تمہارے سنگ تغافل کا کیوں کریں شکوہ

اس آئنے کا مقدر ہی ٹوٹنا ہوگا

کھڑا ہوا ہوں سر راہ منتظر کب سے

کہ کوئی گزرے تو غم کا یہ بوجھ اٹھوا دے

صدا کسے دیں نعیمیؔ کسے دکھائیں زخم

اب اتنی رات گئے کون جاگتا ہوگا

ماضی کے ریگ زار پہ رکھنا سنبھل کے پاؤں

بچوں کا اس میں کوئی گھروندا بنا نہ ہو

مرے خلوص پہ شک کی تو کوئی وجہ نہیں

مرے لباس میں خنجر اگر چھپا نکلا

سجدہ کے ہر نشاں پہ ہے خوں سا جما ہوا

یارو یہ اس کے گھر کا کہیں راستہ نہ ہو

میں بھی اس صفحۂ ہستی پہ ابھر سکتا ہوں

رنگ تو تم مری تصویر میں بھر کر دیکھو

حسن اک دریا ہے صحرا بھی ہیں اس کی راہ میں

کل کہاں ہوگا یہ دریا یہ بھی تو سوچو ذرا

یہ ہاتھ راکھ میں خوابوں کی ڈالتے تو ہو

مگر جو راکھ میں شعلہ کوئی دبا نکلا

مرے خوابوں کی چکنی سیڑھیوں پر

نہ جانے کس کا بت ٹوٹا پڑا ہے