Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "yauvan"

Nazm MATCHES FOR "yauvan"

Nazm

sarapa

tiikhe nainaa.n baa.nkii chitvan gadraayaa gadraayaa yauvan
jaise alha.D kii gaagariyaa chhalkii ab chhalkii ab chhalkii

Kamil Chandpuri
Nazm

tarana-e-hindi

saare jahaa.n se achchhaa hindostaa.n hamaaraa
ham bulbule.n hai.n is kii ye gulsitaa.n hamaaraa
Gurbat me.n ho.n agar ham rahtaa hai dil vatan me.n
samjho vahii.n hame.n bhii dil ho jahaa.n hamaaraa
parbat vo sab se uu.nchaa ham-saaya aasmaa.n kaa
vo santarii hamaaraa vo paasbaa.n hamaaraa
godii me.n kheltii hai.n is kii hazaaro.n nadiyaa.n
gulshan hai jin ke dam se rashk-e-jinaa.n hamaaraa
ai aab-ruud-e-ga.ngaa vo din hai yaad tujh ko
utraa tire kinaare jab kaarvaa.n hamaaraa
maz.hab nahii.n sikhaataa aapas me.n bair rakhnaa
hindii hai.n ham vatan hai hindostaa.n hamaaraa
yuunaan o misr o ruumaa sab miT ga.e jahaa.n se
ab tak magar hai baaqii naam-o-nishaa.n hamaaraa
kuchh baat hai ki hastii miTtii nahii.n hamaarii
sadiyo.n rahaa hai dushman daur-e-zamaa.n hamaaraa
'iqbaal' ko.ii mahram apnaa nahii.n jahaa.n me.n
maaluum kyaa kisii ko dard-e-nihaa.n hamaaraa

Allama Iqbal
Nazm

mujassama

jaise yuunaan ke maGruur KHudaa-vando.n ne
regzaaraan-e-habsh kii kisii shahzaadii ko
tishna ruuho.n ke havasnaak ta.ayyush ke liye
hajla-e-sa.ng me.n paaband banaa rakkhaa ho

Ahmad Faraz
Nazm

KHak-e-hind

sham-e-adab na thii jab yuunaa.n kii anjuman me.n
taabaa.n thaa mahr-e-daanish is vaadii-e-kuhan me.n

Chakbast Braj Narayan
Nazm

Sar-guzisht-e-adam

sune ko.ii mirii Gurbat kii daastaa.n mujh se
bhulaayaa qissa-e-paimaan-e-avvalii.n me.n ne
lagii na merii tabii.at riyaaz-e-jannat me.n
piyaa shu.uur kaa jab jaam-e-aatishii.n mai.n ne
rahii haqiiqat-e-aalam kii justujuu mujh ko
dikhaayaa auj-e-KHayaal-e-falak-nashii.n mai.n ne
milaa mizaaj-e-taGayyur-pasand kuchh aisaa
kiyaa qaraar na zer-e-falak kahii.n mai.n ne
nikaalaa kaabe se patthar kii muurato.n ko kabhii
kabhii buto.n ko banaayaa haram-nashii.n mai.n ne
kabhii mai.n zauq-e-takallum me.n tuur par pahu.nchaa
chhupaayaa nuur-e-azl zer-e-aastii.n mai.n ne
kabhii saliib pe apno.n ne mujh ko laTkaayaa
kiyaa falak ko safar chho.D kar zamii.n mai.n ne
kabhii mai.n Gaar-e-hiraa me.n chhupaa rahaa barso.n
diyaa jahaa.n ko kabhii jaam-e-aaKHrii.n mai.n ne
sunaayaa hind me.n aa kar suruud-e-rabbaanii
pasand kii kabhii yuunaa.n kii sarzamii.n mai.n ne
dayaar-e-hind ne jis dam mirii sadaa na sunii
basaayaa KHitta-e-jaapaan o mulk-e-chii.n mai.n ne
banaayaa zarro.n kii tarkiib se kabhii aalam
KHilaaf-e-ma.ani-e-taaliim-e-ahl-e-dii.n mai.n ne
lahuu se laal kiyaa saik.Do.n zamiino.n ko
jahaa.n mai.n chhe.D ke paikaar-e-aql-o-dii.n mai.n ne
samajh me.n aa.ii haqiiqat na jab sitaaro.n kii
isii KHayaal me.n raate.n guzaar dii.n mai.n ne
Daraa sakii.n na kaliisaa kii mujh ko talvaare.n
sikhaayaa mas.ala-e-gardish-e-zamii.n mai.n ne
kashish kaa raaz huvaidaa kiyaa zamaane par
lagaa ke aa.iina-e-aql-e-duur-bii.n mai.n ne
kiyaa asiir shu.aa.o.n ko barq-e-muztar ko
banaa dii Gairat-e-jannat ye sarzamii.n mai.n ne
magar KHabar na milii aah raaz-e-hastii kii
kiyaa KHirad se jahaa.n ko tah-e-nagii.n mai.n ne
hu.ii jo chashm-e-mazaahir-parast vaa aaKHir
to paayaa KHaana-e-dil me.n use makii.n mai.n ne

Allama Iqbal
Nazm

fareb

aur sone ke chamakte sikke
Da.nk uThaa.e hu.e phan phailaa.e
ruuh aur dil pe chalaa karte hai.n
mulk aur qaum ko din raat Dasaa karte hai.n
roTiyaa.n chaklo.n kii qahbaa.e.n hai.n
jin ko sarmaaya ke dallaalo.n ne
naf.a-KHorii ke jharoko.n me.n sajaa rakhaa hai
baaliyaa.n dhaan kii gehuu.n ke sunahre KHoshe
misr o yuunaan ke majbuur Gulaamo.n kii tarah
ajnabii des ke baazaaro.n me.n bik jaate hai.n
aur bad-baKHt kisaano.n kii bilaktii hu.ii ruuh
apne aflaas me.n mu.nh Dhaa.np ke so jaatii hai
ham kahaa.n jaa.e.n kahe.n kis se ki naadaar hai.n ham
kis ko samjhaa.e.n Gulaamii ke gunahgaar hai.n ham
tauq KHud ham ne pahnaa rakkhaa hai armaano.n ko
apne siine me.n jaka.D rakkhaa tuufaano.n ko
ab bhii zindaan-e-Gulaamii se nikal sakte hai.n
apnii taqdiir ko ham aap badal sakte hai.n
(3)
aaj phir hotii hai.n zaKHmo.n se zabaane.n paidaa
tiira-o-taar fazaa.o.n se barsaataa hai lahuu
raah kii gard ke niiche se ubharte hai.n qadam
taare aakaash pe kamzor habaabo.n kii tarah
shab ke sailaab-e-siyaahii me.n bahe jaate hai.n
phuuTne vaalii hai mazduur ke maathe se kiran
surKH parcham ufuq-e-sub.h pe lahraate hai.n

Ali Sardar Jafri
Nazm

goristan-e-shahi

aasmaa.n baadal kaa pahne KHirqa-e-deriina hai
kuchh mukaddar saa jabiin-e-maah kaa aa.iina hai
chaa.ndnii phiikii hai is nazzaara-e-KHaamosh me.n
sub.h-e-saadiq so rahii hai raat kii aaGosh me.n
kis qadar ashjaar kii hairat-fazaa hai KHaamushii
barbat-e-qudrat kii dhiimii sii navaa hai KHaamushii
baatin-e-har-zarra-e-aalim saraapaa dard hai
aur KHaamoshii lab-e-hastii pe aah-e-sard hai
aah jaulaa.n-gaah-e-aalam-giir yaanii vo hisaar
dosh par apne uThaa.e saik.Do.n sadiyo.n kaa baar
zindagii se thaa kabhii ma.amuur ab sunsaan hai
ye KHamoshii us ke ha.ngaamo.n kaa goristaan hai
apne sukkaan-e-kuhan kii KHaak kaa dil-daada hai
koh ke sar par misaal-e-paasbaa.n istaada hai
abr ke rauzan se vo baalaa-e-baam-e-aasmaa.n
naazir-e-aalam hai najm-e-sabz-faam-e-aasmaa.n
KHaak-baazii vus.at-e-duniyaa kaa hai manzar use
daastaa.n naakaami-e-insaa.n kii hai azbar use
hai azal se ye musaafir suu-e-manzil jaa rahaa
aasmaa.n se inqilaabo.n kaa tamaashaa dekhtaa
go sukuu.n mumkin nahii.n aalam me.n aKHtar ke liye
faatiha-KHvaanii ko ye Thahraa hai dam bhar ke liye
ra.ng-o-aab-e-zinagii se gul-ba-daaman hai zamii.n
saik.Do.n KHuu.n-gashta tahziibo.n kaa madfan hai zamii.n
KHvaab-gah shaaho.n kii hai ye manzil-e-hasrat-fazaa
diida-e-ibrat KHiraaj-e-ashk-e-gul-guu.n kar adaa
hai to goristaa.n magar ye KHaak-e-garduu.n-paaya hai
aah ik bargashta qismat qaum kaa sarmaaya hai
maqbaro.n kii shaan hairat-aafrii.n hai is qadar
jumbish-e-mizhgaa.n se hai chashm-e-tamaashaa ko hazar
kaifiyat aisii hai naakaamii kii is tasviir me.n
jo utar saktii nahii.n aa.iina-e-tahriir me.n
sote hai.n KHaamosh aabaadii ke ha.ngaamo.n se duur
muztarib rakhtii thii jin ko aarzuu-e-naa-subuur
qabr kii zulmat me.n hai in aaftaabo.n kii chamak
jin ke darvaazo.n pe rahtaa hai jabii.n-gustaar falak
kyaa yahii hai in shahanshaaho.n kii azmat kaa ma.aal
jin kii tadbiir-e-jahaa.nbaanii se Dartaa thaa zavaal
rob-e-faGfuurii ho duniyaa me.n ki shaan-e-qaisarii
Tal nahii.n saktii Ganiim-e-maut kii yuurish kabhii
baadshaaho.n kii bhii kisht-e-umr kaa haasil hai gor
jaada-e-azmat kii goyaa aaKHirii manzil hai gor
shorish-e-bazm-e-tarab kyaa uud kii taqriir kyaa
dardmandaan-e-jahaa.n kaa naala-e-shab-giir kyaa
arsa-e-paikaar me.n ha.ngaama-e-shamshiir kyaa
KHuun ko garmaane vaalaa naara-e-takbiir kyaa
ab ko.ii aavaaz soto.n ko jagaa saktii nahii.n
siina-e-viiraa.n me.n jaan-e-rafta aa saktii nahii.n
ruuh-e-musht-e-KHaak me.n zahmat-kash-e-bedaad hai
kuucha gard-e-nai hu.aa jis dam nafas fariyaad hai
zindagii insaa.n kii hai maanind-e-murG-e-KHush-navaa
shaaKH par baiThaa ko.ii dam chahchahaayaa u.D gayaa
aah kyaa aa.e riyaaz-e-dahr me.n ham kyaa ga.e
zindagii kii shaaKH se phuuTe khile murjhaa ga.e
maut har shaah o gadaa ke KHvaab kii taabiir hai
is sitamgar kaa sitam insaaf kii tasviir hai
silsila hastii kaa hai ik bahr-e-naa-paidaa-kanaar
aur is dariyaa-e-be-paayaa.n kii mauje.n hai.n mazaar
ai havas KHuu.n ro ki hai ye zindagii be-e'tibaar
ye sharaare kaa tabassum ye KHas-e-aatish-savaar
chaa.nd jo suurat-gar-e-hastii kaa ik ejaaz hai
pahne siimaabii qabaa mahv-e-KHiraam-e-naaz hai
charKH-e-be-anjum kii dahshatnaak vus.at me.n magar
bekasii is kii ko.ii dekhe zaraa vaqt-e-sahar
ik zaraa saa abr kaa Tuk.Daa hai jo mahtaab thaa
aaKHirii aa.nsuu Tapak jaane me.n ho jis kii fanaa
zindagii aqvaam kii bhii hai yuu.nhii be-e'tibaar
ra.ng-haa-e-rafta kii tasviir hai un kii bahaar
is ziyaa.n-KHaane me.n ko.ii millat-e-garduu.n-vaqaar
rah nahii.n saktii abad tak baar-e-dosh-e-rozgaar
is qadar qaumo.n kii barbaadii se hai KHuugar jahaa.n
dekhtaa be-e'tinaa.ii se hai ye manzar jahaa.n
ek suurat par nahii.n rahtaa kisii shai ko qaraar
zauq-e-jiddat se hai tarkiib-e-mizaaj-e-rozgaar
hai nagiin-e-dahr kii ziinat hamesha naam-e-nau
maadar-e-giitii rahii aabastan-e-aqvaam-e-nau
hai hazaaro.n qaafilo.n se aashnaa ye rahguzar
chashm-e-koh-e-nuur ne dekhe hai.n kitne taajvar
misr o baabul miT ga.e baaqii nishaa.n tak bhii nahii.n
daftar-e-hastii me.n un kii daastaa.n tak bhii nahii.n
aa dabaayaa mehr-e-iiraa.n ko ajal kii shaam ne
azmat-e-yuunaan-o-ruumaa luuT lii ayyaam ne
aah muslim bhii zamaane se yuu.nhii ruKHsat hu.aa
aasmaa.n se abr-e-aazaarii uThaa barsaa gayaa
hai rag-e-gul sub.h ke ashko.n se motii kii la.Dii
ko.ii suuraj kii kiran shabnam me.n hai uljhii hu.ii
siina-e-dariyaa shu.aa.o.n ke liye gahvaara hai
kis qadar pyaaraa lab-e-juu mehr kaa nazzaara hai
mahv-e-ziinat hai sanobar juu.ebaar-e-aa.iina hai
Guncha-e-gul ke liye baad-e-bahaar-e-aa.iina hai
na.ara-zan rahtii hai koyal baaG ke kaashaane me.n
chashm-e-insaa.n se nihaa.n patto.n ke uzlat-KHaane me.n
aur bulbul mutrib-e-ra.ngii.n navaa-e-gulsitaa.n
jis ke dam se zinda hai goyaa havaa-e-gulsitaa.n
ishq ke ha.ngaamo.n kii u.Dtii hu.ii tasviir hai
KHaama-e-qudrat kii kaisii shoKH ye tahriir hai
baaG me.n KHaamosh jalse gulsitaa.n-zaado.n ke hai.n
vaadi-e-kohsaar me.n na.are shabaa.n-zaado.n ke hai.n
zindagii se ye puraanaa KHaak-daa.n ma.amuur hai
maut me.n bhii zindagaanii kii ta.Dap mastuur hai
pattiyaa.n phuulo.n kii girtii hai.n KHizaa.n me.n is tarah
dast-e-tifl-e-KHufta se ra.ngii.n khilaune jis tarah
is nashaat-aabaad me.n go aish be-andaaza hai
ek Gam yaanii Gam-e-millat hamesha taaza hai
dil hamaare yaad-e-ahd-e-rafta se KHaalii nahii.n
apne shaaho.n ko ye ummat bhuulne vaalii nahii.n
ashk-baarii ke bahaane hai.n ye uj.De baam o dar
girya-e-paiham se biinaa hai hamaarii chashm-e-tar
dahr ko dete hai.n motii diida-e-giryaa.n ke ham
aaKHirii baadal hai.n ik guzre hu.e tuufaa.n ke ham
hai.n abhii sad-haa guhar is abr kii aaGosh me.n
barq abhii baaqii hai is ke siina-e-KHaamosh me.n
vaadi-e-gul KHaak-e-sahraa ko banaa saktaa hai ye
KHvaab se ummiid-e-dahqaa.n ko jagaa saktaa hai ye
ho chukaa go qaum kii shaan-e-jalaalii kaa zuhuur
hai magar baaqii abhii shaan-e-jamaalii kaa zuhuur

Allama Iqbal
Nazm

aurat

tuu prem mandir kii paak devii tuu husn kii mamlikat kii raanii
hayaat-e-insaa.n kii qismato.n par tirii nigaaho.n kii hukmaraanii
jahaan-e-ulfat tirii qalam-rau hariim-e-dil terii raajdhaanii
bahaar-e-fitrat tire lab-e-laal-guu.n kii doshiiza muskuraahaT
nizaam-e-kaunain terii aa.nkho.n ke surKH Doro.n kii thartharaahaT
faroG-e-sad-kaa.enaat terii jabiin siimii.n kii zau-fishaanii
bha.Dakte siino.n me.n bas rahii hai.n qaraar ban kar tirii adaa.e.n
tarastii ruuho.n ko jaam-e-ishrat pilaa rahii hai.n tirii vafaa.e.n
rag-e-jahaa.n me.n thirak rahii hai sharaab ban kar tirii javaanii
dimaaG-e-parvar-digaar me.n jo azal ke din se machal rahaa thaa
zabaan-e-taKHliiq-e-dahr se bhii na jis kaa iz.haar ho sakaa thaa
numuud terii usii muqaddas hasii.n taKHayyul kii tarjumaanii
hai vaadi-e-niil par tiraa abr-e-zulf saaya-kunaa.n abhii tak
hai.n jaam-e-iiraa.n kii mai me.n tere labo.n kii shiiriiniyaa.n abhii tak
fasaana-go hai tirii abhii tak hadiis-e-yuunaa.n kii KHuu.n-chakaanii'
hai terii ulfat ke raag par mauj-e-ruud-e-ga.ngaa ko vajd ab tak
tirii mohabbat kii aag me.n jal rahaa hai sahraa-e-najd ab tak
jamaal-e-zahra tire malaa.ek fareb jalvo.n kii ik nishaanii
tirii nigaaho.n ke sahar se gul-fishaa.n hai sher o adab kii duniyaa
tire tabassum ke kaif se hai ye Gam kii duniyaa tarab kii duniyaa
tire labo.n kii miThaas se shakkarii.n hai zahraab-e-zindagaanii
tiraa tabassum kalii kalii me.n tiraa tarannum chaman chaman me.n
rumuuz-e-hastii ke pech-o-KHam tere gesu.o.n kii shikan shikan me.n
kitaab-e-taariiKH-e-zindagii ke varaq varaq par tirii kahaanii
jo tuu na hotii to yuu.n daraKHshanda sham-e-bazm-e-jahaa.n na hotii
vajuud-e-arz-o-samaa na hotaa numuud-e-kaun-o-makaa.n na hotii
bashar kii mahduudiyat kii KHaatir tarastii aalam kii be-karaanii

Majeed Amjad
Nazm

talib-ilm

tumhe.n ma.aluum hai taimuur kii fauje.n jis vaqt
apne dushman pe ba.Dhaa kartii thii.n
aurte.n piichhe rahaa kartii thii.n
aur jo aalim the faazil the un insaano.n kaa jarga sab ke
piichhe piichhe hii chalaa kartaa thaa
kis liye sab ko rah-e-ziist pe har gaam ba.Dhaane vaale
sab se piichhe hii chalaa karte hai.n
ilm me.n ek hii buniyaadii kamii hai varna
ilm har ek zamaane me.n har ek shai se taraqqii paataa
aaj iqbaal ye kahtaa hai ki aurat hii kaa sho.ala vo jis se yuunaan
hashr tak ilm-e-falaatuun se rahegaa zinda
aaj school me.n college me.n maqaam-e-avval
aurato.n ke liye maKHsuus kiye jaate hai.n
aaj a.ngrezii pa.Dhii jaatii hai juGraafiya taariiKH har ik ilm yahaa.n
aise ustaad sikhaataa hai ki jaise ham ko
yahii ma.aluum nahii.n hai ki jo aalim the jo faazil the un insaano.n kaa jarga sab se
piichhe piichhe hii ba.Dhaa kartaa thaa
aurte.n un se zaraa aage rahaa kartii thii.n
aurte.n aaj bhii aage hii rahaa kartii hai.n
aurte.n aaj bhii kahtii hai.n hamaare gesuu
chaahe bikhre ho.n ki ek juu.De me.n paaband kiye baiThe ho.n
dekhne vaalo.n kii naakaam tamannaa.o.n ko
ek hii haath ke paaband hu.aa karte hai.n
vahii ik haath jo talvaar ko pahluu me.n liye
sab se aage hii chalaa kartaa hai
us ko kuchh ilm kii parvaah nahii.n (aurat kii bhii parvaah kyaa hai)
us ko kuchh ilm nahii.n kaise falaatuu.n pal me.n
ik sharar ban ke bujhaa kartaa hai

Meeraji
Nazm

musafir

mirii jhukii hu.ii aa.nkhe.n talaash kartii rahe.n
ko.ii zamiir kaa lahja ko.ii usuul kii baat
guzar ga.ii mirii palko.n pe jaagtii hu.ii raat
nadaamato.n kaa pasiina jabii.n pe phuuT gayaa
mirii zabaa.n pe tiraa naam aa ke TuuT gayaa
qubuul kar ye nadaamat ki is pasiine kii
har ek buu.nd me.n chi.ngaariyo.n ke saa.nche hai.n
qubuul kar mire chehre kii jhurriyaa.n jin me.n
kahii.n junuu.n kahii.n tahziib ke tamaa.nche hai.n
sambhaal meraa subuk hadiya-e-Gam-e-idraak
jo mujh ko saat samundar kaa zahr pii ke milaa
saqaafato.n ke har aatish-fishaa.n me.n jii ke milaa
talab kiyaa mujhe yuunaan ke KHudaa.o.n ne
janam liyaa mire siine me.n devtaa.o.n ne
fareb-o-hirs ke har raaste se mo.D diyaa
aur is ke baa'd super market pe chho.D diyaa
jahaa.n bas ek hii me.aar-e-aadamiyat thaa
hujuum-e-mard-o-zanaa.n mahv-sair-e-vahshat thaa
gha.Dii kaa husn na.e radio kii zebaa.ii
plastic ke ka.nval nylon kii tie
italiya ke na.e boot hong-kong ke haar
crisler kii na.ii range, tokyo ke si.ngaar
har ek jism ko aasuudgii kii KHvaahish thii
har ek aa.nkh me.n asbaab kii parastish thii
ye inhimaak qayaadat me.n bhii nahii.n miltaa
ye suu-e-nafs-e-ibaadat me.n bhii nahii.n miltaa

Mustafa Zaidi
Nazm

huzn-e-insan

jism hai ruuh kii azmat ke liye ziina-e-nuur
mamba-e-kaif-o-suruur
naa-rasaa aaj bhii hai shauq-e-parastaar-e-jamaal
aur insaa.n hai ki hai jaada-kash-e-raah-e-taviil
ruuh-e-yuunaa.n pe salaam
ik zamistaa.n kii hasiin raat kaa ha.ngaam-e-tapaak
us kii lazzaat se aagaah hai kaun
ishq hai tere liye naGma-e-KHaam
ki dil o jism ke aaha.ng se mahruum hai tuu
jism aur ruuh ke aaha.ng se mahruum hai tuu
varna shab-haa-e-zamistaa.n abhii be-kaar nahii.n
aur na be-suud hai.n ayyaam-e-bahaar
aah insaa.n ki hai vahmo.n kaa parastaar abhii
husn bechaare ko dhokaa saa diye jaataa hai
zauq-e-taqdiis pe majbuur kiye jaataa hai
TuuT jaa.e.nge kisii roz mazaamiir ke taar
muskuraa de ki hai taabinda abhii teraa shabaab
hai yahii hazrat-e-yazdaa.n ke tamasKHur kaa javaab

Noon Meem Rashid
Nazm

tarana-e-watan

rashk-e-firdaus hai teraa ra.ngii.n chaman
tujh pe gul-baash karte hai.n koh-o-daman
tere maathe kii rekhaa hai.n ga.ng-o-jaman
terii miTTii me.n KHvaabiida hai.n fikr-o-fan
faKHr-e-yuunaan thii terii bazm-e-kuhan
mere hindustaa.n mere pyaare vatan
devtaa.o.n kii rishiyo.n kii ye sarzamii.n
zarra zarra tirii KHaak kaa hai hasii.n
chuumtaa hai qamar roz terii jabii.n
tere jalve na ho.n kis liye dil-nashii.n
tere zarre me.n KHurshiid kii hai kiran
mere hindustaa.n mere pyaare vatan
tere qadmo.n kii ziinat hai godaavarii
hai himaala kaa parbat tiraa santarii
hai haqiiqat me.n kashmiir jannat tirii
zarre zarre me.n tere hai ik zindagii
desh kii shaan hai taaj kaa baa.nkpan
mere hindustaa.n mere pyaare vatan
kis balaa kii kashish tere KHaaro.n me.n hai
auj firdaus pinhaa.n bahaaro.n me.n hai
ik nayaa baa.nkpan kohsaaro.n me.n hai
dilkashii kis qadar chaa.nd taaro.n me.n hai
hai zamaane se a.alaa tirii anjuman
mere hindustaa.n mere pyaare vatan
meraa mandir hai tuu meraa ka.aba hai tuu
meraa maljaa hai tuu meraa maavaa hai tuu
merii uqbaa hai tuu merii duniyaa hai tuu
meraa hai saaz-e-dil meraa naGma hai tuu
merii har saa.ns tere liye naGma-zan
mere hindustaa.n mere pyaare vatan
sab ko ulfat ke markaz pe laa.uu.ngaa mai.n
ektaa kaa diyaa phir jalaa.uu.ngaa mai.n
apne haatho.n vatan ko sajaa.uu.ngaa mai.n
prem ke giit har vaqt gaa.u.ngaa mai.n
is tarah kaa banaa.uu.ngaa mai.n sa.ngThan
mere hindustaa.n mere pyaare vatan
KHuun se apne duu.ngaa tujhe zindagii
tere phuulo.n ko duu.ngaa niraalii KHushii
zarre zarre ko baKHshu.ngaa mai.n raushnii
sab ko aisii sunaa.uu.ngaa mai.n raagnii
shaa.ntii kii bahaa.uu.ngaa ga.ng-o-jaman
mere hindustaa.n mere pyaare vatan

kanval Dibaivi
Nazm

ek sawal

ko.ii puuchhe hakiim-e-europe se
hind-o-yuunaa.n hai.n jis ke halqa-ba-gosh
kyaa yahii hai mu.aashrat kaa kamaal
mard be-kaar va zan tahii-aaGosh

Allama Iqbal
Nazm

rah-e-farar

idhar se na jaa.o
idhar mai.n ne ik shaKHs ko jaate dekhaa hai aksar
javaano.n ko jo raah me.n rok letaa hai un se
vahii.n baate.n kartaa hai mil kar
jo suqraat kartaa thaa yuunaan ke manchalo.n se
yaqiinan use ek din zahr piinaa pa.Degaa

Akhtarul Iman
Nazm

hum shair hote hain

ham paidaa karte hai.n
ham giilii miTTii ko muTThii me.n bhii.nchaa karte hai.n
to shakle.n bantii hai.n
ham un kii cho.nche.n khol ke saa.nse.n phuu.nkaa karte hai.n
jo miTTii the vo chhuu lene se taa.ir hote hai.n
ham shaa.ir hote hai.n
kan.aan me.n rahte hai.n
jab jalva karte hai.n
to shashdar a.ngushto.n ko pore.n nashtar detii hai.n
phir KHuun Tapaktaa hai jo sard nahii.n hotaa
ik sahmaa saa sakta hotaa hai dard nahii.n hotaa
yuunaan ke Daaku hai.n
ham devtaa.o.n ke mahal me.n naqab lagaayaa karte hai.n
ham aasmaan kaa niilaa shah-darvaaza to.Dte hai.n
ham aag churaate hai.n
to is duniyaa kii yaKH choTii se barf pighaltii hai
phir jame hu.e siine milte hai.n
saa.ns humaktii hai
aur shiryaano.n ke mu.nh khulte hai.n
KHuun dha.Daktaa hai
jiivan-raamaayan me.n
jab raavan istibdaadii kaarobaar chalaataa hai
ham siitaa likhte hai.n
jab rath ke pahiye jismo.n ke poshaak kuchalte hai.n
to giitaa likhte hai.n
jab ho.nTo.n ke sahme kap.Do.n par baKHiya hotaa hai
ham bolaa karte hai.n
jab manDii se ek ek taraazuu Gaa.eb hotaa hai
to jiivan ko miizaan pe rakh kar tolaa karte hai.n
mazduurii karte hai.n
ham lafzo.n ke jangal se lak.Dii kaaTaa karte hai.n
ham arkashii ke maahir hai.n ambaar lagaate hai.n
phir randa pherte hai.n phir barmaa dete hai.n
phir budh milaate hai.n phir chuul biThaate hai.n
ham tho.De tho.De hote hai.n
is bharii bharaa.ii duniyaa me.n ham kam-kam hote hai.n
jab shahr me.n jangal dar aa.e aur us kaa chalan ja.nglaa.e
to ham Gaar se aate hai.n
jab jangal shahr kii zad me.n ho aur us kaa sukuu.n shahraa.e
to bargad se nikalte hai.n
ham tho.De tho.De hote hai.n
ham kam-kam hote hai.n
ham shaa.ir hote hai.n

Waheed Ahmad
Nazm

hindostan

go KHaak ho chukaa hai hindostaa.n hamaaraa
phir bhii hai kul jahaa.n me.n pallaa garaa.n hamaaraa
mu.nh tak rahaa hai ab tak saaraa jahaa.n hamaaraa
hai naam kishvaro.n me.n vird-e-zabaa.n hamaaraa
zarKHez hai saraasar ye gulistaa.n hamaaraa
hai taa.ir-e-tilaa.ii hindostaa.n hamaaraa
bhaarat me.n dekhte the ham san.ate.n jahaa.n kii
mash.huur thii jahaa.n me.n kaariigarii yahaa.n kii
vo baat hindiyo.n ne Gairo.n ke darmiyaa.n kii
jis par jhukii hai gardan amboh-e-sarkashaa.n kii
miltaa thaa ilm-o-fan me.n ham-sar kahaa.n hamaaraa
hai taa.ir-e-talaa.ii hindostaa.n hamaaraa
tasliim kar rahe hai.n espen aur jaapaa.n
sab maante hai.n lohaa german france-o-yuuna.n
america me.n hai charchaa is mulk kaa numaayaa.n
bhaarat kii saltanat par bartaaniya hai naazaa.n
uu.nchaa hai aasmaa.n se ye aastaa.n hamaaraa
hai taa.ir-e-tilaa.ii hindostaa.n hamaaraa
parbat kii choTiyaa.n hai.n darbaa.n hamaare dar kii
daaman me.n jis ke pinhaa.n kaane.n hai.n siim-o-zar kii
ga.ng-o-jaman pe jis dam sayyaad ne nazar kii
sarsabz vaadiyo.n se is kii nazar na sar kii
kyaa Gairat-e-iram hai ye bostaa.n hamaaraa
hai taa.ir-e-tilaa.ii hindostaa.n hamaaraa
paidaa kiye the jis ne arjun kanaad gautam
aaGosh me.n pale the jis kii byaas-o-bikram
godii me.n jis kii khele the bhiim raam bhisham
jin ke sabab se ab tak hai hindiyo.n me.n dam-KHam
vo mulk-e-be-badal hai jannat-nishaa.n hamaaraa
hai taa.ir-e-tilaa.ii hindostaa.n hamaaraa

Aaftab Rais Panipati
Nazm

bait-e-ankabut

ye aurat is liye paidaa hu.ii hai
ki is ko Tuk.De Tuk.De kar ke phaa.nsii par cha.Dhaayaa jaa.e
ise yuunaan ke ik mash.huur Daaku ke bistar kii zaruurat hai
(vo apne sab shikaaro.n kaa qadd-o-qaamat isii bistar ke paimaane kii nisbat se ghaTaataa kaaTtaa yaa
khii.nch kaa jabran ba.Dhaataa thaa)
KHutuut-e-lab to dekho!
kis tarah simTe hu.e hai.n, sa.ng-e-dil
aamiyaana-pan taraavish kar rahaa hai
ye kiina-tuuz aa.nkhe.n
in kii gahraa.ii ke kiicha.D me.n
sunahrii machhliyaa.n Gote lagaatii hai.n
rupahlii shaaKH tauba hai ki khultii baa.nh hai, lekin
ko.ii saaya nahii.n pa.Dtaa!

Shamsur Rahman Faruqi
Nazm

KHak-e-hind

is KHaak-e-dil-nashii.n se chashme hu.e hai.n jaarii
chiin-o-‘arab me.n jin se hotii thii aabyaarii
saare-jahaa.n pe jab thaa vahshat kaa abr taarii
chashm-o-charaaG-e-‘aalam thii sar-zamii.n hamaarii
sham’-e-adab na thii jab yuunaa.n kii anjuman me.n
taabaa.n thaa mehr-e-daanish is vaadii-e-kuhan me.n

Chakbast Braj Narayan
Nazm

sada ba-sahra

qaraar-e-qalb-zaar-e-hind vaar-e-barnaa.ii-e-yuunaa.n
taajllii-e-aal-e-ibraahiim par paiham jo utrii thii
ta.Daptaa sho.ala-guu.n KHuu.n jaahiliyat kii navaa.o.n kaa
chamak reg-e-ravaa.n kii sar-bulandii naKHl-e-sahraa kii
dayaar-e-'haafiz'-o-'KHayyaam' kii u.Dtii hu.ii KHushbuu
nigaah-e-'Gaalib'-o-'iqbaal kii getii-shikan mastii

Shafiq Fatima Shera
Nazm

jangal: ek hasht pahlu taswir

vo sunahrii choliyo.n me.n kas-masaate, gol, ubhre, saa.nvle Tiile
gol, ubhre, saa.nvle Tiile sunahrii, ta.ng, raushan choliyaa.n
kas-masaate, gol, ubhre saa.nvle gadraa.e bhaarii saKHt Tiile
vo sunahre-pan ko yaa.n-vaa.n phaa.D kar KHud phaT pa.Daa hai shyaam-ra.ng
baar se hai chaak-cholii jhaa.nktaa hai saa.nvlii dhartii kaa a.ng
(yaad aataa hai yahaa.n tashbiih kaa samraaT kaalii-daas)

Ameeq Hanafi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now