Search result for "vaj.h" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "vaj.h"

Nazm MATCHES FOR "vaj.h"

Nazm

wa-yabqa-wajh-o-rabbik (hum dekhenge)

ham dekhe.nge
laazim hai ki ham bhii dekhe.nge
vo din ki jis kaa va.ada hai
jo lauh-e-azal me.n likhkhaa hai
jab zulm-o-sitam ke koh-e-giraa.n
ruu.ii kii tarah u.D jaa.e.nge
ham mahkuumo.n ke paa.nv-tale
jab dhartii dha.D-dha.D dha.Dkegii
aur ahl-e-hakam ke sar-uupar

Faiz Ahmad Faiz

Nazm

itna malum hai!

naam bhuule se jo meraa kahii.n aayaa hogaa
Gair-mahsuus tariiqe se vo chau.nkaa hogaa
ek jumle ko ka.ii baar sunaayaa hogaa
baat karte hu.e sau baar vo bhuulaa hogaa
ye jo la.Dkii na.ii aa.ii hai kahii.n vo to nahii.n
us ne har chehra yahii soch ke dekhaa hogaa
jaan-e-mahfil hai magar aaj faqat mere baGair
haa.e kis darja vahii bazm me.n tanhaa hogaa
kabhii sannaaTo.n se vahshat jo hu.ii hogii use
us ne be-saaKHta phir mujh ko pukaaraa hogaa
chalte chalte ko.ii maanuus sii aahaT paa kar
dosto.n ko bhii kis uzr se rokaa hogaa
yaad kar ke mujhe nam ho ga.ii ho.ngii palke.n
''aa.nkh me.n pa.D gayaa kuchh'' kah ke ye Taalaa hogaa
aur ghabraa ke kitaabo.n me.n jo lii hogii panaah
har satar me.n miraa chehra ubhar aayaa hogaa
jab milii hogii use merii alaalat kii KHabar
us ne aahista se diivaar ko thaamaa hogaa
soch kar ye ki bahal jaa.e pareshaanii-e-dil
yuu.nhii be-vaj.h kisii shaKHs ko rokaa hogaa!

Parveen Shakir

Nazm

andesha

baat niklegii to phir duur talak jaa.egii
log be-vaj.h udaasii kaa sabab puuchhe.nge
ye bhii puuchhe.nge ki tum itnii pareshaa.n kyuu.n ho
jagmagaate hu.e lamho.n se gurezaa.n kyuu.n ho
u.ngliyaa.n uTThe.ngii suukhe hu.e baalo.n kii taraf
ik nazar dekhe.nge guzre hu.e saalo.n kii taraf
chuu.Diyo.n par bhii ka.ii tanz kiye jaa.e.nge
kaa.npte haatho.n pe bhii fiqre kase jaa.e.nge
phir kahe.nge ki ha.nsii me.n bhii KHafaa hotii hai.n
ab to 'ruuhii' kii namaaze.n bhii qazaa hotii hai.n
log zaalim hai.n har ik baat kaa ta.ana de.nge
baato.n baato.n me.n miraa zikr bhii le aa.e.nge
in kii baato.n kaa zaraa saa bhii asar mat lenaa
varna chehre ke ta.assur se samajh jaa.e.nge
chaahe kuchh bhii ho savaalaat na karnaa un se
mere baare me.n ko.ii baat na karnaa un se
baat niklegii to phir duur talak jaa.egii

Kafeel Aazar Amrohvi

Nazm

nazm

safed shirt thii tum sii.Dhiyo.n pe baiThe the
mai.n jab class se niklii thii muskuraate hu.e
hamaarii pahlii mulaaqaat yaad hai naa tumhe.n
ishaare karte the tum mujh ko aate jaate hu.e
tamaam raat vo aa.nkhe.n na bhuultii thii.n mujhe
ki jin me.n mere liye 'izzat aur vaqaar dikhe
mujhe ye duniyaa bayaabaan thii magar ik din
tum ek baar dikhe aur be-shumaar dikhe
mujhe ye Dar thaa ki tum bhii kahii.n vahii to nahii.n
jo jism par hii tamanna ke daaG chho.Dte hai.n
KHudaa kaa shukr hai ki tum un se muKHtalif nikle
jo phuul to.D ke Gusse me.n baaG chho.Dte hai.n
ziyaada vaqt na guzraa thaa is ta'alluq ko
ki is ke baa'd vo lamha qarii.n qarii.n aaya
chhu.aa thaa tum ne mujhe aur mujhe mohabbat par
yaqiin aaya thaa lekin kabhii nahii.n aaya
phir us ke baa'd meraa nashsha-e-sukuut gayaa
mai.n kashmakash me.n thii tum mere kaun lagte ho
mai.n amritaa tumhe.n sochuu.n to mere saahir ho
mai.n faarehaa tumhe.n dekhuu.n to jaun lagte ho
ham ek saath rahe aur hame.n pata na chalaa
ta'alluqaat kii had-bandiyaa.n bhii hotii hai.n
mohabbato.n ke safar me.n jo raaste hai.n vahii
havas kii samt me.n pagDa.nDiyaa.n bhii hotii hai.n
tumhaare vaaste jo mere dil me.n hai 'haafii'
tumhe.n mai.n kaash ye sab kuchh kabhii bataa paatii
aur ab maziid na milne kii ko.ii vaj.h nahii.n
bas apnii maa.n se mai.n aa.nkhe.n nahii.n milaa paatii

Tahzeeb Hafi

Nazm

walid sahab ke nam

vo maa.n ke kahne pe kuchh ro.ab mujh pe rakhtaa hai
yahii hai vaj.h mujhe chuumte jhijhaktaa hai
vo aashnaa mire har karb se rahe har dam
jo khul ke ro nahii.n paataa magar sisaktaa hai

Tahir Shaheer

Nazm

mujhe mat batana

mujhe mat bataanaa
ki tum ne mujhe chho.Dne kaa iraada kiyaa thaa
to kyuu.n
aur kis vaj.h se
abhii to tumhaare bichha.Dne kaa dukh bhii nahii.n kam hu.aa
abhii to mai.n
baato.n ke va.ado.n ke shahr-e-tilismaat me.n
aa.nkh par KHush-gumaanii kii paTTii liye
tum ko pe.Do.n ke piichhe daraKHto.n ke jhunD
aur diivaar kii pusht par Dhuu.nDne me.n magan huu.n
kahii.n par tumhaarii sadaa aur kahii.n par tumhaarii mahak
mujh pe ha.nsne me.n masruuf hai
abhii tak tumhaarii ha.nsii se nabard-aazmaa huu.n
aur is ja.ng me.n
meraa hathiyaar
apnii vafaa par bharosa hai aur kuchh nahii.n
use kund karne kii koshish na karnaa
mujhe mat bataanaa.....

Parveen Shakir

Nazm

aadha kamra

baaqii aadhe kamre me.n kyaa ho rahaa hai
la.Dkiyaa.n
kyaa harf chun rahii hai.n
isti.aare ke lihaaz se
haraam ke bachche gin rahii hai.n
la.Dkiyo.n ke naam qaafiye kii vaj.h se
sartre ziyaada nahii.n rakh paa rahaa hai
is liye un kii Gazal chhoTii pa.D rahii hai
zamiin ke lihaaz se naqqaad
apne kamro.n se ukha.Dne ke liye tayyaar nahii.n
lekin unho.n ne vaada kiyaa hai
saare thinker ikaTThe ho.nge
aur bataa.e.nge ki society kiyaa hai
aur kyuu.n hai
vaise havaa.o.n kaa kaam hai chalte phirte rahnaa
duur-andesh kii aa.nkh kaisii hai
cigarette ke kash se ba.Dii hai
vo gha.De se patthar nikaal kar gin rahe the
aur kah rahe the mai.n is gha.De kaa baanii huu.n
chaa.e ke saath Giibat ke cake
zaruurii hote hai.n
aur chuGal-KHorii kii kitaab kaa diibaacha
har shaKHs likhtaa hai
zabaano.n me.n bujhe tiiro.n se maqtuul zinda ho rahe hai.n
ba.Daa iblaaG hai
society ke chehre pe vo zabaan chaltii hai
ki ek ek bande ke paas
kitaabo.n kii riyaasat bande se ziyaada hai

Sara Shagufta

Nazm

izhaar

yuu.nhii be-vaj.h ThiTakne kii zaruurat kyaa thii
dam-e-ruKHsat mai.n agar yaad na aayaa hotaa

Ahmad Nadeem Qasmi

Nazm

madam

aap be-vaj.h pareshaan sii kyuu.n hai.n maadaam
log kahte hai.n to phir Thiik hii kahte ho.nge

Sahir Ludhianvi

Nazm

eid

magar ye eid kaa din bhii to ik haqiiqat hai
ki vaj.h-e-eid samajhnaa bhii ik ibaadat hai
chalo ki rote hu.o.n ko ha.nsaa ke eid manaa.e.n
kisii ke dard ko apnaa banaa ke eid manaa.e.n
dilo.n se apne adaavat miTaa ke eid manaa.e.n
kisii ke lab pe tabassum sajaa ke eid manaa.e.n

Shifa Kajgavnwi

Nazm

lab pe pabandi to hai

hai jinhe.n sab se ziyaada daavaa-e-hubbulvatan
aaj un kii vaj.h se hubb-e-vatan rusvaa to hai

Sahir Ludhianvi

Nazm

hello best friend

baa.njh dhartii ke kaleje pe uge misl-e-chaman
mujh se be-rang ko KHush-rang banaane me.n magan
sharmsaarii ke a.ndhere me.n ra.uunat kii kiran
ai mire dost mirii jaan mirii vaj.h-e-suKHan

Balmohan panday

Nazm

tin manzar

tasavvur
shoKHiyaa.n muztar-nigaah-e-diida-e-sarshaar me.n
ishrate.n KHvaabiida ra.ng-e-Gaaza-e-ruKHsaar me.n
surKH ho.nTo.n par tabassum kii ziyaa.e.n jis tarah
yaasman ke phuul Duube ho.n mai-e-gulnaar me.n
saamnaa
chhantii hu.ii nazro.n se jazbaat kii duniyaa.e.n
be-KHvaabiyaa.n afsaane mahtaab tamannaa.e.n
kuchh uljhii hu.ii baate.n kuchh bahke hu.e naGme
kuchh ashk jo aa.nkho.n se be-vaj.h chhalak jaa.e.n
ruKHsat
fasurda ruKH labo.n par ik niyaaz aamez KHaamoshii
tabassum muzmahil thaa marmarii.n haatho.n me.n larzish thii
vo kaisii be-kasii thii terii pur-tamkii.n nigaaho.n me.n
vo kyaa dukh thaa tirii sahmii hu.ii KHaamosh aaho.n me.n

Faiz Ahmad Faiz

Nazm

abu-talib ke beTe

jabiin-e-vaqt par likkhii hu.ii sachchaa.iyaa.n raushan rahii hai.n
taa-abad raushan rahe.ngii
KHudaa shaahid hai aur vo zaat shaahid hai ki jo vaj.h-e-asaas-e-anafas-o-aafaaq hai
aur KHair kii taariiKH kaa vo baab-e-avval hai
abad tak jis kaa faizaan-e-karam jaarii rahegaa
yaqii.n ke aagahii ke raushnii ke qaafile har daur me.n aate rahe hai.n
taa-abad aate rahe.nge
abuu-taalib ke beTe hifz-e-naamuus-e-risaalat kii rivaayat ke amii.n the
jaan denaa jaante the
vo muslim ho.n ki vo abbaas ho.n aun o mohamaad ho.n alii-akbar ho.n qaasim ho.n alii-asGar ho.n
haq pahchaante the
lashkar-e-baatil ko kab gardaante the
abuu-taalib ke beTe sar-buriida ho ke bhii ailaan-e-haq karte rahe hai.n
abuu-taalib ke beTe paa-ba-jaulaa.n ho ke bhii ailaan-e-haq karte rahe hai.n
abuu-taalib ke beTe sarf-e-zindaa.n ho ke bhii ailaan-e-haq karte rahe hai.n
madiina ho najaf ho karbalaa ho kaazimain o saamira ho mash.had o baGdaad ho
aal-e-abuu-taalib ke qadmo.n ke nishaa.n
insaaniyat ko us kii manzil kaa pata dete rahe hai.n taa-abad dete rahe.nge
abuu-taalib ke beTo.n aur Gulmaan-e-alii-ibn-e-abii-taalib me.n ik nisbat rahii hai
mohabbat kii ye nisbat umar bhar qaa.em rahegii
taa-abad qaa.em rahegii

Iftikhar Arif

Nazm

KHaka

ajab ek uljhan hai
aa.nkhe.n banaa.uu.n yaa rahne hii duu.n
tere KHaake me.n mai.n tere chehre ke azlaat ko khii.nch kar
vo tiraa ik tabassum banaane kii koshish ko puuraa agar kar bhii luu.n
par jo tujh me.n zamaano.n kii tahziib kii ik kahaanii bunii hai
tire laa-shu.uurii ravayyo.n me.n arbo.n baras ke hasii.n irtiqaa kaa
vo jo ik fasaana
D n a kii bases me.n tartiib paa kar
tujhe to banaataa hai vo ik fasaana
vo KHaako.n me.n aaKHir ko kaise sunaa.uu.n
ai vaj.h-e-suKHan
jaan-o-rang-e-Gazal
kaa.enaatii mohabbat kaa radd-e-amal
ai udaasii ke hone me.n vaahid KHalal
tujh se naadim huu.n mai.n
mere vahm-o-gumaa.n me.n qalam me.n mire aur qirtaas me.n
teraa honaa musalsal nahii.n ho rahaa
merii baavanv.iin koshish me.n bhii ab talak
teraa KHaaka mukammal nahii.n ho rahaa

Sohaib Mugheera Siddiqi

Nazm

ye basti meri basti hai

hamaare is mohalle ke sire par aaKHirii ghar maa.e kaa thaa
yuu.n to kahlaatii thii maa.e boha.D vaalii
lekin us ke ghar ke aa.ngan me.n faqat ik niim hotaa thaa
ko.ii jab puuchhtaa maa.e se vajh-e-tasmiya is naam kii
to vo bahut dhiire se ha.nstii aur kahtii thii
ajii vo ba.D kaa uu.nchaa pe.D to mai.n huu.n

Ishrat Afreen

Nazm

ek alamat

apnii hassaas subuk naak se ruumaal haTaa.o
khaad me.n mahz ta.affun hii nahii.n KHez bhii hai
zauq darkaar hai qatre ko guhar karne me.n
ye mai-e-naab pur-asraar bhii hai tez bhii hai
kuchh to hai vaj.h-e-dil-aazaarii-o-aaha.ng-o-satez
varna ye tab-e-KHush-aKHlaaq-o-kam-aamez bhii hai

Mustafa Zaidi

Nazm

ye dukh kam kyun nahin hota

hame.n bichh.De to
kitne
din
mahiine
saal
guzre hai.n
magar ye choT
gahrii hai
magar ye zaKHm
taaze hai.n
ye dukh kam kyuu.n nahii.n hotaa
merii jaanaa.n
agar mai.n saath
do panchhii bhii baiThe dekhtaa huu.n to
mere maazii kaa har manzar
merii aa.nkho.n ke Doro.n me.n
ubhartaa hai
ta.Daptaa hai
merii aa.nkho.n kii putlii Duub jaatii hai
ye dukh kam kyuu.n nahii.n hotaa
merii jaanaa.n
vo saare log
jin kii vaj.h se
ham log bichh.De the
mukammal zindagii kar ke
vo sab qabr me.n so.e hai.n
tumhaaraa dukh mire siine me.n lekin
ab bhii zinda hai
javaa.n hotaa hii jaataa hai
ye dukh kam kyuu.n nahii.n hotaa
mirii jaanaa.n
ab itnii muddato.n me.n
tum bhii shaayad
bhuul baiThii ho
mire sab dost rishta-daar
laakho.n miil aage hai.n
safar me.n zindagii ke
magar mai.n rah gayaa kirdaar
tanhaa
is kahaanii me.n
ye dukh kam kyuu.n nahii.n hotaa
mirii jaanaa.n

Siraj Faisal Khan

Nazm

eid milan

bichh.De hu.o.n ko bichh.De hu.o.n se milaa.e hai
har samt eid jashn-e-mohabbat manaa.e hai
insaaniyat kii pe.ng mohabbat ba.Dhaa.e hai
mausam har ik umiid ko jhuulaa jhulaa.e hai
baarish me.n khet aisii tarah se nahaa.e hai
raunaq har ik kisaan ke chehre pe aa.e hai
ham sab ko apne ghere me.n lene ke vaaste
chaaro.n taraf se ghir ke ghaTaa aaj aa.e hai
haivaaniyat ne KHuun ke dhabbe janam diye
barsaat aa ke KHuun ke dhabbe chhu.Daa.e hai
shahzaadii-e-bahaar kii aamad hai baaG me.n
har ek phuul raah me.n aa.nkhe.n bichhaa.e hai
hai kitnii pyaarii pyaar bharii eid kii adaa
apnaa samajh ke sab ko gale se lagaa.e hai
sach puuchhiye to ye bhii mohabbat kaa hai subuut
jo raa.e aap kii hai vahii merii raa.e hai
bauchhaare.n aa ke detii hai.n us ko salaamiyaa.n
bansii bajaa bajaa ke jo mela lagaa.e hai
mai.n jaa.uu.ngaa to phir kabhii vaapas na aa.uu.ngaa
kaalii ghaTaa to har baras aa.e hai jaa.e hai
eid-ul-fitar kii vaj.h-e-sharaafat to dekhiye
har saal aa ke sab ko gale se lagaa.e hai
diije du.aa.e.n eid kii tyauhaar ko 'naziir'
ik bhii.D aaj aap se milne ko aa.e hai

Nazeer Banarasi

Nazm

dawat-e-fikr

asl sar-chashma-e-vafaa kyaa hai
vaj.h-e-be-mehrii-e-butaa.n socho

Shakeb Jalali

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now