گلاب پر شاعری

بھری بہار میں اک شاخ پر کھلا ہے گلاب

کہ جیسے تو نے ہتھیلی پہ گال رکھا ہے

سنو کہ اب ہم گلاب دیں گے گلاب لیں گے

محبتوں میں کوئی خسارہ نہیں چلے گا

غیر ممکن ہے ترے گھر کے گلابوں کا شمار

میرے رستے ہوئے زخموں کے حسابوں کی طرح

گلدان میں گلاب کی کلیاں مہک اٹھیں

کرسی نے اس کو دیکھ کے آغوش وا کیا

مجھ کو بھی پہلے پہل اچھے لگے تھے یہ گلاب

ٹہنیاں جھکتی ہوئیں اور تتلیاں اڑتی ہوئیں

نکل گلاب کی مٹھی سے اور خوشبو بن

میں بھاگتا ہوں ترے پیچھے اور تو جگنو بن

وہ جس کے صحن میں کوئی گلاب کھل نہ سکا

تمام شہر کے بچوں سے پیار کرتا تھا

عرق نہیں ترے رو سے گلاب ٹپکے ہے

عجب یہ بات ہے شعلے سے آب ٹپکے ہے

گلابوں کے ہونٹوں پہ لب رکھ رہا ہوں

اسے دیر تک سوچنا چاہتا ہوں

وہ مہکتا ہے جو خوشبو کے حوالوں کی طرح

اس کو رکھا ہے کتابوں میں گلابوں کی طرح