Celebrating Children's Day

bhale lagte haiñ schōloñ kī uniform meñ bachche

kañval ke phuul se jaise bharā tālāb rahtā hai

bhale lagte hain schoolon ki uniform mein bachche

kanwal ke phul se jaise bhara talab rahta hai

koī schōl kī ghanTī bajā de

ye bachcha muskurānā chāhtā hai

koi school ki ghanTi baja de

ye bachcha muskurana chahta hai

titliyāñ pakaḌne meñ duur tak nikal jaanā

kitnā achchhā lagtā hai phuul jaise bachchoñ par

titliyan pakaDne mein dur tak nikal jaana

kitna achchha lagta hai phul jaise bachchon par

uḌne do parindoñ ko abhī shoḳh havā meñ

phir lauT ke bachpan ke zamāne nahīñ aate

uDne do parindon ko abhi shoKH hawa mein

phir lauT ke bachpan ke zamane nahin aate

bachche ne titlī pakaḌ kar chhoḌ dī

aaj mujh ko bhī ḳhudā achchhā lagā

bachche ne titli pakaD kar chhoD di

aaj mujh ko bhi KHuda achchha laga

suno samundar kī shoḳh lahro havā.eñ Thahrī haiñ tum bhī Thahro

vo duur sāhil pe ek bachcha abhī gharauñde banā rahā hai

suno samundar ki shoKH lahro hawaen Thahri hain tum bhi Thahro

wo dur sahil pe ek bachcha abhi gharaunde bana raha hai

bachā ke laa.eñ kisī bhī yatīm bachche ko

aur us ke haath se taḳhlīq-e-kā.ināt kareñ

bacha ke laen kisi bhi yatim bachche ko

aur us ke hath se taKHliq-e-kainat karen

kisī bachche se piñjrā khul gayā hai

parindoñ kī rihā.ī ho rahī hai

kisi bachche se pinjra khul gaya hai

parindon ki rihai ho rahi hai

ise bachchoñ ke hāthoñ se uThāo

ye duniyā is qadar bhārī nahīñ hai

ise bachchon ke hathon se uThao

ye duniya is qadar bhaari nahin hai

sauñpoge apne ba.ad virāsat meñ kyā mujhe

bachche kā ye savāl hai gūñge samāj se

saunpoge apne baad wirasat mein kya mujhe

bachche ka ye sawal hai gunge samaj se

jab bachchoñ ko dekhtā huuñ to sochtā huuñ

mālik in phūloñ kī umr darāz kare

jab bachchon ko dekhta hun to sochta hun

malik in phulon ki umr daraaz kare

mohalle vaale mere kār-e-be-masraf pe hañste haiñ

maiñ bachchoñ ke liye galiyoñ meñ ġhubbāre banātā huuñ

mohalle wale mere kar-e-be-masraf pe hanste hain

main bachchon ke liye galiyon mein ghubbare banata hun

nursery kā dāḳhila bhī sarsarī mat jāniye

aap ke bachche ko aflātūn honā chāhiye

nursery ka daKHila bhi sarsari mat jaaniye

aap ke bachche ko aflatun hona chahiye

vo lamha jab mire bachche ne maañ pukārā mujhe

maiñ ek shāḳh se kitnā ghanā daraḳht huī

wo lamha jab mere bachche ne man pukara mujhe

main ek shaKH se kitna ghana daraKHt hui

kal yahī bachche samundar ko muqābil pā.eñge

aaj tairāte haiñ jo kāġhaz kī nannhī kashtiyāñ

kal yahi bachche samundar ko muqabil paenge

aaj tairaate hain jo kaghaz ki nannhi kashtiyan

faqat māl-o-zar-e-dīvār-o-dar achchhā nahīñ lagtā

jahāñ bachche nahīñ hote vo ghar achchhā nahīñ lagtā

faqat mal-o-zar-e-diwar-o-dar achchha nahin lagta

jahan bachche nahin hote wo ghar achchha nahin lagta

rāsta rok liyā merā kisī bachche ne

is meñ koī to 'asar' merī bhalā.ī hogī

rasta rok liya mera kisi bachche ne

is mein koi to 'asar' meri bhalai hogi

ghar se masjid hai bahut duur chalo yuuñ kar leñ

kisī rote hue bachche ko hañsāyā jaa.e

ghar se masjid hai bahut dur chalo yun kar len

kisi rote hue bachche ko hansaya jae

jitnī burī kahī jaatī hai utnī burī nahīñ hai duniyā

bachchoñ ke schōl meñ shāyad tum se milī nahīñ hai duniyā

jitni buri kahi jati hai utni buri nahin hai duniya

bachchon ke school mein shayad tum se mili nahin hai duniya

sātoñ aalam sar karne ke ba.ad ik din kī chhuTTī le kar

ghar meñ chiḌiyoñ ke gaane par bachchoñ kī hairānī dekho

saton aalam sar karne ke baad ek din ki chhuTTi le kar

ghar mein chiDiyon ke gane par bachchon ki hairani dekho