اپنے ہونے کا کچھ احساس نہ ہونے سے ہوا

خود سے ملنا مرا اک شخص کے کھونے سے ہوا

گزرتے پتوں کی چاپ ہوگی تمہارے صحن انا کے اندر

فسردہ یادوں کی بارشیں بھی مجھے بھلانے کے بعد ہوں گی

وہ سردیوں کی دھوپ کی طرح غروب ہو گیا

لپٹ رہی ہے یاد جسم سے لحاف کی طرح

سجنی کی آنکھوں میں چھپ کر جب جھانکا

بن ہولی کھیلے ہی ساجن بھیگ گیا

نہ ٹوٹ کر اتنا ہم کو چاہو کہ رو پڑیں ہم

دبی دبائی سی چوٹ اک اک ابھر گئی ہے

ختم ہونے دے مرے ساتھ ہی اپنا بھی وجود

تو بھی اک نقش خرابے کا ہے مر جا مجھ میں

اسی امید پہ جلتی ہیں دشت دشت آنکھیں

کبھی تو آئے گا عمر خراب کاٹ کے وہ

نہ سوچو ترک تعلق کے موڑ پر رک کر

قدم بڑھاؤ کہ یہ حادثہ ضروری ہے

رشتوں کا بوجھ ڈھونا دل دل میں کڑھتے رہنا

ہم ایک دوسرے پر احسان ہو گئے ہیں

کسی کو قصۂ پاکیٔ چشم یاد نہیں

یہ آنکھیں کون سی برسات میں نہائی تھیں

میں سنگ رہ نہیں جو اٹھا کر تو پھینک دے

میں ایسا مرحلہ ہوں جو سو بار آئے گا

آنکھیں یوں برسیں پیراہن بھیگ گیا

تیرے دھیان میں سارا ساون بھیگ گیا

جسے میں چھو نہیں سکتا دکھائی کیوں وہ دیتا ہے

فرشتوں جیسی بس میری عبادت دیکھتے رہنا

ہمارے بیچ میں اک اور شخص ہونا تھا

جو لڑ پڑے تو کوئی بھی نہیں منانے کا

گرما سکیں نہ چاہتیں تیرا کٹھور جسم

ہر اک جل کے بجھ گئی تصویر سنگ میں

میں سنگ رہ ہوں تو ٹھوکر کی زد پہ آؤں گا

تم آئینہ ہو تو پھر ٹوٹنا ضروری ہے

مرے بچے ترا بچپن تو میں نے بیچ ڈالا

بزرگی اوڑھ کر کاندھے ترے خم ہو گئے ہیں

فیصلہ تھے وقت کا پھر بے اثر کیسے ہوئے

سچ کی پیشانی پہ ہم جھوٹی خبر کیسے ہوئے

کیا نہ ترک مراسم پہ احتجاج اس نے

کہ جیسے گزرے کسی منزل نجات سے وہ

جاتے موسم کی طرح اس سے کبھی مل نہ سکا

ایک لمحے کے تعلق کی سزا ہوں میں تو

کوئی مہکار ہے خوشبو کی نہ رنگوں کی لکیر

ایک صحرا ہوں کہیں سے بھی گزر جا مجھ میں

جاتے قدموں کی کوئی چاپ ہی شاید سن لوں

ڈوبتے لمحوں کی بارات ابھر جا مجھ میں

عذابوں سے ٹپکتی یہ چھتیں برسوں چلیں گی

ابھی سے کیوں مکیں مصروف ماتم ہو گئے ہیں

صف منافقاں میں پھر وہ جا ملا تو کیا عجب

ہوئی تھی صلح بھی خموش اختلاف کی طرح

جو خس بدن تھا جلا بہت کئی نکہتوں کی تلاش میں

میں تمام لوگوں سے مل چکا تری قربتوں کی تلاش میں

جاتے قدموں کی کوئی چاپ ہی شاید سن لوں

ڈوبتے لمحوں کی بارات ابھر جا مجھ میں

حصار گوش سماعت کی دسترس میں کہاں

تو وہ صدا جو فقط جسم کو سنائی دے

دیکھ وہ دشت کی دیوار ہے سب کا مقتل

اس برس جاؤں گا میں اگلے برس جائے گا تو

زہر بن کر وہ مصورؔ مری نس نس میں رہا

میں نے سمجھا تھا اسے بھول چکا ہوں میں تو

تھے اس کے ساتھ زوال سفر کے سب منظر

وہ دکھتے دل کے بہت سنگ میل چھوڑ گیا

کنار آب ہوا جب بھی سنسناتی ہے

ندی میں چپکے سے اک چیخ ڈوب جاتی ہے

کڑے ہیں کوس سفر دور کا ضروری ہے

گھروں سے رشتوں کا اب خاتمہ ضروری ہے