مہکتے پھول ستارے دمکتا چاند دھنک

ترے جمال سے کتنوں نے استفادہ کیا

یہ بھی اعجاز مجھے عشق نے بخشا تھا کبھی

اس کی آواز سے میں دیپ جلا سکتا تھا

ہوا کے ہاتھ پہ چھالے ہیں آج تک موجود

مرے چراغ کی لو میں کمال ایسا تھا

میں تھا صدیوں کے سفر میں احمدؔ

اور صدیوں کا سفر تھا مجھ میں

عین ممکن ہے کہ بینائی مجھے دھوکہ دے

یہ جو شبنم ہے شرارہ بھی تو ہو سکتا ہے

یہ بھی تری شکست نہیں ہے تو اور کیا

جیسا تو چاہتا تھا میں ویسا نہیں بنا

کوئی حیرت ہے نہ اس بات کا رونا ہے ہمیں

خاک سے اٹھے ہیں سو خاک ہی ہونا ہے ہمیں

سکوت توڑنے کا اہتمام کرنا چاہیئے

کبھی کبھار خود سے بھی کلام کرنا چاہیئے

تمہاری جیت میں پنہاں ہے میری جیت کہیں

تمہارے سامنے ہر بار ہارتا ہوا میں

تو جو یہ جان ہتھیلی پہ لیے پھرتا ہے

تیرا کردار کہانی سے نکل سکتا ہے

کسی درویش کے حجرے سے ابھی آیا ہوں

سو ترے حکم کی تعمیل نہیں کرنی مجھے

وہ سر اٹھائے یہاں سے پلٹ گیا احمدؔ

میں سر جھکائے کھڑا ہوں سوال ایسا تھا

وہ زہر ہے فضاؤں میں کہ آدمی کی بات کیا

ہوا کا سانس لینا بھی محال کر دیا گیا

دشت میں وادئ شاداب کو چھو کر آیا

میں کھلی آنکھ حسیں خواب کو چھو کر آیا

کوئی تو دشت سمندر میں ڈھل گیا آخر

کسی کے ہجر میں رو رو کے بھر گیا تھا میں

میرے کشکول میں ڈال اور ذرا عجز کہ میں

اتنی خیرات سے آگے نہیں جانے والا

دل کسی بزم میں جاتے ہی مچلتا ہے خیالؔ

سو طبیعت کہیں بے زار نہیں بھی ہوتی

بس چند لمحے پیشتر وہ پاؤں دھو کے پلٹا ہے

اور نور کا سیلاب سا اس آب جو میں آ گیا

وہ دے رہا تھا طلب سے سوا سبھی کو خیالؔ

سو میں نے دامن دل اور کچھ کشادہ کیا

دشت و جنوں کا سلسلہ میرے لہو میں آ گیا

یہ کس جگہ پہ میں تمہاری جستجو میں آ گیا