apne hone kā kuchh ehsās na hone se huā

ḳhud se milnā mirā ik shaḳhs ke khone se huā

apne hone ka kuchh ehsas na hone se hua

KHud se milna mera ek shaKHs ke khone se hua

vo sardiyoñ kī dhuup kī tarah ġhurūb ho gayā

lipaT rahī hai yaad jism se lihāf kī tarah

wo sardiyon ki dhup ki tarah ghurub ho gaya

lipaT rahi hai yaad jism se lihaf ki tarah

guzarte pattoñ kī chaap hogī tumhāre sehan-e-anā ke andar

fasurda yādoñ kī bārisheñ bhī mujhe bhulāne ke baad hoñgī

guzarte patton ki chap hogi tumhaare sehan-e-ana ke andar

fasurda yaadon ki barishen bhi mujhe bhulane ke baad hongi

sajnī kī āñkhoñ meñ chhup kar jab jhāñkā

bin holī khele hī sājan bhiig gayā

sajni ki aankhon mein chhup kar jab jhanka

bin holi khele hi sajan bhig gaya

na socho tark-e-ta.alluq ke moḌ par ruk kar

qadam baḌhāo ki ye hādsa zarūrī hai

na socho tark-e-talluq ke moD par ruk kar

qadam baDhao ki ye hadsa zaruri hai

na TuuT kar itnā ham ko chāho ki ro paḌeñ ham

dabī dabā.ī sī choT ik ik ubhar ga.ī hai

na TuT kar itna hum ko chaho ki ro paDen hum

dabi dabai si choT ek ek ubhar gai hai

ḳhatm hone de mire saath hī apnā bhī vajūd

tū bhī ik naqsh ḳharābe kā hai mar jā mujh meñ

KHatm hone de mere sath hi apna bhi wajud

tu bhi ek naqsh KHarabe ka hai mar ja mujh mein

isī umiid pe jaltī haiñ dasht dasht āñhkeñ

kabhī to aa.egā umr-e-ḳharāb kaaT ke vo

isi umid pe jalti hain dasht dasht aanhken

kabhi to aaega umr-e-KHarab kaT ke wo

rishtoñ kā bojh Dhonā dil dil meñ kuḌhte rahnā

ham ek dūsre par ehsān ho ga.e haiñ

rishton ka bojh Dhona dil dil mein kuDhte rahna

hum ek dusre par ehsan ho gae hain

maiñ sañg-e-rah nahīñ jo uThā kar tū pheñk de

maiñ aisā marhala huuñ jo sau baar aa.egā

main sang-e-rah nahin jo uTha kar tu phenk de

main aisa marhala hun jo sau bar aaega

kisī ko qissa-e-pākī-e-chashm yaad nahīñ

ye āñhkeñ kaun sī barsāt meñ nahā.ī thiiñ

kisi ko qissa-e-paki-e-chashm yaad nahin

ye aanhken kaun si barsat mein nahai thin

āñkheñ yuuñ barsīñ pairāhan bhiig gayā

tere dhyān meñ saarā sāvan bhiig gayā

aankhen yun barsin pairahan bhig gaya

tere dhyan mein sara sawan bhig gaya

jise maiñ chhū nahīñ saktā dikhā.ī kyuuñ vo detā hai

farishtoñ jaisī bas merī ibādat dekhte rahnā

jise main chhu nahin sakta dikhai kyun wo deta hai

farishton jaisi bas meri ibaadat dekhte rahna

maiñ sañg-e-rah huuñ to Thokar kī zad pe ā.ūñgā

tum ā.īna ho to phir TūTnā zarūrī hai

main sang-e-rah hun to Thokar ki zad pe aaunga

tum aaina ho to phir TuTna zaruri hai

faisla the vaqt kā phir be-asar kaise hue

sach kī peshānī pe ham jhūTī ḳhabar kaise hue

faisla the waqt ka phir be-asar kaise hue

sach ki peshani pe hum jhuTi KHabar kaise hue

hamāre biich meñ ik aur shaḳhs honā thā

jo laḌ paḌe to koī bhī nahīñ manāne kā

hamare bich mein ek aur shaKHs hona tha

jo laD paDe to koi bhi nahin manane ka

mire bachche tirā bachpan to maiñ ne bech Daalā

buzurgī oḌh kar kāñdhe tire ḳham ho ga.e haiñ

mere bachche tera bachpan to main ne bech Dala

buzurgi oDh kar kandhe tere KHam ho gae hain

kaḌe haiñ kos safar duur kā zarūrī hai

gharoñ se rishtoñ kā ab ḳhātma zarūrī hai

kaDe hain kos safar dur ka zaruri hai

gharon se rishton ka ab KHatma zaruri hai

garmā sakīñ na chāhateñ terā kaThor jism

har ik jal ke bujh ga.ī tasvīr sang meñ

garma sakin na chahaten tera kaThor jism

har ek jal ke bujh gai taswir sang mein

kiyā na tark-e-marāsim pe ehtijāj us ne

ki jaise guzre kisī manzil-e-najāt se vo

kiya na tark-e-marasim pe ehtijaj us ne

ki jaise guzre kisi manzil-e-najat se wo

koī mahkār hai ḳhushbū kī na rañgoñ kī lakīr

ek sahrā huuñ kahīñ se bhī guzar jā mujh meñ

koi mahkar hai KHushbu ki na rangon ki lakir

ek sahra hun kahin se bhi guzar ja mujh mein

jaate mausam kī tarah us se kabhī mil na sakā

ek lamhe ke ta'alluq kī sazā huuñ maiñ to

jate mausam ki tarah us se kabhi mil na saka

ek lamhe ke ta'alluq ki saza hun main to

saf-e-munāfiqāñ meñ phir vo jā milā to kyā ajab

huī thī sulh bhī ḳhamosh iḳhtilāf kī tarah

saf-e-munafiqan mein phir wo ja mila to kya ajab

hui thi sulh bhi KHamosh iKHtilaf ki tarah

jaate qadmoñ kī koī chaap hī shāyad sun luuñ

Dūbte lamhoñ kī bārāt ubhar jā mujh meñ

jate qadmon ki koi chap hi shayad sun lun

Dubte lamhon ki baraat ubhar ja mujh mein

zahr ban kar vo 'musavvir' mirī nas nas meñ rahā

maiñ ne samjhā thā use bhuul chukā huuñ maiñ to

zahr ban kar wo 'musawwir' meri nas nas mein raha

main ne samjha tha use bhul chuka hun main to

jo ḳhas-e-badan thā jalā bahut ka.ī nik.hatoñ kī talāsh meñ

maiñ tamām logoñ se mil chukā tirī qurbatoñ kī talāsh meñ

jo KHas-e-badan tha jala bahut kai nikhaton ki talash mein

main tamam logon se mil chuka teri qurbaton ki talash mein

azāboñ se Tapaktī ye chhateñ barsoñ chaleñgī

abhī se kyuuñ makīñ masrūf-e-mātam ho ga.e haiñ

azabon se Tapakti ye chhaten barson chalengi

abhi se kyun makin masruf-e-matam ho gae hain

kanār-e-āb havā jab bhī sansanātī hai

nadī meñ chupke se ik chīḳh Duub jaatī hai

kanar-e-ab hawa jab bhi sansanati hai

nadi mein chupke se ek chiKH Dub jati hai

hisār-e-gosh-e-samā.at kī dastaras meñ kahāñ

tū vo sadā jo faqat jism ko sunā.ī de

hisar-e-gosh-e-samaat ki dastaras mein kahan

tu wo sada jo faqat jism ko sunai de

jaate qadmoñ kī koī chaap hī shāyad sun luuñ

Dūbte lamhoñ kī bārāt ubhar jā mujh meñ

jate qadmon ki koi chap hi shayad sun lun

Dubte lamhon ki baraat ubhar ja mujh mein

dekh vo dasht kī dīvār hai sab kā maqtal

is baras jā.ūñgā maiñ agle baras jā.egā tū

dekh wo dasht ki diwar hai sab ka maqtal

is baras jaunga main agle baras jaega tu

the us ke saath zavāl-e-safar ke sab manzar

vo dukhte dil ke bahut sañg-e-mīl chhoḌ gayā

the us ke sath zawal-e-safar ke sab manzar

wo dukhte dil ke bahut sang-e-mil chhoD gaya

kohar meñ gum-sum samā.ato tum gavāh rahnā

maiñ ek dīvār-e-girya har raat chun rahā huuñ

kohar mein gum-sum samaato tum gawah rahna

main ek diwar-e-girya har raat chun raha hun