Top 10 couplets of Baqaullah Baqa

ishq meñ bū hai kibriyā.ī kī

āshiqī jis ne kī ḳhudā.ī kī

ishq mein bu hai kibriyai ki

aashiqi jis ne ki KHudai ki

bulbul se kahā gul ne kar tark mulāqāteñ

ġhunche ne girah bāñdhīñ jo gul ne kahīñ bāteñ

bulbul se kaha gul ne kar tark mulaqaten

ghunche ne girah bandhin jo gul ne kahin baaten

ishq ne mansab likhe jis din mirī taqdīr meñ

daaġh kī naqadī milī sahrā milā jāgīr meñ

ishq ne mansab likhe jis din meri taqdir mein

dagh ki naqadi mili sahra mila jagir mein

ulfat meñ tirī ai but-e-be-mehr-o-mohabbat

aayā hameñ ik haath se taalī kā bajānā

ulfat mein teri ai but-e-be-mehr-o-mohabbat

aaya hamein ek hath se tali ka bajaana

ḳhvāhish-e-sūd thī saude meñ mohabbat ke vale

sar-ba-sar is meñ ziyāñ thā mujhe ma.alūm na thā

KHwahish-e-sud thi saude mein mohabbat ke wale

sar-ba-sar is mein ziyan tha mujhe malum na tha

is bazm meñ pūchhe na koī mujh se ki kyā huuñ

jo shīsha gire sañg pe maiñ us kī sadā huuñ

is bazm mein puchhe na koi mujh se ki kya hun

jo shisha gire sang pe main us ki sada hun

dekh ā.īna jo kahtā hai ki allāh-re maiñ

us kā maiñ dekhne vaalā huuñ 'baqā' vāh-re maiñ

dekh aaina jo kahta hai ki allah-re main

us ka main dekhne wala hun 'baqa' wah-re main

apnī marzī to ye hai banda-e-but ho rahiye

aage marzī hai ḳhudā kī so ḳhudā hī jaane

apni marzi to ye hai banda-e-but ho rahiye

aage marzi hai KHuda ki so KHuda hi jaane

sailāb se āñkhoñ ke rahte haiñ ḳharābe meñ

TukḌe jo mire dil ke baste haiñ do-ābe meñ

sailab se aankhon ke rahte hain KHarabe mein

TukDe jo mere dil ke baste hain do-abe mein

dekhā to ek sho.ale se ai shaiḳh-o-barhaman

raushan haiñ sham-e-dair o charāġh-e-haram baham

dekha to ek shoale se ai shaiKH-o-barhaman

raushan hain sham-e-dair o charagh-e-haram baham