Best Shayari on Politics

tū idhar udhar kī na baat kar ye batā ki qāfile kyuuñ luTe

tirī rahbarī kā savāl hai hameñ rāhzan se ġharaz nahīñ

tu idhar udhar ki na baat kar ye bata ki qafile kyun luTe

teri rahbari ka sawal hai hamein rahzan se gharaz nahin

un kā jo farz hai vo ahl-e-siyāsat jāneñ

merā paiġhām mohabbat hai jahāñ tak pahuñche

un ka jo farz hai wo ahl-e-siyasat jaanen

mera paigham mohabbat hai jahan tak pahunche

mere siine meñ nahīñ to tere siine meñ sahī

ho kahīñ bhī aag lekin aag jalnī chāhiye

mere sine mein nahin to tere sine mein sahi

ho kahin bhi aag lekin aag jalni chahiye

tum se pahle vo jo ik shaḳhs yahāñ taḳht-nashīñ thā

us ko bhī apne ḳhudā hone pe itnā hī yaqīñ thā

tum se pahle wo jo ek shaKHs yahan taKHt-nashin tha

us ko bhi apne KHuda hone pe itna hi yaqin tha

kaTte bhī chalo baḌhte bhī chalo baazū bhī bahut haiñ sar bhī bahut

chalte bhī chalo ki ab Dere manzil hī pe Daale jā.eñge

kaTte bhi chalo baDhte bhi chalo bazu bhi bahut hain sar bhi bahut

chalte bhi chalo ki ab Dere manzil hi pe Dale jaenge

maujoñ kī siyāsat se māyūs na ho 'fānī'

girdāb kī har tah meñ sāhil nazar aatā hai

maujon ki siyasat se mayus na ho 'fani'

girdab ki har tah mein sahil nazar aata hai

kabhī jamhūriyat yahāñ aa.e

yahī 'jālib' hamārī hasrat hai

kabhi jamhuriyat yahan aae

yahi 'jalib' hamari hasrat hai

aur sab bhuul ga.e harf-e-sadāqat likhnā

rah gayā kaam hamārā hī baġhāvat likhnā

aur sab bhul gae harf-e-sadaqat likhna

rah gaya kaam hamara hi baghawat likhna

kal siyāsat meñ bhī mohabbat thī

ab mohabbat meñ bhī siyāsat hai

kal siyasat mein bhi mohabbat thi

ab mohabbat mein bhi siyasat hai

siyāsat ke chehre pe raunaq nahīñ

ye aurat hamesha kī bīmār hai

siyasat ke chehre pe raunaq nahin

ye aurat hamesha ki bimar hai