Best Propose Shayari

ishq ke iz.hār meñ har-chand rusvā.ī to hai

par karūñ kyā ab tabī.at aap par aa.ī to hai

ishq ke izhaar mein har-chand ruswai to hai

par karun kya ab tabiat aap par aai to hai

mujh se nafrat hai agar us ko to iz.hār kare

kab maiñ kahtā huuñ mujhe pyaar hī kartā jaa.e

mujh se nafrat hai agar us ko to izhaar kare

kab main kahta hun mujhe pyar hi karta jae

tujh se kis tarah maiñ iz.hār-e-tamannā kartā

lafz sūjhā to ma.ānī ne baġhāvat kar dī

tujh se kis tarah main izhaar-e-tamanna karta

lafz sujha to maani ne baghawat kar di

iz.hār-e-ishq us se na karnā thā 'sheftā'

ye kyā kiyā ki dost ko dushman banā diyā

izhaar-e-ishq us se na karna tha 'shefta'

ye kya kiya ki dost ko dushman bana diya

kiije iz.hār-e-mohabbat chāhe jo anjām ho

zindagī meñ zindagī jaisā koī to kaam ho

kije izhaar-e-mohabbat chahe jo anjam ho

zindagi mein zindagi jaisa koi to kaam ho

yuuñ to ashkoñ se bhī hotā hai alam kā iz.hār

haa.e vo ġham jo tabassum se ayaañ hotā hai

yun to ashkon se bhi hota hai alam ka izhaar

hae wo gham jo tabassum se ayan hota hai

un se iz.hār-e-mohabbat jo koī kartā hai

duur se us ko dikhā dete haiñ turbat merī

un se izhaar-e-mohabbat jo koi karta hai

dur se us ko dikha dete hain turbat meri

ye aañsū ye pashemānī kā iz.hār

mujhe ik baar phir bahkā ga.ī ho

ye aansu ye pashemani ka izhaar

mujhe ek bar phir bahka gai ho

chalo ki jazba-e-iz.hār chīḳh meñ to Dhalā

kisī tarah ise āḳhir adā bhī honā thā

chalo ki jazba-e-izhaar chiKH mein to Dhala

kisi tarah ise aaKHir ada bhi hona tha

kyuuñ na 'tanvīr' phir iz.hār kī jur.at kiije

ḳhāmushī bhī to yahāñ bā.is-e-rusvā.ī hai

kyun na 'tanwir' phir izhaar ki jurat kije

KHamushi bhi to yahan bais-e-ruswai hai