رونے لگے تو کون ہمیں چپ کرائے گا

سو اس کی احتیاط ہے ہم رو نہیں رہے

ہوش میں آتے ہی ہو جاتے ہیں چپ

اور بے ہوشی میں چلاتے ہیں ہم

اگر ہوتا تو خود کو پھر بناتا

مگر افسوس کوزہ گر نہیں ہوں

اپنے آنگن میں پرندے دیکھ کر

جسم کی ٹہنی سے اڑ جاتے ہیں ہم

تم کو افسوس تمہیں ٹھیک بنایا نہ گیا

اور اک ہم کہ ابھی چاک پہ رکھے نہ گئے

یہ گلہ ہے کہ ہارتا بھی نہیں

بیچ میں کھیل چھوڑ دیتا ہوں

اس جنگل کے پیڑوں سے میں واقف ہوں

گر جاتے تھے جس پر سایا کرتے تھے

کوئی قصہ نہیں سنانے کو

کیسے بہلاؤں گا زمانہ کو

اک سدا آسماں سے آتی ہے

اور میں دھیان تک نہیں دیتا

سوچتا ہوں کہ تجھ کو مجھ سے کوئی

حادثہ ہی بچا کے لے جائے

زندہ رہا تو کون سا زندہ رہوں گا میں

مر بھی گیا تو کون سا میں مر ہی جاؤں گا

ہٹا لی وقت رہتے آنکھ قصہ گو کی آنکھوں سے

مجھے اس کی کہانی پر بھروسہ ہونے والا تھا

زخم ہرے رہتے ہیں دیکھا دیکھی میں

اور نظر اندازی میں بھر جاتے ہیں

نہایت بھلے تجربہ کار اہل وفا چن لیے ہیں

ہماری سہولت سے ہم نے ہمارے خدا چن لیے ہیں

کیا ہے کہ ہم اس کو کبھی پورے نہیں پڑتے

ہم ہی نہیں کر پاتے ہیں بھرپائی ہماری