صبر کرتی ہی رہی بے چارگی

ظلم ہوتا ہی رہا مظلوم پر

اے اجل کچھ زندگی کا حق بھی ہے

زندگی تیری امانت ہی سہی

ہر نفس منت کش آلام ہے

زندگی شاید اسی کا نام ہے

جبر سہتا ہوں مگر کب تک سہوں انسان ہوں

صبر کرتا ہوں مگر دل صبر کے قابل نہیں

دیدنی ہے اب شکست ضبط کی بے چارگی

مسکراتا ہوں مگر دل درد سے لبریز ہے

آہ اب خود دارئ اکبر کہاں

ہو گئی وہ بھی غلام آرزو

حسن کی تفسیر بھی کچھ کیجیئے

عشق بے شک اک خیال خام ہے

زندگی ہے چشم عبرت میں ابھی

کچھ نہیں تو عیش و عشرت ہی سہی

عشق کی سادہ دلی ہے ہر طرف چھائی ہوئی

بارگاہ حسن میں ہر آرزو نوخیز ہے

بزم حسن و عشق میں اکبرؔ کی افسردہ دلی

داد کے لائق نہیں بے داد کے قابل نہیں