Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "vera"

Nazm MATCHES FOR "vera"

Nazm

pas-e-aina

mujhe jamaal-e-badan kaa hai e'tiraaf magar
mai.n kyaa karuu.n ki varaa-e-badan bhii dekhtaa huu.n
ye kaa.enaat faqat ek ruKH nahii.n rakhtii
chaman bhii dekhtaa huu.n aur ban bhii dekhtaa huu.n
mirii nazar me.n hai.n jab husn ke tamaam andaaz
mai.n fan bhii dekhtaa huu.n fikr-o-fan bhii dekhtaa huu.n
nikal gayaa huu.n fareb-e-nigaah se aage
mai.n aasmaa.n ko shikan-dar-shikan bhii dekhtaa huu.n
vo aadmii ki sabhii ro.e jin kii mayyat par
mai.n us ko zer-e-kafan KHanda-zan bhii dekhtaa huu.n

Ahmad Nadeem Qasmi
Nazm

dil mere sahra-naward-e-pir dil

naGma-dar-jaa.n raqs barpaa KHanda-bar-lab
dil tamannaa.o.n ke be-paayaa.n alaav ke qariib
dil mire sahraa-navard-e-piir dil
reg ke dil-shaad shahrii reg tuu
aur reg hii terii talab
reg kii nik.hat tire paikar me.n terii jaa.n me.n hai
reg sub.h-e-iid ke maanind zartaab-o-jaliil
reg sadiyo.n kaa jamaal
jashn-e-aadam par bichha.D kar milne vaalo.n kaa visaal
shauq ke lamhaat ke maanind aazaad-o-aziim
reg naGma-zan
ki zarre reg-zaaro.n kii vo paazeb-e-qadiim
jis pe pa.D saktaa nahii.n dast-e-la.iim
reg-e-sahraa zar-garii kii ek kii lahro.n se duur
chashma-e-makr-o-riyaa shahro.n se duur
reg shab-bedaar hai suntii hai har jaabir kii chaap
reg shab-bedaar hai nigaraa.n hai maanind-e-naqiib
dekhtii hai saaya-e-aamir kii chaap
reg har ayyaar Gaarat-gar kii maut
reg istibdaad ke tuGyaa.n ke shor-o-shar kii maut
reg jab uThtii hai u.D jaatii hai har faateh kii nii.nd
reg ke nezo.n se zaKHmii sab shahanshaaho.n ke KHvaab
reg ai sahraa kii reg
mujh ko apne jaagte zarro.n ke KHvaabo.n kii
na.ii ta.abiir de
reg ke zarro.n ubhartii sub.h tum
aa.o sahraa kii hado.n tak aa gayaa roz-e-tarab
dil mire sahraa-navard-e-piir dil
aa chuum reg
hai KHayaalo.n ke parii-zaado.n se bhii ma.asuum reg
reg-e-raqsaa.n maah-o-saal nuur tak raqsaa.n rahe
us kaa abresham mulaa.em narm-KHuu KHandaa.n rahe
dil mire sahraa-navard-e-piir dil
ye tamannaa.o.n kaa be-paayaa.n alaav
raah gum kar duu.n kii mash.al is ke lab par aa.o aa.o
tere maazii ke KHazaf rezo.n se jaagii hai ye aag
aag kii qurmuz zabaa.n par imbisaat-e-nau ke raag
dil mire sahraa-navard-e-piir dil
sargiraanii kii shab-e-rafta se jaag
kuchh sharar aaGosh sarsar me.n hai.n gum
aur kuchh ziina ba ziina sho.alo.n ke miinaar par cha.Dhte hu.e
aur kuchh tah me.n alaav kii abhii
muztarib lekin muzabzab tifl-e-kam-sin kii tarah
aag ziina aag ra.ngo.n kaa KHaziina
aag un lazzaat kaa sar-chashma hai
jis se letaa hai Gizaa ushshaaq ke dil kaa tapaak
chob-e-KHushk anguur us kii mai hai aag
sarsaraatii hai rago.n me.n iid ke din kii tarah
aag kaahin yaad se utrii hu.ii sadiyo.n kii ye afsaana-KHvaa.n
aane vaale qarnahaa kii daastaane.n lab pe hai.n
dil miraa sahraa-navard-e-piir dil sun kar javaa.n
aag aazaadii kaa dil-shaadii kaa naam
aag paidaa.ish kaa afzaa.ish kaa naam
aag ke phuulo.n me.n nasrii.n yaasman sumbul shafiiq-o-nastaran
aag aaraa.ish kaa zebaa.ish kaa naam
aag vo taqdiis dhul jaate hai.n jis se sab gunaah
aag insaano.n kii pahlii saa.ns ke maanind ik aisaa karam
umr kaa ik tuul bhii jis kaa nahii.n kaafii javaab
ye tamannaa.o.n kaa be-paayaa.n alaav gar na ho
is laq-o-daq me.n nikal aa.e.n kahii.n se bhe.Diye
is alaav ko sadaa raushan rakho
reg-e-sahraa ko bashaarat ho ki zinda hai alaav
bhe.Diyo.n kii chaap tak aatii nahii.n
aag se sahraa kaa rishta hai qadiim
aag se sahraa ke Te.Dhe re.ngne vaale
girah-aaluud zholiida daraKHt
jaagte hai.n naGma-dar-jaa.n raqs barpaa KHanda-bar-lab
aur manaa lete hai.n tanhaa.ii me.n jashn-e-maahtaab
un kii shaaKHe.n Gair-mara.ii tabl kii aavaaz par detii hai.n taal
biikH-o-bun se aane lagtii hai KHudaavandii jalaajil kii sadaa
aag se sahraa kaa rishta hai qadiim
rahravo.n sahraa-navardo.n ke liye hai rahnumaa
kaarvaano.n kaa sahaaraa bhii hai aag
aur sahraa.o.n kii tanhaa.ii ko kam kartii hai aag
aag ke chaaro.n taraf pashmiina-o-dastaar me.n lipTe hu.e
afsaana-go
jaise gird-e-chashm mizhgaa.n kaa hujuum
un ke hairat-naak dilkash tajrabo.n se
jab damak uThtii hai ret
zarra zarra bajne lagtaa hai misaal-e-saaz-e-jaa.n
gosh-bar-aavaaz rahte hai.n daraKHt
aur ha.ns dete hai.n apnii aarifaana be-niyaazii se kabhii
ye tamannaa.o.n kaa be-paayaa.n alaav gar na ho
reg apnii KHalvat-e-be-nuur-o-KHud-bii.n me.n rahe
apnii yaktaa.ii kii tahsii.n me.n rahe
is alaav ko sadaa raushan rakho
ye tamannaa.o.n kaa be-paayaa.n alaav gar na ho
asia africa pahnaa.ii kaa naam
be-kaar pahnaa.ii kaa naam
europe aur america daaraa.ii kaa naam
takraar-e-daaraa.ii kaa naam
meraa dil sahraa-navard-e-piir dil
jaag uThaa hai mashriq-o-maGrib kii aisii yak-dilii
ke kaarvaano.n kaa nayaa ruuyaa liye
yak-dilii aisii ki hogii fahm-e-insaa.n se varaa
yak-dilii aisii ki ham sab kah uThe.n
is qadar ujlat na kar
izhdihaam-e-gul na ban
kah uThe.n ham
tuu Gam-e-kul to na thii
ab lazzat-e-kul bhii na ban
roz-e-aasaa.ish kii bedardii na ban
yak-dilii ban aisaa sannaaTaa na ban
jis me.n taabistaa.n kii dopahro.n kii
be-haasil kasaalat ke sivaa kuchh bhii na ho
is jafaa-gar yak-dilii ke kaarvaa.n yuu.n aa.e.nge
dast-e-jaaduu-gar se jaise phuuT nikle ho.n tilism
ishq-e-haasil-KHez se yaa zor-e-paidaa.ii se jaise naa-gahaa.n
khul ga.e ho.n mashriq-o-maGrib ke jism
jism sadiyo.n ke aqiim
kaarvaa.n farKHanda-pai aur un kaa baar
kiisa kiisa taKHt-e-jam aur taaj-e-kai
kuuza kuuza fard kii satvat kii mai
jaama jaama roz-o-shab mehnat kaa KHai
naGma naGma hurriyat kii garm lai
saaliko firoz-baKHto aane vaale qaaflo
shahr se lauToge tum to paa.oge
ret ke sarhad pe jo ruuh-e-abad KHvaabiida thii
jaag uThii hai shikva-haa-e-nai se vo
ret kii tah me.n jo sharmiilii sahar ro.iida thii
jaag uThii hai hurriyat kii lai se vo
itnii doshiiza thii itnii mard-e-naa-diida thii sub.h
puuchh sakte the na us kii umr ham
dard se ha.nstii na thii
zarro.n kii ra.anaa.ii pe bhii ha.nstii na thii
ek mahjuubaana be-KHabarii me.n ha.ns detii thii sub.h
ab manaatii hai vo sahraa kaa jalaal
jaise izz-o-jal ke paa.nv kii yahii mehraab ho
zer-e-mehraab aa ga.ii ho us ko bedaarii kii raat
KHud janaab-e-izz-o-jal se jaise umiid-e-zafaaf
saare naa-karda gunaah is ke mu.aaf
sub.h-e-sahraa shaad-baad
ai uruus-e-izz-o-jal farKHanda ro taabinda kho
tuu ik aise hujra-e-shab se nikal kar aa.ii hai
dast-e-qaatil ne bahaayaa thaa jahaa.n har sej par
sai.nka.Do.n taaro.n kaa raKHshanda lahuu phuulo.n ke paas
sub.h-e-sahraa sar mire zaanuu pe rakh kar daastaa.n
un tamannaa ke shahiido.n kii na kah
un kii niima-ras uma.ngo.n aarzuu.o.n kii na kah
jin se milne kaa ko.ii imkaa.n nahii.n
shahd teraa jin ko nashsh-e-jaa.n nahii.n
aaj bhii kuchh duur is sahraa ke paar
dev kii diivaar ke niiche nasiim
roz-o-shab chaltii hai mub.ham KHauf se sahmii hu.ii
jis tarah shahro.n kii raaho.n par yatiim
naGma-bar-lab taaki un kii jaa.n kaa sannaaTaa ho duur
aaj bhii is reg ke zarro.n me.n hai.n
aise zarre aap hii apne Ganiim
aaj bhii is aag ke sho.alo.n me.n hai.n
vo sharar jo us kii tah me.n par-buriida rah ga.e
misl-e-harf naa-shuniida rah ga.e
sub.h-e-sahraa ai uruus-e-izz-o-jal
aa ki un kii daastaa.n dohraa.e.n ham
un kii izzat un kii azmat gaa.e.n ham
sub.h ret aur aag ham sab kaa jalaal
yak-dilii ke kaarvaa.n un kaa jamaal
aa.o
is tahliil ke halqe me.n ham mil jaa.e.n
aa.o
shaad-baaG apnii tamannaa.o.n kaa be-paayaa.n alaav

Noon Meem Rashid
Nazm

jashn-e-azadi

pattiyaa.n kitnii bhii aa.e.n jaa.e.n
svatantrtaa divas kii haardik shubh kaamnaa.e.n
desh kaa ko.ii bhii galii kuucha rahe
tira.ngaa hamesha sab se uu.nchaa rahe
tira.nge me.n kesariyaa safed haraa rang hai.n
tira.nge ke rang hamaare desh ke a.ng hai.n
kesariyaa suurya haraa vikaas kaa partiik
safed shaa.ntii aur dharm nirbhiik
tiino.n se mil kar tira.ngaa bantaa hai
santulan banaa.e rakhne ke liye sarkaar jantaa hai
bas ek rang ko gar ziyaada mahatv de.nge
to desh kaa santulan bigaa.D le.nge
jab jantaa sarkaar hii santulan bigaa.Dne lag jaa.e
to phir desh ko bas jai shrii raam hii bachaa.e
sahii ko sahii Galat ko Galat kahnaa
desh-bhaktii zimme-daarii kaa hai gahnaa
yadi ham anaitik ko anaitik na kah paa.e.n
to is se achchhaa hai ki ham guu.nge ho jaa.e.n
aa.iye koshish kare.n kii zimmedaar bane.n
aa.iye koshish kare.n kii iimaan-daar bane.n
desh zindabaad hii rahegaa gar ham zimmedaar na bane.n
desh zindabaad hii rahegaa gar ham iimaan-daar na bane.n
desh zindabaad hii rahegaa gar ham kuchh bhii na bane.n
gar kuchh bhii na kar sake.n to bas itnaa kare.n
ham maanavtaa ke virudh kabhii hathiyaar na bane.n
vipattiyaa.n kitnii bhii aa.e.n jaa.e.n
svatantrtaa divas kii haardik shubh kaamnaa.e.n

Sachin Dev Verma
Nazm

siyasat

hai ko.ii to baat jo vo aavaaz dabaane pe aamaada hai
lagaa le jitnaa dam ho apnaa bhii mazbuut iraada hai
kifaayatii ta.aliim-o-ilaaj kii haqdaar hai avaam
raqam vahaa.n se nikaale jin ke paas zaruurat se ziyaada hai
aage chal kar yahii pa.Dhne vaale log desh ko aage le jaa.e.nge
ye kyaa tahziib ki zaruurat-mand ko kahte ho haraam-zaada hai
kursii pe baiTh ke KHud ko vaziir samajh rahaa hai vo bad-gumaa.n
us ko ye bataa do ki vo bisaat kaa bas ek piyaada hai

Sachin Dev Verma
Nazm

aao up

kirshn aur raam ke autaar dikhaa.e.nge tumhe.n
up aa.o kabhii chamatkaar dikhaa.e.nge tumhe.n
kabiir suur tulsii aur KHusrav hii nahii.n
ba.Dh kar ek se ek fankaar dikhaa.e.nge tumhe.n
jaise bichh.Dii hu.ii do bahne gale miltii huu.n
ga.ngaa jamunaa kii paavan dhaar dikhaa.e.nge tumhe.n
dilo.n me.n ehsaasho.n kii narm garmaahaT liye
karte hai.n kaise aadar satkaar dikhaa.e.nge tumhe.n

Sachin Dev Verma
Nazm

ye kashmir hamara hai

is jannat par ham ne apne tan-man-dhan ko vaaraa hai
ham kashmiirii ham kashmiirii ye kashmiir hamaaraa hai

Arsh Malsiyani
Nazm

naya daur

na.e zamaane kii takniiko.n ke chakkar me.n
kyaa kyaa bichha.D gayaa kuchh yaad hai

Sachin Dev Verma
Nazm

aaj ka hindostan

aaj kaa hindostaan
duniyaa ke javaa.n mulko.n me.n se ek hai
naujavaano.n me.n naujavaan
jin me.n se ziyaada-tar naujavaan
be-rozgaar hai.n
aaj ke be-rozgaar naujavaan
kal ke be-rozgaar buu.Dhe ho jaa.e.nge
kal hindostaan duniyaa ke
sab se buu.Dhe mulko.n me.n se ek hogaa
buu.Dhaa bhii aur be-rozgaar bhii
aur be-had Gariib be-sahaaraa bhii
vo buu.Dhe be-had Gariib
be-sahaaraa be-rozgaar
kal ke buu.Dhe hindostaan par
bojh ban jaa.e.nge

Sachin Dev Verma
Nazm

shairi

dil kii kashmakash lafzo.n me.n nikaal detaa huu.n
jism kyaa mai.n ruuh ke kap.De utaar letaa huu.n
mai.n nahii.n jaantaa qasiida qit.a sher-o-misra.a kyaa hai
dil me.n jo aataa hai varaq par utaar detaa huu.n

Sachin Dev Verma
Nazm

kahin tum abad to nahin ho

kaho kaun ho tum
azal se kha.De ho
nigaaho.n me.n hairat ke KHeme lagaa.e
ufuq ke ghane paaniyo.n kii taraf
apnaa chehra uThaa.e
kaho kaun ho tum bataa.o bataa.o
kahii.n tum tilism-e-samaa.at se naa-aashnaa to nahii.n ho
kahii.n tum vo dar to nahii.n ho
jo sadiyo.n kii dastak se khultaa nahii.n
yaa qadiimii shikasta sii mehraab ho
jis me.n ko.ii charaaG-e-rifaaqat bhii jaltaa nahii.n
dhund-aaluud kohna pahaa.Do.n me.n
andar hii andar ko jaataa hu.aa raasta to nahii.n ho
vahii rang ho
jis se rang aur aamez hotaa nahii.n
be-numuu jhiil jis me.n parinda ko.ii
apne par tak bhigotaa nahii.n
kaun ho tum bataa.o bataa.o
kahii.n malba-e-vaqt par
niistii ke andhere me.n baiThe hu.e
roz-e-avval se uj.De hu.e
be-sahaaraa makii.n to nahii.n ho
kahii.n tum falak se pare
yaa vara-e-zamii.n to nahii.n ho!

Rafiq Sandelvi
Nazm

hamare din guzar gae

jale bujhe se diip hai.n nazar kii rahguzaar me.n
zaraa zaraa sii raushnii ki jis me.n KHaam ujlate.n
badan ke daaG sii.nchtii.n
jhuke jhuke mizaaj par tanii tanii sii uljhane.n
daliil se varaa hai saarii guftuguu kaa saaneha
zaraa zaraa sii zindagii ba.Daa ba.Daa saa KHauf hai
labo.n ke surKH baam par malaal-e-raftagaa.n nahii.n
firaasato.n kaa qaht hai
malaamato.n kaa ahd hai
hame.n fareb-e-zindagii zaraa saa kaam kyaa pa.Daa
hamaare din guzar ga.e

Iliyas Babar Aawan
Nazm

alamiya

nuur-e-irfaa.n apnaa haasil apnaa haasil tiirgii
ye gurez-e-zindagii hai vo jihaad-e-zindagii
ranj-o-raahat kii kashaakash se varaa hai zindagii
ijtihaad-e-ilm-o-fan se maa-sivaa hai zindagii
ek an-dekhaa bahaa.o ek an-thak silsila
zindagii ke tajribe se maavaraa hai zindagii
ek hijr-e-be-amaa.n hai ek koh-e-aatishii.n
soz-e-jaa.n hai kyaa shu.uur-e-ziist kyaa naa-aagahii

Siddique Kaleem
Nazm

aankhen meri baqi un ka

KHud duudmaan-e-qibla-e-aalam kare.n KHayaal
dil me.n bahut dino.n se hai kaa.nTaa chubhaa hu.aa
us KHaandaa.n ke ek ra.ngiile piyaa ke ghar
farzand-e-arjumand ke KHatna pe kyaa hu.aa
chashme ubal rahe the suruur-o-nashaat ke
thaa chaav.Dii kaa naqsha-e-uryaa.n khi.nchaa hu.aa
is mahfil-e-nashaat ke narGe me.n vo bhii the
chehre pe jin ke zohd-o-vara.a thaa likhaa hu.aa
qavvaal gaa rahe the KHuzuu'-o-KHushuu' se
rindaan-e-bul-havas me.n thaa GauGaa machaa hu.aa
baada-gusaar khol ke baiThe the botale.n
thaa ranDiyo.n ke saamne huqqa dharaa hu.aa
na.at-e-nabii pe ismat-e-aavaara nukta-chii.n
KHauf-e-KHudaa thaa zohraa-vasho.n me.n ghiraa hu.aa
daulat ke Dher 'zaahidaa' parviin pe nisaar
dahqaan-e-KHasta-haal kaa chuulhaa bujhaa hu.aa
the KHaadimo.n ke peT pe patthar ba.ndhe hu.e
aur kanchano.n pe baab-e-saKHaavat khulaa hu.aa
'shorish' us ek manzar-e-zohra-gudaaz me.n
dast-e-du.aa thaa arsh kii jaanib uThaa hu.aa
is hashr-e-nau me.n qibla-e-aalam kahaa.n the aap
dekhaa to hogaa aap ne jo maajraa hu.aa

Shorish kashmiri
Nazm

mujhe mojiz-bayan kar do

mirii atraaf me.n bikhre hu.e raushan-jabii.n lafzo
mujhe Dhuu.nDo
ajab aashob hai
mere qalam me.n raushnaa.ii suukhtii jaatii hai
aur soche.n na.ii ashkaal me.n Dhalne se qaasir hai.n
jo sochuu.n likh nahii.n paataa
jo likkhuu.n vo cliche hai
muravvaj isti.aaro.n aur tashbiiho.n kii utran se
mirii nazmo.n ke pairaahan nahii.n bante
ta.affun se bhare pairaaya-e-iz.haar se
iblaaG kaa siina nahii.n khultaa
mai.n likhne baiThtaa huu.n
to mire haatho.n kii larzish saath hotii hai
agar kuchh bolnaa chaahuu.n
to luknat rok letii hai
kisii vijdaan kii suurat
kisii ilhaam kii suurat
dar-e-ib.haam ko kholo
mire afkaar kaa kashkol
apnii jagmagaatii raushnii se is tarah bhar do
ki mere zehn ke aa.ngan me.n
puure chaa.nd kii raunaq utar aa.e
jo ab tak maa-varaa-e-saut hai
us ko ayaa.n kar do
mujhe mojiz-bayaa.n kar do

Salman Basit
Nazm

2 qahqaha

ajab raat hai hadd-e-nigaah tak har-suu
athaah zahar bharii chaa.ndnii kii jhiil sii hai
varaa-e-madd-e-nazar kohar hai taKHayyul kii
varaa-e-hadd-e-taKHayyul siyah fasiil sii hai
samaa.n hai huu kaa sa.Dak hai sa.Dak ke dono taraf
qataar taa-ba-ufuq hai ghane daraKHto.n kii
havaa sanaktii hai to chau.nk chau.nk pa.Dtii hai.n
har ek pe.D me.n ruuhe.n sii tiira-baKHto.n kii
kuchh aise ghuur ke bas gholte hai.n sannaaTe
havaa ke zor se jab Tahniyaa.n ulajhtii hai.n
dhu.e.n se re.ngte hai.n tah-ba-tah KHayaalo.n me.n
sukuut chiiKHtaa hai siiTiyaa.n sii bajtii hai.n
nazar uThaataa huu.n to zaaviye nigaaho.n me.n
uThaa ke dhuul saraabo.n kii jho.nk dete hai.n
qadam ba.Dhaataa huu.n to azhdahe hayuulo.n ke
phano.n ke tiir kaf-e-paa me.n Tho.nk dete hai.n
jo saa.ns letaa huu.n to saa.ns saa.ns kii lau par
tafakkuraat kii aa.ndhii sii chalne lagtii hai
jo sochtaa huu.n to ehsaas ke mahlako.n tak
siyaahiyo.n kii Galaazat uchhalne lagtii hai
dil-o-nigaah pe kitnii muhiib tezii se
kuchh uljhano.n ke siyah-naag re.ng aa.e hai.n
qadam qadam pe hai kitnii amiiq-e-fikr kii lau
qadam qadam pe mirii rah me.n kitne saa.e hai.n

Takht Singh
Nazm

mujhe bhi likhna

kabhii mohabbat pe nazm ho to
mujhe bhii likhnaa
tum apnii aa.nkho.n ke raaste pe
palak kinaare
ko.ii bhii jugnuu saa KHvaab dekho kitaab dekho
aur us me.n kuchh ujle ujle logo.n ke baab dekho
to jaan lenaa ye mai.n nahii.n huu.n
mujhe guzarnaa hai baab hone kitaab hone ke marhalo.n se
tum apnii poro.n mujhe TaTolo to baab Thahruu.n
pahaa.Diyo.n ke buland ziino.n se chaa.nd takte
jo mujh ko socho to KHvaab Thahruu.n
samaa'ato.n se varaa jo alfaaz hai.n sabhii ko
tum apne haatho.n se mere haatho.n pe gar likho to kitaab Thahruu.n
mohabbato.n kaa nisaab Thahruu.n
kabhii mohabbat pe nazm ho to
mujhe bhii likhnaa
kabhii mohabbat pe nazm ho to
mujhe bhii likhnaa

Nadeem Najid
Nazm

dubli-patli

shagun bharii KHvaab se ja.Dii hai
zamaana raftaar se ba.ndhaa hai
zamaane ko aap zaid kah le.n
bakar ko samjhe.n
mujhe samajh le.n yaa KHud ko kah le.n
zamaana raftaar se ba.ndhaa hai
shagun bharii kaa vo KHvaab vo aaftaab raushan hai
jo
ufuq ke muhiit ko rau.ndtaa nikaltaa hai
shab ke isfanj se syaahii nicho.Dtaa hai
vo nii.nd aur nii.nd ke a.ndhero.n kii kokh ko to.Dtaa hai
vo
vaqt kii yaKH-aaluuda jhiil ko chhedtaa hai
to saaniye ubalte hai.n
jaise jaise shagun bharii kii buKHaar vaalii safed aa.nkho.n se jaise motii Tapak rahe ho.n
zamaana raftaar se ba.ndhaa hai
vo tez raftaar jai jai vintii kii raagnii kii dhuno.n pe raqsaa.n hai
maut se be-KHabar zamii.n kii nihaayato.n se varaa nikaltaa
vo apnii raftaar se ba.ndhaa hai
ye kaisii samte.n hai.n jo kahii.n bhii nahii.n nikaltii.n
ye kaisaa tuufaa.n hai jo musalsal hai
zindagaanii mahaa-bha.nvar hai
zamaana be-jaan ek tinkaa

Iqtidar Javed
Nazm

na jaane kab likha jae

ko.ii aisii sadaa bhii hai
samaa.at se varaa hai jo

Hamida Shaheen
Nazm

gladiola

ye ek saa.at kaa rang jis me.n suruur bhii hai vuquuf bhii hai
yahii faraaz-e-abad ke rasto.n kaa raazdaa.n hai
ye rang aa.nkho.n ko KHiira kar de to kaun dekhe
varaa-e-had-e-nigaah kyaa hai

Ameen Rahat Chugtai
Nazm

apna ghar

suuraj chaa.nd sitaare
fazaa kii qaus me.n Ta.nge
hare motii javaahar panne
aasmaano.n kii laa-mahduud KHalaa me.n chamaktii damaktii devtaa.o.n kii mehrbaan nuurii aa.nkhe.n
vahii.n kahii.n
unhii.n ke maabain hai
meraa ghar
mere abbaa kii havelii
jis ke aa.ngan ke KHaamosh be-aavaaz naGme
ziina ziina utar aa.e dhartii par aur
aa jame
mere dil ko KHaalii aur viiraa.n paa kar aur
gahrii aTuuT samaadhii me.n ram kar yugo.n vahii.n baiThe rahe
merii aa.nkho.n kaa nuur-o-suruur
mere kaano.n kaa sangiit
mere ho.nTo.n par machaltii dhune.n
unhii.n kii tausii.a hai.n
masarrat ke nashe me.n
mahak mahak uThte hai.n mere qalb-o-jigar aur
chahak chahak kar gungunaate hai.n
apne aabaa.ii giit
jo mafhuum se maavaraa hai.n
jin me.n dhun to hai
shabd nahii.n
in guu.nge naGmo.n kaa jaaduu
khol detaa hai vo dayaar
jin ke piichhe chhupaa meraa mahbuub
tab se meraa muntazir hai
jab se mai.n us se ruuTh kar zindagii kii talaash-e-bejaa me.n is dhartii par chalaa aaya thaa
phir kisii din
kisii ek mubaarak saa.at me.n jo us ne pahle hii se nirdhaarit kar rakhii hai
janam-janmaantar kii us kii samaadhii TuuTtii hai aur vo aa.nkhe.n kholtaa hai
muskuraa kar merii aa.nkho.n me.n jhaa.nktaa hai
pahchaan liyaa na ham ne tujhe bhago.De
chal ab ghar chale.n

Balraj Verma
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now