kitne dil the jo ho ga.e patthar

kitne patthar the jo sanam Thahre

kitne dil the jo ho gae patthar

kitne patthar the jo sanam Thahre

bahār meñ bhī nahīñ koī shāḳh-e-gul mahfūz

chaman kā hasan hai muflis kī aabrū kī tarah

bahaar mein bhi nahin koi shaKH-e-gul mahfuz

chaman ka hasan hai muflis ki aabru ki tarah

tū faqat jaam kā mafhūm samajh ai saaqī

tishnagī kyā hai ye mai-ḳhvār samajh lete haiñ

tu faqat jam ka mafhum samajh ai saqi

tishnagi kya hai ye mai-KHwar samajh lete hain

nafas nafas pe ye hotā hai kyuuñ mujhe mahsūs

hayāt tujh se alag rah ke ḳhud-kushī to nahīñ

nafas nafas pe ye hota hai kyun mujhe mahsus

hayat tujh se alag rah ke KHud-kushi to nahin

ek ek nafas meñ raushnī hai

yādoñ ke charāġh jal rahe haiñ

ek ek nafas mein raushni hai

yaadon ke charagh jal rahe hain

terī tausīf se ḳhālī ho agar

lafz ho jaatā hai mohmal kaisā

teri tausif se KHali ho agar

lafz ho jata hai mohmal kaisa

ḳhatm jab ho ga.iiñ tamannā.eñ

ham na.e hausloñ ke saath jiye

KHatm jab ho gain tamannaen

hum nae hauslon ke sath jiye

ḳhatm jab ho ga.iiñ tamannā.eñ

ham na.e hausloñ ke saath jiye

KHatm jab ho gain tamannaen

hum nae hauslon ke sath jiye

gul bhī haiñ mujhe aziiz lekin

kāñToñ ke liye barahna-pā huuñ

gul bhi hain mujhe aziz lekin

kanTon ke liye barahna-pa hun

khaḌe haiñ dost bhī dushman bhī ab ye kyā kahiye

kidhar se phuul mile haiñ kidhar se sang mile

khaDe hain dost bhi dushman bhi ab ye kya kahiye

kidhar se phul mile hain kidhar se sang mile

rafāqatoñ ke tasalsul se jī na bhar jaa.e

judā.iyoñ kā bhī mausam kabhī kabhī rakhnā

rafaqaton ke tasalsul se ji na bhar jae

judaiyon ka bhi mausam kabhi kabhi rakhna

aaj hoñToñ pe yuuñ hañsī aa.ī

jis tarah koī sānehā guzre

aaj honTon pe yun hansi aai

jis tarah koi saneha guzre

tum na kaho tārīḳh kahegī ham haiñ kis me.aar ke log

patthar khaa.e phuul tarāshe rāhoñ ko hamvār kiyā

tum na kaho tariKH kahegi hum hain kis mear ke log

patthar khae phul tarashe rahon ko hamwar kiya

saaqī ko ye ḳhush-fahmī thī ham tak mauj na aa.egī

pyaas kā jab paimāna chhalkā Duub ga.e mai-ḳhāne tak

saqi ko ye KHush-fahmi thi hum tak mauj na aaegi

pyas ka jab paimana chhalka Dub gae mai-KHane tak

apnī maḳhmūr nigāhoñ ko na do izn-e-ḳhirām

baḌh ga.ī aur agar pyaas to phir kyā hogā

apni maKHmur nigahon ko na do izn-e-KHiram

baDh gai aur agar pyas to phir kya hoga

na ḳhizāñ meñ hai koī tīrgī na bahār meñ koī raushnī

ye nazar nazar ke charāġh haiñ kahīñ bujh ga.e kahīñ jal ga.e

na KHizan mein hai koi tirgi na bahaar mein koi raushni

ye nazar nazar ke charagh hain kahin bujh gae kahin jal gae

is ik adā-e-mohabbat pe zindagī sadqe

gurez ham se hai lekin supurdagī kī tarah

is ek ada-e-mohabbat pe zindagi sadqe

gurez hum se hai lekin supurdagi ki tarah

charāġhoñ kī safeñ suunī paḌī haiñ

hamāre baa'd mahfil meñ rahā kyā

charaghon ki safen suni paDi hain

hamare ba'd mahfil mein raha kya

yuuñ bhī guzre haiñ shab-o-roz ki ham

niiñd kī fikr meñ aksar jaage

yun bhi guzre hain shab-o-roz ki hum

nind ki fikr mein aksar jage

ek lamhe ko muskurā.e the

ek muddat se aañkh pur-nam hai

ek lamhe ko muskurae the

ek muddat se aankh pur-nam hai

saañs lene ko samajhte haiñ hayāt ai 'shā'ir'

log vāqif to hoñ jiine kī adā se pahle

sans lene ko samajhte hain hayat ai 'sha'ir'

log waqif to hon jine ki ada se pahle

unhīñ ke naam se mansūb hai bahār-e-chaman

jo log vāqif-e-ādāb-e-rañg-o-bū bhī nahīñ

unhin ke nam se mansub hai bahaar-e-chaman

jo log waqif-e-adab-e-rang-o-bu bhi nahin

sar jhukā.e hue ḳhāmosh huuñ yūsuf kī tarah

zindagī bech rahī hai sar-e-bāzār mujhe

sar jhukae hue KHamosh hun yusuf ki tarah

zindagi bech rahi hai sar-e-bazar mujhe

malāl-e-tark-e-ta.alluq na jaane kyā hotā

ḳhayāl-e-tark-e-ta'alluq se mar ga.e haiñ log

malal-e-tark-e-talluq na jaane kya hota

KHayal-e-tark-e-ta'alluq se mar gae hain log

qafas ko āshiyāñ kah deñ agar log

badal jā.egā maf.hūm-e-qafas kyā

qafas ko aashiyan kah den agar log

badal jaega mafhum-e-qafas kya

pyaar kī ek nazar de ke ḳharīdo ham ko

jins-e-nāyāb nahīñ vaqt ke bāzār meñ ham

pyar ki ek nazar de ke KHarido hum ko

jins-e-nayab nahin waqt ke bazar mein hum