Gulaab Par Shayari

bharī bahār meñ ik shāḳh par khilā hai gulāb

ki jaise tū ne hathelī pe gaal rakkhā hai

bhari bahaar mein ek shaKH par khila hai gulab

ki jaise tu ne hatheli pe gal rakkha hai

suno ki ab ham gulāb deñge gulāb leñge

mohabbatoñ meñ koī ḳhasāra nahīñ chalegā

suno ki ab hum gulab denge gulab lenge

mohabbaton mein koi KHasara nahin chalega

ġhair mumkin hai tire ghar ke gulāboñ kā shumār

mere riste hue zaḳhmoñ ke hisāboñ kī tarah

ghair mumkin hai tere ghar ke gulabon ka shumar

mere riste hue zaKHmon ke hisabon ki tarah

gul-dān meñ gulāb kī kaliyāñ mahak uThīñ

kursī ne us ko dekh ke āġhosh vā kiyā

gul-dan mein gulab ki kaliyan mahak uThin

kursi ne us ko dekh ke aaghosh wa kiya

mujh ko bhī pahle-pahal achchhe lage the ye gulāb

Tahniyāñ jhuktī huiiñ aur titliyāñ uḌtī huiiñ

mujh ko bhi pahle-pahal achchhe lage the ye gulab

Tahniyan jhukti huin aur titliyan uDti huin

nikal gulāb kī muTThī se aur ḳhushbū ban

maiñ bhāgtā huuñ tire pīchhe aur tū jugnū ban

nikal gulab ki muTThi se aur KHushbu ban

main bhagta hun tere pichhe aur tu jugnu ban

vo jis ke sehn meñ koī gulāb khil na sakā

tamām shahr ke bachchoñ se pyaar kartā thā

wo jis ke sehn mein koi gulab khil na saka

tamam shahr ke bachchon se pyar karta tha

araq nahīñ tire rū se gulāb Tapke hai

ajab ye baat hai sho.ale se aab Tapke hai

araq nahin tere ru se gulab Tapke hai

ajab ye baat hai shoale se aab Tapke hai

gulāboñ ke hoñToñ pe lab rakh rahā huuñ

use der tak sochnā chāhtā huuñ

gulabon ke honTon pe lab rakh raha hun

use der tak sochna chahta hun

vo mahaktā hai jo ḳhushbū ke havāloñ kī tarah

is ko rakkhā hai kitāboñ meñ gulāboñ kī tarah

wo mahakta hai jo KHushbu ke hawalon ki tarah

is ko rakkha hai kitabon mein gulabon ki tarah