kiyā azal se hai sāne.a ne but-parast mujhe

kabhū butoñ se phirūñ maiñ ye to ḳhudā na kare

kiya azal se hai sanea ne but-parast mujhe

kabhu buton se phirun main ye to KHuda na kare

kahiyo sabā salām hamārā bahār se

ham to chaman ko chhoḌ ke sū-e-qafas chale

kahiyo saba salam hamara bahaar se

hum to chaman ko chhoD ke su-e-qafas chale

saaqī hamārī tauba tujh par hai kyuuñ gavāra

minnat nahīñ to zālim tarġhīb yā ishāra

saqi hamari tauba tujh par hai kyun gawara

minnat nahin to zalim targhib ya ishaara

'saudā' jo be-ḳhabar hai vahī yaañ kare hai aish

mushkil bahut hai un ko jo rakhte haiñ āgahī

'sauda' jo be-KHabar hai wahi yan kare hai aish

mushkil bahut hai un ko jo rakhte hain aagahi

na kar 'saudā' tū shikva ham se dil kī be-qarārī kā

mohabbat kis ko detī hai miyāñ ārām duniyā meñ

na kar 'sauda' tu shikwa hum se dil ki be-qarari ka

mohabbat kis ko deti hai miyan aaram duniya mein

ye to nahīñ kahtā huuñ ki sach-much karo insāf

jhūTī bhī tasallī ho to jiitā hī rahūñ maiñ

ye to nahin kahta hun ki sach-much karo insaf

jhuTi bhi tasalli ho to jita hi rahun main

naubat-e-qais ho chukī āḳhir

ab to 'saudā' kā bājtā hai naañv

naubat-e-qais ho chuki aaKHir

ab to 'sauda' ka bajta hai nanw

gar ho sharāb o ḳhalvat o mahbūb-e-ḳhūb-rū

zāhid qasam hai tujh ko jo tū ho to kyā kare

gar ho sharab o KHalwat o mahbub-e-KHub-ru

zahid qasam hai tujh ko jo tu ho to kya kare

kyuuñ na af.ī chale har ek jagah makḌā kar

na paḌā us ko tirī zulf-e-siyah-fām se kaam

kyun na afi chale har ek jagah makDa kar

na paDa us ko teri zulf-e-siyah-fam se kaam

dikhā.ūñgā tujhe zāhid us āfat-e-dīñ ko

ḳhalal dimāġh meñ tere hai pārsā.ī kā

dikhaunga tujhe zahid us aafat-e-din ko

KHalal dimagh mein tere hai parsai ka

samjhe the ham jo dost tujhe ai miyāñ ġhalat

terā nahīñ hai jurm hamārā gumāñ ġhalat

samjhe the hum jo dost tujhe ai miyan ghalat

tera nahin hai jurm hamara guman ghalat

'saudā' ḳhudā ke vāste kar qissa muḳhtasar

apnī to niiñd uḌ ga.ī tere fasāne meñ

'sauda' KHuda ke waste kar qissa muKHtasar

apni to nind uD gai tere fasane mein

ishq se to nahīñ huuñ maiñ vāqif

dil ko sho.ala sā kuchh lipaTtā hai

ishq se to nahin hun main waqif

dil ko shoala sa kuchh lipaTta hai

saaqī ga.ī bahār rahī dil meñ ye havas

tū minnatoñ se jaam de aur maiñ kahūñ ki bas

saqi gai bahaar rahi dil mein ye hawas

tu minnaton se jam de aur main kahun ki bas

abas tū ghar basātā hai mirī āñkhoñ meñ ai pyāre

kisī ne aaj tak dekhā bhī hai paanī pe ghar Thahrā

abas tu ghar basata hai meri aankhon mein ai pyare

kisi ne aaj tak dekha bhi hai pani pe ghar Thahra

na rakkhā jag meñ rasm-e-dostī andoh-rozī ne

magar zaanū se ab baaqī rahā hai rabt-e-peshānī

na rakkha jag mein rasm-e-dosti andoh-rozi ne

magar zanu se ab baqi raha hai rabt-e-peshani

yaaro vo sharm se jo na bolā to kyā huā

āñkhoñ meñ sau tarah kī hikāyāt ho ga.ī

yaro wo sharm se jo na bola to kya hua

aankhon mein sau tarah ki hikayat ho gai

zāhid sabhī haiñ ne.amat-e-haq jo hai akl-o-shurb

lekin ajab maza hai sharāb o kabāb kā

zahid sabhi hain neamat-e-haq jo hai akl-o-shurb

lekin ajab maza hai sharab o kabab ka

is kashmakash se daam ke kyā kaam thā hameñ

ai ulfat-e-chaman tirā ḳhāna-ḳharāb ho

is kashmakash se dam ke kya kaam tha hamein

ai ulfat-e-chaman tera KHana-KHarab ho

hai muddatoñ se ḳhāna-e-zanjīr be-sadā

ma.alūm hī nahīñ ki divāne kidhar ga.e

hai muddaton se KHana-e-zanjir be-sada

malum hi nahin ki diwane kidhar gae

bādshāhat do jahāñ kī bhī jo hove mujh ko

tere kūche kī gadā.ī se na kho de mujh ko

baadshahat do jahan ki bhi jo howe mujh ko

tere kuche ki gadai se na kho de mujh ko

na jiyā terī chashm kā maarā

na tirī zulf kā bañdhā chhūTā

na jiya teri chashm ka mara

na teri zulf ka bandha chhuTa

nahīñ hai ghar koī aisā jahāñ us ko na dekhā ho

kanhayyā se nahīñ kuchh kam sanam merā vo harjā.ī

nahin hai ghar koi aisa jahan us ko na dekha ho

kanhayya se nahin kuchh kam sanam mera wo harjai

kyā karūñgā le ke vaa.iz haath se hūroñ ke jaam

huuñ maiñ sāġhar-kash kisī ke sāġhar-e-maḳhmūr kā

kya karunga le ke waiz hath se huron ke jam

hun main saghar-kash kisi ke saghar-e-maKHmur ka

tum kaan dhar suno na suno us ke harf ko

'saudā' ko haigī apnī hī guftār se ġharaz

tum kan dhar suno na suno us ke harf ko

'sauda' ko haigi apni hi guftar se gharaz

gila likhūñ maiñ agar terī bevafā.ī kā

lahū meñ ġharq safīna ho āshnā.ī kā

gila likhun main agar teri bewafai ka

lahu mein gharq safina ho aashnai ka

itnā likhā.iyo mirī lauh-e-mazār par

yaañ tak na zī-hayāt ko koī ḳhafā kare

itna likhaiyo meri lauh-e-mazar par

yan tak na zi-hayat ko koi KHafa kare

fikr-e-ma.āsh ishq-e-butāñ yād-e-raftagāñ

is zindagī meñ ab koī kyā kyā kiyā kare

fikr-e-maash ishq-e-butan yaad-e-raftagan

is zindagi mein ab koi kya kya kiya kare

'saudā' kī jo bālīñ pe gayā shor-e-qayāmat

ḳhuddām-e-adab bole abhī aañkh lagī hai

'sauda' ki jo baalin pe gaya shor-e-qayamat

KHuddam-e-adab bole abhi aankh lagi hai

'saudā' jahāñ meñ aa ke koī kuchh na le gayā

jaatā huuñ ek maiñ dil-e-pur-ārzū liye

'sauda' jahan mein aa ke koi kuchh na le gaya

jata hun ek main dil-e-pur-arzu liye

mat pūchh ye ki raat kaTī kyūñke tujh baġhair

is guftugū se fā.eda pyāre guzar ga.ī

mat puchh ye ki raat kaTi kyunke tujh baghair

is guftugu se faeda pyare guzar gai

kahte haiñ vo jo hai 'saudā' kā qasīda hī ḳhuub

un kī ḳhidmat meñ liye maiñ ye ġhazal jā.ūñgā

kahte hain wo jo hai 'sauda' ka qasida hi KHub

un ki KHidmat mein liye main ye ghazal jaunga

shāḳh meñ gul kī nazākat ye baham pahuñchī hai

sham.a-sāñ garmī-e-nazzāra se jaatī hai pighal

shaKH mein gul ki nazakat ye baham pahunchi hai

shama-san garmi-e-nazzara se jati hai pighal

'saudā' hue jab āshiq kyā paas aabrū kā

suntā hai ai divāne jab dil diyā to phir kyā

'sauda' hue jab aashiq kya pas aabru ka

sunta hai ai diwane jab dil diya to phir kya

akelā ho rah-e-duniyā meñ gir chāhe bahut jiinā

huī hai faiz-e-tanhā.ī se umr-e-ḳhizr tūlānī

akela ho rah-e-duniya mein gir chahe bahut jina

hui hai faiz-e-tanhai se umr-e-KHizr tulani

tirā ḳhat aane se dil ko mere ārām kyā hogā

ḳhudā jaane ki is āġhāz kā anjām kyā hogā

tera KHat aane se dil ko mere aaram kya hoga

KHuda jaane ki is aaghaz ka anjam kya hoga

dil ke TukḌoñ ko baġhal-gīr liye phirtā huuñ

kuchh ilaaj is kā bhī ai shīsha-girāñ hai ki nahīñ

dil ke TukDon ko baghal-gir liye phirta hun

kuchh ilaj is ka bhi ai shisha-giran hai ki nahin

kaun kisī kā ġham khātā hai

kahne ko ġham-ḳhvār hai duniyā

kaun kisi ka gham khata hai

kahne ko gham-KHwar hai duniya

maiñ ne tum ko dil diyā aur tum ne mujhe rusvā kiyā

maiñ ne tum se kyā kiyā aur tum ne mujh se kyā kiyā

main ne tum ko dil diya aur tum ne mujhe ruswa kiya

main ne tum se kya kiya aur tum ne mujh se kya kiya

badlā tire sitam kā koī tujh se kyā kare

apnā hī tū farefta hove ḳhudā kare

badla tere sitam ka koi tujh se kya kare

apna hi tu farefta howe KHuda kare

jis roz kisī aur pe bedād karoge

ye yaad rahe ham ko bahut yaad karoge

jis roz kisi aur pe bedad karoge

ye yaad rahe hum ko bahut yaad karoge

kise tāqat hai sharh-e-shauq us majlis meñ karne kī

uThā dene ke Dar se saañs vaañ lete haiñ rah rah ke

kise taqat hai sharh-e-shauq us majlis mein karne ki

uTha dene ke Dar se sans wan lete hain rah rah ke

kaifiyyat-e-chashm us kī mujhe yaad hai 'saudā'

sāġhar ko mire haath se liijo ki chalā maiñ

kaifiyyat-e-chashm us ki mujhe yaad hai 'sauda'

saghar ko mere hath se lijo ki chala main

kis muñh se phir tū aap ko kahtā hai ishq-bāz

ai rū-siyāh tujh se to ye bhī na ho sakā

kis munh se phir tu aap ko kahta hai ishq-baz

ai ru-siyah tujh se to ye bhi na ho saka

har sañg meñ sharār hai tere zuhūr kā

muusā nahīñ jo sair karūñ koh tuur kā

har sang mein sharar hai tere zuhur ka

musa nahin jo sair karun koh tur ka

mauj-e-nasīm aaj hai ālūda gard se

dil ḳhaak ho gayā hai kisī be-qarār kā

mauj-e-nasim aaj hai aaluda gard se

dil KHak ho gaya hai kisi be-qarar ka

'saudā' jo tirā haal hai itnā to nahīñ vo

kyā jāniye tū ne use kis aan meñ dekhā

'sauda' jo tera haal hai itna to nahin wo

kya jaaniye tu ne use kis aan mein dekha

firāq-e-ḳhuld se gandum hai sīna-chāk ab tak

ilāhī ho na vatan se koī ġharīb judā

firaq-e-KHuld se gandum hai sina-chaak ab tak

ilahi ho na watan se koi gharib juda

be-sabātī zamāne kī nā-chār

karnī mujh ko bayān paḌtī hai

be-sabaati zamane ki na-chaar

karni mujh ko bayan paDti hai

kaam aa.ī kohkan kī mashaqqat na ishq meñ

patthar se jū-e-shīr ke laane ne kyā kiyā

kaam aai kohkan ki mashaqqat na ishq mein

patthar se ju-e-shir ke lane ne kya kiya