Sardi Shayari

ab udaas phirte ho sardiyoñ kī shāmoñ meñ

is tarah to hotā hai is tarah ke kāmoñ meñ

ab udas phirte ho sardiyon ki shamon mein

is tarah to hota hai is tarah ke kaamon mein

december kī sardī hai us ke hī jaisī

zarā sā jo chhū le badan kāñptā hai

december ki sardi hai us ke hi jaisi

zara sa jo chhu le badan kanpta hai

sardī meñ din sard milā

har mausam bedard milā

sardi mein din sard mila

har mausam bedard mila

garmī lagī to ḳhud se alag ho ke so ga.e

sardī lagī to ḳhud ko dobāra pahan liyā

garmi lagi to KHud se alag ho ke so gae

sardi lagi to KHud ko dobara pahan liya

tum to sardī kī hasīñ dhuup kā chehra ho jise

dekhte rahte haiñ dīvār se jaate hue ham

tum to sardi ki hasin dhup ka chehra ho jise

dekhte rahte hain diwar se jate hue hum

us ke lahje meñ barf thī lekin

chhū ke dekhā to haath jalne lage

us ke lahje mein barf thi lekin

chhu ke dekha to hath jalne lage

lagī rahtī hai ashkoñ kī jhaḌī garmī ho sardī ho

nahīñ ruktī kabhī barsāt jab se tum nahīñ aa.e

lagi rahti hai ashkon ki jhaDi garmi ho sardi ho

nahin rukti kabhi barsat jab se tum nahin aae

sardī aur garmī ke uzr nahīñ chalte

mausam dekh ke sāhab ishq nahīñ hotā

sardi aur garmi ke uzr nahin chalte

mausam dekh ke sahab ishq nahin hota

jo de sakā na pahāḌoñ ko barf kī chādar

vo merī bāñjh zamīñ ko kapās kyā degā

jo de saka na pahaDon ko barf ki chadar

wo meri banjh zamin ko kapas kya dega

kabhī to sard lagā dopahar kā sūraj bhī

kabhī badan ke liye ik kiran ziyāda huī

kabhi to sard laga dopahar ka suraj bhi

kabhi badan ke liye ek kiran ziyaada hui

ab kī sardī meñ kahāñ hai vo alaav siina

ab kī sardī meñ mujhe ḳhud ko jalānā hogā

ab ki sardi mein kahan hai wo alaw sina

ab ki sardi mein mujhe KHud ko jalana hoga

saḳht sardī meñ ThiThurtī hai bahut ruuh mirī

jism-e-yār aa ki bechārī ko sahārā mil jaa.e

saKHt sardi mein ThiThurti hai bahut ruh meri

jism-e-yar aa ki bechaari ko sahaara mil jae

ik barf sī jamī rahe dīvār-o-bām par

ik aag mere kamre ke andar lagī rahe

ek barf si jami rahe diwar-o-baam par

ek aag mere kamre ke andar lagi rahe

tez dhuup meñ aa.ī aisī lahar sardī kī

mom kā har ik putlā bach gayā pighalne se

tez dhup mein aai aisi lahar sardi ki

mom ka har ek putla bach gaya pighalne se

itnī sardī hai ki maiñ bāñhoñ kī harārat māñgūñ

rut ye mauzūñ hai kahāñ ghar se nikalne ke liye

itni sardi hai ki main banhon ki hararat mangun

rut ye mauzun hai kahan ghar se nikalne ke liye

sardī hai ki is jism se phir bhī nahīñ jaatī

sūraj hai ki muddat se mire sar par khaḌā hai

sardi hai ki is jism se phir bhi nahin jati

suraj hai ki muddat se mere sar par khaDa hai

is baar intizām to sardī kā ho gayā

kyā haal peḌ kaTte hī bastī kā ho gayā

is bar intizam to sardi ka ho gaya

kya haal peD kaTte hi basti ka ho gaya

aisī sardī meñ shart chādar hai

oḌhne kī ho yā bichhaune kī

aisi sardi mein shart chadar hai

oDhne ki ho ya bichhaune ki

ye sardiyoñ kā udaas mausam ki dhaḌkaneñ barf ho ga.ī haiñ

jab un kī yaḳh-bastagī parakhnā tamāzateñ bhī shumār karnā

ye sardiyon ka udas mausam ki dhaDkanen barf ho gai hain

jab un ki yaKH-bastagi parakhna tamazaten bhi shumar karna

ab us maqām pe hai mausamoñ kā sard mizāj

ki dil sulagne lage aur dimāġh jalne lage

ab us maqam pe hai mausamon ka sard mizaj

ki dil sulagne lage aur dimagh jalne lage

shaam ne barf pahan rakkhī thī raushniyāñ bhī ThanDī thiiñ

maiñ is ThanDak se ghabrā kar apnī aag meñ jalne lagā

sham ne barf pahan rakkhi thi raushniyan bhi ThanDi thin

main is ThanDak se ghabra kar apni aag mein jalne laga

sūraj chaḌhā to pighlī bahut choTiyoñ kī barf

āñdhī chalī to ukhḌe bahut sāya-dār log

suraj chaDha to pighli bahut choTiyon ki barf

aandhi chali to ukhDe bahut saya-dar log

hathelī se ThanDā dhuāñ uTh rahā hai

yahī ḳhvāb har martaba dekhtī huuñ

hatheli se ThanDa dhuan uTh raha hai

yahi KHwab har martaba dekhti hun