o nastaran
shahiid-e-azal laala-KHuunii.n kafan
jahaa.n chhup gayaa parda-e-ra.ng me.n
lahuu kii hai gardish rag-e-sang me.n
fazaa niilii niilii havaa me.n suruur
Thaharte nahii.n aashiyaa.n me.n tuyuur
vo juu-e-kohistaa.n uchaktii hu.ii
aTaktii lachaktii saraktii hu.ii
uchhaltii phisaltii sambhaltii hu.ii
ba.De pech khaa kar nikaltii hu.ii
ruke jab to sil chiir detii hai ye
pahaa.Do.n ke dil chiir detii hai ye
zaraa dekh ai saaqii-e-laala-faam
sunaatii hai ye zindagii kaa payaam
pilaa de mujhe vo mai-e-parda-soz
ki aatii nahii.n fasl-e-gul roz roz
vo mai jis se raushan zamiir-e-hayaat
vo mai jis se hai masti-e-kaa.enaat
vo mai jis me.n hai soz-o-saaz-e-azal
vo mai jis se khultaa hai raaz-e-azal
uThaa saaqiyaa parda is raaz se
la.Daa de mamuule ko shahbaaz se
zamaane ke andaaz badle ga.e
nayaa raag hai saaz badle ga.e
hu.aa is tarah faash raaz-e-fara.ng
ki hairat me.n hai shiisha-baaz-e-fara.ng
puraanii siyaasat-garii KHvaar hai
zamii.n miir o sultaa.n se be-zaar hai
gayaa daur-e-sarmaaya-daarii gayaa
tamaashaa dikhaa kar madaarii gayaa
giraa.n KHvaab chiinii sambhalne lage
himaala ke chashme ubalne lage
dil-e-tuur-e-siinaa-o-faaraan do-niim
tajallii kaa phir muntazir hai kaliim
musalmaa.n hai tauhiid me.n garam-josh
magar dil abhii tak hai zunnaar-posh
tamaddun tasavvuf sharii.at-e-kalaam
butaan-e-ajam ke pujaarii tamaam
haqiiqat KHuraafaat me.n kho ga.ii
ye ummat rivaayaat me.n kho ga.ii
lubhaataa hai dil ko kalaam-e-KHatiib
magar lazzat-e-shauq se be-nasiib
bayaa.n is kaa mantiq se suljhaa hu.aa
luGat ke bakhe.Do.n me.n uljhaa hu.aa
vo suufii ki thaa KHidmat-e-haq me.n mard
mohabbat me.n yaktaa hamiiyat me.n fard
ajam ke KHayaalaat me.n kho gayaa
ye saalik maqaamaat me.n kho gayaa
bujhii ishq kii aag andher hai
musalmaa.n nahii.n raakh kaa Dher hai
sharaab-e-kuhan phir pilaa saaqiyaa
vahii jaam gardish me.n laa saaqiyaa
mujhe ishq ke par lagaa kar u.Daa
mirii KHaak jugnuu banaa kar u.Daa
KHirad ko Gulaamii se aazaad kar
javaano.n ko piiro.n kaa ustaad kar
harii shaaKH-e-millat tire nam se hai
nafas is badan me.n tire dam se hai
ta.Dapne pha.Dakne kii taufiiq de
dil-e-murtazaa soz-e-siddiiq de
jigar se vahii tiir phir paar kar
tamannaa ko siino.n me.n bedaar kar
tire aasmaano.n ke taaro.n kii KHair
zamiino.n ke shab zinda-daaro.n kii KHair
javaano.n ko soz-e-jigar baKHsh de
miraa ishq merii nazar baKHsh de
mirii naav girdaab se paar kar
ye saabit hai to is ko sayyaar kar
btaa mujh ko asraar-e-marg-o-hayaat
ki terii nigaaho.n me.n hai kaa.enaat
mire diida-e-tar kii be-KHvaabiyaa.n
mire dil kii poshiida betaabiyaa.n
mire naala-e-niim-shab kaa niyaaz
mirii KHalvat o anjuman kaa gudaaz
uma.nge.n mirii aarzuu.e.n mirii
ummiide.n mirii justuju.e.n mirii
mirii fitrat aa.iina-e-rozgaar
Gazaalaan-e-afkaar kaa murG-zaar
miraa dil mirii razm-gaah-e-hayaat
gumaano.n ke lashkar yaqii.n kaa sabaat
yahii kuchh hai saaqii mataa-e-faqiir
isii se faqiirii me.n huu.n mai.n amiir
mire qaafile me.n luTaa de ise
luTaa de Thikaane lagaa de ise
damaa-dam ravaa.n hai yam-e-zindagii
har ik shai se paidaa ram-e-zindagii
isii se hu.ii hai badan kii numuud
ki sho'le me.n poshiida hai mauj-e-duud
giraa.n garche hai sohbat-e-aab-o-gil
KHush aa.ii ise mehnat-e-aab-o-gil
ye saabit bhii hai aur sayyaar bhii
anaasir ke phando.n se be-zaar bhii
ye vahdat hai kasrat me.n har dam asiir
magar har kahii.n be-chugo.n be-naziir
ye aalam ye but-KHaana-e-shash-jihaat
isii ne taraashaa hai ye somnaat
pasand is ko takraar kii KHuu nahii.n
ki tuu mai.n nahii.n aur mai.n tuu nahii.n
man o tuu se hai anjuman-aafrii.n
magar ain-e-mahfil me.n KHalvat-nashii.n
chamak us kii bijlii me.n taare me.n hai
ye chaa.ndii me.n sone me.n paare me.n hai
usii ke bayaabaa.n usii ke babuul
usii ke hai.n kaa.nTe usii ke hai.n phuul
kahii.n us kii taaqat se kohsaar chuur
kahii.n us ke phande me.n jibra.iil o huur
kahii.n jaza hai shaahiin siimaab ra.ng
lahuu se chakoro.n ke aaluuda chang
kabuutar kahii.n aashiyaane se duur
pha.Daktaa hu.aa jaal me.n naa-subuur
fareb-e-nazar hai sukuun o sabaat
ta.Daptaa hai har zarra-e-kaa.enaat
Thahartaa nahii.n kaarvaan-e-vajuud
ki har lahz hai taaza shaan-e-vajuud
samajhtaa hai tuu raaz hai zindagii
faqat zauq-e-parvaaz hai zindagii
bahut us ne dekhe hai.n past o buland
safar us ko manzil se ba.Dh kar pasand
safar zindagii ke liye barg o saaz
safar hai haqiiqat hazar hai majaaz
ulajh kar sulajhne me.n lazzat use
ta.Dapne pha.Dakne me.n raahat use
hu.aa jab use saamnaa maut kaa
kaThin thaa ba.Daa thaamnaa maut kaa
utar kar jahaan-e-makaafaat me.n
rahii zindagii maut kii ghaat me.n
mazaaq-e-du.ii se banii zauj zauj
uThii dasht o kohsaar se fauj fauj
gul is shaaKH se TuuTte bhii rahe
isii shaaKH se phuuTte bhii rahe
samajhte hai.n naadaa.n use be-sabaat
ubhartaa hai miT miT ke naqsh-e-hayaat
ba.Dii tez jaulaa.n ba.Dii zuud-ras
azal se abad tak ram-e-yak-nafs
zamaana ki zanjiir-e-ayyaam hai
damo.n ke ulaT-pher kaa naam hai
ye mauj-e-nafs kyaa hai talvaar hai
KHudii kyaa hai talvaar kii dhaar hai
KHudii kyaa hai raaz-daruun-hayaat
KHudii kyaa hai bedaari-e-kaa.enaat
KHudii jalva badmast o KHalvat-pasand
samundar hai ik buu.nd paanii me.n band
a.ndhere ujaale me.n hai taabnaak
man o tuu me.n paidaa man o tuu se paak
azal us ke piichhe abad saamne
na had us ke piichhe na had saamne
zamaane ke dariyaa me.n bahtii hu.ii
sitam us kii maujo.n ke sahtii hu.ii
tajassus kii raahe.n badaltii hu.ii
damaa-dam nigaahe.n badaltii hu.ii
subuk us ke haatho.n me.n sa.ng-e-giraa.n
pahaa.D us kii zarbo.n se reg-e-ravaa.n
safar us kaa anjaam o aaGaaz hai
yahii us kii taqviim kaa raaz hai
kiran chaa.nd me.n hai sharar sang me.n
ye be-ra.ng hai Duub kar rang me.n
ise vaasta kyaa kam-o-besh se
nasheb o faraaz o pas-o-pesh se
azal se hai ye kashmakash me.n asiir
hu.ii KHaak-e-aadam me.n suurat-paziir
KHudii kaa nasheman tire dil me.n hai
falak jis tarah aa.nkh ke til me.n hai
KHudii ke nigahbaa.n ko hai zahr-naab
vo naa.n jis se jaatii rahe us kii aab
vahii naa.n hai us ke liye arjumand
rahe jis se duniyaa me.n gardan buland
KHudii faal-e-mahmuud se darguzar
KHudii par nigah rakh ayaazii na kar
vahii sajda hai laa.iq-e-ehtimaam
ki ho jis se har sajda tujh par haraam
ye aalam ye ha.ngaama-e-ra.ng-o-saut
ye aalam ki hai zer-e-farmaan-e-maut
ye aalam ye but-KHaana-e-chashm-o-gosh
jahaa.n zindagii hai faqat KHurd o nosh
KHudii kii ye hai manzil-e-avvalii.n
musaafir ye teraa nasheman nahii.n
tirii aag is KHaak-daa.n se nahii.n
jahaa.n tujh se hai tuu jahaa.n se nahii.n
ba.Dhe jaa ye koh-e-giraa.n to.D kar
tilism-e-zamaan-o-makaa.n to.D kar
KHudii sher-e-maulaa jahaa.n us kaa said
zamii.n us kii said aasmaa.n us kaa said
jahaa.n aur bhii hai.n abhii be-numuud
ki KHaalii nahii.n hai zamiir-e-vajuud
har ik muntazir terii yalGaar kaa
tirii shauKHi-e-fikr-o-kirdaar kaa
ye hai maqsad gardish-e-rozgaar
ki terii KHudii tujh pe ho aashkaar
tuu hai faatah-e-aalam-e-KHuub-o-zisht
tujhe kyaa bataa.uu.n tirii sarnavisht
haqiiqat pe hai jaama-e-harf-e-ta.ng
haqiiqat hai aa.iina-e-guftaar-e-za.ng
farozaa.n hai siine me.n sham-e-nafas
magar taab-e-guftaar rakhtii hai bas
agar yak-sar-e-muu-e-bartar param
faroG-e-tajallii ba-sozad param

Allama Iqbal
Nazm

tarana

darbaar-e-vatan me.n jab ik din sab jaane vaale jaa.e.nge
kuchh apnii sazaa ko pahu.nche.nge, kuchh apnii jazaa le jaa.e.nge

Faiz Ahmad Faiz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now