چنندہ دوہے

گھر کو کھوجیں رات دن گھر سے نکلے پاؤں

وہ رستہ ہی کھو گیا جس رستے تھا گاؤں

چڑیا نے اڑ کر کہا میرا ہے آکاش

بولا شکھرا ڈال سے یوں ہی ہوتا کاش

کیوں راتوں کا جاگیے کر کے اس کو یاد

پتھر دل پر کب اثر کرتی ہے فریاد

آئے مٹھی بند لیے چل دیے ہاتھ پسار

وہ کیا تھا جو لٹ گیا دیکھو سوچ بچار

آنکھیں دھوکا دے گئیں پاؤں چھوڑ گئے ساتھ

سبھی سہارے دور ہیں کس کا پکڑیں ہاتھ

کیسے اپنے پیار کے سپنے ہوں ساکار

تیرے میرے بیچ ہے مذہب کی دیوار

آسمان پر چھا گئی گھٹا گھور گھنگور

جائیں تو جائیں کہاں ویرانے میں شور

جیسا اس کا کرودھ ہے ویسا اس کا پیار

الگ الگ ہوتی نہیں دو دھاری تلوار

دیا بجھا پھر جل جائے اور رت بھی پلٹا کھائے

پھر جو ہاتھ سے جائے سمے وہ کبھی نہ لوٹ کے آئے

کب تک جان بچائے پھول پہ اوس کا ننھا قطرہ

پتوں کی بھی اوٹ میں ہو تو سورج پل پل خطرہ

امرت رس کی بین پر زہر کے نغمے گاؤ

مرہم سے مسکان کے زخموں کو اکساؤ

آنگن ہے جل تھل بہت دیواروں پر گھاس

گھر کے اندر بھی ملا شاہدؔ کو بنواس

دوہے کبت کہہ کہہ کر عالؔی من کی آگ بجھائے

من کی آگ بجھی نہ کسی سے اسے یہ کون بتائے

اک چٹکی بھر چاندنی اک چٹکی بھر شام

برسوں سے سپنے یہی دیکھے یہاں عوام

اے سترنگی روشنی کیسی شکل بنائی

جو رنگ اپنایا نہیں وہ ہی دیا دکھائی

دنیا سے اوجھل رہے لیا لبادہ اوڑھ

سارے تن پر چھا گیا من کا کالا کوڑھ

جرم محبت کی ملی ہم کو یہ پاداش

اپنے کاندھے پر چلے لے کر اپنی لاش

بیتے جس کی چھاؤں میں موسم کے دن رات

اپنے من کی آس کا ٹوٹ گیا وہ پات

دامن صبح پر پھیل گئے رنگ برنگے پھول

ان کی رونق ہر جگہ گھر ہو یا اسکول

آنکھ سے اوجھل ہو اور ٹوٹے پربت جیسی پریت

منہ دیکھے کی یاری پرتوؔ شیشہ کی سی پریت