Best Couplets Featuring Trees

daraḳht kaT gayā lekin vo rābte 'nāsir'

tamām raat parinde zamīñ pe baiThe rahe

daraKHt kaT gaya lekin wo rabte 'nasir'

tamam raat parinde zamin pe baiThe rahe

gil hai aariz to qadd-e-yār daraḳht

kab ho aisā bahār-dār daraḳht

gil hai aariz to qadd-e-yar daraKHt

kab ho aisa bahaar-dar daraKHt

ye ik shajar ki jis pe na kāñTā na phuul hai

saa.e meñ us ke baiTh ke ronā fuzūl hai

ye ek shajar ki jis pe na kanTa na phul hai

sae mein us ke baiTh ke rona fuzul hai

kal shajar kī guftugū sunte the aur hairat meñ the

ab parinde bolte haiñ aur shajar ḳhāmosh haiñ

kal shajar ki guftugu sunte the aur hairat mein the

ab parinde bolte hain aur shajar KHamosh hain

sharīfe ke daraḳhtoñ meñ chhupā ghar dekh letā huuñ

maiñ āñkheñ band kar ke ghar ke andar dekh letā huuñ

sharife ke daraKHton mein chhupa ghar dekh leta hun

main aankhen band kar ke ghar ke andar dekh leta hun

thakan bahut thī magar sāya-e-shajar meñ 'jamāl'

maiñ baiThtā to mirā ham-safar chalā jaatā

thakan bahut thi magar saya-e-shajar mein 'jamal'

main baiThta to mera ham-safar chala jata

usī daraḳht ko mausam ne be-libās kiyā

maiñ jis ke saa.e meñ thak kar udaas baiThā thā

usi daraKHt ko mausam ne be-libas kiya

main jis ke sae mein thak kar udas baiTha tha

in daraḳhtoñ se bhī naata joḌiye

jin daraḳhtoñ kā koī saaya nahīñ

in daraKHton se bhi nata joDiye

jin daraKHton ka koi saya nahin

maiñ ik shajar kī tarah rah-guzar meñ Thahrā huuñ

thakan utaar ke tū kis taraf ravāna huā

main ek shajar ki tarah rah-guzar mein Thahra hun

thakan utar ke tu kis taraf rawana hua

daraḳht haath hilāte the rahnumā.ī ko

musāfiroñ ne to kuchh bhī nahīñ kahā mujh se

daraKHt hath hilate the rahnumai ko

musafiron ne to kuchh bhi nahin kaha mujh se