کیا کہوں کتنا فزوں ہے تیرے دیوانے کا دکھ

اک طرف جانے کا غم ہے اک طرف آنے کا دکھ

ممکن ہے یہی دل کے ملانے کا سبب ہو

ی رت جو ہمیں ہاتھ ملانے نہیں دیتی

بس اتنا ربط کافی ہے مجھے اے بھولنے والے

تری سوئی ہوئی آنکھوں میں اکثر جاگتا ہوں میں

نہ جانے اس نے کھلے آسماں میں کیا دیکھا

پرندہ پھر سے جہان قفس میں لوٹ آیا

زندگی تو بھی ہمیں ویسے ہی اک روز گزار

جس طرح ہم تجھے برسوں سے گزارے ہوئے ہیں

دیکھ اے میری زبوں حالی پہ ہنسنے والے

وقت کی دھوپ نے کس درجہ نکھارا مجھ کو

کس کی تنویر سے جل اٹھے بصیرت کے چراغ

کس کی تصویر یہ آنکھوں سے لگائی گئی ہے

ختم ہوتا ہی نہیں سلسلہ تنہائی کا

جانے کس درجہ مسافت میں ہے ڈھالی گئی شب

جانے کس رت میں کھلیں گے یہاں تعبیر کے پھول

سوچتا رہتا ہوں اب خواب اگاتا ہوا میں

ہر ایک شاخ پہ ویرانیاں مسلط ہیں

بدن درخت بھی گویا ہے آشیانۂ شب

وہ اک لمحہ سزا کاٹی گئی تھی جس کی خاطر

وہ لمحہ تو ابھی ہم نے گزارہ ہی نہیں تھا

زندگی ہم سے تری آنکھ مچولی کب تک

اک نہ اک روز کسی موڑ پہ آ لیں گے تجھے

اسی باعث میں اپنا نصف رکھتا ہوں اندھیرے میں

مرے اطراف بھی سورج کوئی گردش میں رہتا ہے

سپرد آب یوں ہی تو نہیں کرتا ہوں خاک اپنی

عجب مٹی کے گھلنے کا مزا بارش میں رہتا ہے

رقم کروں بھی تو کیسے میں داستان وفا

حروف پھرتے ہیں بیگانے میرے کاغذ سے

ایسی ہی بے چہرگی چھائی ہوئی ہے شہر میں

آپ اپنا عکس ہوں میں آپ آئینہ ہوں میں