Best Siyasat Shayari

un kā jo farz hai vo ahl-e-siyāsat jāneñ

merā paiġhām mohabbat hai jahāñ tak pahuñche

un ka jo farz hai wo ahl-e-siyasat jaanen

mera paigham mohabbat hai jahan tak pahunche

ishq meñ bhī siyāsateñ niklīñ

qurbatoñ meñ bhī fāsla niklā

ishq mein bhi siyasaten niklin

qurbaton mein bhi fasla nikla

maslahat-āmez hote haiñ siyāsat ke qadam

tū na samjhegā siyāsat tū abhī nādān hai

maslahat-amez hote hain siyasat ke qadam

tu na samjhega siyasat tu abhi nadan hai

in se ummīd na rakh haiñ ye siyāsat vaale

ye kisī se bhī mohabbat nahīñ karne vaale

in se ummid na rakh hain ye siyasat wale

ye kisi se bhi mohabbat nahin karne wale

dil hī to hai siyāsat-e-darbāñ se Dar gayā

maiñ aur jā.ūñ dar se tire bin sadā kiye

dil hi to hai siyasat-e-darban se Dar gaya

main aur jaun dar se tere bin sada kiye

kal siyāsat meñ bhī mohabbat thī

ab mohabbat meñ bhī siyāsat hai

kal siyasat mein bhi mohabbat thi

ab mohabbat mein bhi siyasat hai

ye kaisī siyāsat hai mire mulk pe haavī

insān ko insāñ se judā dekh rahā huuñ

ye kaisi siyasat hai mere mulk pe hawi

insan ko insan se juda dekh raha hun

siyāsat ke chehre pe raunaq nahīñ

ye aurat hamesha kī bīmār hai

siyasat ke chehre pe raunaq nahin

ye aurat hamesha ki bimar hai

maiñ pairvi-e-ahl-e-siyāsat nahīñ kartā

ik rāsta in sab se judā chāhiye mujh ko

main pairwi-e-ahl-e-siyasat nahin karta

ek rasta in sab se juda chahiye mujh ko

sāmne mohabbat ke hech hai siyāsat bhī

jab dimāġh thak jaa.e dil se kaam le ai dost

samne mohabbat ke hech hai siyasat bhi

jab dimagh thak jae dil se kaam le ai dost