آگ پر اشعار

ابلتے وقت پانی سوچتا ہوگا ضرور

اگر برتن نہ ہوتا تو بتاتا آگ کو

عقل ہر بار دکھاتی تھی جلے ہاتھ اپنے

دل نے ہر بار کہا آگ پرائی لے لے

اس سے کہنا کہ دھواں دیکھنے لائق ہوگا

آگ پہنے ہوئے جاوں گا میں پانی کی طرف

اپنے جلنے کا ہمیشہ سے تماشائی ہوں

آگ یہ کس نے لگائی مجھے معلوم نہیں

اوروں کی آگ کیا تجھے کندن بنائے گی

اپنی بھی آگ میں کبھی چپ چاپ جل کے دیکھ

سرد راتوں کا تقاضہ تھا بدن جل جاے

پھر وہ اک آگ جو سینہ سے لگائی میں نے

میرے ہونے سے نہ ہونا ہے مرا

آگ جلنے سے دھواں آباد ہے

کونسا نام دیں ایسی برسات کو جس کے دامن میں پانی بھی ہے آگ بھی

ہوک اٹھتی رہی روح جلتی رہی دل پگھلتا رہا اشک ڈھلتے رہے

صبح دم صحن گلستاں میں صبا کے جھونکے

آتش درد محبت کو ہوا دیتے ہیں

کچھ یوں فنا ہوا ہوں محبت کی آگ میں

دنیا کو دے چلا ہوں کہانی ملال کی

میں گھر بسا کے سمندر کے بیچ سویا تھا

اٹھا تو آگ کی لپٹوں میں تھا مکان مرا

چمک اٹھے مری آنکھوں میں اشک کی صورت

جو آگ دل میں ہے روشن زباں سے ظاہر ہو

ہمیں بجھاتے ہیں لو پہلے سب چراغوں کی

پھر ان چراغوں کے حصے کا جلنا پڑتا ہے