Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "zehnii"

Nazm MATCHES FOR "zehnii"

Nazm

aaKHiri lamha

tumhe.n kal apne shariik-e-safar ko chun.naa hai
vo jis se tum ko mohabbat mile rifaaqat bhii
hazaar ek ho.n do zehn muKHtalif ho.nge
ye baat talKH hai lekin hai ain-fitrat bhii
bahut hasiin hai zehnii mufaahamat lekin
ba.Dii aziim hai aadarsh kii hifaazat bhii

Jan Nisar Akhtar
Nazm

apahij gaDi ka aadmi

mai.n bikhraa hu.aa aadmii huu.n
mirii zehnii biimaariyo.n kaa sabab ye zamii.n hai
mai.n us din se Dartaa huu.n jab barf saarii pighal kar
ise Garq kar de
na.e aasmaanii havaadis
sifar me.n badal de.n
yaa aadmii apne a.amaal se KHud
ise ik kahaanii banaa de
zamii.n shora pushto.n kii aamaaj-gah ban ga.ii hai

Akhtarul Iman
Nazm

zara socho

mujhe ma.aluum hai jaanaa.n
mire marne pe tum aa.nsuu bahaa.oge
mirii har baat tum ko yaad aa.egii
ba-mushkil bhuul paa.oge
zaraa socho
ye narmii hamdamii me.n mujh ko mil jaa.e to achchhaa ho
mujhe ma.aluum hai
merii Galatiyo.n ko saraasar bhuul jaa.oge
gile shikve kabhii mu.nh par na laa.oge
zaraa socho
tumhaarii be-niyaazii
gar merii maujuudgii me.n mujh ko mil jaa.e to achchhaa ho
mujhe ma.aluum hai ye bhii
ki merii qabr par
tum phuul rakkhoge mohabbat se
mirii KHaatir vahii.n kuchh der rah kar Gam bhulaa.oge
zaraa socho
ye chaahat haath hii me.n mujh ko mil jaa.e to achchhaa ho
mujhe aisaa bhii lagtaa hai
mirii aavaaz KHaamoshii me.n sun kar chau.nk jaa.oge
mirii yaado.n ke a.ndhere me.n apnaa dil jalaao.ge
zaraa socho
yaqii.n is raushnii me.n mujh ko mil jaa.e to achchhaa ho
mujhe ehsaas hotaa hai
ki meraa ranj kuchh arsa tumhe.n maGmuum rakkhegaa
tumhe.n zehnii sukuu.n se der tak mahruum rakkhegaa
magar jaanaa.n
ye Gam aasuudgii me.n mujh ko mil jaa.e to achchhaa ho
jo mar kar tum se haasil ho
vo sab is zindagii me.n mujh ko mil jaa.e to
achchhaa ho
zaraa socho

Asna Badr
Nazm

shofer

ham hai.n us aKHlaaq ke pairav, ham hai.n us tahziib ke log
jis me.n iffat ik ''mafruuza'' ismat jis me.n '''zehnii rog''
jazbo.n par pahre biThlaanaa kyaa ''saudaa-e-KHaam'' nahii.n?

Shaad Aarfi
Nazm

sabza-e-begana

hasab-nasab hai na taariiKH o jaa-e-paidaa.ish
kahaa.n se aayaa thaa maz.hab na valdiyat ma.aluum
maqaamii chhoTe se KHairaatii aspataal me.n vo
kahii.n se laayaa gayaa thaa vahaa.n ye hai marquum
mariiz raato.n ko chillaataa hai ''mire andar
asiir zaKHmii parinda hai ik, nikaalo ise
guluu-girafta hai ye habs-e-dam hai KHaa.if hai
sitam-rasiida hai mazluum hai bachaa lo ise''
mariiz chiiKHtaa hai dard se karaahtaa hai
ye vietnam, kabhii dominican, kabhii kashmiir
zar-e-kasiir, siyah qaume.n, KHaam madniyaat
kasiif tel ke chashme, avaam, istehsaal
zamii.n kii maut bahaa.im, fizaa.ii ja.ng, sitam
ijaara-daarii, subuk gaam, dilrubaa, atfaal
sarod-o-naGma, adab, sher, amn, barbaadii
janaaza ishq kaa, daf kii sadaa.e.n, murda KHayaal
taraqqii, ilm ke gahvaare, ruuh kaa madfan
KHudaa kaa qatl, ayaa.n zer-e-naaf zohra jamaal
tamaam raat ye be-rabt baate.n kartaa hai
mariiz saKHt pareshaanii kaa sabab hai yahaa.n
Garaz ki jo thaa shikaayat kaa ek daftar thaa
natiija ye hai usii roz muntaqil karke
use ik aur shifaa-KHaane ko ravaana kiyaa
sunaa gayaa hai vahaa.n nafsiyaat ke maahir
tabiib haaziq o nabbaaz doctor kitne
talab kiye ga.e aur sab ne ittifaaq kiyaa
ye ko.ii zehnii maraz hai, mariiz ne shaayad
kabhii parinda ko.ii paalaa hogaa lekin vo
adam-e-tavajjohii yaa ittifaaq se yuu.nhii
bichaara mar gayaa us maut kaa asar hai ye
ajiib chiiz hai taht-e-shu.uur insaa.n kaa
ye aur kuchh nahii.n ehsaas-e-jurm hai jis ne
dil o dimaaG pe qabza kiyaa hai is darja
mariiz qaatil o mujrim samajhtaa hai KHud ko!
kisii kii raa.e thii pasmaa.nda qaum kaa ik fard
mariiz hogaa isii vaaste siyah qaume.n
Gariib ke liye ik taboo ban ga.ii.n afsos
ko.ii ye kahtaa thaa ye asal me.n hai hubb-e-vatan
mariiz chaahtaa thaa ham kafiil ho.n apne
kisii bhii qaum ke aage na haath phailaa.e.n
yahii.n pe tel ke chashme hai.n, vo kare.n daryaaft!
gumaan kuchh ko thaa ye shaKHs ko.ii shaa.er hai
jo chaahtaa thaa jahaa.n-gardii me.n guzaare vaqt
hasiin aurte.n maa.il ho.n lutf-o-aish rahe
qalam ke zor se shohrat mile zamaane me.n
zar-e-kasiir bhii haath aa.e is bahaane se
magar Gariib kii sab koshishe.n ga.ii.n naakaam
shikast-e-paiham o ehsaas-e-naa-rasaa.ii ne
ye haal kar diyaa majruuh hoga.e a.asaab
Garaz ki nukta-rassii me.n guzar gayaa sab vaqt
vo chiiKHtaa hii rahaa dard kii davaa na milii
nashist baa'd nashist aur mu.aa.ene shab o roz
inhii.n me.n vaqt guzartaa gayaa shifaa na milii
phir ek shaam vahaa.n surma-dar-guluu aa.ii
jo us ke vaaste goyaa tabiib-e-haaziq thii
kisii ne phir na sunii dard se bharii aavaaz
karaahtaa thaa jo KHaamosh ho gayaa vo saaz

Akhtarul Iman
Nazm

ism-e-azam

mai.n mash.huur ho gayaa huu.n
achaanak itnaa ziyaada
ki vo log mujhe buraa kahne lage hai.n
jo kabhii mujhe mile hii nahii.n
jo mujhe jaante hii nahii.n
maaheriin-e-nafsiyaat kahte hai.n
Gair-haqiiqii duniyaa me.n rahne vaale
jazbaatii log
KHud ko hero samajh kar
jaagtii aa.nkho.n ke KHvaabo.n me.n
apnii marzii ke vilen taKHliiq kar lete hai.n
is Galat-fahmii kaa ta.alluq
un ke shu.uur se nahii.n hotaa
un ke a.amaal se nahii.n hotaa
un ke shajre se nahii.n hotaa
ye ek zehnii aariza hai
is liye
mujhe kisii se shikaayat nahii.n
mariizo.n se hamdardii hai
aur tho.Dii sii KHushii bhii
ki gaaliyo.n se kalii karne vaale
kuchh logo.n ko
meraa naam le kar
taskiin milne lagii hai
meraa naam
ism-e-aazam ban gayaa hai

Mubashshir Ali Zaidi
Nazm

urdu

kaash urdu hii me.n ho saare dafaatir kaa hisaab
kaash taqriire.n kare.n urdu me.n sab izzat-ma.aab
kab talak rakhiyegaa a.ngrezii me.n ta.aliimii nisaab
qaum ke bachcho.n ke haq me.n ye hai ik zehnii azaab
kab talak ye kah ke qismat se rahe.n ham shikva-sanj
''ra.nj kaa KHuugar hu.aa insaa.n to miT jaataa hai ra.nj''

Syed Mohammad Jafri
Nazm

aadha-adhura shaKHs

mire ghar ke makiino, rishta-e-daaro, ai galii vaalo
mujhe yuu.n rassiyo.n se baa.ndh kar
zehnii mariizo.n ke shifaa-KHaane me.n mat bhejo
ki mai.n paagal nahii.n huu.n, chiiKHtaa, sar piiTtaa to huu.n
magar mai.n chiiKH kar us ko bulaataa huu.n
jo meraa aadhaa hissa hai
jo meraa duusraa mai.n hai

Satyapal Anand
Nazm

lowe

tumhaaraa zehnii tavaazun biga.D chukaa hai?
tum u.ngliyo.n ke bajaa.e
keyboard chabaane vaalii la.Dkii se mohabbat karte ho
jo khaa.nstii hai to
us ke halaq se girne lagte hai.n
s
i
d
r
aur
a ke pichke hu.e letters

Sidra Sahar Imran
Nazm

kaun hai mujrim shahr-e-ilm ki taraji ka

ye jo baune KHudaa bane hai.n ajiib shai se jo lag rahe hai.n
hai.n dar-haqiiqat ye aadmii hii bas un kii KHaslat judaa hai tho.Dii
anaa jo un kii kuchal chukii hai zamiir un kaa jo mar gayaa hai
ye sach hai zehnii Gulaam hai.n ab KHabaasato.n ke imaam hai.n ye
hamesha jhuk kar mile danii se sanaa me.n ratab-ul-lisaan ho kar
gunah ko un ke savaab jaanaa fareb ko laa-javaab kah kar
unhii ko aaqaa unhii ko maalik unhii ko apnaa KHudaa bhii maanaa
unhii ke haatho.n jism-o-jaa.n ko KHudii ko iimaa.n ko bech Daalaa
ba-naam-e-ilm-o-adab jo paayaa
abdullaah-ibn-e-ubay kii daulat abuu-jahl kii vo KHaasiyat hai
jo chaahe.n un ko kuchh aur kah le.n jo chaahe.n insaa.n phir bhii samjhe.n
magar ye sach hai la.iin hai.n ye
kam-zarf aur haqiir hai.n ye
ye daanaa.o.n ke haq ko yaksar Gabii ko mohmal ko bechte hai.n
ye qaum-o-millat kaa naam le kar usuul-o-maz.hab kii baat kah kar
nasle.n kitnii tabaah kar ke khetiyaa.n apnii sii.nchte hai.n
aur habaab dil me.n baiThaa
mai.n dekhtaa huu.n ye sochtaa huu.n
hai kaun mujrim in me.n aaKHir
jo aaqaa maalik banaa hu.aa thaa
yaa vo jo baunaa KHudaa banaa hai
yaa phir vo daanaa shikast khaa kar
idhar udhar jo bhaTak rahe hai.n
yaa vo Gabii jo haq churaa kar
KHudaa ke KHitte me.n aa base hai.n
yaa mai.n
ki tanhaa muhiit-e-dil me.n
mahz tamaashaa-bii.n banaa huu.n

Abu Bakr Abbad
Nazm

jab bhi jute KHarido

jab bhii juute KHariido
to ye dhyaan rakhnaa
bahut narm ho.n
saKHt cham.Daa na ho
aur bhaarii na ho.n
ain mumkin hai ik din tumhe.n apne logo.n ke siine pe chalnaa pa.De
un kii ruuhe.n kuchalnaa pa.De.n un ko takliif utnii na ho un me.n nafrat ke tuufaan palne lage.n
zahr mu.nh se ugalne lage.n
juute kaale na ho.n
varna un kii siyaahii dil-o-jaa.n pe jam jaa.egii aur baatin me.n kuchh KHair hogii
to mar jaa.egii
un kii e.Dii me.n narmii ho utnii
agar paa.nv dhartii pe maaro to un kii dhamak se go zehnii KHaliyo.n ko nuqsaan na ho aur haDDiyaa.n na ho
tasme vaale bhii juute na ho.n
un se saazish ke phande na ban.ne lago aur phaa.nsii kii KHaatir kahii.n
apne mohsin na chun.ne lago
jab bhii juute KHariido

Tauqeer Abbas
Nazm

nakaam muzakaraat

mak.Dii ke jaale kaalii satre.n aur log
ek hii ghar me.n rahte hai.n
lekin anjaan rahte hai.n
ek duusre ke naamo.n se
is liye bahaal nahii.n ho paate
un ke sifaaratii ta.alluqaat
rakhii rah jaatii hai.n kono.n khudro.n me.n
zehnii ham-aaha.ngii kii saarii file.n
aur log
rubber-band kii tarah un par
cha.Dh jaate hai.n

Sidra Sahar Imran
Nazm

baqa-e-mohabbat

dar diivaar aur dariiche
ek mu.aahida hai.n
adam-e-mudaaKHalat kaa mashruut mu.aahida
do mohazzab insaano.n ke darmiyaa.n
do mutamaddin KHaandaano.n ke darmiyaa.n
diivaar
tahziib kii tarjumaan
tamaddun kii pahchaan
aur baqaa-e-baahamii kii aa.iina-daar
hiila huquuq kii zamaanat
baqaa-e-tahiiyat kii alaamat
hait aur ahaata
zehnii-o-jismaanii aasuudgii
aur
sukh-chain ke liye laazim hai
daKHl dar ma.aquulaat
Gair-aKHlaaqii hii nahii.n
Gair-insaanii ravayya bhii hai
ghar kaa haq hai ki vo
duusre ghar kii be-jaa mudaaKHalat se mahfuuz rahe
ham diivaar to
hamdard hotaa hai
KHabar-giir hotaa hai
KHabar-rasaa.n nahii.n ban saktaa
taKHayyul aasuudgii
sukh ghaTaatii
aur dukh ba.Dhaatii hai
shakar-ganjii paidaa kartii hai
aazurda-dilii kaa maujib bantii hai
faasle diivaar kii puKHtagii se nahii.n
dilo.n kii saKHtii se ba.Dhte hai.n
puKHta diivaar to tamaddun kii baqaa hai
suurii faasle be-ma.anii ho jaate hai.n
agar qalb-o-nazar shaad ho.n
haq KHalvat KHaliij nahii.n
faraaKHii tarfain hai
privacy kaa haq
tahziib-e-insaanii kii me.araaj hai

Shamim Alvi
Nazm

is dharti ke tare hum hain

ye ma.azuur bekas Gabii zehnii bachche
hai.n insaa.n nahii.n ko.ii maaTii ke putle
zabaa.n se hai.n guu.nge samaa.at se aarii
banaa.o na in ko sa.Dak ke bhikaarii
hai.n pur-pech-tar in kii hastii ke raste
ki pur-soz jaise ho.n bansii ke naGme
saraape ko un ke na be-kaar kahnaa
ye hai.n zindagii kaa hasii.n ek gahnaa
kabhii ye ha.nsaa.e.n kabhii ruuTh jaa.e.n
dilo.n se Gamo.n kii lakiire.n miTaa.e.n
ye naT-khaT haTiile bahut chulbule hai.n
adaa.o.n me.n in kii ajab valvale hai.n
kaTii u.ngliyaa.n hai.n musavvir bane.nge
apaahij sahii phir bhii taajir bane.nge
mohabbat kaa siino.n me.n jazba jagaa.o
samaajii fariize ko apne nibhaa.o
ye ik farz aisaa ki raahat hai is me.n
chhupii ibn-e-aadam kii azmat hai is me.n
inhe.n Gaur se tum gha.Dii bhar jo dekho
mashiyyat hai qudrat kii kuchh is ko samjho
suluuk un se rakkho mohabbat vafaa kaa
sila paa.oge tum bhii be-shak jazaa kaa
inhe.n bhuul kar na kabhii duur rakhnaa
'adiim' in sitaaro.n ko maamuur rakhnaa

Bismillah Adeem
Nazm

tumhaare dard ko apne upar lene ke liye

mai.n mahsuus kar saktii huu.n
tumhaare dard ko
apne jism me.n utarte hu.e
magar yaqiin nahii.n kar paatii
ki ye tumhaaraa hii dard hai
gha.Dii kii Tik-Tik ke saath
mai.n sochtii rahtii huu.n
tumhaare bistar ke gird chakkar lagaa kar
mai.n is dard ko apne uupar lene ke liye
kyaa kyaa qurbaan kar saktii huu.n
jismaanii raahate.n
samaajii muraa.aat
jazbaatii masarrate.n
zehnii lataafate.n
yaa puurii zindagii bhii
jo bahut qiimtii hai
aur mujhe bahut pyaarii

Tanveer Anjum
Nazm

gardish-e-ayyam

marhala gardish-e-haalaat ke roz-o-shab kaa
marhala uljhe KHayaalaat ke roz-o-shab kaa
marhala vaqt kii be-mehrii-o-bezaarii kaa
marhala zehnii aziyyat kaa dil-aazaarii kaa
jiite jii kyaa mujhe har roz hii marnaa hogaa
zindagii itnaa bataa de tuu mujhe tere liye
aur yuu.n kitne maraahil se guzarnaa hogaa

Ashhar Nadeemi
Nazm

udasi ki kokh se janm leti ek nazm

aah afsos
mai.n ne kiyaa kuchh nahii.n sahaa magar phir bhii
merii qismat haamila ho kar ek
haqiiqii KHushii ko janm na de sakii
vo biga.Dtaa zehnii tavaazun
school ke bench par akele baiThne kaa dukh
murda-KHaane se apnii laash na milne kaa Gam
haa.e vo dosto.n ke badle ravayye
vo chand ummiido.n ke janaaze jinhe.n mai.n ne
KHud se chhupaa kar hii KHud me.n dafn kar diyaa
vo KHvaabo.n ke TuuTe hu.e chand Tuk.De
jinhe.n mai.n ne kisii udaas naGme ke havaale kar diyaa
meraa har KHvaab signal pe soyaa rahaa
aur log apnii gaa.Diyo.n se unhe.n kuchal kar chal diye
mai.n yuunaanii qadiim shahro.n ke uu.nche malbo.n pe
kaaGaz kii chi.Diyaa jaise u.D kar aise giraa
jaise mujh par sadiyo.n ke sadmo.n kaa bojh thaa
abhii bhii tum puuchhte ho yaar hu.aa kyaa hai
mai.n ne kitne jhuuTe dilaaso.n ke peg banaa.e
aur aise nosh kiye jaise kabhii kuchh hu.aa hii nahii.n thaa
ye sab haadse
mere dil pe kisii rail-gaa.Dii kii tarah chalte rahe
aur us ke Tuk.De KHalaa.o.n me.n bikhar ga.e
vahii dil jis me.n
ummiide.n armaan chand KHvaab aur ek 'adad meraa pasandiida shaKHs bastaa thaa
mai.n apnii barbaadii pe royaa to mere aa.nsu.o.n se
merii qismat me.n likhii saarii KHushiyaa.n
kisii anjaan dariyaa me.n bah ga.ii.n
mai.n apnii bebasii pe ha.nstaa
signal pe apne KHvaabo.n ko gaaliyaa.n baktaa rahaa
KHud-kushiyaa.n karne vaale
KHvaabo.n me.n mujhe sabr kaa dars dete rahe
aur mai.n apnii paamaalii pe udaasii
kii kokh se nazme.n jantaa rahaa
ek ke baa'd ek haadisa merii zindagii ke canvas se
rang nahii.n muskuraahaTe.n chhiin le gayaa
magar monis-e-jaa.n aise bhii kyaa
mere kandhe tere dilaase kii thapkii ke liye taraste rahe
aur tuu yuunaanii KHudaa.o.n kii maujuudgii pe
mashkuuk bahs me.n gum rahaa
mai.n ne kyaa kuchh nahii.n sahaa monis-e-jaa.n
quetta-cafe kii chhat pe baiThe
haadso.n kaa maaraa ek la.Dkaa ro ro ke apne dosto.n ko bataataa rahaa
ki haa.n mai.n ne ye sab sahaa hai
us kaa banjar chehra chiiKH chiiKH kar us kii bebasii bayaa.n kar rahaa thaa
aur us kii dahliiz par ek nayaa haadisa us ke intizaar me.n thaa

Manzar Latif
Nazm

ramz

in kitaabo.n ne ba.Daa zulm kiyaa hai mujh par
in me.n ik ramz hai jis ramz kaa maaraa hu.aa zehn
muzhda-e-ishrat-e-anjaam nahii.n paa saktaa
zindagii me.n kabhii aaraam nahii.n paa saktaa

Jaun Eliya
Nazm

dastur

phuul shaaKHo.n pe khilne lage tum kaho
jaam rindo.n ko milne lage tum kaho
chaak siino.n ke silne lage tum kaho
is khule jhuuT ko zehn kii luuT ko
mai.n nahii.n maantaa mai.n nahii.n jaantaa

Habib Jalib
Nazm

walid ki wafat par

tumhaarii qabr par
mai.n faatiha pa.Dhne nahii.n aayaa
mujhe maaluum thaa
tum mar nahii.n sakte
tumhaarii maut kii sachchii KHabar jis ne u.Daa.ii thii
vo jhuuTaa thaa
vo tum kab the
ko.ii suukhaa hu.aa patta havaa se mil ke TuuTaa thaa
mirii aa.nkhe.n
tumhaare manzaro.n me.n qaid hai.n ab tak
mai.n jo bhii dekhtaa huu.n
sochtaa huu.n
vo vahii hai
jo tumhaarii nek-naamii aur bad-naamii kii duniyaa thii
kahii.n kuchh bhii nahii.n badlaa
tumhaare haath merii u.ngliyo.n me.n saa.ns lete hai.n
mai.n likhne ke liye
jab bhii qalam kaaGaz uThaataa huu.n
tumhe.n baiThaa hu.aa mai.n apnii hii kursii me.n paataa huu.n
badan me.n mere jitnaa bhii lahuu hai
vo tumhaarii
laGzisho.n naakaamiyo.n ke saath bahtaa hai
mirii aavaaz me.n chhup kar
tumhaaraa zehn rahtaa hai
mirii biimaariyo.n me.n tum
mirii laachaariyo.n me.n tum
tumhaarii qabr par jis ne tumhaaraa naam likhaa hai
vo jhuuTaa hai
tumhaarii qabr me.n mai.n dafn huu.n
tum mujh me.n zinda ho
kabhii fursat mile to faatiha pa.Dhne chale aanaa

Nida Fazli
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now