Top 10 couplets of Insha Allah Khan Insha

ajiib lutf kuchh aapas kī chheḌ-chhāḌ meñ hai

kahāñ milāp meñ vo baat jo bigāḌ meñ hai

ajib lutf kuchh aapas ki chheD-chhaD mein hai

kahan milap mein wo baat jo bigaD mein hai

jazba-e-ishq salāmat hai to inshā-allāh

kachche dhāge se chale ā.eñge sarkār bañdhe

jazba-e-ishq salamat hai to insha-allah

kachche dhage se chale aaenge sarkar bandhe

kamar bāñdhe hue chalne ko yaañ sab yaar baiThe haiñ

bahut aage ga.e baaqī jo haiñ tayyār baiThe haiñ

kamar bandhe hue chalne ko yan sab yar baiThe hain

bahut aage gae baqi jo hain tayyar baiThe hain

kyā hañsī aatī hai mujh ko hazrat-e-insān par

fel-e-bad ḳhud hī kareñ lānat kareñ shaitān par

kya hansi aati hai mujh ko hazrat-e-insan par

fel-e-bad KHud hi karen lanat karen shaitan par

na chheḌ ai nik.hat-e-bād-e-bahārī raah lag apnī

tujhe aTkheliyāñ sūjhī haiñ ham be-zār baiThe haiñ

na chheD ai nikhat-e-baad-e-bahaari rah lag apni

tujhe aTkheliyan sujhi hain hum be-zar baiThe hain

kuchh ishāra jo kiyā ham ne mulāqāt ke vaqt

Taal kar kahne lage din hai abhī raat ke vaqt

kuchh ishaara jo kiya hum ne mulaqat ke waqt

Tal kar kahne lage din hai abhi raat ke waqt

jī kī jī hī meñ rahī baat na hone paa.ī

haif ki us se mulāqāt na hone paa.ī

ji ki ji hi mein rahi baat na hone pai

haif ki us se mulaqat na hone pai

ye ajiib mājrā hai ki ba-roz-e-īd-e-qurbāñ

vahī zab.h bhī kare hai vahī le savāb ulTā

ye ajib majra hai ki ba-roz-e-id-e-qurban

wahi zabh bhi kare hai wahi le sawab ulTa

sāñvle tan pe ġhazab dhaj hai basantī shaal kī

jī meñ hai kah baiThiye ab jai kanhayyā laal kī

sanwle tan pe ghazab dhaj hai basanti shaal ki

ji mein hai kah baiThiye ab jai kanhayya lal ki

hazār shaiḳh ne dāḌhī baḌhā.ī san kī sī

magar vo baat kahāñ maulvī madan kī sī

hazar shaiKH ne daDhi baDhai san ki si

magar wo baat kahan maulwi madan ki si